Gihimo Alang sa Dakong Katuyoan

INGON sa gipadayag sa sinugdan, ang mga tawo dugay nang nakasud-ong sa kalangitan ug nahibulong, ‘Nganong ania kining tanan dinhi?’ Usa ka hawod kaayong musikero sa panahong dugay na kaayo kanhi mapabilhong miawit: “Ang mga langit nagpahayag sa himaya sa Diyos; ug ang hawan nagpadayag sa buhat sa iyang mga kamot.”—Salmo 19:1.

Ang atong matahom nga yuta makapatunghag samang reaksiyon. Pananglitan, human sa pagpanaw sa wanang, ang astronot nga si Charles M. Duke, Jr., miingon: “Ang yuta mao ang labing matahom nga talan-awon sa wanang, uban sa tanang kolor niini sa yuta, sa kadagatan, ug sa kapanganoran.” Siya midugang: “Ang pagtan-aw niini diha sa madulom nga kawanangan halos maoy usa ka relihiyoso nga kasinatian.”

Unsay imong reaksiyon inigtan-aw nimo sa usa ka hayag, punog-bituon nga kalangitan? O sa dihang magtan-aw ug usa ka talan-awon sa yuta nga maanindot kaayo ang kinaiyanhong katahom niini? Wala ba ikaw sukad mahibulong kon sa unsang paagi kini mitungha, o kon ngano?

Nagpadayag sa Iyang Katuyoan

Si Jehova nagpatugbaw ug pangutana sa tawong si Job: “Diin ka man sa pagtukod ko sa kalibotan?” (Job 38:4) Ang pangutana nagpaubos kang Job, kay siya, sa pagkatinuod, wala maglungtad niadtong panahona. Bisan pa niana, dugay na kaayo sa wala pa ang panahon ni Job, ang Diyos naglalang ug mga anak nga sama sa iyang dagway—espiritung mga persona, mga manulonda. (Salmo 104:4, 5) Busa nagpadayon sa iyang pagpangutana kang Job bahin sa kalibotan, ang Diyos nagsukna: “Kinsay nagpahiluna sa pamag-ang niana, sa dihang [ang mga manulonda] nagdungan sa masadyaong pagsinggit, ug ang tanang anak sa Diyos nagduyog sa pagsinggit sa kalipay?”—Job 38:6, 7.

Nganong dihay kalipay taliwala sa mga manulonda sa pagkatukod sa kalibotan? Tungod kay sila dayag nga nahibalo nga ang kalibotan maoy linain taliwala sa materyal nga mga kalalangan sa Diyos. Tingali ang Diyos naghatag pa sa mga manulonda ug usa ka pasiunang-pagtan-aw sa iyang mahimayaong katuyoan labot sa yuta. Sa ulahi, gipadayag ni Jehova sa mga tawo nga siya “wala magbuhat [sa kalibotan] alang sa walay kapuslanan, [kondili] nag-umol niini aron pagapuy-an,” oo, aron pagapuy-an ug pagapahimuslan sa mga tawo, bisan sa walay kataposan.—Isaias 45:18.

Human sa paglalang sa lalaki ug babaye, gipahibalo ni Jehova ang iyang katuyoan labot sa yuta sa dihang iyang gisugo ang unang magtiayon: “Sumanay ug dumaghan kamo ug pun-a ninyo ang yuta ug magagahom kamo niini, ug magbuot sa mga isda sa dagat ug sa mga langgam sa kalangitan ug sa matag buhing linalang nga naglihok sa yuta.” (Genesis 1:28) Ang Diyos naglalang sa tawhanong paris nga may kahibulongang mga gahom sa pagpanganak, ug ang iyang katuyoan mao nga ang tibuok yuta mapuno sa mga tawong hingpit nga magpabanaag sa maayong mga hiyas sa ilang Maglalalang.

Tinuod, ang mga tawo karon nagpuyo halos sa tanang dapit sa yuta, apan wala sila magpuyo niini sa paagi nga makahatag ug pasidungog sa ilang Maglalalang. Ang mga tawo anaa sa masakiton, himalatyong kahimtang, ug wala nila atimana sa hustong paagi ang yuta o ang mga linalang niini nga mga hayop. Si Jehova naglalang sa tawo nga hingpit, ug ang iyang katuyoan mao, sa pagdagan sa panahon, nga ang tibuok yuta mailalom sa paggahom sa matarong tawhanong pamilya nga ang tanan magkinabuhi nga walay kataposan sa usa ka yutan-ong paraiso.

Kita makasalig nga kining katuyoana matuman. Ngano? Tungod sa saad ni Jehova nga kon unsa ang iyang gimbut-an kini iyang “pagatumanon usab.” (Isaias 46:11; 55:11) Ang iyang Pulong nagpasalig: “Ang mga matarong magapanunod sa yuta, ug sila magapuyo niini sa walay kataposan.” (Salmo 37:29; Pinadayag 21:3, 4) Daghan ang nahinumdom nga ang Anak sa Diyos, si Jesu-Kristo, nagsaad sa naghinulsol nga mamumuhat ug daotan nga namatay tapad niya: “Ikaw mahiuban kanako sa Paraiso.” (Lucas 23:43) Sa unsang paagi kana mahitabo?

Kon sa Unsang Paagi Matuman ang Katuyoan sa Diyos

Sa dihang bug-os nang magmando si Kristo sa yuta, kadtong mamumuhat ug daotan pagabanhawon ngadto sa kinabuhi dinhi sa yuta ilalom sa dugay-nang giampo nga langitnong pagmando. (Salmo 72:1, 5-8; Mateo 6:9, 10; Juan 18:36, 37; Buhat 24:15) Apan, sa dili pa mahitabo ang pagpamanhaw sa mga patay, ang yuta pagahinloan sa tanang modumili sa pagsimba sa Diyos. Ang Bibliya nagsaad: “Ang Diyos sa langit magatukod ug usa ka gingharian nga dili gayod malumpag.” Ug kini midugang: “Kini magadugmok ug magaut-ot niining tanang gingharian, ug kini molungtad hangtod sa panahong walay katinoan.”—Daniel 2:44.

Sa pagkatinuod, ang maalamon-sa-tanan nga Maglalalang sa atong dakong uniberso makatuman sa iyang katuyoan nga kining yutaa pagapun-on sa mga tawo nga nagpabanaag sa iyang maayong mga hiyas! (Genesis 1:27) Aron ang mga tawo makabaton ug higayon sa pagkakat-on kon sa unsang paagi himoon kini sa Diyos, siya nagtagana ug usa ka libro nga mabasa sa mga tawo bisan asa.a Matikdi kon giunsa kini paghubit sa usa ka tawo sa Dayton, Ohio, T.B.A.:

“Dili ko gayod mahuman pagbasa kining basahona sa tibuok kong kinabuhi. Kini nagsugod sa pagkaadunay usa ka maanindot nga pinuy-anan nga gilaglag sa rebelyon. Misunod ang makapasubong mga hitabo, katalagman, kasub-anan, pagbuno, ug kamatayon. Sa magkadako ang mga pamilya, ang pagkabanlod ngadto sa kawalay-paglaom ug kangitngitan misamot. Milabay ang kasiglohan, mitungha ug napukan ang kanasoran, linibong mga tawo nangagi, tanang tawhanong pagbati gikan sa grabe, mabangis nga pagdumot ngadto sa gugmang nagpakasakit mahibalag. Ang paglaom, nga nagsugod nga usa ka diyutayng kidlap, mitubo ngadto sa bug-os nga pagsalig. Ang usa ka hingpit nga kagamhanan magtukod pag-usab sa maanindot nga pinuy-anan. Ang magmamando niana mao ang Hari, si Kristo Jesus. Ang kagamhanan, ang Gingharian sa Diyos. Ang pamilya, ang tawhanong banay. Ang basahon mao ang Bibliya!”

Ikaw among gidasig sa pagsusi niining labing hinungdanong basahon, ang Bibliya. Dugang pa, gidapit ka namo sa pagsusi sa mas detalyadong ebidensiya nga kini nga uniberso ug ang daghang bahin niini wala mitungha nga sulagma lamang. Imong makita ang usa ka matun-anong pagsusi niining butanga diha sa librong Is There a Creator Who Cares About You? Sa panid 32 niining magasina, imong mahibaloan kon sa unsang paagi makadawat ka ug usa ka kopya.

[Footnote]

[Hulagway sa panid 10]

“Ang labing matahom nga talan-awon sa wanang”

[Credit Line]

Letrato sa NASA