“Kinsay Nagbutang ug Kaalam Diha sa mga Lut-od sa Panganod”?
“SA DIHANG inyong makita ang usa ka panganod nga nagautbo sa kasadpang mga bahin, dihadiha kamo moingon, ‘Usa ka bagyo ang moabotay,’ ug kini mahitabo tuod. Ug sa dihang inyong makita nga mohuyop ang usa ka hangin gikan sa habagatan, kamo moingon, ‘Adunay mahitabong grabe nga kainit,’ ug kini mahitabo.” Kining mga pulonga ni Jesus, nga gisulat sa magsusulat sa Ebanghelyo nga si Lucas, maoy mga pananglitan sa mga pagpanagna sa klima ingon sa gibuhat sa karaang Palestina. (Lucas 12:54, 55) Diha sa pipila ka kahimtang, ang karaang mga tawo makabasa sa mga timailhan ug makahimog tukmang dili-magdugay nga mga pagpanagna.
Karong adlawa, ang mga meteorologo naggamit ug modernong kahimanan, sama sa nagalibot-sa-yuta nga mga satelayt, Doppler radar, ug gamhanang mga kompiyuter, sa pagsukod sa mga sumbanan sa klima sa taastaas nga mga yugto. Apan ang ilang mga pagpanagna sagad sayop. Ngano?
Daghang hinungdan ang nagpalisod sa paghimog tukmang pagpanagna sa klima. Pananglitan, ang wala-damhang mga kausaban sa temperatura, kaumogon, presyon sa hangin, ug gikusgon ug direksiyon sa hangin makapakomplikar sa mga butang. Dugang pa niini mao ang komplikadong panaglambigit sa adlaw, mga panganod, ug kadagatan, nga wala pa bug-os masabti sa mga siyentipiko. Tungod nianang katarongana, ang pagpanagna sa klima nagpabiling usa ka dili-tukmang siyensiya.
Ang limitadong kahibalo sa tawo may kalabotan sa klima nagpahinumdom kanato sa mga pangutanang gisukna ni Job: “Kinsay nagmugna sa mga yamog? Kang kansang tagoangkan naggikan ang yelo? . . . Makapatugbaw ka ba sa imong tingog ngadto sa panganod, aron nga ang mabug-at nga tapok sa tubig makalapaw kanimo? . . . Kinsay nagbutang ug kaalam diha sa mga lut-od sa panganod, o kinsay naghatag ug pagsabot sa katingalahan sa langit? Kinsay makaihap sa husto gayod sa mga panganod pinaagi sa kaalam, o ang mga tadyaw sa tubig sa langit—kinsay makayabo niana?”—Job 38:28-37.
Ang tubag niining tanang pangutanaha mao, Dili ang tawo kondili si Jehova nga Diyos. Oo, bisag unsa pa ka maalamon ang mga tawo, ang kaalam sa atong Maglalalang maoy hilabihan, hilabihan ka labaw. Pagkamahigugmaon gayod sa iyang bahin nga iyang gihimo ang iyang kaalam nga atong mabatonan diha sa mga panid sa Bibliya, aron magmalamposon kita sa atong dalan.—Proverbio 5:1, 2.