ZEBA

[Halad].

Usa ka hari sa Midian kinsa nakigbahin sa pagpanglupig sa Israel. Si Zeba ug Zalmuna lagmit mao ang mga magmamando sulod sa pito ka tuig nga ang Midian mihimog mga pagpanulong, ug ilang gidaot ang mga uma ug gihimong timawa ang Israel. (Huk 6:1-6) Sa wala hisgoting panahon gipatay usab nila ang mga membro sa panimalay ni Gideon.​—Huk 8:​18, 19.

Sa dihang gibuntog ni Gideon ang ilang 135,000 ka kasundalohan, si Zeba, si Zalmuna, ug ang 15,000 ka tawo nakaikyas bisan pag gigukod pag-ayo ug sila nakaabot sa Karkor, nga may igoigo nang gilay-on, apan didto sila napildi pag-usab ug sa kataposan nadakpan. Samtang gidala pagbalik ni Gideon si Zeba ug Zalmuna hangtod sa Sucot ingong napakaulawan nga mga binihag, sila gipahinumdoman sa ilang mapagawalong mga pulong (o lagmit sa ilang gipakitang tinamdan) nga gitipigan diha sa salmo: “Atong panag-iyahon ang puloy-anang mga dapit sa Diyos alang sa atong kaugalingon.” (Sal 83:​11, 12) Human moangkon nga sila mao ang nagpatay sa iyang mga igsoon, gipatay mismo ni Gideon ang duha ka hari sa Midian.​—Huk 8:4-21.