Kinsa ang Mahimong Higala sa Diyos?

IKAW mahimong higala sa Diyos. Duolan sa 4,000 ka tuig kanhi, ang tawong si Abraham mituo kang Jehova nga Diyos. Kini giisip niya ingon nga pagkamatarong, ug kadto nga patriarka sa ulahi gitawag “higala ni Jehova.” (Santiago 2:23) Busa kon ikaw dunay pagtuo kang Jehova, ikaw usab mahimong higala sa Diyos.

Ang mga higala hayan imbitahon sa usa ka pangaon ingong mga dinapit. Sa pagkamatuod, ang bahin sa ilado-kaayong ika-23 nga Salmo naghawas sa Diyos ingong usa ka matinagdanong tig-abiabi. Kini nag-ingon: “Ikaw [Jehova] nagaandam ug pagkaon sa atubangan ko tinambongan sa akong mga kaaway. . . . Ang akong kopa nagaawas.”​—Salmo 23:5.

Sa laing okasyon, ang samang salmista​—si Haring David sa karaang Israel​—nangutana: “O Jehova, kinsa man ang dinapit sa imong tabernakulo? Kinsa man ang magapuyo sa imong bukid nga balaan?” (Salmo 15:1) Sa mahulagwayon, kini nagkahulogan sa pagduol kang Jehova diha sa madawat nga pag-ampo ug pagsimba. Pagkadako nga pribilehiyo! Sa unsang paagi ang dili-hingpit nga mga tawo mahimong takos nga mga higala ug mga dinapit sa Diyos?

Ang ika-15 nga Salmo nagtubag niini nga pangutana. Kini naghisgot ug napulo ka espisipikong mga kinahanglanon alang niadtong nagatinguha nga mahimong mga higala ug mga dinapit sa Diyos. Atong tagdon kining mga kinahanglanona usa ug usa, sugod sa bersikulo 2.

“Siya nga nagalakaw sa matul-id ug nagabuhat sa pagkamatarong”

Ang anak ni Abraham midaghan sa hilabihan tungod kay si Abraham walay sala sa moral sa iyang paglakaw atubangan kang Jehova. (Genesis 17:1, 2) Ang “paglakaw” usahay nagkahulogang pagpadayon sa usa ka kurso sa kinabuhi. (Salmo 1:1; 3 Juan 3, 4) Alang sa mga higala ug mga dinapit sa Diyos, dili igo nga magpasakop sa usa ka relihiyon, malipay sa matahom nga mga edipisyo niini, ug makigbahin sa pormal nga mga kasaulogan. Dili tanan niadtong magaingon “Ginoo, Ginoo” o mopahayag nga sila nakaila sa Diyos ang makatagamtam sa mga panalangin sa iyang Gingharian. (Mateo 7:21-23; Tito 1:16) Ang mga higala ni Jehova ‘nagalakaw nga walay sayop’ diha sa iyang panan-aw ug ‘nagabuhat sa pagkamatarong’ sumala sa iyang mga sukdanan.​—Miqueas 6:8.

Kini wala magtugot sa tanang porma sa panglimbong, seksuwal nga imoralidad, ug kadunotan. Ang Diyos mismo nagsulti kanato ngano, nga nag-ingon: “Kinahanglan kamo magmabalaan, kay ako balaan man.” (1 Pedro 1:16) Ang imo bang relihiyon nagsunod sa hataas nga mga sukdanan sa Diyos, nagapalagpot sa mga tawong nagadumili sa pagsunod sa iyang mga kinahanglanon? Ikaw ba nagainsister sa matarong nga paggawi alang sa imong kaugalingon ug sa imong pamilya? Kon mao, imong pagakab-oton ang sunod nga kinahanglanon alang sa mga higala ug mga dinapit sa Diyos.

“Ug nagasulti sa kamatuoran diha sa iyang kasingkasing”

Kon gusto nato nga kita mahimong higala sa Diyos, kita dili mamakak o mogamit ug mga pulong sa pag-ulog-ulog uban sa dobli nga kasingkasing. (Salmo 12:2) Kita kinahanglan ‘mosulti sa kamatuoran diha sa kasingkasing,’ dili diha lamang sa atong mga ngabil. Oo, kita kinahanglan matinud-anon sa kinailadman ug mohatag pamatuod sa “pagtuo nga walay pagminaut.” (1 Timoteo 1:5) Ang ubang mga tawo mamakak o mosulti nga katunga-tinuod aron lang dili maulawan. Ang uban manglimbong sa eksamin sa tunghaan o palsipikahon ang mga bayranan sa buhis. Kining mga buhata nagapakitag kakulang sa gugma sa butang matuod. Apan ang buhat nga matinud-anon ug matarong nagagikan sa mismong mga kasingkasing sa mga higala sa Diyos. (Mateo 15:18-20) Sila dili mabudhion o malimbongon.​—Proverbio 3:32; 6:16-19.

Si apostol Pablo misulat: “Ayaw na kamo pagbinakakay ang usa ngadto sa usa. Hukasa ang inyong daang personalidad uban sa mga batasan niini, ug isul-ob ninyo ang bag-ong personalidad.” (Colosas 3:9, 10) Oo, kadtong nagasulti sa tinuod sa ilang kasingkasing nagsul-ob sa “bag-ong personalidad.” Ikaw ba bug-os matinud-anon sa imong kaugalingon ug sa uban, nagasulti sa kamatuoran diha sa imong kasingkasing? Kon mao, kana makaapekto sa imong isulti ngadto sa uban.

“Siya dili magbutang-butang uban sa iyang dila”

Aron makab-ot kini nga kinahanglanon alang sa mga dinapit sa Diyos, dili gayod kita mosultig daotan mahitungod sa uban. (Salmo 15:3) Ang Hebreohanong berbo nga gihubad “pagbutang-butang” gikuha gikan sa pulong “tiil” ug nagkahulogan “sa pagtamak niana” ug busa “sa paglakawlakaw.” Ang mga Israelinhon gisugo: “Dili ka magsuroysuroy sa paglibak taliwala sa imong katawhan. Dili ka magpanghimaraot batok sa dugo sa imong isigkatawo. Ako mao si Jehova.” (Levitico 19:16; 1 Timoteo 5:13) Kon atong butang-butangan ang usa ka tawo, kuhaan siya sa iyang maayong ngalan, kita dili mahimong mga higala sa Diyos.

Si David miingon: “Bisan kinsa nga magabutang-butang sa iyang isigkatawo sa tago, akong pahilomon siya.” (Salmo 101:5) Kita usab makapahilom sa mga tigbutang-butang kon kita dili mamati kanila. Ug ang maayong lagda mao ang dili pagsultig bisan unsa bahin sa usa ka tawo sa iyang likod nga dili kita makaako sa pagsulti sa iyang atubangan. Maayo kon atong kontrolahon sa ingon ang atong dila. Apan, pagkahinungdanon nga atong kontrolahon usab ang atong mga lihok!

“Sa iyang mga higala siya wala maghimog daotan”

Hinungdanon dinhi mao ang mga pulong ni Jesus: “Busa, ang tanang bu

tang nga imong gustong buhaton sa mga tawo diha kanimo, mao usay buhata diha kanila.” (Mateo 7:12) Aron makatagamtam sa pag-uyon sa Diyos, kinahanglan magpugong kita sa pagbuhat ug daotan. Ang salmista nag-ingon: “Oh kamo nga nahigugma kang Jehova, dumti ninyo ang daotan. Siya nagabantay sa mga kalag sa iyang mga balaan; siya nagaluwas kanila gikan sa kamot sa mga daotan.” (Salmo 97:10) Busa kon gusto nato nga mahimong higala ug tabang sa Diyos, kinahanglan atong dawaton ang iyang mga sukdanan.

Ang paglikay sa daotan nag-apil sa dili pagtikas kang bisan kinsa diha sa mga kasabotan sa negosyo o sa ubang mga paagi. Sa pulong ug sa buhat, dili gayod nato daoton ang atong kauban, apan, magahimo kita ug maayong mga butang alang kaniya. Kini nagatandog sa tanang bahin sa kinabuhi. Pananglitan, kon magmaneho, kita sa matinahuron mohunong sa paghatag sa mga lumalabay sa katungod sa pagtabok sa dalan. Kita makatabang sa mga tigulang, makadasig sa mga nawad-an sa paglaom, makalipay sa nagmasulob-on. Niining bahina, si Jehova naghatag pangunang panig-ingnan. Sama sa gipamulong ni Jesus, ang Diyos “nagapasubang sa iyang adlaw ibabaw sa mga tawong daotan ug ibabaw sa mga tawong maayo ug nagpadalag mga ulan ngadto sa mga matarong ug sa mga dili-matarong.” (Mateo 5:43-48) Sama sa pagbuhat ug maayo ngadto sa uban mao ang pagtuman nianang sunod nga gihisgotan sa salmista.

“Ug wala magpasipala batok sa iyang suod nga higala”

Kitang tanan makahimo ug mga sayop, ug pagkadako sa atong pasalamat kon ang suod nga mga higala mopili sa pagpalabay niining gagmay nga mga kalapasan! Kita masubo kon isugid sa suod nga higala ang atong gamay apan makauulaw nga kahuyangan ngadto sa uban. Buhaton kini sa ubang mga tawo aron sa pagkuha sa pagtagad gikan sa iyang kaugalingong mga kasaypanan o sa paghimo sa ilang kaugalingon nga labaw nga tan-awon sa uban. Apan kining mga buhata dili takos niadtong nagatinguha nga mahimong mga higala sa Diyos.

“Kadtong nagatabon sa usa ka kalapasan nagapangita ug gugma, apan kadtong magabutyag sa usa ka butang magapabulag sa labing suod nga mga higala,” nag-ingon ang Proverbio 17:9. Siyempre, dili nato tagoon ang seryosong kalapasan. (Levitico 5:1; Proverbio 28:13) Apan kon gusto kita nga mahimong mga higala sa Diyos, dili nato ‘dawaton,’ o sagopon ingong tinuod, ang dulumtanang mga sugilanon mahitungod sa matarong nga mga higala. (1 Timoteo 5:19) Ang mga higala ni Jehova nagasultig maayo sa mga alagad sa Diyos inay ipakaylap ang mga sugilanon mahitungod kanila, dugangan ang butang nga ila nang nadunggan gikan sa daotan nga mga pagsaway sa mga tawong dili-diyosnon. Ang mga higala ug mga dinapit sa Diyos nagabantay usab sa ilang mga kaubanan, kay si David midugang diha sa bersikulo 4.

“Diha sa iyang mga mata ang bisan kinsa nga talamayon ginasalikway”

Nagapangitag hakog nga mga kaayohan, ang ubang mga tawo gustong makig-uban sa sapian o sa iladong mga tawo bisan pa sila daotan. (Itandi ang Judas 16.) Apan dili kita mahimong mga higala ni Jehova kon kita makig-uban sa daotan. Kinahanglan atong dumtan gayod ang daotan nga dili kita gustong makig-uban sa mga tawong nagabuhat niana. (Roma 12:9) Hilabihan kaayo ka daotan ang hari sa Israel nga si Jehoram nga tungod niana gisultihan siya ni propetang Eliseo: “Ingon nga si Jehova sa mga panon buhi, sa kang kinsang atubangan ako nagatindog, kon wala pa ako magatahod sa paghianhi ni Jehosphat ang hari sa Juda, ako dili moatubang kanimo o makigkita nimo.” (2 Hari 3:14) Aron mahimong mga higala sa Diyos, kinahanglan atong sundon ang pasidaan ni Pablo: “Ang daotang mga kauban makadaot sa maayong pamatasan.”​—1 Corinto 15:33.

Nan, kon atong gimahal ang pagkahigala ni Jehova, dili kita makig-uban sa mga daotan. Kita mohimo lamang sa gikinahanglan nga pakiglabot kanila. Pilion nato ang atong mga higala alang sa ilang maayong relasyon uban sa Diyos, dili sa ilang baroganan sa kalibotan. Kita mopili ug mga higala sa maalamong paagi kon kita dunay masimbahong kahadlok sa Diyos. Niining paagiha, matikdi ang ikapitong kinahanglanon nga kab-oton sa mga dinapit ni Jehova.

“Apan ginatahod niya ang mga tawong nahadlok kang Jehova”

Aron mahimong mga higala ug dinapit sa Diyos, kinahanglan mahadlok kita kaniya. Ang Proverbio 1:7 nag-ingon: “Ang pagkahadlok kang Jehova mao ang sinugdanan sa kahibalo.” Unsa ang “kahadlok kang Jehova”? Kini mao ang masimbahong kataha sa Diyos ug usa ka maayong kahadlok nga dili-makapahimuot kaniya. Kini mosangpot sa matuod nga kahibalo, makaluwas ug kinabuhi nga disiplina, ug langitnong kaalam nga maoy usa ka segurado nga giya.

Kadtong nahadlok kang Jehova nagapabilin sa iyang matarong nga mga sukdanan bisan kon mosangpot kini ug pagbiaybiay. Pananglitan, daghan ang motamay kon kadtong nahadlok kang Jehova kugihang motrabaho, matinud-anon sa trabaho, o naningkamot sa pagtabang sa uban sa espirituwal. Apan sa unsang paagi ginalantaw sa tawong diyosnon ang mga tawong matarong? ‘Siya nagatahod niadtong may kahadlok kang Jehova,’ lantawon sila nga may hataas nga pagtamod, bisan kon kini nagkahulogan sa pag-antos sa pasipala uban kanila. Ikaw ba duna niini nga pagtahod sa mga tawo nga nahadlok sa Diyos? Sa pagkutlo ug laing kinahanglanon alang sa balaan nga pag-uyon, ang salmista midugang:

“Siya nga nagapanumpa batok sa iyang kaugalingon, ug siya dili magausab”

Ang prinsipyo dinhi mao ang pagtuman sa atong mga saad, sama sa Diyos. (1 Hari 8:56; 2 Corinto 1:20) Bisan kon atong mahibaloan sa ulahi nga malisod ang pagbuhat sa atong gisaad, dili nato usbon ang atong hunahuna ug dili motuman sa atong gisaad. Dinhi ang Greek Septuagint, Syriac Peshitta, ug Latin Vulgate nga mga teksto nag-ingon, “nanumpa sa iyang silingan.” Kon kita manumpa sa pagbuhat ug usa ka butang o mohimog tukmang panaad, kinahanglang tumanon nato kana. (Ecclesiastes 5:4) Siyempre, kon kita mahibalo nga ang usa ka butang nga atong gisaad dili-kasulatanhon, dili nato kana buhaton.

Wala bungkaga ni Josue ang pakigsaad uban sa mga Gibeonita bisan pa nga sa ulahi iyang nahibaloan nga ilang gilimbongan siya sa pagpanaad. (Josue 9:16-19) Busa kita kinahanglang mga lalaki, mga babaye, ug mga batan-on nga nagatuman sa atong pulong. Dili kita manaad ngadto sa uban ug unya pasagdan kini kon dunay madanihong mga higayon nga bukas kanato. Si Jesus miingon: “Himoa ang inyong Oo nga Oo, ang inyong Dili, Dili.” (Mateo 5:37) Ilabinang determinado kadtong nagpahinungod kang Jehova sa pagtuman sa ilang saad sa pag-alagad kaniya sa walay kataposan ingong iyang mga Saksi. Gawas pa sa paghimog mga saad, kinahanglan may konsiderasyon kita sa pinansiyal nga mga butang, sama sa gipakita ni David diha sa ika-15 nga Salmo, bersikulo 5.

“Siya wala magapahulam sa iyang salapi aron patuboan”

Ang salapi nga hulamon alang sa katuyoan sa negosyo angay bayran nga may tubo. Apan dinhi ang gipasabot ni David mao ang ‘paghulam sa salapi’ ngadto sa kabus. Ang Mosaiko nga balaod nag-ingon: “Kon magpahulam ka ug salapi sa bisan kinsa sa atong katawhan, sa kabus nga anaa uban kaninyo, dili ka makigsama sa magpapautang kaniya. Dili mo siya patuboan.” (Exodo 22:25; Levitico 25:35, 36) Sa dihang nakita ni Nehemias ang kabus nga nag-antos ingong mga biktima sa mga nagpatubo, iyang gipahunong ang maong pagpamentaha.​—Nehemias 5:1-13.

Alang sa “tubo,” gigamit ni David ang Hebreohanong pulong nga gikuha gikan sa laing pulong nga nagkahulogang “pagpaak.” Kini nagsugyot nga ang hakog nga mga tigpatubo naglamoy sa kabus ug sa gamay nga ilang nabatonan. Sa matin-aw, mas maayo ang pagtabang sa kabus nga dili maglaom ug bisan unsang balos. Mihimo si Jesus ug punto pinaagi sa pag-ingon: “Sa magadalit ikaw ug kombira o panihapon, . . . dapita ang mga kabus, ang mga pungkol, ang mga piang, ang mga buta; ug ikaw magmalipayon, tungod kay sila dili man makabalos kanimo. Ikaw pagabalosan ra unya sa pagpamanhaw sa mga matarong.” (Lucas 14:12-14) Ang tawo nga gustong mahimong higala sa Diyos ug dinapit dili gayod magpahimulos sa kakabus sa iyang silingan ug sundon ang padayon nga gihisgotan sa salmista.

“Ug siya wala magdawat ug hiphip batok sa inosente

Ang hiphip dunay makadunot nga impluwensiya. Ang mga Israelinhon gisugo: “Dili ka . . . magdawat ug hiphip, kay ang hiphip nagabuta sa mga mata sa maalamon ug nagatuis sa mga pulong sa mga matarong.” (Deuteronomio 16:19) Ilabinang daotan ang pagdawat ug hiphip sa pagdaot sa usa ka “inosente,” tingali pinaagi sa pag-usab sa testimoniya sa hukmanan. Pagkatalamayon ni Judas Iscariote sa pagdawat sa hiphip sa pagbudhi sa walay-sala nga Jesus!​—Mateo 26:14-16.

Tingali atong isipon ang atong kaugalingon nga kita walay sala niining bahina. Apan natintal ba kita sa paghiphip aron makagawas sa usa ka makauulaw nga kahimtang? Ang propetang Samuel wala gayod modawat ug “salapi nga pahilom,” o hiphip. (1 Samuel 12:3, 4) Kitang tanan kinahanglan managgawi nianang paagiha kon kita gustong mahimong mga higala ug mga dinapit sa Diyos.

“Siya nga nagabuhat niining mga butanga dili gayod matarog”

Human sa napulo ka besis nga paghubit sa usa ka tawong matarong, gitapos sa ika-15 nga Salmo pinaagi sa nag-una nga mga pulong. Kini nagpahimo kanato sa pag-analisar sa atong relihiyon. Kon kini mao ang matuod nga pagtuo, kini angay motudlo kanato sa (1) paglakaw sa matul-id ug sa pagbuhat sa pagkamatarong, (2) sa pagsulti sa kamatuoran diha sa kasingkasing, (3) sa dili pagbutang-butang sa uban, ug (4) sa paglikay sa paghimog daotan. Ang relihiyon nga madawat sa Diyos (5) dili mopasipala batok sa matarong nga mga higala ug (6) mopalikay kanato sa pag-uban sa mga tawong talamayon. Ang matuod nga pagtuo mopalihok kanato sa (7) pagtahod sa mga tawo nga nahadlok kang Jehova, (8) sa pagtuman sa atong gisaad nga buhaton kon kini matarong, (9) sa pagpahulam sa kabus nga walay tubo, ug (10) sa dili pagdawat ug hiphip batok sa usa ka tawong inosente.

Si David wala mag-ingon nga ang bisan kinsa nga nagabasa, nagasulti, o nagatuo niining mga butanga “dili matarog.” Kini maeksperyensiyahan lamang sa mga tawo nga “nagabuhat niining mga butanga.” Ang pagtuo nga walay binuhatan nga mopaluyo niini patay ug dili mobunga sa balaan nga pag-uyon. (Santiago 2:26) Ang mobuhat ug maayong mga butang nga gihisgotan sa ika-15 nga Salmo dili matarog, kay si Jehova magapanalipod ug magalaban kanila.​—Salmo 55:22.

Siyempre, adunay labaw pa ang putli nga pagsimba kay sa napulo ka punto nga gihisgotan sa ika-15 nga Salmo. Ang mga sumusunod ni Jesus sa ulahi nakakat-on sa ubang mga butang mahitungod sa pagsimba sa Diyos “uban sa espiritu ug sa kamatuoran.” (Juan 4:23, 24) Ikaw makahimo usab, kay ang mga tawo nga nagabuhat niining mga butanga naglungtad karong adlawa. Ang regular nga pagpakig-uban sa mga Saksi ni Jehova ug ang pagtuon sa Bibliya makatukod ug paglaom sa kinabuhi diha sa yutan-ong paraiso nga diin ikaw mahimong dinapit ug higala sa Diyos sa walay kataposan.