‘Gawas kon si Jehova ang Magatukod sa Balay. . .’

BISAN diin ka magpuyo, adunay usa ka dapit nga, alang kanimo, mao ang balay. Nagkalainlain kaayo ang mga estilo sa mga balay ug mga paagi sa pagtukod. Mga payag nga binuhat sa lapok ug amakan, mga balay nga binuhat sa tibuok nga mga troso, prefabricated nga mga kongkretong balay​—ang listahan daw dili matapos. Ang pipila mobati nga relaks sa usa ka payag nga kogon sama sa uban diha sa mas dagkong mga balay. Ngano man kini?

Ang pagbati sa kahayahay, pagkakontento, nagaagad ug dako sa imong mga kauban. (Proverbio 18:24) Bisan pa sa tanang kasidlak ug kamadanihon nga ginatanyag sa kalibotan, kinaiyanhong ang panimalay mao ang dangpan sa usa alang sa kalinaw ug kahupayan. Bisan pa niana, sa paghukom pinaagi sa mga taho mahitungod sa pamilyahanong kinabuhi karong adlawa, walay garantiya nga ang usa kanunay makakaplag ug kalinaw ug kahupayan sa panimalay. Sa dakong gilapdon, kadtong nagapuyo ipon kanimo​—ang imong pamilya​—makaambit kaha sa imong kalinaw o makadaot niana. Nan, unsa ang sekreto sa pagtukod sa usa ka malipayon, malinawon nga panimalay?

Pagtukod sa Balay

“Gawas kon si Jehova mao mismo ang magatukod sa balay, walay kapuslanan nga ang mga magtutukod naghago sa pagbuhat niana,” matud sa unang bersikulo sa Salmo 127. Kadtong nagaapil sa pagtukod sa mga balay alang sa pagsimba sa matuod nga Diyos, si Jehova, nakakaplag nga kini tinuod. Bisan pag ang may-kahanas nga mga trabahante nagaboluntaryo sa ilang panahon ug kahago alang sa madali nga pagpatindog sa nindot nga mga Kingdom Hall, ang panalangin ni Jehova maoy nagapasalig sa kalamposan. Bisan ang mga tumatan-aw kasagaran makakita nga nagalihok ang butang talagsaon kaayo. Pananglitan, ang usa ka magasin nga nagtaho bahin sa usa sa maong proyekto sa Colchester, Inglaterra, migamit sa ulohang “Si Jehova Nagpataas sa Atop.”

Bisan pa niana, ang kalamposan sa mga buluhaton nga lahi sa literal nga mga proyekto sa pagpanukod nagadepende usab sa panalangin ni Jehova. Palandonga ang mga pulong ni Solomon diha sa ikatulong bersikulo sa Salmo 127: “Tan-awa! Ang mga anak maoy panulondon gikan kang Jehova; ang mga bunga sa tiyan maoy usa ka ganti.” Si Jehova maoy usa ka Magtutukod usab nga labing hawod kon bahin sa mga pamilya, ug ang mga ginikanan nagbaton sa talagsaong pribilehiyo sa pagkahimong iyang masigkamagbubuhat, o mga isigkamamumuo.a (Hebreohanon 11:10) Sa unsang paagi ang Kristohanong mga ginikanan makapahimulos niining bulahang panagkonsabo ug malamposong makatukod ug malipayon, malinawong pamilya, usa nga magpasidungog sa Maglalalang, si Jehova nga Diyos?

Malamposong Pagtukod ug Pamilya

Ang usa ka kinahanglanong elemento sa malamposong pagtukod mao ang maayong arkitektural nga plano, o blueprint. Alang sa pagtukod ug batan-ong mga magdadayeg sa Diyos, walay mas maayong blueprint kay sa iyang inspiradong Pulong, ang Bibliya. (2 Timoteo 3:16, 17) “Bansaya ang usa ka batang lalaki sumala sa dalan alang kaniya; bisan pag siya matigulang siya dili mobiya niana,” misulat si Solomon. (Proverbio 22:6) “Ang dalan alang kaniya” mao ang dalan ni Jehova, ug kon sundon kana sa mga ginikanan, ginatanyag nila sa ilang mga kabataan ang kalaoman nga modagko nga matinumanong mga alagad sa Diyos.

Ang usa ka maayong tinukod nagakinahanglag maayong galamiton sa pagtukod. Usa ka Aprikanong bisita sa Uropa dili makatuo nga ang pipila sa mga tinukod nga iyang nakita maoy ginatos ka tuig sa edad. Usa ka pagpadayag alang kaniya ang pagkakita sa lig-ong materyales nga gigamit sa maong mga tinukod. Sa laing bahin, kon ang mga magtutukod magdaginot sa materyales, ang sangpotanan kadaghanan makadaot, nga makapatay pa. Kini matuod usab sa pagmatutog mga anak.

Sa pagsamkon, madawat sa mga bata ang genetikanhong panulondon nga gitiman-an sa pagkadili-hingpit tungod sa sala. (Salmo 51:5) Sa laing mga pulong, sila may depekto sukad sa sinugdan. Ang Kristohanong mga ginikanan kinahanglang magpukgo niini pinaagi sa pagsingkamot sa pagtukod sa malungtaron, diyosnong mga hiyas nganha sa ilang mga anak. (1 Corinto 3:10-15) Gawas kon kini himoon, bisan pag unsaon sa pagsingkamot sa mga ginikanan sa ubang mga bahin, sama sa pagtagana sa ilang mga anak lalaki ug babaye sa labing maayong pagkaon, panapot, ug balay, ang ilang paningkamot sa pagtukod mawalay kapuslanan.

Kana ang hinungdan ang balaang tambag ngadto sa mga ginikanan, ilabina ang mga amahan, mao: “Ipadayon ang pagmatuto kanila [mga anak] sa disiplina ug pagdumala sa kaisipan ni Jehova.” (Efeso 6:4) Ang disiplina ug pagdumala sa kaisipan ni Jehova nagalangkit sa labing maayong mga plano ug materyales sa pagtukod. Ang paggamit kanila mosangpot sa walay-kataposang mga kaayohan alang sa tibuok pamilya.

Pagbansay Diha sa Trabahoan

Bisan pa sa maayong-pagkahikay nga mga plano, anaa kanunay ang wala-dahoma nga mga krisis sa lakaw sa pagtukod. Sa samang paagi, ang mga ginikanan kinahanglang magtuon sa pagdahom sa wala-dahomang mga suliran sa adlaw-adlaw nga kinabuhi sa mga membro sa pamilya ug maandam sa pagsagubang kanila. Sa unsang paagi mahimo kini?

Ang maayong komunikasyon tali sa duha ka ginikanan hinungdanon. Sa dihang ang amahan ug inahan mainampoong magahisgot sa pag-uswag sa mga bata, sila makakitag mga bahin diin nahiangay ang pagdayeg ug ubang bahin diin gikinahanglan ang dugang “pagtukod.” Sa dihang ang maong mga kahuyangan mailhan, ang mga ginikanan magkahiusa sa paglihok ug makahimog mga lakang sa pagsagubang kanila.

Apan tingali ikaw may dakong pamilya, ug basin ikaw mahibulong: ‘Sa unsang paagi ikapahiangay namo ang among paningkamot ngadto sa indibiduwal nga mga panginahanglan sa among daghang mga anak?’ Nganong dili ihatag ang pagbansay diha sa trabahoan aron ang inyong mga anak makatabang sa usag usa? Ang mga aprentis nagasilbi sa mga tuig sa pagkat-on ug mga kahanas tapad sa batid nga mga magbubuhat. Tingali sa inyong pagtuon sa pamilya, makasulay ka sa pagsukna sa inyong tin-edyer nga mga anak sa pagpatin-aw sa pila ka butang ngadto sa mga manghod. Ang kamatinud-anon, pagpilig mga higala, pagsukol sa daotang mga impluwensiya sa tunghaan, ug uban pa, maoy mga topiko nga ikaasoy pag-ayo sa mga magulang ug mas bata pang kabataan. Pinaagi sa pagtudlo sa maong mga tinuod-kinabuhing mga proyekto nganha sa mga magulang, makatabang ka sa pagbansay kanila nga maugmad ang mga gahom sa pag-ila ug katakos sa pagtudlo samtang nagatudlo sa mga bata pa sa butang kinahanglang ilang makat-onan. (Hebreohanon 5:14) Kini may dugang kaayohan sa pag-ugmad sa tinuod nga panagsandurot taliwala sa mga managsoon.

Tingali gamay ang inyong pamilya, nga usa rag anak. Nan, ikaw daghag kahigayonan nga mailhan ug masabtan ang inyong anak. Bisan pa niana, pagbantay sa kapeligrohan nga patumanan ang inyong anak pinaagi sa paghimo niyang sentro kaayo sa pagtagad. Kamo tulo, dili ba? Busa pagbuhat nga magkauban. Kini magtudlo kaniya nga makigkomunikar sa uban ug magliso sa iyang pagtagad sa gawas, sa ingon malikayan nga siya mahimong mahunahunaon-sa-kaugalingon.

Himoang Tumong ang Pamilyahanong Panaghiusa

Hinuon, adunay labaw pa sa pagtukod sa usa ka pamilya kay sa pagdumalag pagtuon sa Bibliya ug paghatag tambag ug disiplina. Si Solomon miingon: “Uban sa tawo walay butang labi pang maayo kay siya magakaon ug magainom ug nga ang iyang kalag makakita sa pagkamaayo tungod sa iyang pagkugi sa pagbuhat.” (Ecclesiastes 2:24) Pihong ang imong pamilya lamian sa pagkaon niini kon kini laming pagkaluto. Ginahikay ba ninyo nga mangaon nga magkauban ingong pamilya? Basin kini dili posible kanunay kon ang lainlaing sakop sa pamilya wala diha kay tua sa trabaho, sa tunghaan, o sa ubang buluhaton. Hinuon, kasagarang adunay labing menos usa ka pangaon sa usa ka adlaw nga kamo makakaon nga tingob ingong pamilya. Unsay makaamot sa maayong atmospera diha sa lamesang kan-anan sa pamilya?

Usa ka igsoon nagagamit sa okasyon sa pagpatunghag pangutana sa Bibliya aron hisgotan sa tanang presente. Hinuon, likayan niya ang pagpakaulaw niadtong wala mahibalo sa tubag. Ang uban nagasugid sa mga kasinatian sa pagsangyaw. Pinaagi sa pagpamati sa espirituwal nga mga butang, ang mga panahon sa pagpangaon mahimong mga okasyon sa paglig-on sa tibuok nga pamilya. (Tan-awa ang Roma 14:19.) Tinuod, sa pila ka bahin sa kalibotan, dili batasan ang pag-estoryahay ug daghan panahon sa pangaon. Bisan pa niana, ang tinuyong paningkamot sa paghupot ug malipayong atmospera hinungdanon. Ang Proverbio 15:17 nagaingon: “Labi pang maayo ang pagkaon nga utanon diin adunay gugma kay sa pinatambok nga baka ug ang pagdumot kauban niana.”

Ang paglulinghayaw ug kausaban sa paso dunay ilang dapit sa Kristohanong pamilyahanong kinabuhi. Ang maalamong mga ginikanan nagagamit nianang mga okasyona sa pagtukod sa usa ka lig-ong teokratikanhong pamilya. Sa unsang paagi?

Bisan tuod sayon nga pasagdan ang mga batan-on ug ipasunod ang ilang intereses, may kapeligrohan niini. Pananglitan, pagkadili maalamon nga tugotan ang mga batan-on nga malangkit kaayo sa mga dula nga mameligro ang kinabuhi o ang mga bukton o tiil! (1 Timoteo 4:8) Sa gidak-on nga posible, pilia ang mga kalihokan nga magalangkit sa tanang membro sa pamilya. Ang amahan makapangayo sa ilang mga opinyon ug mga ideya ug makahatag sa asaynment sa matag usa nga andamon.

Kamo ba ingong pamilya makapadako sa inyong gugma ug makadapit sa ubang membro sa kongregasyon aron makaambit sa mga kalipay sa inyong pamilya? Ang gulanggulang nga mga sakop sa kongregasyon kasagaran gustong makaambit sa pamilyahanong espiritu, ilabina kon wala diha ang ilang mga pamilya mismo o wala magkinabuhi sumala sa Kristohanong mga prinsipyo. (Santiago 1:27) Sa daghang kongregasyon, adunay nag-inusarang-ginikanan nga mga pamilya. Uban ang nahiangayng konsiderasyon sa teokratikanhong pagkaulo ug pagtahod sa pagkaangay, ang mga ansiano ug ang uban makatanyag ug espirituwal nga silonganan sa mga membro sa maong mga pamilya. (Isaias 32:1) Daghang “ilo nga batang lalaki” ang milambo ngadto sa timbang nga ulo sa pamilya ingong sangpotanan sa mahigugmaong interes nga gipakita sa usa ka hamtong Kristohanong tawo.​—Salmo 82:3.

Ang pagtukod sa Kristohanong panimalay maoy lisod nga buluhaton. Apan uban sa tabang ni Jehova, mapabilhan gayod nimo nga “ang mga anak maoy panulondon gikan kang Jehova; ang mga bunga sa tiyan maoy usa ka ganti.” (Salmo 127:1, 3) Sila mahimong tinubdan sa pagdayeg dili lamang sa Kristohanong mga ginikanan kondili ngadto usab sa ilang Maglalalang, si Jehova nga Diyos.

[Mga Footnote]