Kinabuhi—Usa ka Gasa Gikan sa Diyos
KAWHAAN-UG-UPAT ka oras sa usa ka adlaw, ang atong kasingkasing mobomba ug bililhong dugo sa katibuk-an sa atong lawas. Matulog kita, ug mopadayon sa pagbukad ug pagkuyos ang atong mga baga. Mokaon kita, ug sa awtomatiko mahilis ang pagkaon. Kini nga tanan mahitabo sa matag adlaw, uban sa gamay o walay tinuyo nga paghago sa atong bahin. Kining misteryoso ug katingalahan nga mga paagi, nga wala kaayo baleha, maoy bahin sa gasa nga gitawag nato nga kinabuhi. Sa usa ka diwa kini usa ka gasa nga matawag milagroso.
Palandonga ang paagi sa pagsamkon ug pagpanganak ug tawo. Bisag sa kasagaran isalikway sa lawas ang langyawng tisyu, mohimog eksepsiyon ang tagoangkan alang sa pertilisadong binhi sa babaye. Inay isalikway ang nagtubong binhi ingon nga langyawng tisyu, pakan-on ug panalipdan kini hangtod andam na kining mogula ingon nga masuso. Kon walay katakos ang tagoangkan sa paghimo ning importanteng eksepsiyon sa lagda nga ang langyawng tisyu isalikway, imposible ang tawhanong pagpanganak.
Bisan pa niana, ang kinabuhi alang sa bag-ong gipanganak nga bata mapamubo kon dili pa tungod sa pagtubo nga mahitabo sa tagoangkan sa dihang upat pa ka bulan ang bata sa tiyan. Nianang panahona mosugod kini sa pagtamoytamoy sa iyang kumagko, nga magbansay sa kaunoran nga sa ulahi magpatakos niini sa pagtutoy sa mga suso sa iyang inahan. Ug kini usa ra sa daghang kinabuhi-ug-kamatayon nga mga butang nga dugay nang natino una mahimugso ang bata.
Samtang ang bata anaa pa sa tagoangkan, adunay bangag ang bungbong sa iyang kasingkasing. Hinuon, kini nga bangag sa awtomatiko motak-op sa pagpanganak. Dugang pa, ang usa ka dakong ugat nga mosaylo sa mga baga samtang ang bata anaa pa sa tagoangkan sa awtomatiko mokuyos sa pagkatawo; ang dugo nianang panahona mopaingon sa mga baga, diin tagan-an kinig oksiheno samtang ang bata mosugod sa pagginhawa.
Kining tanan sinugdanan lamang. Sa tibuok kinabuhi, ang serye sa mga sistema nga labing maayo nga pagkadesinyo (sama sa mga sistema sa gininhawa, sirkulasyon, nerbiyos, ug endocrine) mohimo ug mopahiusa sa ilang mga obra uban sa kahanas nga makapalibog sa salabotan sa tawo—ang tanan alang sa pagpatunhay sa kinabuhi. Dili katingad-an nga usa ka karaang manunulat miingon nga gitumong sa Diyos: “Pagadayegon ko ikaw tungod kay sa makalilisang nga paagi ako kahibulongan nga pagkabuhat. Ang imong mga buhat kahibulongan, ingon nga nasayran pag-ayo sa akong kalag.”—Salmo 139:14.
Tin-aw, ang manunulat nianang nindot nga mga pulong wala magtuo nga ang kinabuhi sa yano produkto sa binuta, ebolusyonaryong sulagma o aksidente. Kon kana tinuod, wala kitay tinuod nga mga obligasyon o mga tulubagon kon sa unsang paagi angay natong gamiton ang atong mga kinabuhi. Ugaling lamang, ang desinyo sa tin-aw gibanaag diha sa mga mekanismo sa kinabuhi, ug ang desinyo nagkahulogan nga may tigdesinyo. Ang Bibliya nagpahayag niining prinsipyoha: “Hinuon, ang matag balay may nagtukod, apan ang nagtukod sa tanan nga butang mao ang Diyos.” (Hebreohanon 3:4) Busa hinungdanon nga “mahibaloan nga si Jehova mao ang Diyos. Siya mao ang nagbuhat kanato, ug dili kita sa atong kaugalingon.” (Salmo 100:3) Oo, ang kinabuhi labaw pa kay sa maayong aksidente; kini usa ka gasa gikan sa Diyos mismo.—Salmo 36:9.
Kay kana ang kahimtang, unsay atong mga obligasyon ngadto sa Maghahatag ug kinabuhi? Unsa ang gidahom niya nga paagi sa atong paggamit sa atong mga kinabuhi? Kini sila ug langkit nga mga pangutana pagahisgotan sa sunod nga artikulo.