Ang Hunahuna sa Bibliya

Angay Bang Dumtan sa mga Kristohanon ang mga Homoseksuwal?

NIADTONG 1969 namugna ang usa ka pulong sa pinulongang Ingles nga nagbatbat sa di-makataronganong kahadlok o pag-ayad sa mga homoseksuwal. Ang pulong maoy “homophobia.” Daghang pinulongan walay sama ka tinong pulong, apan sa kaliboang katuigan, ang katawhan sa daghang nasod ug mga pinulongan nagpadayag ug pagkadisgusto sa mga homoseksuwal.

Hinuon, sa di pa dugayng panahon ang homoseksuwalidad kaylap nga gipasiugda ingong usa lang ka mapiling matang sa seksuwal nga pagpahayag. Ang historyanong si Jerry Z. Muller karong bag-o misulat mahitungod sa “nag-usbawng awhag alang sa publikong pag-ila ug pagtahod sa homoseksuwalidad mismo.” Iyang gisaysay nga ang mga homoseksuwal “mausbawong naghugpong aron imantala ang ilang batasan ingong dalayegon, ug ihangyo nga himoon usab kana sa uban.” Kini makita ilabina diha sa kanasoran sa Kasadpan. Bisan pa niana, sa kadaghanang bahin sa kalibotan, bisan diha sa giingong liberal nga kanasoran, daghan mosaway ug magsalikway gihapon sa homoseksuwalidad.

Ang mga homoseksuwal ug kadtong gidudahang homoseksuwal kasagarang pilion nga tumong sa mga pagyagayaga, panghasi, ug kapintasan. Bisan ang relihiyosong mga pangulo nagpadayag sa maong pagdumot. Ang uban misugod nianang morag pribado nilang mga pakigbugno batok sa mga homoseksuwal. Tagda, pananglitan, ang mga komentong gipahayag sa usa ka obispo sa Gregong Ortodoksong Iglesya nga karong bag-o gisibya sa Gregong nasyonal nga radyo. Siya mipahayag: “Ang Diyos magsunog sa mga homoseksuwal hangtod sa hangtod sa gahong sa kalayo sa impiyerno. Ang mga singgit sa ilang hilas nga mga baba molanog hangtod sa kahangtoran. Ang ilang daotang mga lawas makaagom ug di-maagwanta nga pagpaantos.” Tinuod ba gayod kini? Unsay pagbati sa Diyos bahin sa mga homoseksuwal?

Hunahuna sa Diyos

Ang Bibliya wala magpailang linain sa mga homoseksuwal ingong usa ka pundok aron isalikway o dumtan sa mga Kristohanon. Gawas pa, wala kini magtudlo nga pagasilotan sa Diyos ang mga homoseksuwal​—o bisan kinsa sa iyang mga linalang​—pinaagi sa pagsunog kanila sa kalayong impiyerno sa walay kataposan.​—Itandi ang Roma 6:23.

Hinunoa, ang Kasulatan nagpadayag sa moral nga mga sukdanan sa atong Maglalalang, nga subsob nahasupak sa modernong-adlawng mga sukdanan sa moral. Ang homoseksuwal nga mga buhat, pakigsekso sa lalaki ug babaye nga dili kinasal, ug ang bestialidad ngatanan gisaway diha sa Bibliya. (Exodo 22:19; Efeso 5:3-5) Gilaglag sa Diyos ang Sodoma ug Gomora tungod nianang seksuwal nga mga buhat.​—Genesis 13:13; 18:20; 19:4, 5, 24, 25.

Mahitungod sa mga buhat sa homoseksuwalidad, ang Pulong sa Diyos pintok nga nag-ingon: “Kini maoy usa ka dulumtanang butang.” (Levitico 18:22, The New Jerusalem Bible) Ang Kasugoan sa Diyos ngadto sa Israel naglagda: “Sa dihang ang usa ka lalaki modulog sa usa ka lalaki nga sama sa pagdulog sa usa ka babaye, silang duha nakabuhat ug dulumtanang butang. Sa walay sipyat sila pagapatyon.” (Levitico 20:13) Ang samang silot gilagda alang niadtong magabuhat sa bestialidad, pag-unay, ug pagpanapaw.​—Levitico 20:10-12, 14-17.

Si apostol Pablo giinspirar sa pagbatbat sa homoseksuwal nga mga buhat ingong mga pahayag sa “makauulawng seksuwal nga mga gana” ug ingong “sukwahi sa kinaiyahan.” Siya misulat: “Mao kana kon nganong ang Diyos nagtugyan kanila ngadto sa makauulawng seksuwal nga mga gana, kay ang ilang mga babaye nag-usab sa kaugalingon nilang kinaiyanhong gamit ngadto sa usa nga sukwahi sa kinaiyahan; ug sa sama usab bisan gani ang mga lalaki mibiya sa kinaiyanhong paggamit sa babaye ug nanag-uros-uros diha sa ilang kaulag sa usag usa, mga lalaki sa mga lalaki, nga nagabuhat sa kon unsay law-ay ug nagadawat diha sa ilang kaugalingon sa bug-os nga bayad, nga angay sa ilang sayop. Ug maingon gayod nga sila wala mouyon sa paghupot sa Diyos diha sa tukmang kahibalo, ang Diyos nagtugyan kanila ngadto sa dili-inuyonan nga kahimtang sa kaisipan, sa pagbuhat sa mga butang nga dili angay.”​—Roma 1:26-28.

Ang Kasulatan wala maghatag ug mga pamalibad, mga pagtugot, kalibog; ang homoseksuwal nga mga buhat, pagpanapaw, pagpakighilawas, ngatanan maoy dulumtanan sa panan-aw sa Diyos. Uyon niana, ang matuod nga mga Kristohanon dili magpahuyang sa baroganan sa Bibliya bahin sa “makauulawng seksuwal nga mga gana” aron lamang mahimong mas popular o mas dinawat sa modernong kultura. Ni mouyon sila sa bisan unsang kalihokan nga gipahinungod sa pagpasiugda sa homoseksuwalidad ingong normal nga estilo sa pagkinabuhi.

“Dumti ang Daotan”

Ang Bibliya nagtambag: “Oh kamong mga nahigugma kang Jehova, dumti ang daotan.” (Salmo 97:10) Busa, ang mga Kristohanon gidahom nga magdumot sa matag buhat nga naglapas sa mga balaod ni Jehova. Ang pipila ka tawo tingali mosanong uban ang grabe pang mga pagbati sa pag-ayad o pagdumot sa homoseksuwalidad kay sa ubang matang sa imoralidad, nga mag-isip sa homoseksuwalidad ingong dili-kinaiyanhong seksuwal nga kahiwian. Bisan pa niana, angay bang dumtan sa mga Kristohanon ang mga indibiduwal nga nagbuhat nianang mga butanga?

Ang salmista naghatag ug kalamdagan bahin niining isyuha sa Salmo 139:21, 22: “Dili ba gidumtan ko kadtong nagdumot kanimo sa hilabihan, Oh Jehova, ug dili ba giayran ko kadtong masukolon kanimo? Uban sa hingpit nga pagdumot akong gidumtan sila. Sila nahimong tinuod nga mga kaaway kanako.” Ang atong pagkamaunongon kang Jehova ug ang iyang mga prinsipyo angay magpatungha diha kanato ug grabeng pagkadisgusto niadtong tinuyong mosukol kang Jehova ug mokuha sa baroganan ingong mga kaaway sa Diyos. Si Satanas ug ang mga demonyo nahilakip sa maong kompirmadong mga kaaway sa Diyos. Ang pipila ka tawo lagmit usab nga maapil sa maong kategoriya. Apan, mahimong lisod kaayong mailhan sa Kristohanon kanang mga tawhana sumala sa panggawas nga panagway. Dili kita makabasa sa mga kasingkasing. (Jeremias 17:9, 10) Sayop ang pagtuo nga ang usa maoy dili na matul-id nga kaaway sa Diyos tungod kay siya nagbuhat ug daotan. Sa daghang kaso ang mga mamumuhat ug daotan yanong wala masayod sa mga sukdanan sa Diyos.

Busa, sa katibuk-an, ang mga Kristohanon hinay sa pagdumot sa isigkatawo. Bisan pag sila dili gayod moangay sa pila ka estilo-sa-kinabuhi, dili sila modagmal sa uban, ni maghambin ug kayugot o daotang pagbati kanila. Sa kapulihay, ang Bibliya nagtambag sa mga Kristohanon nga “magmadaiton sa tanang tawo.”​—Roma 12:9, 17-19.

“Ang Diyos Dili Mapihigon”

Si Jehova mohatag ug kapasayloan sa tawo nga tinuod nga maghinulsol, bisan unsang imoralidad ang tingali gibuhat nianang tawhana. Wala ing ebidensiya nga giisip ni Jehova ang usa ka matang sa imoralidad ingong daotan pa kay sa lain. “Ang Diyos dili mapihigon.” (Buhat 10:34, 35) Tagda, pananglitan, ang kaso sa unang-siglong kongregasyon sa Corinto. Si apostol Pablo misulat kanila: “Walay mga makihilawason, ni mga tigsimbag idolo, ni mga mananapaw, ni mga lalaking nahuptan alang sa dili-kinaiyanhong mga katuyoan, ni mga lalaking nakigdulog sa mga lalaki, ni mga kawatan, ni mga tawong dalo, ni mga palahubog, ni mga tigsultig pasipala, ni mga mangingilkil nga makapanunod sa gingharian sa Diyos.” Unya giila ni Pablo nga ang pipila ka kanhing mga makihilawason, mga mananapaw, mga homoseksuwal, ug mga kawatan nadawat sa sulod sa Kristohanong kongregasyon sa Corinto. Siya mipatin-aw: “Ug gani ingon niana ang pipila kaninyo kaniadto. Apan kamo hinlo nang nahugasan, apan kamo nabalaan na, apan kamo napahayag na nga matarong sa ngalan sa atong Ginoong Jesu-Kristo ug sa espiritu sa atong Diyos.”​—1 Corinto 6:9-11.

Siyempre, si Jehova dili motugot sa bisan unsang nagpadayon ug makanunayong paglapas sa iyang hingpit nga mga sukdanan sa moral. Sa tino gidumtan niya ang matig-ang dili pagtagad sa iyang mga prinsipyo. Bisan pa niana, iyang gibuksan kanunay ang pultahan alang sa pagpasig-uli. (Salmo 86:5; Isaias 55:7) Nahiuyon niini, ang mga Kristohanon dili maghimo sa mga homoseksuwal, o kinsa pa man, nga tumong sa pagdumot, pagyagayaga, o panghasi. Giisip sa matuod nga mga Kristohanon ang ilang isigkatawo ingong lagmit nga mga tinun-an ni Kristo, nga magtratar kanila sa matinahoron ug maligdong nga paagi. Ang Bibliya nag-ingon: “Kini maoy maayo ug dalawaton sa panan-aw sa atong Manluluwas, ang Diyos, kansang kabubut-on mao nga ang tanang matang sa mga tawo maluwas ug makadangat sa tukmang kahibalo sa kamatuoran.”​—1 Timoteo 2:3, 4.

Mga Kristohanon Magadawat sa Mahinulsolon

Sa balikbalik, ang Bibliya nagpahayag nga ang Diyos mapasayloon. Nagbatbat kini kaniya ingong “Diyos sa mga buhat sa kapasayloan, maayohon ug maluluy-on, hinay sa kasuko ug dagaya sa mahigugmaong-kalulot.” (Nehemias 9:17; Ezequiel 33:11; 2 Pedro 3:9) Ang Bibliya dugang pa nagpanig-ingon kaniya ngadto sa amahan sa sambingay ni Jesus bahin sa anak nga mausikon nga nag-usik-usik sa iyang panulondon diha sa kinabuhing mapatuyangon sa usa ka halayong yuta. Ang amahan nagpaabot uban ang dinupang mga bukton aron dawaton pag-usab ang iyang anak sa dihang ang anak sa kataposan naulian sa iyang maayong panimuot, naghinulsol, ug mipauli sa balay sa iyang pamilya.​—Lucas 15:11-24.

Oo, posible nga magbag-o ang usa ka mamumuhat ug daotan. Ang Kasulatan nag-ila niini pinaagi sa pagdasig sa mga tawo nga hukason ang daang pagkatawo ug isul-ob ang bag-ong pagkatawo ug ‘magbag-o sa gahom nga nagapalihok sa hunahuna.’ (Efeso 4:22-24) Kadtong nagbuhat sa daotan, lakip ang mga homoseksuwal, makahimog dagkong kausaban sa ilang panghunahuna ug panggawi, ug daghan gayod ang nagmalamposon sa maong pagbag-o.a Si Jesus mismo misangyaw ngadto nianang mga tawhana; ug sa nagpakitag paghinulsol, sila nahimong dalawaton kaniya.​—Mateo 21:31, 32.

Ang mga Kristohanon magadawat sa mahinulsolong mga tawo gikan sa nagkadaiyang mga kahimtang sa kinabuhi. Human biyai ang imoral nga mga buhat, bisan kon unsa kana, matagamtam sa tanan ang bug-os nga mga benepisyo sa kapasayloan sa Diyos tungod kay “si Jehova maayo sa tanan, ug ang iyang mga kaluoy anaa sa ibabaw sa tanan niyang mga buhat.”​—Salmo 145:9.

Ang mga Kristohanon andam motanyag sa gikinahanglang espirituwal nga pagpaluyo, bisan ngadto niadtong nagpakigbisog pa sa homoseksuwal nga mga kiling. Nahiuyon kini sa kaugalingong pagpadayag sa gugma sa Diyos, kay ang Bibliya nag-ingon: “Nagarekomendar ang Diyos sa iyang kaugalingong gugma kanato sa pagkaagi nga, samtang kita mga makasasala pa, si Kristo namatay alang kanato.”​—Roma 5:8.

[Footnote]

[Blurb sa panid 14]

Ang mga Kristohanon dili magpahuyang sa hunahuna sa Bibliya bahin sa homoseksuwalidad

[Picture Credit Line sa panid 13]

Punch