“Paglawig sa Dagat Panahon sa Bagyo”

DILI ba nimo lantawon ang maong pagpangahas ingong wala sa panahon, binuang, ug kalagmitang mosangpot sa katalagman? Hinunoa, ang pipila nagbutang sa ilang kaugalingon diha sa maong kahimtang sa mahulagwayong paagi. Sa unsang paagi? Ang ika-17ng-siglo nga Ingles nga awtor nga si Thomas Fuller miingon: “Ayaw ug lihok samtang anaa sa kasuko. Sama ra kini sa paglawig sa dagat panahon sa bagyo.”

Ang pagpadayon sa usa ka plano samtang anaa sa kahimtang sa dili-mapugngang kasuko mahimong magpahinabog makapasubong mga sangpotanan. Gipamatud-an kini sa usa ka hitabong narekord sa Bibliya. Si Simeon ug Levi, mga anak sa karaang patriarkang si Jacob, misanong sa pagpanamastamas sa ilang igsoong babaye nga si Dina pinaagi sa pagpanghasi diha sa mapanimaslong kapungot. Ang resulta maoy dinaghang pagpatay ug pagpangagaw. Dili ikahibulong nga gihukman ni Jacob ang ilang daotang binuhatan, nga nag-ingon: “Gibuhat ninyo akong dulumtanan sa paghimo kanakong baho alang sa mga molupyo sa yuta.”​—Genesis 34:25-30.

Sa pagkamaalamon, ang Pulong sa Diyos, ang Bibliya, nagrekomendar sa kaatbang nga dalan. Kini nag-ingon: “Pasagdi ang kasuko ug biyai ang kaligutgot; ayaw ipakita ang imong kaugalingon nga manginit aron lamang mobuhat ug daotan.” (Salmo 37:8) Ang pagsunod nianang tambaga makasanta sa dagkong kasal-anan.​—Ecclesiastes 10:4; tan-awa usab ang Proverbio 22:24, 25.