Ang Akong Kasuko o ang Akong Panglawas?
KINSAY dili masuko? Kini mahitabo kanatong tanan. Usahay ang dako nga kasuko tingali makataronganon. Apan, sa tinuoray, dili ba tinuod nga sagad ang atong kasuko (o ang kagrabe niini) dili makataronganon?
Ang Bibliya nagasulti kanato: “Biyai ang kasuko ug ayri ang kaligutgot; ayaw ipakita ang imong kaugalingon nga manginit aron sa pagbuhat lamang ug daotan.” (Salmo 37:8) Unsa ka maalamon ang maong tambag? Makaapektar ba kini sa imong taas-ug-abot nga maayong panglawas?
Sa seksiyong “Health” niini, ang The New York Times miingon:
“Ang mga tawo nga mosinta dayon sa kasuko o molingkod nga maglungotlungot sa kalagot sa matag gihunahunang pagdaot tingali nagahimo ug labaw pa kay sa paghimo sa ilang kaugalingon nga ngil-ad. Tingali ila pang ginapatay ang ilang kaugalingon.
“Ang mga tigpanukiduki nakatigom ug daghang impormasyon ning bag-o pa nga nagsugyot nga ang pagkamasuk-anon makadaot kaayo sa lawas nga kini katumbas sa, o molabaw pa, sa pagtabako, sa sobrang katambok ug sa punog-tambok nga pagkaon ingong gamhanang hinungdan sa sayo nga kamatayon.
“‘Ang among mga pagtuon nagpakita nga ang madumtanon, madudahong kasuko katumbas sa bisan unsang ubang kapeligrohan sa panglawas nga among nahibaloan,’ miingon si Dr. Redford Williams, usa ka tigpanukiduki sa behavioral medicine sa Duke University Medical Center.”
Ang mga pagtuon nagpakita nga kadtong sobra kaayong moreaksiyon sa mga problema nga komon sa matag adlaw nga pagkinabuhi mopagawas ug daghang hormone sa kalisod. Ang ilang kanunayng pagsilaob sa kasuko mopahinabog pagkadili-timbang sa makaayo ug makadaot nga mga matang sa kolesterol, nga nagpameligro kanila sa sakit sa kasingkasing.
Ang uban tingali motubag, ‘Apan mao kanay akong naandan’ o, ‘Nagdako ako nga ingon niana.’ Bisan pa, kana wala magpasabot nga ikaw dili makausab, pinaagi sa tim-os nga pagpaningkamot sa pagpadapat sa tambag sa Diyos. Diha sa imong Bibliya, susiha ang iyang tambag mahitungod sa kasuko ug kaligutgot nga narekord diha sa Proverbio 14:29, 30; 22:24, 25; Efeso 4:26; Santiago 1:19, 20.
Ang pagpadapat nianang diyosnong kaalam mahimong makaayo sa imong panglawas ug mopalugway sa imong kinabuhi. Ang Times miingon: “Daghang tigpanukiduki miingon nga ang tawong daling masuko makapakunhod sa kapeligrohan sa sayo nga kamatayon pinaagi sa pagbag-o sa kalit, suko nga reaksiyon.”
Buot ba Nimong Duawon?
Bisan niining gubot nga kalibotan, maangkon nimo ang kalipay gikan sa tukmang kahibalo sa Diyos sa Bibliya, sa iyang Gingharian, ug sa iyang kahibulongang katuyoan alang sa katawhan. Kon buot nimo ang dugang impormasyon o buot nimong may moduaw kanimo sa pagdumala ug libreng pagtuon sa Bibliya sa balay uban nimo, palihog pagsulat sa Watch Tower, P.O. Box 2044, 1099 Manila, o sa nahiangay nga direksiyon nga nalista sa panid 2.