Ipakita ang Pagsalig Kang Jehova—Pinaagi sa Pagpadapat sa mga Butang Nakat-onan
“Magsalig ka kang Jehova ug magbuhat ka ug maayo; magpuyo ka sa yuta, ug makiglabot uban sa pagkamatinumanon.”—SALMO 37:3.
1, 2. (a) Unsa ang angay nga tilinguhaong resulta sa personal nga pagtuon? (b) Unsang ilustrasyon ang gihatag ni Santiago, ug ang pagtan-aw nga iyang gibatbat umalagi ba?
ANG pagtuon sa usa sa Pulong sa Diyos dili alang sa kaugalingong kahimuot. Ang pagtuon angay nga usa ka paagi aron maugmad ang pagsalig kang Jehova. (Proverbio 3:1-5) Ang mga pulong sa salmista sa ibabaw nagapakita nga ang diyosnong pagsalig, sa baylo, makita diha sa usa ka tawo pinaagi sa iyang ‘pagbuhat ug maayo.’
2 Si Santiago miawhag: “Mahimong mga magtutuman sa pulong, ug dili lamang tigpaminaw niini, nga magalimbong sa inyong kaugalingon sa bakak nga pangatarongan. Kay kon adunay maminaw lamang sa pulong, ug dili magtutuman, kini siya mahisama sa usa ka tawo nga nagasud-ong sa iyang kinaiyanhong nawong sa salamin. Kay siya nagatan-aw sa iyang kaugalingon ug dayon siya molakaw ug dihadiha mahikalimot lang dayon kon unsa siyang matanga sa tawo.” (Santiago 1:22-24) Busa ang maong pagtan-aw dili lamang umalaging pagtan-aw. Ang Gregong pulong sa “pagtan-aw” nga gigamit dinhi sa panguna “nagapaila sa lihok sa hunahuna sa pagsabot sa pila ka bahin sa usa ka butang.”—An Expository Dictionary of New Testament Words, ni W. E. Vine; itandi ang Buhat 7:31, Kingdom Interlinear.
3. Sa unsang paagi ang usa ka tawo nga motan-aw sa salamin daling mahikalimot “kon unsang matanga siya sa tawo”?
3 Nan, handurawa ang usa ka tawo nga nagasusi sa iyang kaugalingon sa usa ka salamin, nga tingali makakaplag nga ang dagway dili nindot. Tingali iyang makita ang dobleng sulang tungod sa hinobrang pagkaon ug hinobrang pag-inom, mga butod sa mata tungod sa kawalay tulog, ug mga kunot sa iyang agtang gumikan sa nagasamok nga mga kabalaka. Sa pagkakita sa iyang nawong, mohukom siya sa paghimo sa nalangan kaayong mga kausaban sa mga batasan ug paagi sa kinabuhi. Dayon “siya molakaw.” Tungod kay wala na makita ang makapikal nga dagway, siya “dihadiha mahikalimot,” dili kaayo sa iyang dagway, kondili “kon unsa siyang matanga sa tawo.” Ang iyang hukom nga magbag-o mahanaw.
4. Sa unsang paagi ang ilustrasyon ni Santiago mapadapat sa atong pagtuon sa Kasulatan?
4 Sa susama, tingali ikaw usa ka may-katakos nga estudyante sa Bibliya. Apan, unsay imong reaksiyon bahin sa imong makita sa salamin sa Pulong sa Diyos? Kon ibanaag ang espirituwal nga mga depekto ug mga buling, kini ba magpahinabog umalaging kabalaka kanimo, o mohimo ka ba sa lig-ong hukom sa pagtul-id sa mga depekto? Si Santiago midugang: “Apan siya nga motan-aw sa hingpit nga kasugoan nga iya sa kagawasan ug mopadayon niana, kining tawhana, tungod kay siya nahimo, nga dili malimtanong tigpaminaw, kondili magtutuman sa pulong, malipay sa iyang pagbuhat niini.” (Santiago 1:25) Ang salmista miampo: “Tudloi ako, O Jehova, sa dalan sa imong mga lagda, aron ako makabantay niini hangtod sa kataposan.”—Salmo 119:33.
Kon Unsay Ginasulti Kanato sa Atong mga Buhat
5. (a) Unsay ginatug-an bahin kanato sa atong mga buhat? (b) Unsang dulnganan ang nagahulat niadtong “mga mamumuhat sa daotan”?
5 Sa tinuoray, kon unsay atong ginabuhat o ginabatasan nagapamatuod kon unsa kita sa kahiladman. Ug sa madugay o madali ang usa ka tawo magapadayag sa “tinago nga pagkatawo” pinaagi sa pagbuhat sa maayo o daotan. (Salmo 51:6) Matud ni Solomon: “Pinaagi sa iyang mga buhat ang usa ka batang lalaki mailhan kon ang iyang buhat maputli ug matul-id.” (Proverbio 20:11) Kini matuod kang Jacob ug Esau sa bata pa sila. Sa paglabay sa panahon, ang mga buhat ni Esau nagpadayag sa iyang kakulang sa pagpabili sa espirituwal. (Genesis 25:27-34; Hebreohanon 12:16) Kini matuod usab sa libolibo nga nag-angkong nagasalig kang Jehova apan si kinsa nagpamatuod sumala sa pagtawag sa Bibliya nga “mga magbubuhat sa daotan.” (Job 34:8) Ang salmista misulat: “Sa manurok ang mga daotan ingon sa balili ug sa dihang molabong ang tanang mamumuhat sa daotan, kini mao nga sila pagalaglagon sa walay kataposan.”—Salmo 92:7.
6. Nganong kinahanglanon nga ipakita nato ang atong pagsalig kang Jehova karon?
6 Nagadaghan ang mga tawong daotan, ug ang ilang kalaglagan dili na madugay; dili tugotan sa Diyos ang mga mamumuhat ug daotan sa panahong walay tino. (Proverbio 10:29) Busa kinahanglang atong ipakita ang atong pagsalig kang Jehova pinaagi sa pagpadapat sa atong nakat-onan. “Hupti ang maayong kagawian sa taliwala sa kanasoran,” mitambag si Pedro. (1 Pedro 2:12) Nan, unsa ang pila ka bahin nga niana kita makauswag?
Atong mga Pakiglabot sa Uban
7. Nganong kinahanglang kita magmainampingon sa atong mga pakiglabot “sa mga tagagawas”?
7 Ang usa ka bahin tingali mao ang atong paagi sa pagpakiglabot sa uban. Ang Proverbio 13:20 nagapasidaan: “Siya nga may mga pakiglabot sa mga buangbuang mosangpot sa kadaotan.” Kay napakyas sa pagpadapat niining dinasig nga tambag, ang pipila nahimong sobra ka suod sa kalibotanong mga tawo sa trabahoan ug tunghaan. Sa ingon ang usa ka minyong igsoong lalaki nalangkit sa mahugaw nga kagawian uban sa usa ka babaye sa iyang trabahoan. Mikuyog usab siya sa lalaking mga kauban sa trabaho ngadto sa mga lokal nga mga bar nga misangpot sa iyang pagkahubog. Sa pagkamatuod, kinahanglan kita “padayon nga magagawi nga maalamon ngadto sa mga tagagawas.”—Colosas 4:5.
8. Sa unsang paagi ang uban makapauswag sa ilang mga pakiglabot sa kaubang mga Kristohanon?
8 Apan komosta ang atong mga pakiglabot sa kaubang mga Kristohanon? Pananglit kon ikaw utangan ug kuwarta sa usa ka igsoon. Mahimo kahang imong gilangan ang pagbayad kaniya, nga mangatarongan nga kay daw datoon ang igsoon, ikaw labaw nga nagkinahanglan niana kay kaniya? “Ang daotan nagahulam ug dili mobayad,” matud sa Salmo 37:21. O kon ikaw usa ka amo, imo bang ginapadapat ang prinsipyong “Ang magbubuhat takos sa iyang mga suhol” kon bahin sa pagsuweldo sa Saksing mga empliyado? (1 Timoteo 5:18) Si Pablo nakaingon bahin sa iyang mga pakiglabot mismo: “Uban sa pagkabalaan ug diyosnong katim-os . . . kami nagagawi sa among kaugalingon diha sa kalibotan, apan ilabina nganha kaninyo.”—2 Corinto 1:12.
Kasarangang Sinina ug Pamostura
9. Unsang mga urog sa sinina ug pamostura ang napanid-an sa pila ka ansiano?
9 Ang usa ka nagapanawng magtatan-aw sa Alemanya nagbatbat sa pila ka lokal nga Kristohanon ingong “kaliwatan sa tennis nga sapatos” tungod sa ilang sobra ka dipormal nga sinina panahon sa mga miting. Ang sangang-buhatan midugang nga ang pila ka tigtambong sa miting “halos nagkato,” bisan tuod “ang kinabag-an sa atong mga igsoon kasarangan sa pamiste.” Ang laing nasod susamang nagtaho nga “ang kakulang sa personal nga panghinlo usa ka problema dinhi . . . Ang pila ka igsoon dili magsul-ob ug limpiyong sinina. Ang ilang buhok pasagdang dili sinudlay ug hugaw kon moadto sa mga tigom o sa pagsangyaw sa kanataran.” Hinungdanon gayod nga ang mga alagad ni Jehova mahimong hapsay ug limpiyo sa tanang bahin.—2 Corinto 7:1.
10. (a) Unsang prinsipyoha ang magagiya sa atong pagpili sa sinina ug pamostura? (b) Kanus-a nahiangay ang tambag, ug angay unsay atong pagsanong?
10 Kinahanglan kita “magbiste nga kasarangan, uban ang kaligdong ug kaangayan,” ilabina sa dihang makig-ambit sa espirituwal nga mga kalihokan. (1 Timoteo 2:9, New International Version) Ang isyu dili kon kaha ang usa ka moda sobra ka makiurog apan kon kaha kini angay alang sa usang nagaangkong ministro sa Diyos. (Roma 12:2; 2 Corinto 6:3) Ang sobra ka kaswal o hugot-sa-lawas nga sinina makadaot sa atong mensahe. Ang mga urog nga sa dayag ug tinuyo nagahimong bayen-on sa mga lalaki o nagahimong lakin-on sa mga babaye tinong dili angay. (Itandi ang Deuteronomio 22:5.) Hinuon, ang lokal nga mga batasan tingali magkalain, sumala sa klima, mga panginahanglan sa trabaho, ug uban pa, mao nga ang Kristohanong kongregasyon dili mohimog lisod ug dili-matarog nga mga lagda nga mapadapat sa tibuok-kalibotang panag-igsoonay. Ni ipatuman sa mga ansiano ang ilang personal nga mga gusto diha sa panon. Bisan pa niana, kon ang paagi sa pamostura sa usa ka magmamantala sa Gingharian makatugaw sa kadaghanan sa kongregasyon o makadaot sa ministeryo, nahiangay ang malulutong tambag. Mosanong ka bang mapaubsanon sa maong tambag, nga magpakitag pagsalig kang Jehova?—Hebreohanon 12:7.
Pagsalig nga ang Diyos Magtagana Alang sa mga Tigpangita sa Gingharian
11. Sa unsang paagi ang pipila nasakpan sa pagpangagpas sa materyal nga mga butang, ug nganong kini dili maalamon?
11 “Nan, pangitaa una ninyo ang gingharian ug ang iyang pagkamatarong, ug kining tanang ubang butang igadugang kaninyo.” (Mateo 6:33) Pagkamakasubo sa dihang ang pipila mapakyas sa pagpamati nianang mga pulonga! Kay nagtuo sa kasugiran bahin sa pinansiyal nga kasegurohan, mainiton nilang gipangagpas ang bahandi, sekular nga edukasyon, ug kalibotanong mga karera, “nga nagasalig sa ilang pangabuhian.” (Salmo 49:6) Si Solomon nagapasidaan: “Ayaw paghago sa pagpakadato. . . . Ang imong mga mata imo bang gipatan-aw niana, sa dihang kini walay kapuslanan? Kay sa walay pakyas kini nagahimog mga pako alang sa kaugalingon sama sa usa ka agila ug nagalupad ngadto sa mga langit.”—Proverbio 23:4, 5.
12. Sa unsang paagi kadtong nagapangagpas sa bahandi ‘nalagbaslagbasan sa daghang kasakit’?
12 Si apostol Pablo dugang nagapasidaan: “Kay ang gugma sa salapi mao ang gamot sa tanang matang sa makadaot nga mga butang, ug tungod sa pagpangab-ot niining gugmaha ang pipila nangahisalaag gikan sa pagtuo ug nalagbaslagbasan sa ilang kaugalingon sa daghang kasakit.” (1 Timoteo 6:10) Sa usa ka interbiyo sa U.S. News & World Report, si Dr. Douglas LaBier miingon nga ang daghang batan-ong lalaki ug babaye nga nagapangagpas sa bahandi “nagtaho sa mga pagbati sa pagkadili-tagbaw, kabalaka, depresyon, kahaw-ang, paranoia, ingon man sa tanang matang sa mga sakitsakit sa lawas—mga labad-sa-ulo, mga sakit sa bukobuko, mga sakit sa tiyan, pagkadili-makatulog, mga suliran sa pagkaon.”
13. Nganong labing maayo nga magmatagbaw sa “pagkaon ug panapot”?
13 Kadtong nagasalig nga si Jehova motagana alang kanila mahigawas sa dakong kasakit ug kabalaka. Matuod, ang pagkatagbaw lamang “sa pagkaon ug panapot” mahimong magkahulogan sa labaw pang kasarangang sukdanan sa pamuyo. (1 Timoteo 6:8) Apan “ang mga katigayonan walay kapuslanan sa adlaw sa kapungot.” (Proverbio 11:4) Dugang pa, kon atong pauswagon ang atong pag-alagad kang Jehova, kita mahimong makadawat sa “panalangin ni Jehova” nga “nagapadato, ug siya dili magadugang ug kasakit niana.”—Proverbio 10:22.
“Pangitaa ang Pakigdait ug Sunda Kana”
14, 15. (a) Unsang matang sa mga isyu ang usahay makadisturbo sa kalinaw sa mga kongregasyon? (b) Sa unsang paagi matinguha ang kalinaw kon mahitabo ang mga panagkabingkil?
14 Ang laing paagi nga kita makapakita sa atong pagsalig kang Jehova mao ang “pagpangita sa pakigdait ug pagsunod niini” taliwala sa atong isigkamagtutuo. (1 Pedro 3:10-12) Hinuon, may panahong itugot sa uban ang ginagmayng mga butang nga mahimong tinubdan sa mapaitong panagbingkil taliwala sa mga igsoon: ang dayandayan sa Kingdom Hall, mga pagpasibo sa mga teritoryo sa kongregasyon, mga asaynment sa Pagtuon sa Bibliya, pagkupot sa mga suplay sa magasin ug basahon. O, sa pila ka kaso, inay sa paghusay sa personal o pamatigayong mga panaglalis sa espiritu sa Mateo 18:15-17, ang mga igsoon wala na magtingganay sa usag usa o nakasamok sa kongregasyon tungod sa ilang panaglalis.
15 Si Santiago miingon: “Ang bunga sa pagkamatarong nagpugas sa binhi niini sa malinawong mga kahimtang.” (Santiago 3:18) Busa, alang sa kalinaw makiling sa pagpahiuyon sa mga gusto o mga hunahuna sa uban, bisag nawad-an sa personal nga mga katungod. (Itandi ang Genesis 13:5-12.) Pananglitan, kon duha ka kongregasyon ang nagagamit sa usa ka Kingdom Hall, ang usa ka kongregasyon angay dili maghunahunang kini mao ang “tag-iya” sa tigomanan ug may gahom sa pagdiktar sa mga oras sa tigom o sa ubang butang sa laing kongregasyon. Angay molungtad ang pagtahod ug kooperasyon sa usag usa.
16. Unsa ang bili sa pag-ila sa teokratikanhong kahikayan diha sa balay ug sa kongregasyon?
16 Daghang panaglalis malikayan kon ilhon lamang nato ang teokratikanhong kahikayan ug huptan ang atong hustong dapit. (1 Corinto 11:3; Efeso 5:22-27) Kon motahod ang mga asawa sa mga gusto sa ilang mga bana, ang mga anak sa mga sugo sa ilang mga ginikanan, ang ministeryal nga mga alagad sa tugon sa mga ansiano, ang ilang mga aksiyon “makatabang sa pag-uswag sa [kongregasyon] sa paglig-on niini diha sa gugma.” (Efeso 4:16) Itugot nato, usahay ang mga bana, mga ginikanan, ug mga ansiano may kakulangan. (Roma 3:23) Apan ang pagrebelde ba, pagreklamo, o pagsukol sa maayog-tuyo nga mga direksiyon mopaarang-arang sa kahimtang? Labi pang maayo ang paghupot sa atong dapit nga gitudlo sa Diyos ug sundon ang pakigdait!
Pagpanlimbasog Diha sa Kanataran
17. (a) Unsang mga katarongan ang ginahatag sa pipila alang sa pagbatog basta lamang nga bahin sa buluhatong pagsangyaw? (b) Giunsa pagdasig ni Jesus ang mga Kristohanon sa pagsanong sa mga kalisod karong adlawa?
17 Hinuon, alang sa daghan ang kinadak-ang hagit mao ang pagtuman sa Kristohanong sugo nga iwali ang maayong balita. (Mateo 24:14; 28:19, 20) Ang pipila may diyutay ra kaayong bahin sa pagsangyaw sa kanataran, tingali mangatarongan nga tungod sa mga kalisod sa pangabuhi ug pagmatutog pamilya malisdan sila sa pagbuhat ug labaw pa. Itugot, ang mga kalisod sa “kataposang mga adlaw” makalilisang. (2 Timoteo 3:1) Bisan pa niana, si Jesus nagpasidaan batok sa ‘pagkamabug-atan sa mga kabalaka sa kinabuhi.’ Samtang mograbe ang mga kahimtang, ang mga Kristohanon angay ‘mobarog nga tul-id ug ihangad ang ilang mga ulo.’ (Lucas 21:28, 34) Ang usa sa labing maayong mga paagi sa “pagbarog nga malig-on” batok sa mga atake ni Satanas mao nga ang atong “mga tiil sinapinan sa kasangkapan sa maayong balita”—nga makig-ambit nga regular sa pagwali!—Efeso 6:14, 15.
18. Unsa tingali ang hinungdan ang pipila wala sa bug-os makig-ambit sa buluhatong pagsangyaw?
18 Balik sa adlaw ni Pablo, daghang Kristohanon (labing menos sa pila ka kongregasyon) “nangita sa ilang kaugalingong kaayohan, dili sa iya ni Kristo Jesus.” (Filipos 2:21) Matuod kaha kini sa pipila sa atong taliwala karong adlawa? Tingali napakyas sila sa pag-isip sa pagpangita sa Gingharian sama sa pag-isip niadtong tawo nga nakakitag usa ka “mutya nga mahal kaayo” nga tungod niadto siya mihimog pagsakripisyo. (Mateo 13:45, 46) Kay nagpadaog sa interes-sa-kaugalingon, gisunod nila ang dalan nga labing dili hago ug nagatanyag sa basta lamang nga pag-alagad. Apan, hinumdoming ang gugma kang Jehova ug sa isigkatawo maoy nagapalihok sa matuod nga mga Kristohanon sa pagwali, bisan pag ang pagsultig una sa mga estranghero dili nato kinaiyanhong hilig.—Mateo 22:37-39.
19. Nganong si Jehova dili mahimuot sa dagaang nga paningkamot, ug sa unsang paagi atong matulotimbang ang atong kaugalingong pag-alagad kaniya?
19 Kon kita dili madasig sa pagwali, nan ang atong gugma kang Jehova ug atong pagsalig kaniya mao lamay pagkaamgo sa hunahuna. “Ilha ang Diyos sa imong amahan ug alagara siya uban ang bug-os nga kasingkasing,” mitambag si David kang Solomon, “kay ang tanang kasingkasing ginasusi ni Jehova, ug siya nakasabot sa tanang kiling sa mga hunahuna.” (1 Cronicas 28:9) Si Jehova dili malimbongan sa dagaang nga paningkamot. Bisan ang regular nga pakig-ambit sa pagsangyaw sa kanataran dili magatagbaw kaniya kon itanyag lamang nato ang basta lamang nga pag-alagad sa atong mahimo kon kita ‘manlimbasog pag-ayo.’ (Lucas 13:24) Ang matag Kristohanon sa ingon kinahanglang mohimog matinud-anong pagtulotimbang sa iyang bahin sa pagsangyaw sa kanataran ug mangutana sa iyang kaugalingon: ‘Ginabuhat ko ba gayod ang tanan kong mahimo?’ Basin kinahanglang himoon ang pagpasibo sa atong mga butang gipalabi.
Gipalihok sa “Pagbuhat ug Maayo” Tungod sa mga Panig-ingnan sa Uban
20. Nganong angay nga susihon ang maayong mga panig-ingnan nga gihatag sa kaubang mga Kristohanon?
20 Ang atong pag-alagad sa Diyos wala buhata aron “itandi sa laing tawo.” (Galacia 6:4) Bisan pa niana, ang maayong mga panig-ingnan sa uban kadaghanan makapalihok kanato sa pagbuhat ug labaw pa. Si apostol Pablo mismo miingon: “Mahimong mga manunundog kanako, maingon nga ako nanundog kang Kristo.” (1 Corinto 11:1) Nan, palandonga kon pila ang panahong gigugol sa atong mga igsoon sa pagsangyaw sa kanataran kada bulan. Sa Tinipong Bansa, ang aberids nga oras sa mga magmamantala miuswag gikan sa 8.3 oras niadtong 1979 ngadto sa 9.7 oras sa 1987! Ang atong mga igsoon inanay nagapauswag sa panahong ilang gigugol sa kanataran. Matuod ba kana kanimo?
21. Unsay nakapalihok sa daghan sa pagsulod sa payunir nga buluhaton? Iilustrar.
21 Kay nadasig sa makugihong mga panig-ingnan sa uban, ang talagsaong mga gidaghanon nagasulod sa regular payunir nga buluhaton. Sa California (U.S.A.) ang usa ka batan-ong igsoong babaye nga ginganlag si Angela nakadawat ug makapatental nga tanyag sa trabaho, apil ang eskolarsip sa kolehiyo nga iyang magustohan. Si Angela, mipili sa bug-os-panahong ministeryo. Iyang rason? “Pinaagi sa pagpakig-uban sa daghang payunir, nakita ko gayod ang halalom kaayong kalipay ug katagbawan dili lamang sa ilang kaugalingon kondili sa ilang relasyon kang Jehova. Buot kong mabatonan kining halalom nga kalipay ug katagbawan.”
22. Unsa ang mga kaayohan sa pagpadapat sa mga butang nakat-onan?
22 Buot ba nimo ang “halalom nga kalipay ug katagbawan”? Nan “mosalig kang Jehova ug mobuhat ug maayo”! Itugot nga ang imong nahibaloan magapalihok kanimo sa pagbuhat sa imong labing maarangan sa pag-alagad kang Jehova. Ang pagpadapat sa mga butang nakat-onan magpakita sa tanan sa imong espirituwal nga pag-uswag ug makahatag kaayohan sa uban sa moluwas-kinabuhing paagi. (1 Timoteo 4:15, 16) Busa, hinaot ang tanan mosanong sa mga pulong ni Pablo sa Filipos 4:9: “Ang mga butang inyong nakat-onan ingon man nadawat ug nadungog ug nakita maylabot kanako, ipadapat kini; ug ang Diyos sa kalinaw magauban kaninyo.”
Mga Punto Alang sa Pagsubli
□ Angay unsay atong sanong sa pagtan-aw sa salamin sa Pulong sa Diyos?
□ Sa unsang paagi atong mapauswag ang atong paagi sa pagpakiglabot sa uban?
□ Nganong dili maalamon ang pagpangagpas ug materyal nga mga butang?
□ Sa unsang paagi kita makatinguha sa kalinaw diha sa kongregasyon?
□ Unsay magapalihok kanato nga makaambit sa bug-os sa pag-alagad sa kanataran?
[Hulagway sa panid 16]
Dili igo ang pagkakita sa espirituwal nga mga depekto ug mga buling. Kinahanglang molihok kita sa pagtul-id kanila!
[Hulagway sa panid 18]
Kadtong nagapangagpas sa bahandi kadaghanan makaagom ug “daghang kasakit”