Nahinumdom Ka Ba?

Nabasa ba nimog maayo ang mga isyu sa Ang Bantayanang Torre niining tuiga? Sulayi kon makatubag ka sa mosunod nga mga pangutana:

Unsay kaayohan kon mogahin tag panahon sa pagpakig-estorya, pagpaminaw, ug paghunahuna bahin kang Jehova?

Makahimo tag mas maayong mga desisyon, mahimo tang mas maayong magtutudlo, mas molig-on ang atong pagtuo, ug mas molalom ang atong gugma kang Jehova.—w22.01, p. 30-31.

Unsay kaayohan kon mosalig ta kang Jehova ug sa iyang mga representante?

Karon na ang panahon nga mosalig ta sa pamaagi ni Jehova. Mahimo nato nâ pinaagi sa dili pagduhaduha sa mga instruksiyon ug desisyon sa mga ansiyano. Sa dakong kasakitan, mas sayon unya para nato ang pagsunod bisan pag makadawat tag mga instruksiyon nga morag dili haom o dili praktikal.—w22.02, p. 4-6.

Unsay gipasabot sa anghel dihang iyang gisultihan si Zacarias bahin sa “tunton nga gigunitan ni [Gobernador] Zorobabel”? (Zac. 4:8-10)

Kini nga panan-awon nagpasalig sa katawhan sa Diyos nga bisag simple ra ang ginatukod nga templo, kini mahuman ug makaabot sa sukdanan sa Diyos.—w22.03, p. 16-17.

Unsay atong buhaton aron mahimo tang “maayong ehemplo . . . sa sinultihan”? (1 Tim. 4:12)

Mosulti ta sa buotan ug matinahorong paagi dihang magsangyaw, mokanta nga kinasingkasing, mokomento pirme sa tigom, mosultig tinuod, ug maningkamot nga makapadasig ug dili sakit ang atong sinultihan.—w22.04, p. 6-9.

Nganong ang mga deskripsiyon sa upat ka mananap (mga gingharian) sa Daniel kapitulo 7 makita diha sa usa na lang ka mananap nga gihisgotan sa Pinadayag 13:1, 2?

Ang mananap sa Pinadayag 13 wala magsimbolo sa usa lang ka gingharian, sama sa Roma. Kini nagsimbolo sa tanang gobyerno nga nagmando sa tawo sukad sa una hangtod karon.—w22.05, p. 9.

Unsa ang pangunang paagi nga mapakita nato ang atong pagsalig sa hustisya sa Diyos?

Kon naay nanginsulto, nakapasakit, o nakasala nato, dili ta maghambin ug kasuko. Hinuon, itugyan nato ang tanan kang Jehova. Iyang wad-on ang tanang kadaot nga resulta sa sala.—w22.06, p. 10-11.

Kon ang brader moampo panahon sa tigom, unsay angay niyang hinumdoman?

Ang pag-ampo dili angayng gamiton aron manambag sa kongregasyon o mohimog mga pahibalo. Dili kinahanglang mogamit ug “daghang pulong,” ilabina sa sugod sa tigom. (Mat. 6:7)—w22.07, p. 24-25.

Kadtong “nagbuhat ug daotan” ‘banhawon ngadto sa paghukom.’ Unsay gipasabot niana? (Juan 5:29)

Dili sila hukman base sa ilang binuhatan sa wala pa sila mamatay. Sila obserbahan ug susihon base sa ilang binuhatan human sa ilang pagkabanhaw.—w22.09, p. 18.

Unsang pagdasig ang gisulti ni J. F. Rutherford sa kombensiyon niadtong Septiyembre 1922?

Sa kombensiyon sa Cedar Point, Ohio, U.S.A., siya miingon: “Ang Hari nagmando na! Kamo ang iyang mga magwawali. Busa imantala, imantala, imantala, ang Hari ug ang iyang Gingharian!”—w22.10, p. 3-5.

Sumala sa Isaias kapitulo 30, unsa ang tulo ka paagi nga ginatabangan ta sa Diyos nga makalahutay?

Gipakita niini nga kapitulo nga siya (1) maminaw ug motubag sa atong mga pag-ampo, (2) maggiya kanato, ug (3) maghatag natog mga panalangin karon ug sa umaabot.—w22.11, p. 9.

Nganong makaingon ta nga ang Salmo 37:10, 11, 29 naay katumanan kaniadto ug sa umaabot?

Ang giingon ni David nagpakita sa malipayong kinabuhi nga natagamtam sa Israel, sama niadtong panahon nga si Solomon ang hari. Dihang naghisgot si Jesus bahin sa umaabot nga Paraiso, iyang gikutlo ang bersikulo 11. (Mat. 5:5; Luc. 23:43)—w22.12, p. 8-10, 14.