Pagpakigsulti sa Silingan—Ang Tanan Bang Maayong Tawo Moadto sa Langit?

ANG mga Saksi ni Jehova malipay nga ipaambit ang mensahe sa Bibliya sa ilang mga silingan. May gikalibgan ka ba sa Bibliya? Gusto ka bang mahibalo bahin sa pagtulon-an sa mga Saksi ni Jehova? Kon mao, ayaw pagpanuko sa pagpangutana nila sa sunod higayon nga sila makig-estorya nimo. Malipay silang motubag sa imong mga pangutana.

Aniay pananglitan sa pagpakigsulti sa usa ka Saksi ni Jehova ngadto sa iyang silingan. Ibutang ta nga Marcos ang ngalan sa Saksi ug nagsangyaw siya kang Roberto.

Unsay Buhaton Niadtong Moadto sa Langit?

Marcos: Sa imong hunahuna, ang ato kahang umaabot moarang-arang, mograbe, o mao ra gihapon?

Roberto: Paminaw nako moarang-arang ni. Naglaom kong makaadtog langit aron makauban ang Ginoo.

Marcos: Maayo kaayo na. Daghag gihisgotan ang Bibliya bahin sa langit ug sa pribilehiyo nga makaadto didto. Nahibalo ka ba kon unsay buhaton niadtong moadto sa langit?

Roberto: Makauban ang Diyos ug dayegon siya hangtod sa hangtod.

Marcos: Nindot na nga paglaom. Gani, ang Bibliya naghisgot dili lang sa mga pribilehiyo nga madawat niadtong moadto sa langit kondili naghisgot usab bahin sa ilang hinungdanong responsabilidad.

Roberto: Unsa man nga responsabilidad?

Marcos: Gihisgotan kini sa Pinadayag 5:10. Kini nag-ingon: “Gihimo mo [Jesus] sila nga usa ka gingharian ug mga saserdote ngadto sa atong Diyos, ug sila magamando ingong mga hari ibabaw sa yuta.” Namatikdan ba nimo kon unsay responsabilidad niadtong moadto sa langit?

Roberto: Giingon dinhi nga sila magmando ingong mga hari ibabaw sa yuta.

Marcos: Makapainteres na, di ba?

Kinsa May Ilang Mandoan?

Marcos: Nan, kon kadtong moadto sa langit magmando ingong mga hari, duna gyoy mga tawong ilang mandoan, dili ba? Kay kon wala, unsay kapuslanan sa usa ka gobyerno kon walay mga sakop?

Roberto: Tuod no?

Marcos: Busa ang pangutanang motungha mao, Kinsa may ilang mandoan?

Roberto: Tingali atong mandoan ang mga tawo nga wala pa mamatay ug wala pa moadto sa langit.

Marcos: Daw makataronganon na—kon ang tanang maayong tawo moadto sa langit. Pero aniay laing posibilidad. Mahimo kaha nga may mga tawo—pipila ka maayong tawo—nga dili moadto sa langit?

Roberto: Wala pa koy nadunggang Kristiyano nga nagtuo niana.

Marcos: Nakapangutana ko ana tungod sa atong mabasa sa Salmo 37:29. Palihog kono kog basa ini.

Roberto: Sige. Kini nag-ingon: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”

Marcos: Salamat. Namatikdan ba nimo kon asa mopuyo ang kadaghanan sa maayong mga tawo?

Roberto: Giingon dinhi nga sila magapuyo sa yuta.

Marcos: Sakto—ug dili lang sa mubong panahon. Matikdi nga ang teksto nag-ingon: “Sila magapuyo sa ibabaw niini hangtod sa kahangtoran.”

Roberto: Tingali nagpasabot na nga dili mawad-ag maayong mga tawo dinhi sa yuta. Kon kita mamatay ug moadto sa langit, pulihan ta sa ubang maayong tawo nga mahimugso.

Marcos: Tingali daghan ang nagtuo nga mao nay gipasabot sa teksto. Apan posible kaha nga lain ang gipasabot niana? Posible kaha nga ang maayong mga tawo mabuhi sa yuta hangtod sa kahangtoran?

Roberto: Ambot lang.

Usa ka Paraisong Yuta sa Umaabot

Marcos: Buweno, tagda kining laing teksto nga naghisgot bahin sa kinabuhi sa yuta sa umaabot. Atong basahon ang Pinadayag 21:4. Kini nag-ingon bahin sa mga tawong mabuhi nianang panahona: “Iyang [Diyos] pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” Dili ba nindot na nga palaaboton?

Roberto: Bitaw. Pero, para nako nagtumong na sa kinabuhi didto sa langit.

Marcos: Aw, tinuod nga kadtong moadto sa langit makatagamtam ug susamang panalangin. Apan tan-awa pag-usab ang teksto. Unsay giingon niana nga mahitabo sa kamatayon?

Roberto: Kini nag-ingon nga “ang kamatayon mawala na.”

Marcos: Husto. Nan, seguradong mouyon ka nga aron mawala ang usa ka butang, kinahanglang molungtad usa kini.

Roberto: Siyempre.

Marcos: Apan walay kamatayon sa langit, dili ba? Dinhi lang sa yuta nga ang tawo mangamatay.

Roberto: Ah, hunahunaon pa nako na.

Marcos: Abi nimo Bert, ang Bibliya nagtudlo nga dunay pipila ka maayong tawo nga moadto sa langit apan ang daghang uban pa mabuhi sa walay kataposan dinhi sa yuta. Gani, segurado kong nadunggan na nimo ning mga pulonga: “Malipayon ang mga malumog-buot, sanglit sila magapanunod sa yuta.”—Mateo 5:5.

Roberto: Oo, kadaghan na ko nakadungog anang tekstoha nga gibasa sa simbahan.

Marcos: Kon ang mga malumog-buot makapanunod sa yuta, dili ba nagpasabot kana nga ang mga tawo magpuyo dinhi sa yuta? Kadtong magpuyo dinhi sa yuta makatagamtam sa mga benepisyo nga gitagna dinhi sa Pinadayag. Ilang makita ang atong kalibotan nga bug-os nga mausab kay wagtangon na man sa Diyos ang tanan nga dili maayo—bisan ang kamatayon.

Roberto: Nasabtan nako ang imong punto, apan morag dili pa igo ang usa o duha ka teksto nga mopamatuod niana.

Marcos: Siyempre dili. Sa pagkatinuod, daghang teksto ang naghisgot kon unsay kinabuhi dinhi sa yuta sa umaabot. Okey lang ba nga ipabasa nako nimo ang usa sa akong paboritong teksto?

Roberto: Sige, okey lang.

“Ang Daotan Mawala Na”

Marcos: Ganiha atong gibasa ang bersikulo 29 sa Salmo 37. Atong tan-awon pag-usab kining kapituloha. Karon, atong basahon ang bersikulo 10 ug 11. Palihog kono kog basa.

Roberto: Okey. “Sa dili na madugay, ug ang daotan mawala na; ug pagasusihon mo gayod ang iyang dapit, ug siya mawala diha. Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”

Marcos: Salamat. Sumala sa bersikulo 11, asa man magpuyo ang “mga maaghop,” o maayong mga tawo?

Roberto: Kini nag-ingon nga sila “magapanag-iya sa yuta.” Apan sa paminaw ko, kining tekstoha mapadapat karon; kay naa may maayong mga tawo sa yuta karon.

Marcos: Tinuod na. Apan, matikdi nga ang teksto nag-ingon usab nga ang maayong mga tawo makatagamtam ug “kadagaya sa pakigdait.” May pakigdait ba sa yuta karon?

Roberto: Wala gyod.

Marcos: Busa sa unsa mang paagi matuman ang maong saad? Mahimong gamiton nato ni nga pagtandi: Ibutang ta nga naa kay apartment. Ang pipila nga nagpuyo niana maayo—ilang giatiman ang apartment ug maayo sila nga silingan. Malipay kang magpaabang nila. Apan ang uban dili maayo; ilang gidaot ang imong apartment ug dili sila maayong silingan. Karon, kon dili sila mag-usab, unsa may imong buhaton?

Roberto: Papahawaon nako sila.

Marcos: Mao nay buhaton sa Diyos sa mga daotan karon. Tan-awa pag-usab ang bersikulo 10. Kini nag-ingon: “Ang daotan mawala na.” Sa ato pa, “papahawaon” sa Diyos ang mga tawong makadaot sa uban. Dayon ang mga maayo mabuhi sa yuta nga malinawon. Tingali ang ideya nga ang maayong mga tawo mabuhi sa yuta sa walay kataposan lahi sa imong nahibaloan.

Roberto: Bitaw, wa pa gyod ko kadungog ana nga gitudlo sa among simbahan.

Marcos: Ug sumala sa imong giingon ganiha, dili pa igo ang usa o duha ka teksto sa pagpamatuod niana. Sa pagkatinuod, kinahanglang susihon nato kon unsay giingon sa Bibliya sa katibuk-an bahin sa umaabot sa maayong mga tawo. Apan base sa mga teksto nga atong gibasa karon, posible kaha nga ang pipila ka maayong tawo moadto sa langit, samtang ang daghang uban pang mga maayo mabuhi sa yuta sa walay kataposan?

Roberto: Ambot lang. Pero, morag mao nay gipasabot sa teksto nga imong gibasa. Hunahunaon pa nako na pag-ayo.

Marcos: Samtang susihon nimo kanag dugang, tingali may mga pangutana pang mosantop sa imong hunahuna. Pananglitan, komosta ang maayong mga tawo nga nabuhi una pa kanato? Miadto ba silang tanan sa langit? Kon wala, asa man sila karon?

Roberto: Makapainteres nang mga pangutanaha dà.

Marcos: O sige. Mao ni ang akong himoon. Ilista nako ang pipila ka teksto nga naghisgot ana.a Dayon, mobalik ko dinhi ug hisgotan ang maong mga teksto human nimo kana mabasa ug mapamalandong. Okey ra ba nimo?

Roberto: Okey kaayo! Salamat ha.

[Footnote]