13, 14. Diin gibutang sa mga Saksi ni Jehova ang ilang paglaom, ug unsay ilang gihimo bahin niini?

¹³ Sa pagkatinuod, wala pulihi ni Jesus si Jehova ingon nga mao ang paglaom sa katawhan. Ang Salmo 37:34 aplikado gihapon: “Paglaom kang Jehova ug pagbantay sa iyang dalan, ug siya magabayaw kanimo sa pagpanunod sa yuta. Sa diha nga pagalaglagon ang mga daotan, ikaw makakita niana.” Kinahanglan gihapong magpadayon sa paglaom kang Jehova ug sa pagdasig sa mga katawhan sa dili paglaom sa hinimog-tawong mga institusyon.

16. Nganong ikaingon nga si Jesus adunay samang panglantaw kang David?

¹⁶ Si Haring David mao ang espirituwal nga magbalantay sa mga pamilya sa karaang Israel, ug siya ang mibukas sa dalan alang sa Jerusalem aron mahimong kaulohan sa nasod, nga niini ang iyang anak nga si Solomon nagmando sulod sa 40 ka tuig. Uban sa maayong katarongan, si Jesu-Kristo gihisgotan ingong “anak ni David.” (Lucas 1:31; 18:39; 20:41) Kon naglaom si David kang Jehova nga Diyos, naglaom usab ang iyang yutan-ong kaliwat si Jesu-Kristo. Ug mao kanay iyang gihimo.

17. Unsay pamatuod nga naglaom si Jesus kang Jehova?

¹⁷ Ingong pamatuod nga gisunod sa labing iladong yutan-ong kaliwat ni David, si Jesu-Kristo, ang tambag sa Salmo 37:34 dihang miginhawa sa iyang kataposang ginhawa diha sa kahoy sa pagsakit, si Jesus miingon: “Amahan, nganha sa imong mga kamot itugyan ko ang akong espiritu.” (Lucas 23:46) Nagkutlo siya ug nagtuman sa mga pulong ni David diha sa Salmo 31:5, nga gipahayag ngadto sa Diyos: “Ngadto sa imong mga kamot itugyan ko ang akong espiritu.” Wala mapakyas ang paglaom ni Jesus, ug maingon man kang Haring David. Gibanhaw si Kristo gikan sa patay sa ikatulong adlaw. Kap-atan ka adlaw sa ulahi siya mibalik ngadto sa iyang langitnong Amahan. Sa kataposan sa Hentil nga Panahon sa 1914, gibayaw ni Jehova ang iyang Anak aron mahimong Magmamando sa yuta.

Panahon sa Paglaom Karon

18. Nganong mao na karon ang tukmang panahon sa paglaom?

¹⁸ Karon, samtang ang bag-ong tuig 6,014 A.M. (sa Tuig sa Kalibotan) nagaagak sa tawhanong panimalay paingon sa umaabot, unsay paglaom ang ginapaabot alang sa tawhanong pamilya? Tukma kaayo karon ang pangutana tungod kay hapit na kita sa 1,900 ka tuig tapos sa panahon sa Bibliya. Dugay na kaayong panahong milabay sukad nga gisulat ni David ang Salmo 37:34.