Salmo 46:10—“Hilom Kamo ug Ilha Ninyo nga Ako mao ang Dios”

“Hunong na mo ug ilha nga ako Diyos. Pagabayawon ko taliwala sa kanasoran; pagabayawon ko diha sa yuta.”—Salmo 46:10, Bag-ong Kalibotang Hubad.

“Hilom kamo ug ilha ninyo nga ako mao ang Dios. Gibayaw ako taliwala sa mga nasod, gibayaw ako dinhi sa yuta!”—Salmo 46:10, Ang Biblia, 2011.

Kahulogan sa Salmo 46:10

Giawhag sa Diyos ang tanan nga simbahon siya ug ilhon ang iyang katungod sa pagmando sa tibuok yuta. Ang iyang gahom ug awtoridad klaro kaayong makita. Kini nga kamatuoran kinahanglang ilhon sa tanan nga gustong mabuhi sa walay kataposan.—Pinadayag 4:11.

“Hunong na mo ug ilha nga ako Diyos.” Sa ubang translation sa Bibliya, ang unang bahin niini gihubad nga “hilom kamo.” Tungod niini, daghan ang nagtuo nga sugo kini nga magpakitag pagtahod o maghilom lang diha sa simbahan. Pero ang Hebreohanong mga pulong nga gihubad ug “hunong na mo ug ilha nga ako Diyos,” maoy pag-awhag ni Jehovaa nga Diyos sa mga tawo sa tanang kanasoran nga mohunong na sa pagsupak kaniya ug ilhon nga siya lang ang angayng simbahon.

Makita pod sa Salmo 2 ang susamang pag-awhag. Didto, ang Diyos nagsaad nga molihok siya batok niadtong mosupak niya. Sa laing bahin, kadtong miila sa awtoridad sa Diyos nagasalig kaniya alang sa giya, kusog, ug kaalam. Kay sila ‘midangop Kaniya,’ sila malipayon ug mibatig kasegurohan, bisan panahon sa mga kalisdanan.—Salmo 2:9-12.

“Pagabayawon ko taliwala sa kanasoran; pagabayawon ko diha sa yuta.” Kaniadto, si Jehova nga Diyos gibayaw sa dihang gigamit niya ang iyang dakong gahom sa pagpanalipod sa iyang katawhan. (Exodo 15:1-3) Sa umaabot, mas mabayaw pa gyod siya sa dihang ang tanang tawo sa yuta magpasakop sa iyang awtoridad ug mosimba kaniya.—Salmo 86:9, 10; Isaias 2:11.

Konteksto sa Salmo 46:10

Ang usa ka reperensiya nag-ingon nga ang Salmo 46 “maoy awit nga nagdayeg sa gahom sa Diyos, ang gamhanang tigpanalipod sa iyang katawhan.” Dihang awiton sa katawhan sa Diyos ang Salmo 46, ilang gipahayag ang ilang pagsalig sa katakos ni Jehova sa pagpanalipod ug pagtabang kanila. (Salmo 46:1, 2) Kini nga awit nagpahinumdom nila nga si Jehova kanunay nga nagauban kanila.—Salmo 46:7, 11.

Aron mas molig-on ang ilang pagsalig sa gahom ni Jehova nga Diyos sa pagpanalipod kanila, ang salmo nagdasig nila nga pamalandongon ang iyang gamhanang mga buhat. (Salmo 46:8) Kini espesipikong nagpasiugda sa iyang katakos sa pagpahunong sa mga gubat. (Salmo 46:9) Pinaagi sa pagpanalipod sa iyang katawhan gikan sa kaaway nga mga nasod, samag gipahunong ni Jehova ang mga gubat panahon sa Bibliya. Pero ang Bibliya nagsaad nga sa dili madugay himoon kana sa Diyos sa mas bug-os pa dihang taposon niya ang mga gubat sa tibuok yuta.—Isaias 2:4.

Gitabangan ba gihapon ni Jehova ang iyang mga magsisimba karon? Oo. Gani, gidasig pag-ayo ni apostol Pablo ang mga Kristohanon nga mosalig Kaniya alang sa tabang. (Hebreohanon 13:6) Ang Salmo 46 nagpalig-on sa atong pagsalig sa gahom sa Diyos sa pagpanalipod kanato. Kini motabang nato nga isipon ang Diyos ingong “atong kusog ug dangpanan.”—Salmo 46:1.

Tan-awa ning mubo nga video nga nagsumaryo sa basahon sa Salmo.