Mabuntog Mo Kining mga Babaga!

ANG usa ka jumbo jet mahimong makapasakay ug gatosan ka mga pasahero ug toniladang mga kargamento. Sa unsang paagi kanang mabug-at nga ayroplano makalupad? Simple lang, pinaagi sa lift o ang puwersa nga nagbatok sa pagbitad sa grabidad.

Sa dihang ang ayroplano mohaguros pagdagan diha sa tugpahanan, ang hangin mohasmag sa ibabaw ug sa ubos sa nagkurbang mga pako. Kini mopatunghag paitaas nga puwersa nga gitawag ug lift. Kon adunay igong puwersa, madaog sa ayroplano ang grabidad sa yuta ug molupad. Siyempre, ang sobrag karga nga ayroplano dili makapatunghag igong puwersa aron makalupad.

Kita usab masobrahan ug karga. Sa kasiglohang milabay, si Haring David miingon nga ang iyang ‘kalapasan samag lulan nga mabug-at ra kaayo alang kaniya.’ (Salmo 38:4) Sa ingon usab, si Jesu-Kristo nagpasidaan batok sa pagkanabug-atan tungod sa mga kabalaka sa kinabuhi. (Lucas 21:34) Ang negatibong mga hunahuna ug mga pagbati makapabug-at kanato sa sukod nga daw kini lisod nga igong “makalupad.” Ikaw ba nabug-atan sa sama nga paagi? O nakasinati ka bag pipila ka babag sa imong dugang espirituwal nga kauswagan? Kon mao, unsay makatabang?

Gilaayan Ka Ba?

Ang kalaay​—usa ka komon nga reklamo karon​—mahimong usa ka babag sa hunahuna, bisan alang sa pipila sa katawhan ni Jehova. Ang mga batan-on ilabinang makiling sa pagsalikway sa mga kalihokan nga giisip nilang makalaay. Mao ba kanay imong bation usahay labot sa Kristohanong mga tigom? Kon mao, unsay imong mahimo aron himoong makaiikag ang imong pagtambong sa tigom?

Ang pagpakigbahin mao ang yawi. Si Pablo misulat sa batan-ong si Timoteo: “Pagabansaya ang imong kaugalingon nga maoy tumong ang diyosnong pagkamahinalaron. Kay ang lawasnong pagbansay mapuslanon ug diyutay; apan ang diyosnong pagkamahinalaron mapuslanon sa tanang butang, kay nagahupot kini ug saad sa kinabuhi karon ug nianang sa umaabot.” (1 Timoteo 4:7, 8) Usa ka basahon labot sa maayong panglawas mahimong makalaay ug limitado lamang ug bili kon kita dili mosunod sa gisugyot nga mga ehersisyo. Ang Kristohanong mga tigom gidesinyo aron maehersisyo ang atong mga hunahuna ug mahimo kana kon kita mangandam ug makigbahin. Kini nga pagpakigbahin maghimo sa mga tigom nga mas magantihon ug makaiikag.

Niining bahina, usa ka batan-ong Kristohanong babaye nga ginganlag Mara miingon: “Kon dili ako mangandam sa mga tigom, ako dili malipay niini. Apan, kon ako mangandam daan, ang akong hunahuna ug kasingkasing mas madinawaton. Ang mga tigom mahimong mas makahuloganon, ug ako maghinamhinam sa pagkomento.”

Ang pagkakat-on sa pagpamati makatabang usab. Ang pagpamati sa maanindot nga musika masayon ug dihadiha makalingaw. Apan dili tanang katagbawan mabatonan dihadiha. Kita makabaton lamang ug katagbawan sa programa sa tigom kon kita mamati pag-ayo sa gisulti. Usa ka Kristohanon nga ginganlag Rachel miingon: “Kon dili maayo ang mamumulong, kinahanglang isentro ko gayod ang akong pagtagad. Ang lagda alang nako mao, ‘Kon dili kaayo makaiikag ang pakigpulong, labi pang isentro ko ang akong pagtagad.’ . . . Hatagan nakog linain nga pagtagad ang mga kasulatan, nga maningkamot nga makakuha ug daghan pa niana kutob sa mahimo.” Kinahanglang disiplinahon nato ang atong kaugalingon, sama kang Rachel, aron makapamati. Ang basahon sa Proverbio nag-ingon: “Anak ko, pagmatngon sa akong kaalam. Ikiling ang imong igdulungog sa akong salabotan.”​—Proverbio 5:1.

Ang pipila ka impormasyong gipresentar diha sa mga tigom daw balikbalik na. Hinungdanon kaayo kini! Ang tanang mga alagad sa Diyos nagkinahanglan ug mga pahinumdom. Ang dili hingpit nga unod, uban sa balikong mga kiling niini ug dili maayong panumdoman, nagkinahanglan sa tanang tabang nga mabatonan. Si apostol Pedro ‘nagtinguha sa pagpahinumdom sa mga isigkamagtutuo bahin sa pipila ka mga butang, bisan kon sila nahibalo na niini ug malig-on na diha sa kamatuoran.’ (2 Pedro 1:12) Si Jesus nagpatin-aw usab nga “ang matag instruktor sa publiko . . . maoy sama sa usa ka tawo, usa ka tag-iya sa balay, nga magapagawas gikan sa iyang bahanding tinigom ug mga butang nga bag-o ug daan.” (Mateo 13:52) Busa, samtang hisgotan sa atong mga tigom ang pamilyar nga mga hunahuna sa Kasulatan, o ‘daang mga bahandi,’ kanunay nga aduna gayoy pipila ka ‘bag-ong mga bahandi’ sa paglipay kanato.

Ang pagkamatinguhaon nga pahimuslan sa bug-os ang mga tigom mahimong moresulta ug tinuod nga espirituwal nga pagdasig. “Malipayon kadtong mahunahunaon sa ilang espirituwal nga panginahanglan [kadtong kinsa mga makililimos sa espiritu],” si Jesus miingon. (Mateo 5:3, potnot.) Ang maong tinamdan diha sa mahimsog espirituwal nga pagkaon nga gitagana sa mga tigom makawala sa kalaay.​—Mateo 24:45-47.

Nawad-ag Kadasig Tungod sa Dili Maayong Panig-ingnan?

Ikaw ba naglagot tungod sa paggawi sa usa diha sa imong kongregasyon? Tingali ikaw nakapangutana, ‘Sa unsang paagi ang usa ka igsoon mogawi ug ingon niana ug aduna gihapoy maayong baroganan?’ Ang maong mga hunahuna molihok ingong usa ka babag sa hunahuna, mobuta kanato sa bili sa maayong panag-ubanay nga atong mabatonan uban sa katawhan sa Diyos.​—Salmo 133:1.

Tingali ang pipila ka membro sa kongregasyon sa Colosas may susamang problema. Si Pablo nagtambag kanila: “Padayon nga mag-inantosay sa usag usa ug bukas nga magpinasayloay sa usag usa kon ang usa may hinungdan sa pagreklamo batok sa lain.” (Colosas 3:13) Giila ni Pablo nga ang pipila ka Kristohanon sa Colosas tingalig adunay dili maayong paggawi ug sa ingon nakahatag tingali sa uban ug tinuod nga hinungdan sa pagreklamo. Busa dili kita angayng mahibulong kon ang usa sa atong mga igsoong lalaki ug babaye usahay kulang ug pila ka Kristohanong hiyas. Si Jesus naghatag ug maayong tambag sa paghusay sa seryosong mga problema. (Mateo 5:23, 24; 18:15-17) Apan masubsob, mahimong atong antoson na lamang ang mga kahuyangan sa mga isigkamagtutuo ug pasayloon sila. (1 Pedro 4:8) Sa pagkatinuod, ang maong paagi maoy alang sa atong kaugalingong kaayohan ug sa uban. Nganong ingon niini ang kahimtang?

“Ang pagsabot sa usa ka tawo dayag nga magpahinay sa iyang kasuko, ug maoy iyang himaya ang pagpasaylo sa kalapasan,” nag-ingon ang Proverbio 19:11. Mas labing maayong magpasaylo kay sa tugotan ang kasuko ug kayugot nga mag-umido! Si Salvador, usa ka ansiano nga ilado sa iyang mahigugmaong espiritu, miingon: “Kon dili ako tagdon ug maayo sa usa ka igsoon o mosultig masakit, akong pangutan-on ang akong kaugalingon: ‘Sa unsang paagi matabangan ko ang akong igsoon? Sa unsang paagi malikayan ko nga mawala ang akong bililhong relasyon kaniya?’ Gibutang ko kanunay sa hunahuna kon unsa ka sayon ang pagsultig sayop nga butang. Kon adunay usa nga magpasagad lang ug sulti, ang labing maayong solusyon mao ang pagpabakwi sa iyang gisulti ug magsugod pag-usab. Apan imposible kana, busa akong himoon ang sunod nga labing maayong paagi ug dili na lang tagdon ang gisulti. Hunahunaon ko lang kini nga usa ka pasundayag sa dili hingpit nga unod imbes banaag sa tinuod nga personalidad sa akong igsoon.”

Bation tingali nimo nga ang paghimo niini mas sayon nga isulti kay sa pagbuhat. Apan kini nagdepende ug dako sa paagi nato sa pagdala sa atong panghunahuna. “Bisan unsang mga butang hiligugmaon, . . . padayong isipa kining mga butanga,” mitambag si Pablo. (Filipos 4:8) Ang “hiligugmaon” sa literal nagkahulogang “nagapukaw-ug-pagmahal.” Buot ni Jehova nga atong palandongon kon unsa ang maayo sa mga tawo, palandongon kanang mga hiyas nga nagapukaw ug pagmahal inay kayugot. Siya mismo ang naghatag kanato ug kinalabwang panig-ingnan niining bahina. Ang salmista nagpahinumdom kanato bahin niini, nga nag-ingon: “Kon kasaypanan lang ang imong ginabantayan, Oh Jah, Oh Jehova, kinsay makabarog?”​—Salmo 103:12; 130:3.

Tinuod, usahay ang paggawi sa usa ka igsoon tingali makapaluya, apan ang kinabag-an sa atong mga isigkamagsisimba maoy talagsaong mga panig-ingnan sa Kristohanong pagkinabuhi. Kon atong hinumdoman kini, sama kang David kita malipay ‘sa paghatag ug dakong himaya kang Jehova ug sa pagdayeg kaniya taliwala sa daghang katawhan.’​—Salmo 109:30.

Ang Pagkahimong Saksi ba Daw Malisod Kaayo?

Ikasubo, tungod sa laing babag sa hunahuna, ang pipila wala pa makasugod sa pagdayeg kang Jehova. Daghang lalaki nga dili mga Saksi ni Jehova responsableng nagtagana sa ilang panimalay ug nagsuportar pa gani sa ilang mga asawa diha sa Kristohanong ministeryo. Sila mahigalaon ug hayan nagpakitag interes sa kongregasyon, apan sila nagpugong sa pagkahimong dedikadong mga alagad sa Diyos. Unsay nagpugong kanila?

Usa ka problema tingali mao nga kining mga banaha nakamatikod sa puliking teokratikanhong kalihokan sa ilang mga asawa ug mibati nga ang pagkahimong Saksi sobra ka daghag kinahanglanon. O lagmit sila nahadlok nga sila dili gayod makapakigbahin sa buluhatong pagsangyaw sa balay-ug-balay. Sa ilang hunahuna, mas daghan ang mga kaakohan kay sa mga panalangin. Nganong may babag sa hunahuna? Ang kadaghanan sa mga estudyante sa Bibliya nakakat-on ug nagpadapat sa kamatuoran nga inanay. Apan ang dili magtutuong mga bana sagad nahibalo pag-ayo sa tanang Kristohanong mga kaakohan una pa sila natukmod sa pagdawat niini.

Si Manuel, nga may ingon niini nga kahimtang, nagsaysay: “Sulod sa mga napulo ka tuig, ubanan nako ang akong asawa sa mga asembliya ug sa mga tigom. Sa pagkatinuod, gusto kong makig-uban sa mga Saksi kay sa mga tawo sa kalibotan, ug ako malipay sa pagtabang kanila kon makahimo ako. Ako nakadayeg sa gugma nga naglungtad sa ilang taliwala. Apan ang ideya sa pag-adto sa balay ug balay maoy usa ka dakong babag alang kanako, ug ako nahadlok nga biaybiayon ako sa akong mga kauban sa trabaho.

“Ang akong asawa mapailobon kaayo kanako ug wala gayod mosulay sa pagpugos kanako sa pagtuon sa Bibliya. Siya ug ang mga bata ‘nagsangyaw’ pinaagi sa ilang maayong panig-ingnan. Si José, usa ka ansiano sa kongregasyon, nagpakitag linain nga pagtagad kanako. Ako nagtuo nga ang iyang pagdasig sa kataposan ang nagpasugod kanako sa seryosong pagtuon. Human mabawtismohi, naamgohan ko nga ang pangunang babag anaa ra sa akong hunahuna. Sa dihang mihukom ako sa pag-alagad kang Jehova, akong nasinati ang iyang tabang sa pagbuntog sa akong mga kahadlok.”

Sa unsang paagi ang mga asawa ug ang Kristohanong mga ansiano makatabang sa mga bana sama kang Manuel aron mabuntog ang ilang babag sa hunahuna? Ang usa ka pagtuon sa Bibliya mahimong makatukod ug pagpabili ug tinguha sa pagbuhat sa kabubut-on sa Diyos. Sa pagkatinuod, ang bug-os nga kahibalo sa Kasulatan mao ang pasikaranan sa pagpakitag pagtuo ug pagbatog pagsalig sa paglaom sa unahan.​—Roma 15:13.

Unsay magdasig niini nga mga bana sa pagdawat ug pagtuon sa Bibliya? Sagad, ang pagpakighigala uban sa masinabtanong mga igsoong lalaki sa kongregasyon dakog mahimo. Tingali ang usa ka ansiano o laing may kasinatiang igsoong lalaki ang mohimog tikang sa pagsuod sa bana. Sa dihang matukod na ang maayong relasyon, ang iya na lamang gikinahanglan tingali mao nga adunay usa nga motanyag ug pagtuon kaniya. (1 Corinto 9:19-23) Kasamtangan, mahimong ipaambit nga tinaggidyot sa maalamong Kristohanong asawa ang espirituwal nga mga pagkaon sa iyang dili magtutuong bana, kay nakasabot nga siya lagmit dili mosanong sa pagpamugos.​—Proverbio 19:14.

Sama sa nakat-onan ni Manuel sumala sa kasinatian, sa dihang ang usa ka tawo makabatog espirituwal nga kalig-on, ang samag-bukid nga mga babag mahimong sama sa gagmayng mga bungtod na lamang. Ginapalagsik ni Jehova kadtong kinsa nagtinguha sa pag-alagad kaniya. (Isaias 40:29-31) Pinaagi sa kusog sa Diyos ug sa pagpaluyo sa hamtong nga mga Saksi, ang mga babag tingalig mawala. Ang buluhatong balay-ug-balay sa ingon mahimong dili na kaayo makapalugda ug ang mga kauban sa trabaho dili na kaayo makahahadlok, samtang ang tibuok-kalag nga pag-alagad mahimong mas makaiikag.​—Isaias 51:12; Roma 10:10.

Padayong Magmadasigon

Posibleng mabuntog ang mga babag sama sa tulo nga ato nang nahisgotan. Iniglupad na sa ayroplano, ang labing kusog nga puwersa sa makina ang normal nga gikinahanglan ingon man ang bug-os nga pagtagad sa mga tripulante sa paglupad. Iniglupad, ang mga makina mokaon ug mas daghang sugnod kay sa bisan haing ubang bahin sa paglupad. Sa susama, aron mabuntog ang negatibong mga hunahuna ug mga pagbati gikinahanglan ang bug-os nga paningkamot ug bug-os nga pagtagad. Ang pagsugod tingali mao ang labing malisod nga bahin, kasamtangan ang pag-uswag mas sayon sa dihang makab-ot na ang kadasig.​—Itandi ang 2 Pedro 1:10.

Ang padayong pag-uswag mahuptan pinaagi sa pagpamati dayon sa pagdasig sa Kasulatan. (Salmo 119:60) Kita makaseguro nga ang kongregasyon buot motabang. (Galacia 6:2) Labing hinungdanon, hinunoa, mao ang pagpaluyo sa Diyos nga Jehova. Sama sa giingon ni David, “dalayegon si Jehova, nga sa matag adlaw nagapas-an sa atong palas-anon.” (Salmo 68:19) Sa dihang atong itugyan ang atong kaugalingon diha sa pag-ampo, ang atong lulan mahimong mogaan.

Usahay, biyaan sa usa ka ayroplano ang dag-omon nga panahon, moagi sa lut-od sa panganod, ug molupad sa kapanganoran ngadto sa hayag kaayo nga adlaw. Kita usab makabiya sa negatibong mga hunahuna. Uban sa tabang sa Diyos, atong malagbasan ang lut-od sa panganod, sa mahulagwayong pagkasulti, ug kalipayan ang masanag, malipayong atmospera sa tibuok-kalibotang pamilya sa mga magsisimba ni Jehova.

[Hulagway sa panid 23]

Uban sa tabang ni Jehova, kita makabuntog sa mga babag sa hunahuna