Unsay Giingon sa Bibliya Bahin sa Paghatag?
Tubag sa Bibliya
Ang Bibliya nagdasig sa paghatag nga kinasingkasing ug sakto ang motibo. Gipakita sa Bibliya nga parehong makabenepisyo ang naghatag ug ang gihatagan. (Proverbio 11:25; Lucas 6:38) Si Jesus miingon: “Adunay labaw nga kalipay sa paghatag kay sa pagdawat.”—Buhat 20:35.
Sa unsang paagi makaayo ang paghatag?
Makaayo ang paghatag kon gihimo ni nga kinasingkasing. “Ipabuhat sa matag usa ang sumala sa iyang gihukom diha sa iyang kasingkasing,” miingon ang Bibliya, “dili nga kontragusto o pinugos, kay gihigugma sa Diyos ang malipayong maghahatag.”—2 Corinto 9:7.
Ang kinasingkasing nga paghatag maoy bahin sa “pagsimba” nga giuyonan sa Diyos. (Santiago 1:27) Ang tawong mahinatagon mitabang sa Diyos, kinsa nag-isip niana ingong pagpahulam. (Proverbio 19:17) Gitudlo sa Bibliya nga panalanginan sa Diyos ang mahinatagon.—Lucas 14:12-14.
Unsa ang dili maayong klase sa paghatag?
Kon manghatag aron makabentaha. Pananglitan:
Aron magpabilib.—Mateo 6:2.
Aron balosan.—Lucas 14:12-14.
Aron maluwas.—Salmo 49:6, 7.
Kon masuportahan ang binuhatan o kinaiya nga gidumtan sa Diyos. Pananglitan, dili maayong hatagag kuwarta ang mga tawong gamiton lang ni sa pagsugal, pagdroga, o paghuboghubog. (1 Corinto 6:9, 10; 2 Corinto 7:1) Dili pod maayong mohatag niadtong makasuportar unta sa kaugalingon pero dili motrabaho.—2 Tesalonica 3:10.
Kon mapasagdan ang gihatag sa Diyos nga obligasyon. Ang Bibliya nagtudlo nga kinahanglang suportahan sa mga ulo sa pamilya ang panginahanglan sa iyang pamilya. (1 Timoteo 5:8) Dili maayo kon sobra siyang manghatag sa uban nga mapasagdan na ang iyang pamilya. Gisaway gani ni Jesus kadtong dili mosuporta sa ilang tigulang nga ginikanan kay nangangkon nga ang ilang gipanag-iya “gasa nga gipahinungod [na] sa Diyos.”—Marcos 7:9-13.