“Mga Bahandi Pinaagi sa Bakakon nga Dila . . . Usa ka Gabon”

KARONG mga panahona, ang pagpamakak ug panikas kasagarang giisip nga makataronganon​—ug daw malamposon​—nga mga taktika sa negosyo. Tinuod kini sa mga panahon sa Bibliya. Nagsulat si salmistang Asaph maylabot kanila nga “ming-uswag sa ilang paagi sa pangabuhi,” sa malimbongong mga plano. Makita sila nga “kanunayng haruhay” tungod sa bahandi nga nahatag kanila sa ilang panglimbong.​—Salmo 73:8, 12.

Apan, ang mga Kristohanon karon, kinahanglang maglikay ‘sa paghigugma sa malimbongong ganansiya’ ug sa pagdangop sa hanap kun tinikas nga mga paagi sa negosyo. (1 Pedro 5:2) Ang Proverbio 21:6 nagpasidaan: “Ang pagbaton ug mga bahandi pinaagi sa usa ka bakakong dila maoy usa ka gabon nga ginapalid, ug ngadto sa nagapangita sa kamatayon.” Oo, ang tanang “mga bahandi” nga nabatonan pinaagi sa pagpamakak ug panikas seguradong lumalabay sama sa “gabon,” nga mahanaw sama sa alisngaw. “Ang mga bahandi sa daotan walay kapuslanan” sa kadugayan. (Proverbio 10:2) Sa pagkatinuod, ang bakakon “nagapangita sa kamatayon” pinaagi sa pagpadayon sa makamatayng dalan. Mamubo ang iyang kinabuhi nga wala sa panahon sanglit mosumbalik ang iyang mga daotang laraw. (Itandi sa Ester 7:10.) O labing menos, taposon ang iyang kinabuhi sa adlaw sa paghukom sa Diyos.