TIGMO
Usa ka pamulong nga makapalibog. Ang Hebreohanong pulong alang sa tigmo mahimong hubaron usab nga ‘dili tin-aw nga pamulong’ o ‘makapalibog nga pangutana.’ (Itandi ang Dan 8:23, ftn sa Rbi8.) Ang mga tigmo gipalahi sa yanong sinultihan nga daling masabtan. (Num 12:8) Kining pulonga usahay gigamit ingong usa ka ekspresyon nga sama sa “panultihon,” tungod kay ang tigmo mahimong usa ka pahayag nga puno sa kahulogan apan gisulti diha sa tulugkarong pinulongan. (Sal 49:4) Ang samang Hebreohanong pulong nga gihubad nga “mga tigmo,” sa lain nga konteksto, gihubad usab nga “makapalibog nga mga pangutana.” (2Cr 9:1) Ang pagtagik ug tigmo, nga sagad naglakip ug makapalibog apan tukmang analohiya, nagkinahanglan ug idlot nga pangisip, ug ang pagsulbad sa maong tigmo nagkinahanglan ug katakos nga masabtan ang kalangkitan sa mga butang ngadto sa usag usa; busa ang Bibliya naghisgot sa mga tigmo ingong produkto sa maalamong mga tawo ug ingong usa ka butang nga matugkad lamang sa usa ka tawo nga may pagsabot.—Pr 1:5, 6.
Ang Bibliya mismo naundan ug mga tigmo nga naglangkit sa mga katuyoan ni Jehova. (Sal 78:2-4) Kini maoy mga pulong nga sa sinugdan makapalibog sa magbabasa; kini tingali gituyo nga lisod-sabton, nga migamit ug makahuloganong mga pagtandi nga gituyong dili masabtan sa mga tawo sa panahon nga kini unang gisulat. Pananglitan, sa Zacarias 3:8 si Jehova sa matagnaong paagi naghisgot sa “akong alagad nga mao ang Turok,” apan wala niya ipatin-aw niini nga teksto nga kining usa maoy usa ka turok, o usa ka kaliwat, sa harianong linya ni David ug nga sa pagkatinuod kining maong usa mao ang kaugalingong Anak sa Diyos nga niadtong higayona didto pa sa langit nga ipanganak unya sa usa ka ulay nga kaliwat ni Haring David. Ug ang Pinadayag 13:18 nag-ingon nga “ang numero sa mapintas nga mananap” giingong “unom ka gatos ug kan-umag-unom,” apan niini nga teksto wala isaysay ang kahulogan sa maong numero.
Usahay ang mga tigmo gigamit, dili sa pagpalibog sa mga tawong nakadungog niini, kondili lagmit aron sa pagpukaw sa interes ug aron ipaabot ang mensahe nga mas tin-aw. Ingon niini ang tigmo bahin sa duha ka agila ug sa paras, nga gipahayag ngadto sa balay sa Israel pinaagi sa manalagnang si Ezequiel. (Eze 17:1-8) Dihadiha human niya isulti ang tigmo, si Ezequiel gisugo ni Jehova sa pagsukna sa katawhan kon nasabtan ba nila kini ug dayon ipatin-aw kini ngadto kanila.
Ang pipila ka tigmo gisulti aron tagnaon sa mga tawo, ug sagad kini ipresentar nga samag balak, sama sa tigmo nga gipahayag ni Samson ngadto sa mga Filistehanon. Sa dihang siya miingon: “Gikan sa magkakaon may migula nga makaon, ug gikan sa kusgan may migula nga matam-is,” siya tinuyong migamit ug mga pagtandi nga dili daling masabtan. (Huk 14:12-18) Ang iyang tigmo gipasukad sa usa ka personal niyang kasinatian dili pa dugay una pa niini sa dihang iyang gikahig ang dugos gikan sa patayng lawas sa usa ka leyon diin didto kini gipondo sa panon sa mga putyokan.—Huk 14:8, 9.