LEKSIYON 37
Kon Unsay Giingon sa Bibliya Bahin sa Trabaho ug Kuwarta
Nabalaka na ba ka sukad bahin sa trabaho o kuwarta? Lisod tingaling balansehon ang pag-atiman sa atong panginahanglan ug ang pagsimba kang Jehova sa kinamaayohang paagi. Ang Bibliya naay praktikal nga tambag nga makatabang nato.
1. Unsay giingon sa Bibliya bahin sa trabaho?
Gusto sa Diyos nga mag-enjoy ta sa atong trabaho. Ang Bibliya nag-ingon nga “wala nay mas maayo pa alang sa tawo kay sa . . . malipay sa iyang paghago.” (Ecclesiastes 2:24) Si Jehova kugihan kaayo. Kon kugihan pod ta sama niya, mapalipay nato siya ug malipay pod ta.
Ang trabaho importante. Pero dili gyod nato tugotan nga mahimo ning mas importante kay sa atong pagsimba kang Jehova. (Juan 6:27) Siya nagsaad nga kon unahon nato siya, iyang itagana ang atong materyal nga panginahanglan.
2. Unsa ang balanseng panghunahuna bahin sa kuwarta?
Uyon ang Bibliya nga “ang salapi [o, kuwarta] panalipod,” pero nagpasidaan pod ni nga dili gyod ta magmalipayon kon kuwarta ang atong unahon. (Ecclesiastes 7:12) Busa gidasig ta nga dili higugmaon ang kuwarta kondili ‘magmakontento kon unsay naa nato.’ (Basaha ang Hebreohanon 13:5.) Kon kontento ta sa kon unsay naa nato, dili ta mobati nga morag pirmeng naay kulang sa atong kinabuhi. Malikayan nato nga magkautang-utang. (Proverbio 22:7) Ug dili ta mabiktima sa pagpanugal ug sa pag-apil sa mga negosyo nga dali kunong makapadato.
3. Sa unsang paagi nato magamit ang kuwarta nga dili lang para sa atong kaugalingon?
Si Jehova mahinatagong Diyos, ug ato siyang gisundog dihang kita “magmahinatagon, andam sa pagpaambit.” (1 Timoteo 6:18) Magamit nato ang atong kuwarta nga dili lang para sa atong kaugalingon pinaagi sa pagsuportar sa kongregasyon ug sa pagtabang sa nanginahanglan, ilabina sa atong mga igsoon sa pagtuo. Ang pinakaimportante kang Jehova, dili ang gidaghanon sa atong ihatag, kondili ang atong motibo sa paghatag. Kon kinasingkasing tang magmahinatagon, malipay ta ug mapalipay nato si Jehova.—Basaha ang Buhat 20:35.
TUN-IG DUGANG
Sayra ang mga kaayohan kon kontento ta ug kon husto ang atong panghunahuna bahin sa trabaho.
4. Ang atong paagi sa pagtrabaho magpasidungog kang Jehova
Ang atong relasyon kang Jehova angayng mag-impluwensiya kon unsay atong pag-isip sa trabaho. I-play ang VIDEO, ug dayon hisgoti ang mosunod nga mga pangutana:
Sa video, unsay giganahan nimo sa tinamdan ug binuhatan ni Jason sa trabahoan?
Unsay iyang gihimo nga nagpakita nga balanse ang iyang panghunahuna bahin sa trabaho?
Basaha ang Colosas 3:23, 24, ug dayon hisgoti kini nga pangutana:
Nganong importante kon unsay atong panghunahuna bahin sa trabaho?
Ang trabaho importante. Pero dili gyod nato tugotan nga mahimo ning mas importante kay sa atong pagsimba kang Jehova
5. Ang pagkakontento makahatag natog kaayohan
Daghan ang naningkamot pag-ayo aron naa silay daghang kuwarta. Pero lahi ang tambag sa Bibliya. Basaha ang 1 Timoteo 6:6-8, ug dayon hisgoti kini nga pangutana:
Unsay gitambag sa Bibliya nga atong buhaton?
Bisag dili ta dato, puwede tang magmalipayon. I-play ang VIDEO, ug dayon hisgoti ang mosunod nga pangutana:
Bisag kini nga mga pamilya dili dato, nganong malipayon sila?
Pero komosta kon daghan na tag nabatonan ug gusto pa tag dugang? Si Jesus mihatag ug ilustrasyon aron ipakita ang kapeligrohan niini. Basaha ang Lucas 12:15-21, ug dayon hisgoti kini nga pangutana:
Unsay imong nakat-onan sa ilustrasyon ni Jesus?—Tan-awa ang bersikulo 15.
Basaha ug ikomparar ang Proverbio 10:22 ug 1 Timoteo 6:10. Dayon hisgoti kini nga mga pangutana:
Para nimo, unsay mas importante? Naa kay maayong relasyon kang Jehova o naa kay daghang kuwarta? Ngano?
Unsang mga problema ang moresulta kon ang atong panahon naa na lang sa pagpangitag kuwarta?
6. Itagana ni Jehova ang atong mga panginahanglan
Masulayan ang atong pagtuo kang Jehova dihang naa tay problema bahin sa trabaho ug kuwarta. I-play ang VIDEO aron imong makita kon unsay atong mahimo dihang makaeksperyensiya ta niana nga mga problema, ug dayon hisgoti ang mosunod nga mga pangutana:
Sa video, unsang mga problema ang naeksperyensiyahan sa brader?
Unsay iyang gihimo sa pag-atubang sa maong mga problema?
Basaha ang Mateo 6:25-34, ug dayon hisgoti kini nga pangutana:
Unsay gisaad ni Jehova nga iyang himoon para niadtong nag-una kaniya?
ANG UBAN MOINGON: “Kinahanglan kong maningkamot para sa akong pamilya, maong dili ko makatambong ug tigom kada semana.”
Unsang teksto ang nagkombinsir nimo nga ang pag-una sa pagsimba kang Jehova mao gyod ang pinakamaayong desisyon?
SUMARYO
Ang trabaho ug kuwarta importante, pero dili gyod nato tugotan nga makabalda ni sa atong pag-alagad kang Jehova.
Review
Unsay makatabang aron makabaton kag balanseng panghunahuna bahin sa trabaho?
Unsay mga kaayohan kon kontento ka?
Unsaon nimo pagpakita nga naa kay pagsalig sa saad ni Jehova nga iyang tagan-an ang iyang katawhan?
SUSIHA
Susiha kon nag-ingon ba ang Bibliya nga daotan ang kuwarta.
Sayra kon unsang klase sa paghatag ang makapalipay sa Diyos.
Ang pagpanugal ba dili makadaot?
Sayra kon unsay nakapabag-o sa usa ka tawo nga sugarol ug kawatan.
“Hilig Kaayo Ko sa Karera sa Kabayo” (Ang Bantayanang Torre, Nobyembre 1, 2011)