Ang Hunahuna sa Bibliya

“Ang Bunal sa Pagdisiplina”—Kinaraan na Ba?

“Ang mga binuang nabugkos diha sa kasingkasing sa usa ka bata; ang bunal sa pagdisiplina magapalabog niana sa halayo gikan kaniya.”​—Proverbio 22:15.

“Bisag unsang pisikal nga silot maoy pagdagmal sa pagbati ug angayng dili uyonan.”​—Parents Anonymous.

ANG paghisgot sa Bibliya sa “bunal sa pagdisiplina” nakasugnib ug mainitong panaglalis. Masabot kini, kay kada tuig linibo ka bata ang mamatay ingong laktod nga sangpotanan sa pisikal nga pagdagmal sa ginikanan. Tingali mao kini ang katarongan nganong ang usa ka komentaryo sa Bibliya nagtuis sa pag-uyon sa Bibliya sa pisikal nga silot ingong yanong “usa ka ideya nga gipasikad sa naandang pagtuo sa mga tawo nga nagkinabuhi sa kapanahonan sa Bibliya.”

Apan ang kultural nga mga opinyon wala magdasig sa Bibliya​—ang nagdasig mao ang Diyos. (2 Timoteo 3:16) Ang iya bang mga komento bahin sa “bunal sa pagdisiplina“ dili makataronganon? Hinungdanon nga atong susihon “ang bunal“ diha sa iyang konteksto. Sa pag-ilustrar: Ang tinagsa nga piraso sa usa ka jigsaw puzzle dili masabtan. Pagkatapos lamang nga mapatakdo silang tanan nga ang usa makakita sa tibuok nga hulagway. Sa susama, “ang bunal“ maoy usa lamang ka piraso sa puzzle. Aron makit-an ang tibuok hulagway, kinahanglang atong ipatakdo “ang bunal“ sa ubang mga prinsipyo sa Bibliya nga may kalabotan sa disiplina.

Usa ka Balanseng Panlantaw

Ang Bibliya ba nagsugyot lamang ug pisikal nga silot? Tagda ang mosunod nga tambag:

• “Ayaw itukmod ang imong anak sa kaligutgot.“

• “Ayaw palabihig-buyag ang inyong mga bata o imong kuhaon ang tanang kadasig gikan kanila.“

‘Kana mas labawng rasonable kay sa tambag sa Bibliya,’ ang pila tingali moingon. Apan kini maoy tambag sa Bibliya. Natala kini sa Efeso 6:4 (The New Jerusalem Bible) ug Colosas 3:21 (Phillips).

Oo, ang panlantaw sa Bibliya maoy makataronganon. Kana nagaila nga ang pisikal nga silot sagad dili ang labing epektibo nga pamaagi sa pagtudlo. Ang Proverbio 8:33 nag-ingon, “Pamatia ang pagdisiplina” dili, ‘Batia ang pagdisiplina.’ Ug ang Proverbio 17:10 nagtudlo nga “ang usa ka pagsaway motidlom sa halalom sa usa nga may salabotan kay sa usa ka gatos ka latos sa usa ka buang.” Dugang pa, ang Deuteronomio 11:19 nagrekomendar sa makasanta nga pagdisiplina, nga magpahimulos sa kasagarang nga higayon sa pagsilsil sa moral nga mga prinsipyo diha sa usa ka bata. Mao nga, ang panlantaw sa Bibliya bahin sa pagdisiplina maoy balanse.

Unsa na man ang Mahitungod sa “ang Bunal”?

Sa gihapon, ang Bibliya tinuod naghisgot sa “bunal” sa pagdisiplina. (Proverbio 13:24; 22:15; 23:13, 14; 29:15) Sa unsang paagi kini pagasabton?

Ang pulong “bunal” gihubad gikan sa Hebreohanon nga pulong sheʹvet. Alang sa mga Hebreohanon, ang sheʹvet nagkahulogan ug usa ka tukog o usa ka sungkod, sama sa ginagamit sa magbalantayg karnero. Dinhing kontekstoha ang bunal sa awtoridad nagasugyot sa mahigugmaong paggiya, dili bagis nga walay kaluoy.​—Salmo 23:4.

Ang sheʹvet sa subsob gigamit sa simboliko diha sa Bibliya, naghawas sa awtoridad. (2 Samuel 7:14; Isaias 14:5) Sa dihang nagpunting sa awtoridad sa ginikanan, “ang bunal“ wala lang magpasabot sa pisikal nga silot. Kana naglakip sa tanang porma sa pagdisiplina, nga sa subsob dili kinahanglang pisikal. Ug sa dihang ang pisikal nga pagdisiplina ang gamiton, kana sa kasagaran tungod kay ang ubang mga pamaagi wala magmalamposon. Ang Proverbio 22:15 nag-ingon nga ang binuang maoy “nabugkos“ (“naugbok,” NJB; “halalom nga pagkagamot,“ The New English Bible) sa kasingkasing sa usa nga nagadawat sa pisikal nga pagdisiplina. Labaw pa sa binata lamang nga tinonto ang nalangkit.

Sa Unsang Paagi ang Disiplina Ipahamtang?

Sa Bibliya, ang disiplina pirmeng nalangkit sa gugma ug kalumo, dili sa kasuko ug kawalay kaluoy. Ang hanas nga tigmaymay kinahanglang “malumo ngadto sa tanan, . . . makapugong ubos sa kadaotan, nga nagatudlo nga may kalumo kanilang dili maayog panggawi.”​—2 Timoteo 2:24, 25.

Busa, ang disiplina dili usa ka emosyonal nga pahungawanan alang sa ginikanan. Inay, kana usa ka pamaagi sa pagtudlo. Sa ingon, kana kinahanglang motudlo sa usa ka nakasalang anak. Sa dihang ipahamtang sa kasuko, ang pisikal nga pagdisiplina motudlo ug dili husto nga leksiyon. Kana motagana sa panginahanglan sa ginikanan, dili sa iyaha sa bata.

Dugang pa, ang epektibong disiplina may mga utlanan. “Pagasawayon ko ikaw sa tukma nga sukod,“ ingon ni Jehova sa iyang katawhan sa Jeremias 46:28. Kini ilabina nga importante nga pagahinumdoman sa dihang nagapahamtang ug pisikal nga disiplina. Ang pagbunal ug pagyugyog sa usa ka bata mahimong motultol sa kadaot sa utok o ngani kamatayon.a Ang paghinobra sa gihunahuna nga tumong sa pagdisiplina​—sa pagtul-id ug sa pagtudlo—​mahimong motultol sa pagdagmal sa bata.b

Ang Bibliya Wala Magtuboy sa Pagdagmal

Una pa tul-ira ang iyang katawhan, si Jehova nag-ingon: “Ayaw kahadlok, . . . kay ako nagauban kanimo.” (Jeremias 46:28) Ang disiplina kinahanglan nga dili mobiya sa bata nga mobating sinalikway. Inay, ang bata angayng makasabot nga ang ginikanan maoy ‘kauban niya’ ingong mahigugmaon, mapaluyohong pagdasig. Kon ang pisikal nga disiplina gihunahuna nga kinahanglanon, ang bata kinahanglang makasabot ngano. Ang Proverbio 29:15 nag-ingon nga “ang bunal ug ang pagbadlong maoy nagahatag ug kaalam.”

Makapasubo nga karong adlawa daghan ang nagagamit sa “bunal“ sa ginikananhong awtoridad nga hinobra. Bisan pa, walay makit-an nga sayop sa balanseng mga prinsipyo sa Bibliya. (Itandi ang Deuteronomio 32:5.) Sa dihang atong tagdon ang “bunal“ diha sa iyang konteksto, atong makita nga kana nagasilbi sa pagtudlo sa mga bata, dili sa pagdagmal kanila. Maingon sa ubang mga butang, ang Bibliya napamatud-ang “may kapuslanan sa pagpanudlo, alang sa pagpamadlong, alang sa pagpanul-id, ug pagdisiplina sa pagkamatarong.”​—2 Timoteo 3:16.

[Mga footnote]

[Picture Credit Line sa panid 26]

The Bettmann Archive