‘Pagpangita sa Makapahimuot nga mga Pulong, Hustong mga Pulong’
“ANG magwawali nangita ug makapahimuot nga mga pulong ug ang pagsulat sa hustong mga pulong sa kamatuoran.” (Ecclesiastes 12:10) Unsa unya ka bililhon ang ‘makapahimuot, hustong mga pulong’ nga binase sa dinasig nga Kasulatan! Sila gitandi sa mga “mansanas nga bulawan diha sa linala nga salapi,” maartihon ug halangdon sa bisan unsang okasyon ug bililhon kaayo diha sa makaguol nga mga kahimtang.—Proverbio 25:11.
Sa atong adlaw ang Dakong Magwawali, si Jesu-Kristo, nagataganag espirituwal nga kahinguhaan nga labaw pa sa gitagamtam sa katawhan sa Diyos niadto ilalom sa karaang mga hari sa Israel. (Mateo 12:42) Kapin sa siglo, ang makapahimuot, hustong mga pulong sa kamatuoran nga naghisgot sa halos tanang bahin sa kinabuhi ang ginapresentar sa mga publikasyon sa Watch Tower Society ug kaylap nga giapod-apod diha sa daghang mga pinulongan. Daghang pamilya ug mga indibiduwal sa ingon ang nakatigom sa ilang kaugalingong mga balay ug usa ka librarya sa kasaligang mga reperensiya nga nagpunting sa Bibliya. Dugang pa, kadaghanan sa mga kongregasyon sa mga Saksi ni Jehova may maayong mga librarya nga magamit sa ilang mga Kingdom Hall.
Apan, ang pagpangita sa makapahimuot, hustong mga pulong nga gikinahanglan sa usa ka partikular nga kahimtang sa gihapon nagkinahanglag panukiduki. Nag-ila niini, sukad sa sayong kasaysayan niini, ang Watch Tower Society nakapatik nag mga indise sa iyang mga publikasyon.—Tan-awa ang kahon sa panid 28 ug 29.
Usa ka Bag-ong Polisa
Ang tuig 1985 nagsugod sa bag-ong kapitulo sa kasaysayan sa Watch Tower Publications Indexes. Siyam ka mas unang mga Indise ang giusa ug giharmoniya diha sa usa ka tomo nga nagkobre sa 1930 hangtod 1985, usa ka proyekto nga nagkinahanglag 14 ka tuig sa paningkamot. Ang mga benepisyo sa maong usa-ka-tomo nga Indise nga nagkobre sa daghang katuigan mitultol sa 1986 ngadto sa usa ka polisa, ang pagpatik dayon sa sunodsunod nga mga Indise. Matag tuig, kasagaran sa misunod upat ka tuig, usa ka brosyur nga Indise ang nagkobre sa usa, duha, tulo, ug unya upat ka tuig. Sa matag lima ka tuig usa ka gahig-hapin nga Indise ang mag-usa sa tanang mga Indise gikan sa 1986 pataas, sama sa 1986-90,1986-95, ug padayon. Busa, dili na kinahanglang mokonsulta pa sa kapin sa tulo ka mga Indise: ang 1930-1985 Index, ang bag-o gahig-hapin nga Indise, ug ang bag-o nga brosyur.
Ang Indise Giandam Tungod Kanimo
Ang unang bahin sa matag Indise maoy usa ka indise sa ulohan. Sa pag-andam sa usa ka indise sa ulohan, duha ka pangutana ang gihinumdoman: (1) Unsang impormasyon ang kinahanglang ibutang sa indise? (2) Asa tan-awa sa usa kanang impormasyona?
Ingong magbabasa, ikaw dili kaayo interesado sa pagpangita sa matag gagmay nga komento sa usa ka ulohan. Sanglit ikaw sa katibuk-an motan-aw sa impormasyon nga bililhon o tinuod nga hinungdanon, ingon niini ang pag-indise. Apan ang maong materyal dili na kinahanglang patas-on pa. Ang usa ka pagtala sa Indise mahimong usa ka hugpong lang sa pulong, sama sa usa ka pulong sa polisa sa Society sa usa ka butang. O mahimong kini molangkob sa tibuok artikulo, bisan usa ka publikasyon. Apan, sagad, ang pagtala moabot ug ubay-ubayng mga parapo sa panaghisgot.
Ang pangutana kon asa makita ang mga reperensiya diha sa Indise hinungdanon usab, kay ang mga magbabasa managlahig hunahuna ug motan-aw ubos sa nagkalainlaing mga ulohan. Pananglitan, ang impormasyon mahitungod sa Torre sa Babel makita ubos sa TOWER OF BABEL. Apan ang uban nga mga magbabasa mahimong motan-aw ubos sa BABYLON, ARCHAEOLOGY, O LANGUAGE(S), depende sa aspekto sa ulohan nga gikaikagan nila. Busa, ang mga paningkamot gihimo sa pag-usob sa mga reperensiya ubos sa lainlain tukmang mga ulohan, giisip ang mga magbabasa diha sa nagkadaiyang pangidaron ug mga kagikan ug sila may lainlaing katuyoan.
Kon sa Unsang Paagi Makatabang ang Indise Kanimo
Samag usa ka mapa ang Indise motabang lamang kanimo kon mogamit ka niana. Unsay gidahom nimong makita diha sa indise sa ulohan o sa seksiyon sa indise sa Kasulatan nga nagsunod niana?
Ang mga reperensiya sa seksiyon sa indise sa Kasulatan maoy materyal nga nagpatin-aw sa tagsatagsa ka bersikulo. Hayan makita nimo nga gipatin-aw ang hitabo sa gibatbat ang mga pulong sa tekso, kon nganong gisulat kini, ngadto kang kinsa gipadapat kini, o ang kahulogan sa matag mga pulong o hugpong sa mga pulong. Ang usa ka pananglitan mao ang hangyo diha sa modelong pag-ampo ni Jesus: “Ayaw kami dad-a sa pagsulay.” (Mateo 6:13) Nganong gipahayag kana nianang paagiha? Ang indise sa Kasulatan motabang kanimo niana.
Ang indise sa ulohan, ingon sa gipasabot sa ngalan niini, maoy usa ka indise mismo sa mga ulohan inay kay sa mga pulong o mga prase. Sa dihang mosulay sa pagpangita sa usa ka artikulo pinaagi sa iyang titulo, ang pipila ka mga magbabasa malisdan sa pagpangita niana. Kini nga suliran motungha kon walay pulong diha sa ulohan ang magpaila sa butang gihisgotan. Ang usa ka pananglitan mao ang artikulong “Unsa ka Daghan ang Sobra Na?” nga naghisgot sa epekto sa alkohol. Nahinumdom sa unod sa artikulo, ikaw tingali mopakli sa mga ulohang ALCOHOLIC BEVERAGES o DRINKING diha sa Indise, ug imong makita ang reperensiya didto.
Ang Indise bililhon kaayo sa pagpangita sa impormasyon sa mga problema nga imong ginaatubang. Pananglitan, kon usa ka ginikanan, mobati ka bag kaguol sa imong paningkamot sa pagdisiplina ug paggiya sa imong mga anak? Ubos sa CHILDREN makita nimo ang mga reperensiya nga motakdo nga mohatag pagsabot sa ilang mga hunahuna, pagbati, ug mga panginahanglan. Apan, ubos sa ulohang CHILD TRAINING, makita nimo ang mga reperensiya sa pagtudlo ug pagdisiplina sa tanan nilang mga aspekto.
Ang Watch Tower Society usahay makadawat ug mga sulat nga nangayog tabang sa pagsulbad sa mga problema sa kaminyoon o mga pangutana sa katukma sa tinong mga panagsuod sa kaminyoon. Bisag motubag ang Sosyedad, ang samang sensitibo, praktikal nga tambag makita pinaagi sa pagpakli sa ulohang MARRIAGE, uban sa mga sub-ulohan niini “mga suliran” ug “sekso” o “seksuwal nga mga relasyon,” ug sa pagtan-aw sa gilistang mga reperensiya.
Madawat usab ang mga sulat gikan niadtong nag-antos sa depresyon o kaguol sa hunahuna. Ang pasalig pag-usab ug tabang gitagana pinaagi sa sulat hayan mas madali nga makita diha sa inyong kaugalingong mga librarya o sa usa diha sa lokal nga Kingdom Hall pinaagi sa pagtan-aw sa ulohang DEPRESSION ug MENTAL ILLNESS diha sa Indise. Ang mga artikulong nagbatbat sa pagsagubang sa mga sakit sa hunahuna, mga tambal nga mabatonan, ug makatandog nga mga kasinatian niadtong kanhi naguol gipunting dinhi.
Ikaw usa ba ka batan-on? Ikaw tingali may mga kabalaka bahin sa kaminyoon, pamilyahong kinabuhi, tunghaan, relasyon nimo uban sa mga ginikanan, ug uban pa. Ang pangunang ulohan YOUTHS may mga reperensiya ubos sa tanang mga sub-ulohan ug daghan pa. Dugang pa, ang mga ulohan sama sa RELATIONSHIPS, SCHOOLS, CAREER, ug COURTSHIP may dagkong butang nga ikatanyag. Sa mga taho sa tunghaan, ang Indise magtudlo kanimo ngadto sa usa ka maayong materyal sa kinaiyahan, siyensiya, droga, ekonomiya, ug daghan pang ubang mga ulohan.
Mga Benepisyo alang sa Tanang Pangidaron
Usa ka 81-anyos nga babaye nagsulat: “Ang mga libro ug magasin samag usa ka minahan sa bulawang impormasyon ug espirituwal nga kalig-on—ug ang Indise nagpagawas niini nga mga bulawan.” Ang usa ka inahan nga may mga anak nga otso ug nuybe anyos ang panuigon miingon: “Ako karon naglibog kon unsaon nako pagbuhat kadto kon wala kini. Kini nag-agak kanako ngadto sa mga tubag sa daghang mga pangutana nga gikalibogan ko sa hataas nga panahon ug naghimog mga panukiduki panahon sa pagpangandam sa mga tigom sa kongregasyon nga mas masayon. . . . Isugilon ko usab kaninyo kon sa unsang paagi kini nga publikasyon nakatabang sa among pamilya sa pagtuon sa Bibliya. . . . Sa dihang ang akong bana nagpapili sa batang mga babaye kon unsay buot nilang buhaton, buot nila kanunay ang panukiduki ginamit kini nga Indise. Sila malingaw sa pagpilig usa ka ulohan nga ilang gikaikagan, sama sa ilang paboritong mga hayop o sa nagkalainlaing mga nasod, ug sila nakaarang sa pagtan-aw sa impormasyon uban sa diyutayng tabang. Kini nagtudlo usab kanila nga ang pagtuon sa Bibliya maoy makalingaw.”
Ang pagpangita sa makapahimuot nga mga pulong ug hustong mga pulong sa kamatuoran may dili-mabayarang mga ganti. Ang paningkamot sa magwawali nagataganag mga benepisyo nga saylo pa sa iyang orihinal nga katuyoan, kay ang maong mga pulong nagsilbing pagdasig ug paggiya sa mga alagad ni Jehova karong adlawa. Ang among nahiusang paningkamot usab gipanalanginan ni Jehova, uban sa mga resultang molungtad sa walay kataposan.—Proverbio 3:13-18, 21-26.
[Kahon/Hulagway sa panid 28, 29]
Ang Unang mga Indise
Sa 1902 usa ka linaing edisyon sa Holman Parallel Edition Bible gipatik alang sa Watch Tower Society, ug kini naundan sa masangkarong tabang nga giandam sa Sosyedad. Ang apendiks niini naundan sa ulohan ug sa mga indise sa Kasulatan sa mga serye sa Millennial Dawn nga mga libro (sa ulahi nailhang Studies in the Scriptures), duha ka pangunang bokleta, ug ang Zion’s Watch Tower alang sa 1879-1901.
Ang Berean Bibles sa 1907 ug human niadto nagtagana ug samang mga indise. Kini gipulihan niadtong 1922 sa masangkarong mga indise sa tanang mga publikasyon sa Sosyedad. Kini nga mga indise makita diha sa kataposang pito ka mga tomo sa gitapik pag-usab nga Watch Tower (1879-1919). Hangtod niining adlawa ang ulahi mao ang pangunang mga paagi sa pagpangitag materyal nga gipresentar sa unang mga publikasyon sa Watch Tower Society.
Apan, sa misunod nga 40 ka tuig ang panukiduki sa mga publikasyon nga giluwat human sa 1919 angayng himoon pinaagi sa paggamit sa nagkatibulaag nga mga indise diha sa likod sa mga libro ug diha sa kataposang isyu sa magasin sa matag tuig. Apan sa 1959 ang Sosyedad mihimog dakong proyekto sa pagtaganag usa ka ulohan ug indise sa Kasulatan diha sa usa ka tomo alang sa Iningles nga mga publikasyon. Ang usa ka tem gitigom nga naglakip sa mga membro nga opisyales sa hedkuwarter, graduwadong mga misyonaryo sa Watch Tower School sa Gilead, ug bisan ang nagapanaw nga mga magtatan-aw sa Siyudad sa New York. Human sa usa ka tuig ug tunga sa gihiusang paningkamot sa 18 ka dedikadong mga magbubuhat, ang unang Watch Tower Publication Index, uban ang mga seksiyon alang sa ulohang gihisgotan ug sa gipatin-aw nga mga kasulatan, nga nagkobre sa 31 ka tuig gikan sa 1930 hangtod sa 1960, ang giluwat. Kadto maoy unang pagluwat ngadto sa nalipay nga mga nanambong sa 1961 Nahiusang mga Magsisimba nga mga Asembliya.
Sukad niadto, usa ka Watch Tower Publication Index ang makita sa Iningles matag tuig, uban sa usa ka gahig-hapin giusang Indise sa kada lima ka tuig.