“Usa ka Pulong Gisulti sa Tukmang Panahon”
“Ang usa ka pulong gisulti sa tukmang panahon maoy sama sa mga mansanas nga bulawan diha sa linala nga salapi,” nagaingon ang Proverbio 25:11. Ang atong mahunahunaong mga pulong ug malulutong mga binuhatan sa hinay makaduso sa kasingkasing sa tawong matarong ubay sa dalan nga inuyonan ni Jehova. Ang ato tingaling nasulti o nabuhat, bisan sa mga tuig nga miagi, tingali mahinumdoman pang may kahamuot sa laing tawo. Pananglitan, samtang nagduaw sa usa ka kongregasyon, ang usa ka magtatan-aw sa sirkito ug iyang asawa maoy mga bisita sa usa ka igsoong babayeng bag-o pang nabawtismohan. Ang asawa sa magtatan-aw sa sirkito nagpadalag sulat-pasalamat sa pagkamaabiabihon nga gipakita. Kapig pito ka tuig sa ulahi, iyang nadawat ang mosunod nga sulat:
“Gibati ko nga kinahanglan gayod nga ako mosulat ug mosulti kanimo nga dako ka kaayong tabang kanako latas sa katuigan bisan pag wala ka makaamgo niini. Ikaw ug si Jim akong bisita sa diyutayng paniudto, ug imo akong gipadad-ag nindot kaayong sulat-pasalamat. Kadto makapadasig kaayo, apan ang kasulatan maoy nakatandog sa akong kasingkasing, ug wala gayod nako kana hikalimti. Kadto maoy niadtong 1976. Ako lamang niadto sa among pamilya ang interesado sa kamatuoran. Gitun-an ko ang akong mga batang babaye ug naningkamot nga mahimong usa ka maayong asawa. Apan may panahong buot kong mogawas, nga mogawas sa kamatuoran, mogawas sa mga responsibilidad—mogawas lamang. Apan kadtong kasulatang imong gisulat kanako motukbil sa akong kasingkasing, ug ako moingon sa kaugalingon, ‘Pagkabuangbuang nako,’ ug ako nagpadayon.
“Walay laing butang nianang tanang walo ka tuig ang may ingong epekto kanako, ug buot kong mosulti kanimo bahin niini. Gawas sa kasulatan, ako nakahunahuna nga nindot kaayong ang usang puliki sama kanimo mogahin ug panahon sa pagpasalamat kanako tungod sa pagbuhat sa butang angay kong pagabuhaton.
“Ay, oo—ang kasulatan—2 Juan 8.
“Sandra”
Karong adlawa, ang bana ni Sandra bawtismado na ug kauban niyang magmamantala sa maayong balita. Usa sa duha nila ka anak babaye maoy regular payunir, ug ang laing anak babaye nag-auxiliary payunir sukad sa bag-o pa niyang graduwasyon sa hayskul.
Sa kataposan, unsay ginaingon sa 2 Juan 8? “Bantayi ninyo ang inyong kaugalingon, nga dili kamo kapildihan sa mga butang inyong gihagoan, apan nga inyong mabatonan ang bug-os nga ganti.”