Gidayandayanan ug Ariyos nga Bulawan
SUKAD sa kinaunahang kapanahonan, ang alahas nga bulawan gipabilhan ug maayo tungod sa bili ug katahom niini. Sa dihang nahimong primera ministro sa Ehipto, si Jose nakadawat ug kulentas nga bulawan gikan kang Paraon. (Genesis 41:42) Si Rebeka gihatagan ug bulawan nga singsing sa ilong ug duha ka pulseras nga bulawan, nga mokantidad ug mga $1,400 (T.B.) sa bili karong adlawa. (Genesis 24:22) Walay duhaduha, kining bililhong mga gasa gidawat nga may pagpasalamat ug gisul-ob nga may kahimuot.
Ang Bibliya naghisgot bahin sa mahulagwayong alahas nga labaw pag bili kay niadtong gisul-ob ni Jose ug Rebeka. Ang Proverbio 25:12 nag-ingon: “Ang ariyos nga bulawan, ug ang dayandayan sa lunsay nga bulawan, maoy usa ka maalamong tigbadlong diha sa nagapamating igdulungog.” Sa dihang ang usa ka magtatambag mohatag ug tambag pinasukad sa Pulong sa Diyos inay kay sa iyang kaugalingong hunahuna, sa pagkatinuod siya nagpaambit ug usa ka bililhong gasa. Ngano? Tungod kay sa katibuk-an ang maong tambag nagagikan kang Jehova mismo. Ang Bibliya nagtug-an kanato: “Ang disiplina ni Jehova, Oh anak ko, ayawg isalikway; ug ayaw kaligutgoti ang iyang pagbadlong, kay ang gihigugma ni Jehova iyang ginabadlong, maingon sa pagbadlong sa usa ka amahan sa anak nga iyang gikahimut-an.” (Proverbio 3:11, 12) Sa dihang ang namati mapainubsanong modawat ug mopadapat sa tambag, siya ingon sa daw nagdayandayan mismo ug ariyos nga bulawan. Sama kini sa giingon sa dinasig nga sanglitanan sa Bibliya: “Malipayon ang tawo nga nakakaplag sa kaalam, ug ang tawo nga nakakab-ot sa pagsabot, kay ang pagbaton niana ingon nga ganansiya mas maayo pa kay sa pagbaton ug salapi ingon nga ganansiya ug ang pagbaton niini ingong abot labaw pa kay sa bulawan mismo.”—Proverbio 3:13, 14.