“Kaayohan sa Imong Pusod”
GITUOHAN nga ang hinungdan sa daghan kaayong balatian sa tawo mao ang emosyonal nga mga kapit-os sama sa kahadlok, kaguol, kasina, kasilag, pagdumot, ug pagbating sad-an. Tungod niini, pagkamakapahupay ang giingon sa Bibliya nga ang ‘pagkahadlok kang Jehova’ maoy “kaayohan sa imong pusod ug pangpalagsik sa imong mga bukog”!—Proverbio 3:7, 8.
Ang mga bukog mao ang nagapalig-on nga gambalay sa lawas. Busa, ang Bibliya naggamit sa mga pulong “mga bukog” sa masambingayong paagi, sa paghawas sa pagkatawo sa usa—ilabina sa dihang apektado sa dulot nga mga pagbati ug emosyon. Apan sa unsang paagi ang pagkahadlok kang Jehova maoy “kaayohan sa imong pusod”?
Ang mga eskolar sa Bibliya lainlaig opinyon mahitungod sa paghisgot sa “pusod” niini nga teksto. Ang usa ka komentarista nag-ingon nga tungod kay kini nahimutang sa “sentro sa lawas,” ang “pusod” mahimong maghawas sa tanang hinungdanong mga organo. Ang laing eskolar nagsugyot nga ang pulong “pusod” mahimong magkahulogan sa literal nga pusod, sama sa paggamit niini sa Ezequiel 16:4. Kon ingon niini, ang Proverbio 3:8 mahimong nagpasiugda sa atong panginahanglan sa bug-os nga pagdepende diha sa Diyos—sama rang ang usa ka walay-mahimo nga bata sa tiyan bug-os nga nagdepende sa iyang inahan aron makakaon. Ang lain pang ideya mao nga ang “pusod” mahimong magtumong dinhi sa mga kaunoran ug kaugatan sa lawas. Sa konteksto niini nga bersikulo, mahimo nga kining mga bahina gitandi sa “mga bukog”—ang mas gahi nga mga sangkap sa lawas.
Bisan unsa pa ang espesipikong kahulogan, usa ka butang ang tino: Ang pagpasundayag ug matahaong kahadlok kang Jehova maoy maalamong dalan. Ang pagsunod sa mga sukdanan sa Diyos makaamot sa atong pisikal nga kaayohan karon. Labaw pa niana, mahimo kitang inuyonan ni Jehova, nga motultol sa walay-kataposang kinabuhi diha sa hingpit nga panglawas—sa pisikal ug emosyonal—diha sa iyang umaabot nga bag-ong kalibotan.—Isaias 33:24; Pinadayag 21:4; 22:2.
[Picture Credit Line sa panid 32]
Dr. G. Moscoso/SPL/Photo Researchers