Lipaya ang Kasingkasing ni Jehova Pinaagi sa Paghupot sa Integridad!
“Kon kita mabuhi ug kon kita mamatay, kita iya ni Jehova.”—ROMA 14:8.
1, 2. (a) Nganong ang mga Saksi ni Jehova determinadong mohupot sa ilang integridad sa Diyos? (b) Apan unsang mga pangutana ang motungha?
MAAYO kaayong pagkapahayag nianang mga pulong ni apostol Pablo ang mga gibati sa bugtong matuod nga mga maghuhupot sa integridad niining ika-20ng siglo! Kon makapribilehiyo kita sa pagpadayong buhi ug pagkakitang magun-ob ang daotang sistema karon sa atong atubangan mismo, pagkamalipayon unya nato! Apan kon kita mamatay man sa pag-alagad sa Diyos, nan mamatuman kana. Sa bisan haing kahimtang, determinado kitang mahimong maunongong mga saksi sa atong Diyos, si Jehova. Atong huptan ang atong integridad kaniya. Ngano? Tungod kay mabuhi kun mamatay, kita iya gayod ni Jehova!
2 Apan, unsa ang integridad? Unsay gikinahanglan niana gikan kanato? Ug may kalainan ba sa Diyos ang atong paghupot sa integridad?
Integridad ug mga Kinahanglanon Niini
3. Sumala sa Bibliya, ang paghupot sa integridad nagkahulogan sa unsa?
3 Sa Pulong sa Diyos, ang integridad nagpasabot sa moral nga pagkamaayo ug pagkakompleto, pagkawalay-ikasaway ug pagkawalay-sala. Kini nagkahulogang dili-matarog nga debosyon sa pagkamatarong. Sa pagkamatuod, ang integridad nagkinahanglan sa dili-mabugto nga debosyon ngadto sa usa ka persona—ngadto kang Jehova nga Diyos. Oo, ang paghupot sa integridad nagkahulogan sa pagpadayon sa pagbuhat sa labaw nga kabubut-on ni Jehova.
4. Kinsa ang unang maglalapas sa integridad, ug gidani niya ang unang magtiayon sa pagbuhat sa unsa?
4 Ang unang maglalapas sa integridad mao ang espiritung linalang nga miagak sa unang magtiayon ngadto sa masukolong dalan batok sa ilang Maglalalang. May higayon si Adan ug si Eva sa pagpasundayag sa ilang integridad ngadto kang Jehova pinaagi sa pagtahod sa pagdili sa Diyos bahin sa kahoy sa kahibalo. Apan sa gipit-os sa Kaaway nga mahaylo sa kahakog, sila misupak. Ang ilang mga kasingkasing wala mapamatud-ing walay sala sa mga kalagdaan ni Jehova, ug wala sila makahupot sa integridad ngadto kaniya.—Salmo 119:1, 80.
5. Ang pagsukol ni Satanas nagpatungha sa unsang isyu, ug sa unsang paagi kini napamatud-an sa mga kasinatian sa matarong nga si Job?
5 Ang pagsukol ni Satanas nagpatungha sa isyu sa pagkamatarong sa pagkasoberano sa Diyos ibabaw sa tanan Niyang linalang, sa katungod ni Jehova sa pagpangayo sa bug-os nilang debosyon. Sa ingon ang isyu sa integridad sa tawo sa labaw nga kabubut-on sa Diyos nahimong bililhong bahin sa isyu sa unibersohanong pagkasoberano. Ang pamatuod niini makita sa kahimtang sa alagad ni Jehova si Job, usa ka tawong walay ikasaway, matul-id, ug mahadlokon sa Diyos. (Job 1:1) Si Job wala mobulag sa tukmang dalan sa Diyos. Ang seksuwal nga imoralidad walay gahom kaniya. Siya dili kay dili makataronganon sa panghukom o dili mahinatagon ngadto sa balong babaye, sa ilo, o sa kabos. Inay himoong saliganan ang materyal nga bahandi, si Job misalig sa bug-os sa Hataas Uyamot. (Job 31:7-40) Bisan pa niana ang Yawa nagpatuo nga si Job nag-alagad sa Diyos tungod sa mahakogong mga hinungdan. Bisan pag gitugotan ni Jehova si Satanas sa pagwagtang gikan kang Job sa iyang mga katigayonan ug sa iyang mga anak, napakyas ang Kinalabwang-limbongan sa pagbungkag sa integridad nianang tawong matul-id. Bisan ang sakit ug pagtamay sa mini nga mga maglilipay wala magpulos, kay si Job nagpamatuod nga maghuhupot sa integridad.—Job 1:6–2:13; 27:5, 6; 31:6; 42:8, 9.
6. Unsay gikinahanglan niadtong “iya ni Jehova”?
6 Sa ingon ang mga tawo may bililhon kaayong pribilehiyo nga makatabang sa pagbalaan sa balaang ngalan sa Diyos. Sa unsang paagi? Pinaagi sa paghupot sa integridad, sa pagpadayag nga sila maunongong nagapaluyo sa unibersohanong pagkasoberano ni Jehova. Nan, unsay gikinahanglan niadtong “iya ni Jehova”? Kinahanglang moalagad kita sa Diyos uban ang bug-os nga debosyon, nga dili gayod mahikalimot nga si Jehova maoy “Diyos nga nagapangayo sa linaing debosyon.”—Exodo 20:5.
Kita Makalipay sa Kasingkasing ni Jehova
7, 8. (a) Sanglit kita dili hingpit, sa unsang paagi atong mahuptan ang atong integridad ngadto sa Diyos? (b) Kon kita mga maghuhupot sa integridad, sa unsang paagi ang Proverbio 27:11 mapadapat kanato?
7 Sanglit kitang tanan dili hingpit, kita dili makakab-ot sa hingpit sa matarong nga mga sukdanan sa Diyos. Busa, ang atong paghupot sa integridad wala magpasabot sa pagkahingpit sa lihok o sinultihan. Hinunoa, kini nagkahulogan sa pagkabug-os sa kasingkasing, o pagkakompleto sa debosyon sa kasingkasing. Sa ingon, bisan pag si David nakahimog seryosong mga sala, siya ‘milakaw nga may integridad sa kasingkasing.’ (1 Hari 9:4) Kay gidawat ang pagbadlong, iyang gitul-id ang iyang dalan ug sa ingon ang iyang kasingkasing nahupong sa tiunay nga gugma kang Jehova. (Salmo 26:1-12) Kita, usab, makapasundayag nianang gugmaha, pinaagi sa paglihok ‘sumala sa integridad sa kasingkasing.’—Salmo 78:72.
8 Ang nagahupot-sa-integridad nga dalan posible tungod kay kita may halalom nga pagtuo kang Jehova nga Diyos ug nagasalig sa bug-os kaniya ug sa iyang gahom sa pagluwas kanato. (Salmo 25:21; 41:12) Dili sayon ang paghupot sa atong integridad, kay si Satanas nga Yawa—ang labing dakong kaaway ni Jehova, ug atoa—nagabuta sa mga hunahuna sa mga dili magtutuo ug “nagalimbong sa tibuok gipuy-ang yuta.” (Pinadayag 12:9; 2 Corinto 4:4) Apan, sama kang Job, kita mahimong mga maghuhupot sa integridad. Bisan pag kita dili hingpit, kita sa ingon makalipay sa kasingkasing sa atong mahigugmaong Diyos. Sumala sa ginaingon sa Proverbio 27:11: “Magmaalamon ka, anak ko, ug lipaya ang akong kasingkasing, aron ako makatubag kaniya nga nagabiaybiay kanako.” Ikalipay, ingong maunongong mga alagad ni Jehova, kita makatagana kaniya sa epektibong tubag ngadto sa iyang mabiaybiayong Kaaway. Busa ang atong paghupot sa integridad makahimo gayod ug kalainan. Ingong nagahupot sa integridad, kita makalipay sa kasingkasing ni Jehova. Ug pagkadako sa kalipay nga ihatag niini kanato!
Hataas nga Han-ay sa mga Maghuhupot sa Integridad
9. Kinsa ang pipila sa dakong “panganod” sa naghupot-sa-integridad nga mga saksi ni Jehova, ug unsang mga pagsulay sa integridad ang ilang giantos?
9 Sa pagkamatuod, ang mga Saksi ni Jehova karong adlawa maoy bahin sa hataas nga han-ay sa mga maghuhupot sa integridad. Kini mobalik ngadto pa sa matinumanong si Abel ug nagaapil sa mga lalaki ug mga babaye sama kang Abel, Enoch, Noe, Abraham, Sara, Isaac, Jacob, Jose, Moises, Rahab, Gideon, Barak, Samson, Jepte, David, ug Samuel. Ang mga maghuhupot sa integridad sama ni Sadrak, Mesak, ug Abednego, kinsa midumili sa pagsimba sa larawan nga gipatindog sa Babilonyanhong haring Nabukodonosor ug gitambog ngadto sa gipainit sa hilabihan nga hurno, lagmit mao ang gipasabot ingon nga kadtong “nagpugong sa gahom sa kalayo.” Ang ubang una-Kristohanong mga saksi ni Jehova ‘gibugalbugalan, gibunalan, gibilanggo, gibato, gihusay, gigabas, gipatay sa espada; sila naglakawlakaw nga nagsul-ob sa mga panit sa karnero, sa mga panit sa kanding, samtang nag-antos sa kasakitan ug pagpanagmal.’ Tinong mouyon kita kang Pablo, kinsa mipahayag: “Ang kalibotan dili takos kanila.” Pagkamakalilipay nga kita gilibotan nianang dako kaayong “panganod” sa nagahupot-sa-integridad nga mga saksi!—Hebreohanon 11:1–12:1; tan-awa usab ang Daniel, kapitulo 3.
10. Giunsa paglipay ni apostol Pablo ang kasingkasing ni Jehova?
10 Tungod sa gihatag sa Diyos nga kaisog ug kusog, naantos ni apostol Pablo ang pagkabilanggo, mga pagbunal, pagkalunod sa sakayan, daghang katalagman, mga gabiing walay tulog, kagutmanan, kauhaw, katugnaw, kahubo, ug “makadaghang pag-ungaw sa kamatayon.” (2 Corinto 11:23-27) Giantos niya kanang mga kalisdanana tungod sa ministeryo, ug nianang tanan iyang gilipay ang kasingkasing ni Jehova ingong maisogong maghuhupot sa integridad. Kita makahimo usab niana.
11. Bahin sa integridad, unsang panig-ingnan ang gihatag ni Jesu-Kristo?
11 Ilado taliwala sa mga maghuhupot sa integridad mao “ang Pangulong Tinugyanan ug Maghihingpit sa atong pagtuo,” si Jesu-Kristo. Sa gitental sa Yawa, si Jesus nangupot sa iyang integridad, nga sa kataposan mipahayag: “Pahilayo ka, Satanas! Kay nahisulat na, ‘Si Jehova nga imong Diyos ang imong pagasimbahon, ug kaniya lamang imong igahatag ang balaang pag-alagad.’” Kay tin-awng walay gahom atubangan nianang hinatag-sa-Diyos nga determinasyon, gibiyaan sa Yawa si Jesus. Dili kadto ang kataposang pag-atake ni Satanas kang Jesus, apan ang Yawa walay gahom sa pagbungkag sa integridad sa Anak sa Diyos. ‘Tungod sa kalipay nga gibutang sa iyang atubangan giantos ni Jesus ang kahoy sa pagsakit,’ nga wala gayod magbungkag sa integridad. Hinaot atong sundon ang labing maayo niyang panig-ingnan ug lipayon ang kasingkasing ni Jehova ingong maghuhupot sa integridad.—Hebreohanon 12:2, 3; Mateo 4:1-11.
12, 13. Unsang mga pagsulay sa integridad ang malamposong nasagubang sa unang mga Kristohanon?
12 Gisultihan ni Jesus ang iyang mga tinun-an: “Kamo mahimong mga tumong sa pagdumot sa tanang tawo tungod sa akong ngalan.” (Mateo 10:22) Sa tanang panahon kana matuod kaayo sa matuod nga mga Kristohanon! Sa iyang librong Christianity and the Roman Government, si E. G. Hardy misulat: “Sa tino mopatim-aw, gikan sa sulat ni Pliny ug sa sinulat pag-usab nga iya ni Trajan, nga ang mga Kristohanon masilotan tungod lamang sa nomen [ngalan], o yanong pag-angkong Kristohanon, nga walay tinong sumbong o pruyba sa tino nga mga sala.”
13 Pagkadagkong mga pagsulay sa integridad ang malamposong nasagubang niadtong unang mga Kristohanon tungod sa hinatag-sa-Diyos nga kusog! Pananglitan, mahitungod kanila kini gipahayag: “May panahong sila gisakit ug gitambog ngadto sa gigutom mapintas nga mga mananap sa dulaanan sa paglingaw sa katawhan.” Apan, bisan pa nianang mga pag-antos gipahayag nga “ang paglutos naglig-on hinuon sa ilang pagtuo ug nagpatunghag daghang kinabig sa ilang kawsa.” (From the Old World to the New, nga sinulat ni Eugene A. Colligan ug Maxwell F. Littwin, 1932, mga panid 90-91) Kana matuod sa nagahupot-sa-integridad nga mga saksi ni Jehova niining ika-20ng siglo. Ang mga ahente sa Yawa dili makaparang kanila.
14, 15. Kinsa ang “duha ka saksi,” ug unsay ilang nasinati sa 1918 ug 1919?
14 Palandonga ang nasinati sa dinihogang mga alagad ni Jehova, ang masambingayong “duha ka saksi,” niadtong 1918 ug 1919, dihang ang ilang mga kaaway ‘mimugnag kasamok pinaagi sa balaod.’ (Pinadayag 11:3, 7-10; Salmo 94:20) Si J. F. Rutherford (presidente niadto sa Watch Tower Society) ug pito ka kauban dili makataronganong gibilanggo. Niadtong panahona, ang “duha ka saksi” gipatay kon bahin sa ilang pagpanagna, ug nagkalipay ang ilang mga kaaway. Sa iyang librong Preachers Present Arms, si Ray H. Abrams mipahayag: “Ang pag-usisa sa bug-os nga kaso [nga naglangkit kang Rutherford ug iyang mga kauban] mosangko sa konklusyong ang mga iglesya ug ang klero sa sinugdan maoy nagpaluyo sa kalihokan nga papason [ang mga Estudyante sa Bibliya]. . . . Sa nahiabot ang balita bahin sa mga sentensiyang tag-bayente anyos ngadto sa mga editor sa relihiyosong mga basahon, halos ang tanan sa maong mga publikasyon, dagko ug gagmay, nagkalipay tungod sa hitabo. Wala ako makakaplag ug mga pulong sa simpatiya sa bisan hain sa ortodoksong mga basahon sa relihiyon.”
15 Apan, sa igong panahon ang walo ka nabilanggong Estudyante sa Bibliya nahigawas ug gihukmang walay sala sa bug-os, sa dakong kalagot ni Satanas ug sa mga tawong iyang gitonto. Kay nabuhi tungod sa espiritu sa Diyos, ang “duha ka saksi,” kadtong gamay nga pundok sa mga dinihogan, mitindog na usab ingong mga magmamantala sa Gingharian. (Pinadayag 11:11) Ug ang mga kaaway ni Jehova nagapakig-away sa pildi nga away batok nianang mga maghuhupot sa integridad sukad niadto.
16. Sa unsang paagi ang usa ka batan-ong naghupot sa integridad mipahayag sa iyang kaugalingon?
16 Sa pag-ilustrar: Palandonga ang maisogong mga pulong nga gisulat sa usa ka lalaking batan-on ngadto sa iyang pamilya samtang iyang gipaabot ang kamatayon diha sa mga kamot sa Nazi nga mga maglulutos. Misulat siya: “Lapas na sa tungang gabii. Ako may panahon pa sa pagbag-o sa akong hunahuna. Ay, malipay ba kaha ako pag-usab niining kalibotana tapos ilimod ko ang atong Ginoo? Dili gayod! Apan karon makasalig kamong mobiya ako niining kalibotana sa kalipay ug kalinaw.” Kana mopatim-aw bang huyang, talawan, gipugos nga maglalapas sa integridad? Siyempre dili!
17. Unsa ang epekto sa mga pagdakop sa mga Saksi ni Jehova sa Unyon Sobyet diha sa ilang mga kalihokan sa pagsangyaw sa Gingharian?
17 Ang mga paningkamot sa pagbungkag sa integridad sa mga alagad ni Jehova nagapadayon. Pananglitan, sa iyang librong Religion in the Soviet Union, ang magsusulat si Walter Kolarz naghisgot mahitungod sa masa nga mga pagdakop sa mga Saksi ni Jehova sa sinugdan sa 1951 ug miingon: “Ang mga Saksi mismo nagabanabanang 7,000 ka tawo tanantanan ang gihinginlan, nga gidala ngadto sa Urals, Siberia, sa Halayong Amihanan (Vorkuta) ug Kazakhstan.” Midugang siya: “Dili kini ang kataposan sa ‘mga Saksi’ sa Rusya, apan sinugdanan lamang sa usa ka bag-ong kapitulo sa ilang mga kalihokan sa pagpangabig. Gisulayan pa nila ang pagsabwag sa ilang pagtuo sa mihunong sila sa mga estasyon sa pagpadulong nila ngadto sa dapit sa pagkabinihag. Sa paghingilin kanila ang Gobyernong Sobyet dili makahimog labaw niana sa pagpakaylap sa ilang pagtuo. Gikan sa kahilit sa ilang balangay ang ‘mga Saksi’ nahiadto sa haluag pang kalibotan, bisan pag kadto mao lamang ang makalilisang nga kalibotan sa mga kampong konsentrasyon ug sa pinugos nga trabaho.” Didto nakaplagan sa mga alagad ni Jehova ang daghan nga malipayong nagdawat sa makapalipay nga mensahe sa Gingharian.—Itandi ang Buhat 11:19-21.
Samag Nakadaog nga Kasundalohan
18, 19. Sa unsang paagi posible nga magmadaogon ingong mga maghuhupot sa integridad?
18 Ang paglutos sa katawhan sa Diyos nagapadayon hangtod niining adlawa. Busa sa unsang paagi posible nga ang mga Saksi ni Jehova magmadaogon ingong mga maghuhupot sa integridad? Kita makabuhat niana tungod kay kita nagasugot sa Pulong sa Diyos, ug ‘ang atong mga gahom sa pagsabot nabansay sa pag-ila sa matarong ug sa daotan.’ Ingong maunongong mga saksi ni Jehova, kita ‘wala magpahiuyon niining kahikayan sa mga butang apan nabag-o pinaagi sa pagbag-o sa atong mga hunahuna.’ Malipayon natong ginabuhat kon unsay makapahimuot kang Jehova, ug siya nagahatag kanatog kadaogan batok sa atong mga kaaway, demonyo man ug tawo.—Hebreohanon 5:12-14; Roma 12:1, 2.
19 Kita nga “iya ni Jehova” ikapanig-ingon sa madaogong kasundalohan. Hinuon, ang atong pakig-away maoy espirituhanong pakig-away, ug kita “nagapadayon sa pagbaton ug gahom diha sa Ginoo ug sa pagkagamhanan sa iyang kusog.” Atong gisul-ob ang tibuok nga hinagibang espirituhanon nga gikan sa Diyos, ug ang iyang balaang espiritu nagapaluyo kanato. Kana ang hinungdang kita “makabarog batok sa mga lipatlipat sa Yawa.” (Efeso 6:10-20; 2 Corinto 10:3, 4; Zacarias 4:6) Oo, ug kana ang hinungdang mopadayon kitang magmadaogon ingong mga maghuhupot sa integridad.
20. Unsang tabang ug pasalig ang atong mabatonan samtang kita maningkamot sa paghupot sa atong integridad?
20 Kita tinong maoy talagsaong militaryong gahom. Aw, sa atong taliwala bisan “ang mga babaye nga nagamantala sa maayong balita maoy usa ka dakong panon”! (Salmo 68:11) Bisan pag atong giatubang ang lisod-buntogon nga mga kaaway, ‘labi pang daghan ang nagauban kanato kay sa nagauban kanila.’ (2 Hari 6:16) Ang mga manulonda nagauban kanato samtang atong ginamantala ang maayong balita ngadto sa mga molupyo sa yuta. (Pinadayag 14:6) Ug ingong mga maghuhupot sa integridad, kita may pagsalig nga ‘walay hinagibang gibuhat batok kanato ang molampos.’—Isaias 54:17.
21. Bisan pa sa paglutos nga atong maagoman, unsay nagapadayon?
21 Sa walay duhaduha, nahimo na ang mga linya sa panggubatan. Ang mga puwersa ni Satanas determinado sa pagpugong sa atong buluhaton sa pagsangyaw. Busa, anaa ra kanato nga “ipadayon ang pagpakigbugno sa maayong bugno.” (1 Timoteo 1:18) Kay ang hinimayang si Jesu-Kristo mao ang atong Komandante ug Pangulo, ang matag usa kanato mag-alagad “ingong maayong sundalo ni Kristo Jesus.” (2 Timoteo 2:3, 4) Bisan pag kita gidabodabohan sa tanang kiliran, kita kinahanglan mobarog—ug mobarog gayod, tungod sa dili-takos nga kalulot sa Diyos—nga malig-on ingong mga maghuhupot sa integridad. Ngaya ang atong mga nawong samtang atong makita ang sunodsunod nga pag-uswag. Ang dugang ug dugang gidaghanon sa ‘tilinguhaong mga butang sa kanasoran’ nagasulod ug nagapuno sa balay ni Jehova sa himaya. (Haggeo 2:7) Bisan pa sa paglutos, mga pagbilanggo, mga pagbunal, pagdili sa atong buluhaton sa nagkalainlaing nasod, ug dakong paningkamot sa pagpatak-om sa atong mga ngabil, ang dakong buluhaton sa paghimog tinun-an nagapadayon ug nagakakusog.—Mateo 24:14; 28:19, 20.
22. Ingong iya kita ni Jehova, unsay angay natong pagabuhaton?
22 Samtang padayong mouswag ang gidak-on sa pagdayeg kang Jehova, karon mao ang panahon sa desisyon sa matag usa sa yuta. Pagkadako sa atong pribilehiyo sa pagsangyaw sa maayong balita ug pagtudlo niadtong nagadawat sa matuod nga pagsimba! Busa, samtang mouswag ang “dakong panon,” hinaot mopadayon kita ingong maisogong mga alagad sa Hataas Uyamot nga Diyos. (Pinadayag 7:9) ‘Mabuhi kun mamatay, kita iya ni Jehova.’ Busa mopadayon kita padulong sa tumong sa kinabuhi, nga mapasalamaton kanunay sa dako natong pribilehiyo sa paglipay sa kasingkasing ni Jehova pinaagi sa paghupot sa integridad!
Makatubag Ka Ba?
◻ Unsay integridad?
◻ Ang paghupot sa integridad nagkinahanglan sa unsa sa katawhan ni Jehova?
◻ Sa unsang paagi ikapakitang ang paghupot nato sa integridad may kalainan alang sa Diyos?
◻ Sa unsang mga paagi ang pipila sa nangagi nagpakita nga sila mga maghuhupot sa integridad?
◻ Sa unsang paagi posible nga ang mga Saksi ni Jehova makahupot sa integridad karong adlawa?
[Hulagway sa panid 13]
Ang mga alagad ni Jehova karong adlawa maoy bahin sa taas nga han-ay sa iyang mga saksi nga nagahupot sa integridad. Ikaw ba nahiapil kanila?
Enoch
Sara
Jepte
Pablo