“Pasidunggi si Jehova Pinaagi sa Imong Bililhong mga Butang”—Sa Unsang Paagi?
“PASIDUNGGI si Jehova pinaagi sa imong bililhong mga butang ug pinaagi sa inunahang mga bunga sa tanan nimong abot.” Nalakip niining dinasig nga mga pulong sa kaalam, nga gisulat mga 2,600 ka tuig kanhi, mao ang yawi aron masinati ang dagayang mga panalangin ni Jehova, kay ang magsusulat mipunting: “Unya ang imong mga kamalig mapuno sa kadagaya; ug sa bag-ong bino ang imong mga pug-anan magaawas.”—Proverbio 3:9, 10.
Apan unsay ipasabot sa pagpasidungog sa Diyos? Unsa ang bililhong mga butang nga niana kita magapasidungog kang Jehova? Ug sa unsang paagi atong mahimo kini?
“Pasidunggi si Jehova”
Sa Kasulatan, ang pangunang Hebreohanong pulong sa pasidungog, ka·vohdhʹ, sa literal nagkahulogang “pagkabug-at.” Busa ang pagpasidungog sa usa ka tawo nagkahulogan sa pag-isip kaniya nga may gibug-aton, dalayegon, o bililhon. Ang laing Hebreohanong pulong alang sa pasidungog, yeqarʹ, gihubad usab nga “bililhon” ug “bililhong mga butang.” Sa susama, ang Gregong pulong nga ti·meʹ, gihubad nga “pasidungog” diha sa Bibliya, nagpasabot sa diwa sa pagtamod, pagpabili, kabililhon. Busa ang usa makapasidungog sa uban pinaagig pagpakita sa maong tawo sa halalom nga pagtahod ug pagtamod.
Ang pagpasidungog usab adunay laing dagway. Matikdi ang asoy bahin sa matinumanong Hudiyo nga si Mardokeo, nga sa usa ka okasyon nagyagyag sa laraw batok sa kinabuhi ni Haring Ahasuero sa karaang Persia. Sa ulahi, sa dihang nasayran sa hari nga wala mapasidunggi si Mardokeo sa maong buhat, iyang gisukna ang iyang primer ministro, si Haman, kon unsay labing maayong paagi sa pagpasidungog sa usa nga gikahimut-an sa hari. Naghunahuna si Haman nga alang kaniya ang maong pasidungog, apan nasayop gayod siya! Buweno, miingon si Haman nga ang maong tawo kinahanglang sul-oban ug “harianong sapot” ug pasakyon sa “kabayo nga maoy ginasakyan sa hari.” Siya mihinapos: “Pasakyon nila siya sa kabayo diha sa plasa sa siyudad, ug sila magasinggit nga magauna kaniya, ‘Mao kini ang buhaton ngadto sa tawo kansang pasidungog gikahimut-an mismo sa hari.’” (Ester 6:1-9) Niining kahimtanga, ang pagpasidungog sa usa ka tawo naglakip sa pagtuboy kaniya diha sa publiko aron siya tamdon pag-ayo sa tanang tawo.
Sa susama, ang pagpasidungog kang Jehova adunay duha ka bahin: pagpakita kaniyag taas nga pag-ila sa personal ug pagbayaw kaniya sa publiko pinaagi sa pagpakig-ambit ug pagsuportar sa buluhaton sa pagpahayag sa iyang ngalan diha sa publiko.
“Imong Bililhong mga Butang”—Unsa Kini?
Ang atong bililhong mga butang naglakip gayod sa atong kinabuhi, panahon, mga katakos, ug atong kusog. Komosta ang atong materyal nga mga kabtangan? Matikdi ang mga pulong ni Jesus sa dihang iyang nakita ang kabos nga babayeng balo nga naghulog ug duha ka diyot nga gamay kaayog bili diha sa panudlanan sa templo. Siya miingon: “Kini nga babayeng balo, bisan kabos, mihulog ug labaw pa kay sa gihimo sa tanan. Kay ang tanan kanila [ubang mga nagaamot] mihulog ug mga gasa gikan sa ilang mga sobra, apan kini nga babaye gikan sa iyang kawalad-on mihulog sa tanang kahinguhaan nga gibatonan niya.” (Lucas 21:1-4) Gidayeg ni Jesus kining babayeng balo sa paggamit sa iyang materyal nga mga butang sa pagpalambo sa pagsimba ni Jehova.
Busa, tin-aw nga ang bililhong mga butang nga gihisgotan ni Solomon naglakip usab sa bisan unsang mga kabtangan nga ato tingaling nabatonan. Ug ang ekspresyong “inunahang mga bunga sa tanan nimong abot” nagpasabot sa paghatag sa labing maayo sa atong bililhong mga butang ngadto kang Jehova.
Apan, sa unsang paagi ang paghatag sa materyal nga mga butang makapasidungog sa Diyos? Dili ba iyaha na man ang tanang butang? (Salmo 50:10; 95:3-5) “Ang tanang butang naggikan kanimo,” miila si Haring David diha sa kinasingkasing nga pag-ampo kang Jehova. Ug bahin sa dakong amot nga gihatag niya ug sa iyang katawhan sa pagtukod sa templo, si David miingon: “Gikan sa imong kaugalingong kamot kami nagahatag kanimo.” (1 Cronicas 29:14) Busa sa dihang magatanyag ug mga gasa kang Jehova, ato lamang ginabalik ang iyang gihatag kanato, pinasukad sa kaayo sa iyang kasingkasing. (1 Corinto 4:7) Apan, ingon sa gipakita sa sinugdan, ang pagpasidungog kang Jehova naglakip sa pagbayaw kaniya atubangan sa uban. Ug ang materyal nga mga gasa nga gigamit sa pagpauswag sa matuod nga pagsimba magpasidungog sa Diyos. Ang Bibliya naundan sa hamiling mga panig-ingnan niining paagiha sa pagpasidungog kang Jehova.
Mga Panig-ingnan sa Miagi
Mga 3,500 ka tuig kanhi, sa dihang ang panahon miabot alang kang Jehova sa pagtagana sa tabernakulo didto sa kamingawan ingong dapit sa pagsimba alang sa mga Israelinhon, mitungha ang panginahanglan sa nagkalainlaing bililhong mga butang nga kinahanglanon sa gitaganang disenyo sa Diyos. Gisugo ni Jehova si Moises nga ‘pasagding ang matag usa nga andam ug kasingkasing sa pagdalag amot alang kang Jehova.’ (Exodo 35:5) Ang asoy nagpadayon: “Sila miabot, ang matag usa kansang kasingkasing nagtukmod kaniya, ug sila nagdala, ang matag usa kansang kasingkasing nagdasig kaniya, ug amot kang Jehova alang sa buluhaton sa tolda nga tigomanan ug alang sa tanang pag-alagad niini ug alang sa balaang mga sapot.” (Exodo 35:21) Ang ilang kinabubut-ong halad, sa pagkatinuod, misobra kay sa gikinahanglan sa buluhaton nga ang mga tawo kinahanglang “did-an na sa pagdala niini”!—Exodo 36:5, 6.
Matikdi ang laing pananglitan. Sa dihang ang tabernakulo nakaalagad na sa katuyoan niini ug ang mga pagpangandam ginahimo sa pagtukod sa templo, si David personal nga miamot ug dako alang sa templo nga tukoron sa iyang anak nga si Solomon. Nagpagawas usab siyag mando alang sa uban sa pagduyog, ug ang katawhan misanong uban ang mga gasa sa bililhong mga butang alang kang Jehova. Ang plata ug ang bulawan lamang mobilig mga 50 bilyones dolyares sa kantidad karon. “Ug ang mga tawo nagmaya sa ilang paghatag ug kinabubut-ong mga halad.”—1 Cronicas 29:3-9; 2 Cronicas 5:1.
“Kinabubut-ong mga Halad” sa Atong Adlaw
Sa unsang paagi kita makaambit sa kalipay sa paghimog kinabubut-ong mga halad sa atong adlaw? Ang labing bililhong buluhaton nga ginahimo sa kalibotan niining panahona mao ang pagsangyaw sa Gingharian ug paghimog tinun-an. (Mateo 24:14; 28:19, 20; Buhat 1:8) Ug nakita ni Jehova nga haom nga isalig ang yutan-ong intereses sa Gingharian ngadto sa iyang mga Saksi.—Isaias 43:10.
Tin-aw nga ang salapi kinahanglanon sa paggasto sa buluhaton nga ginahimo sa mga Saksi ni Jehova karon. Ang pagpanukod ug pagmentinar sa mga Kingdom Hall, Assembly Hall, sangang buhatan, pabrika, ug mga puy-anang Bethel naglangkit ug salapi. Ang pagpamatik ug pag-apod-apod ug mga Bibliya ug pinasukad sa Bibliyang mga publikasyon diha sa nagkalainlaing pinulongan naglangkit usab ug mga galastohan. Sa unsang paagi napahigayon ang maong organisasyonal nga mga galastohan? Pinaagig mga amot nga kinabubut-on lamang gayod!
Ang kadaghanang amot naggikan sa mga indibiduwal nga—sama sa babayeng balo nga nakita ni Jesus—may kasarangan lamag kahinguhaan. Kay dili buot masayloan kining bahina sa pagpasidungog kang Jehova, sila miamot ug kasarangang mga kantidad “sumala sa ilang maarangan,” ug, usahay, bisan “labaw sa ilang maarangan.”—2 Corinto 8:3, 4.
“Ipabuhat sa matag usa ang sumala sa iyang gikahukom diha sa iyang kasingkasing, dili nga kontragusto o pinugos, kay gihigugma sa Diyos ang usa ka masayahong maghahatag,” matod pa ni apostol Pablo sa mga Kristohanon sa Corinto. (2 Corinto 9:7) Ang malipayong paghatag nanginahanglag maayong pagplano. Si Pablo miingon sa mga taga-Corinto: “Matag unang adlaw sa semana ang matag usa kaninyo diha sa iyang kaugalingong balay pagahina ingong pagtigom sumala sa iyang pag-uswag, aron nga dihang ako moabot dili na unya himoon ang pagpangolekta.” (1 Corinto 16:2) Sa susama, sa pribado ug sa kinabubut-ong paagi, kadtong buot nga moamot aron sa pagpauswag sa buluhaton sa Gingharian karon makagahin ug pipila sa ilang mga kinitaan alang sa maong katuyoan.
Si Jehova Magapanalangin Niadtong Magapasidungog Kaniya
Samtang ang materyal nga kadagaya mismo dili motultol ngadto sa espirituwal nga kadagaya, ang madagayaong paggamit sa atong bililhong mga butang—atong panahon, atong kusog, ug ang atong materyal nga mga kahinguhaan—sa pagpasidungog kang Jehova magdalag dagayang mga panalangin. Kini tungod kay ang Diyos, nga tag-iya sa tanang butang, nagpasalig kanato: “Ang mahinatagong kalag mismo mahimong matambok, ug ang usa nga dagayang nagabisibis sa uban dagaya usab nga pagabisibisan.”—Proverbio 11:25.
Human sa kamatayon ni Haring David, ang iyang anak nga si Solomon naggamit sa kinabubut-ong mga amot nga natigom sa iyang amahan aron sa pagtukod ug mahimayaong templo, ingon sa gisugo ni Jehova. Ug hangtod nga si Solomon magpabiling matinumanon sa iyang pagsimba sa Diyos, “ang Juda ug ang Israel padayong nagpuyo diha sa kasegurohan . . . gikan sa Dan ngadto sa Beer-seba, sa tanang adlaw ni Solomon.” (1 Hari 4:25) Ang mga kamalig napuno, miawas ang mga sudlanan sa bino—basta ang Israel ‘nagpasidungog kang Jehova pinaagi sa ilang bililhong mga butang.’
Sa ulahi, pinaagi sa propetang si Malaquias, si Jehova miingon: “‘Sulayi ako, palihog, niining bahina,’ nagaingon si Jehova sa mga panon, ‘kon dili ba buksan ko kaninyo ang mga tamboanan sa mga langit ug buboan ko kamo ug panalangin sa pagkaagi nga wala na unyay panginahanglan.’” (Malaquias 3:10) Ang espirituwal nga kadagaya nga ginatagamtam sa mga alagad ni Jehova karon maoy pamatuod nga ang Diyos nagatuman sa iyang saad.
Malipay gayod si Jehova sa dihang atong buhaton ang atong bahin sa pagpauswag sa intereses sa Gingharian. (Hebreohanon 13:15, 16) Ug siya nagsaad sa pagbulig kanato kon kita ‘padayong mangita pag-una sa gingharian ug sa iyang pagkamatarong.’ (Mateo 6:33) Uban ang tumang kalipay sa kasingkasing, hinaot nga atong ‘pasidunggan si Jehova pinaagi sa atong bililhong mga butang.’
[Kahon sa panid 28, 29]
MGA PAAGI NGA NIANA ANG PIPILA MOBOLUNTARYO SA PAGHATAG UG
MGA AMOT NGADTO SA TIBUOK-KALIBOTANG BULUHATON
Daghan ang mogahin, o magbadyet, ug salapi nga ilang ibutang sa mga kahon sa amot nga ginganlang: “Mga Amot Alang sa Tibuok-Kalibotang Buluhaton sa Sosyedad—Mateo 24:14.” Kada bulan ang mga kongregasyon magpadala niining salapia ngadto kaha sa tibuok-kalibotang hedkuwarter sa Brooklyn, New York, o sa lokal nga sangang buhatan.
Ang kinabubut-ong mga donasyong salapi mahimong ipadala usab nga direkta ngadto sa Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, o sa opisina sa Sosyedad nga nag-alagad sa inyong nasod. Ang alahas o ubang mahalong mga butang mahimong ikadonar usab. Ang mubong sulat nga nagpahayag nga kana maoy dihadihang gasa angayng ipataban sa maong mga amot.
KONDISYONAL-DONASYON NGA KAHIKAYAN Ang salapi ikahatag ngadto sa Watch Tower Society nga huptang gisalig o in trust hangtod sa pagkamatay sa tigdonar, nga may kondisyon nga engkasog personal nga gikinahanglan, ibalik kini sa tigdonar. Alang sa dugang impormasyon, palihog pagkontak sa Treasurer’s Office sa adres nga gitala sa itaas.
GIPLANONG PAGHATAG
Dugang pa sa dihadihang mga gasang salapi ug kondisyonal nga mga donasyong salapi, adunay ubang mga paagi sa paghatag aron makabenepisyo ang buluhaton sa Gingharian sa tibuok kalibotan. Kini sila nag-apil sa:
Insyurans: Ang Watch Tower Society manganlan nga benepisyaryo sa usa ka polisa sa life insurance o sa pagretiro/pensiyon nga programa. Ang Sosyedad angayng pahibaloon bahin sa bisan unsang ingon nga kahikayan.
Mga Kuwenta sa Bangko: Mga kuwenta sa bangko, mga sertipiko sa mga deposito, o indibiduwal nga mga kuwenta sa pagretiro mahimong ikabutang nga in trust for o himoong payable on death to sa Watch Tower Society, nga nahiuyon sa mga kinahanglanon sa lokal nga bangko. Ang Sosyedad angayng pahibaloon bahin sa bisan unsang ingong mga kahikayan.
Stocks and Bonds: Ang mga stock o aksiyones ug mga bond ikadonar ngadto sa Watch Tower Society ingong dihadihang gasa o ilalom sa kahikayan diin ang kinitaan magpadayong ibayad ngadto sa tigdonar.
Balay ug Yuta: Ang ikabaligyang balay ug yuta ikadonar ngadto sa Watch Tower Society pinaagi kaha sa paghatag dihadiha o pagreserba sa tibuok kinabuhi sa balay o yuta alang sa tigdonar, kinsa mahimong magpadayon pagpuyo niana samtang buhi pa siya. Ang usa angayng magkontak sa Sosyedad sa dili pa buhatag papeles ang bisan unsang balay o yuta nga idonar sa Sosyedad.
Wills and Trusts: Ang propiedad o salapi mahimong ikabilin ngadto sa Watch Tower Society pinaagi sa usa ka legal-pagkabuhat nga testamento, o ang Sosyedad kanganlang usa ka benepisyaryo sa usa ka trust agreement. Ang trust nga mapanunod sa usa ka relihiyosong organisasyon mahimong adunay pipila ka bentaha sa buluhisan. Ang usa ka kopya sa testamento o trust agreement angayng ipadala ngadto sa Sosyedad.
Ang Sosyedad nag-andam ug Iningles nga brosyur nga nag-ulohang Planned Giving. Kadtong atua sa Tinipong Bansa nga nagaplano sa paghimog espesyal nga gasa ngadto sa Sosyedad karon o magbilin ug sulondon sa pagkamatay mahimong matabangan sa maong impormasyon. Kana tinuod ilabina kon ilang gitinguha ang pagpalampos sa usa ka tumong sa pamilya o propiedad-plano nga tumong samtang pahimuslan ang mga benepisyo sa buluhisan aron mamenosan ang bili sa gasa o sulondon.
Alang sa dugang impormasyon bahin sa nahisgotan sa ibabaw, pagsulat sa Watch Tower, P.O. Box 2044, 1060 Manila, o sa opisina sa Sosyedad nga nag-alagad sa inyong nasod.