5. Ayaw papugong sa pagpabawtismo

Dihang modesisyon ta nga ipahinungod ang atong kaugalingon kang Jehova ug magpabawtismo, kitang tanan makaatubang ug kalisdanan. Ingong pananglitan, i-play ang VIDEO, ug dayon hisgoti ang mosunod nga mga pangutana:

VIDEO: Maatubang Nato ang mga Babag Pinaagi sa Atong Gugma Kang Jehova (5:22)

• Sa video, unsang mga babag ang kinahanglang atubangon ni Narangerel aron makaalagad kang Jehova?

• Sa unsang paagi ang iyang gugma kang Jehova nakatabang niya sa pag-atubang sa maong mga babag?

Basaha ang Proverbio 29:25 ug 2 Timoteo 1:7, ug dayon hisgoti kini nga pangutana:

• Unsay maghatag natog kaisog nga dili magpapugong sa pagpabawtismo?

Kinahanglang palig-onon nato karon ang atong pagsalig kang Jehova. Paggahin ug panahon kada adlaw sa pag-ampo kaniya ug sa pagbasa sa iyang Pulong. Tambong nga regular sa mga tigom sa kongregasyon. Kining tanan maghatag nimog kusog nga imong gikinahanglan aron maisogon nimong maatubang ang bisan unsang paglutos, bisan pag membro sa imong pamilya ang molutos nimo. Si apostol Pablo, nga kadaghan gilutos, misulat: “Si Jehova ang akong magtatabang; dili ko mahadlok.”—Hebreohanon 13:6.

Mahimo pod tang mas maisogon kon regular tang mosangyaw. Ang pagsangyaw magtudlo nato nga mosalig kang Jehova ug pinaagi niini mawala pod ang atong kahadlok sa tawo. (Proverbio 29:25) Kon naa kay kaisog karon sa pagsangyaw, maandam ka pag-ayo nga padayong mosangyaw bisan pag idili sa gobyerno ang atong buluhaton.—1 Tesalonica 2:2.