“May Minilyon Dinha Niana”

MINILYON sa unsa? Sa Crown Mountain sa Georgia, diin ang bulawan nakaplagan na. Sumala sa estorya, ang singgit “May minilyon dinha niana” gilitok ni Dr. Stephenson, usa ka tig-analisar o assayer sa Tunawan sa T.B., gikan sa Dahlonega sa Georgia, T.B.A., balik niadtong 1849. Nganong naghimo man siya nianang pahayaga? Sa dihang misugod ang pagkalot sa bulawan sa 1849 sa California, ang mga minero gikan sa Dahlonega ug sa duol nga Auraria mingsugod sa pagbiya pa-kasadpan sa pagpangita ug dugang dagayang bulawan. Apan ang doktor nagtuo nga may bulawan pa sa amihanang Georgia. Bitaw, sama sa gipahayag sa makasaysayanhong plaka, “tali sa 1829 ug 1839 mga $20,000,000 balor sa bulawan ang nakalot sa banikanhan sa Cherokee sa Georgia.” Apan ang pangdani sa Kasadpan dako kaayo; ang nabilin lamang karong adlawa sa karaang Auraria mao ang nagkatag nga mga relikiya sa kanhing lungsod sa minahan.

Ang susamang kapalaran midangat sa Empire nga kompanya sa mina sa bulawan sa Grass Valley, California. Pagkatapos makakalot ug 591 kilometros nga mga tunil, nga ang giladmon miabot ug 1.6 kilometro halalom ngadto sa yuta, ang minahan gisarad-an niadtong 1957. Dili na kini makaganansiya. Karong adlawa ang minahan usa ka makasaysayanhong parke sa estado.

Ang bulawan may pangdani sa katawhan sulod sa kaliboan ka mga tuig. Apan, ang iyang balor dili permanente ug malupigon, nga mausab sa kapritso sa sentro sa baligyaanan sa pundo ug sa internasyonal nga baligyaanan sa bulawan. Sa gihapon, may “bulawan” nga dili mawad-an sa iyang bili ug kanunay mabatonan sa tanan nga sinserong nagpangita niana. Unsa man kana? “Malipayon ang tawo nga makakaplag sa kaalam, ug ang tawo nga makakab-ot sa pagsabot, kay ang pagkabaton niini labaw pa kay sa ganansiya nga salapi ug sa abot nga bulawan mismo.” (Proverbio 3:​13,14) Oo, ang kaalam ug pagsabot, pinasikad sa kahibalo sa matuod nga Diyos ug sa iyang katuyoan alang sa yuta, may labaw permanenteng bili kaysa bulawan. Kon buot nimong mahibalo ug dugang mahitungod sa Diyos sa Bibliya ug sa bag-ong kalibotan nga iyang gisaad alang sa matinumanon nga katawhan, palihog pakigkita sa mga Saksi ni Jehova sa Kingdom Hall nga duol kaninyo o pagsulat sa nagpatik niining magasina.​—Tan-awa ang adres, sa panid 5.

[Hulagway sa panid 32]

Ang gibiyaan nga hotel sa karaang minahan-sa-bulawan nga lungsod sa Auraria