Makahinumdom Ka Ba?

Imo bang nakita ang dili pa dugayng mga gula sa Ang Bantayanang Torre nga may praktikal nga bili? Nan tan-awa kon makahinumdom ka ba sa mosunod:

◻ Unsay kahulogan sa pagkahimong tiniman-an alang sa kaluwasan pinaagi sa matagnaong tawo nga may sudlanan sa tinta sa magsusulat diha sa panan-awon ni Ezekiel? (Ezekiel 9:2-6)

Nagkahulogan kini nga nakapahinungod na ang usa sa Diyos sa pagtuman sa iyang kabubut-on, nabawtismohan ingong disipulo ni Jesu-Kristo, ug nakasul-ob na sa samag Kristo nga personalidad.​—4/15, panid 11, 12.

◻ Unsa ang mga katuyoan sa tagna sa Bibliya?

Ang mga tagna nagpahibalo sa kamatuoran bahin sa Diyos, sa iyang kabubut-on, ug sa iyang moral nga mga sukdanan. Sila nagapatin-aw sa relasyon sa tawo kang Jehova aron ipasig-uli ang katawhan sa Iyang katuyoan, nga mosangpot sa bug-os nga katumanan niini. (Isaias 1:18-20; 2:1-5; 55:8-11)​—5/1, panid 5.

◻ Unsang makapatayng gutom ang kaylap sa tibuok yuta karon?

Ang espirituwal nga gutom, “sa pagpatalinghog sa mga pulong ni Jehova.” (Amos 8:11)​—5/1, panid 10, 11.

◻ Unsa “ang pagkahadlok kang Jehova”? (Proverbio 1:7)

◻ Ang tukmang pagkahadlok nga mapasuko si Jehova tungod kay atong gipabilhan ang iyang mahigugmaong kalulot ug pagkamaayo. Nagkahulogan usab kini sa pag-ila kang Jehova nga mao ang Supremong Maghuhukom ug Labing Makagagahom, bug-os nga nagasalig kaniya, ug nagadumot sa daotan sa iyang panan-aw. (Salmo 2:11; 115:11; Proverbio 8:13)​—5/15, panid 28.

◻ Unsang mga giya ang gihatag diha sa 1 Timoteo 5 mahitungod sa pag-atiman sa mga tigulang?

Bisan pa nga ang mga sakop sa pamilya ang may unang responsabilidad, ang mga problema sa tigulang pagaatimanon sa tibuok kongregasyon; kinahanglang organisahon sa tukma ang pag-atiman kanila; kining maong pag-atiman limitado niadtong tinuod nga nagkinahanglan.​—6/1, panid 9, 10.

◻ Unsa ang upat ka linangkob nga mga paagi nga gipaputli ni Jehova ang iyang katawhan sa miaging 69 ka tuig?

(1) Sa organisasyonal nga paagi; (2) sa pakig-ambit sa pag-alagad sa kanataran; (3) sa progresibong kahayag sa kamatuoran; (4) sa pagkuha sa mahugawng mga buhat.​—6/15, panid 17-20.

◻ Unsang duha ka paagi ang pulong “motindog” gigamit may labot kang Michael sa Daniel 12:1?

Si Michael gibatbat ingong “nagatindog alang sa mga anak sa imong katawhan.” Gigamit na ni Kristo Jesus ang awtoridad niining bahina alang sa iyang katawhan sa yuta sukad sa 1914 dihang gipalingkod siya sa trono ingong nagamandong Hari sa Gingharian sa Diyos. Ang Daniel nag-ingon usab: “Ug niadtong panahona si Michael motindog.” Kini nagpasabot sa pagsulod sa bag-ong kahimtang sa iyang pagmando diin molihok pa siya sa tagsaong paagi sa pagluwas sa katawhan ni Daniel. Busa, dili sila laglagon pinaagi sa tawhanong mga kagamhanan sa “panahon sa kataposan” alang sa hari sa amihanan ug sa hari sa habagatan. (Daniel 11:40-45)​—7/1, panid 18, 19.