Pagsulay ug Pag-ayag sa Modernong Panahon

“Kinsa ang makapabilin sa adlaw sa iyang pag-anhi, ug kinsa ang mangatubang kon siya mopakita na?”—MALAQUIAS 3:2.

SA DIHANG “ang tinuod nga Ginoo” miabot sa espirituwal nga templo uban sa iyang “sinugo sa pakigtugon,” human nga natukod ang Gingharian sa langit sa 1914, unsay nakita ni Jehova? Ang iyang katawhan nagkinahanglag paglunsay ug pagputli. Magpasakop ba sila niini ug antuson ang gikinahanglang paglunsay sa ilang organisasyon, kalihokan, doktrina, ug kustombre? Sumala sa pagkapahayag niana ni Malaquias: “Kinsay makapabilin sa adlaw sa iyang pag-anhi, ug kinsa ang mangatubang kon siya mopakita na?”​—Malaquias 3:1, 2.

2. Sa modernong mga panahon, kinsa “ang mga anak ni Levi” sa Malaquias 3:3?

² Midawat si Jehova sa responsibilidad sa pagputli ug sa paglunsay sa “mga anak ni Levi.” (Malaquias 3:3) Sa karaang Israel, ang tribo ni Levi mao ang nagtaganag mga saserdote ug mga katabang sa templo. Kining “mga anak ni Levi” katugbang sa bug-os nga lawas sa mga dinihogan karon nga nag-alagad ingong mga saserdote ilalom ni Jesus, ang Hataas nga Saserdote. (1 Pedro 2:7-9; Hebreohanon 3:1) Sila mao ang una nga gisulayan dihang miabot si Jehova sa espirituwal nga templo uban sa iyang “sinugo sa pakigtugon.” Karon, unsay pamatuod nga nahitabo kining paglunsay sa kataposan sa Gubat sa Kalibotan I paunahan?

Usa ka Panahon sa Kalayonhong mga Pagsulay

³ Sa dihang miuban si Jehova sa iyang “sinugo sa pakigtugon” diha sa espirituwal nga templo, Iyang nakita ang nanghibilin nga nagkinahanglag paglunsay ug pagputli. Pananglitan, ang The Watch Tower midasig sa mga magbabasa niini sa paggahin sa Mayo 30, 1918, ingong adlaw sa pag-ampo nga makadaog ang demokratikong mga gahom, sumala sa gihangyo sa Kongreso sa T.B. ug ni Presidente Wilson. Kini maoy usa ka paglapas sa neyutralidad sa Kristohanon.​—Juan 17:14, 16.

4. Unsay nahitabo bahin sa paglutos sa mga alagad ni Jehova?

⁴ Ang klero ug ang mga kagamhanan mihatag ug dakong pag-ipit sa dinihogang mga alagad ni Jehova. Bakak nga gipasakaan ug sumbong nga sedisyon, misulay ang dinihogang nanghibilin sa pagpadayag sa ilang pagkawalay sala atubangan sa katilingban. Apan, sa Mayo 7, 1918, dihay sugo sa pagdakop sa walo ka membro sa tagdumala ug sa mga tagsulat sa Watch Tower Bible and Tract Society, lakip sa presidente, si J. F. Rutherford. Gisugdan ang ilang husay sa Lunes, Hunyo 3. Sa pagka Hunyo 20 mibalik ang hunta sa mga maghuhukom ug gisentensiyahan silang sad-an sa upat ka sumbong. Dayon sa Hulyo 4, 1918, kining dedikadong Kristohanong mga lalaki gipasakay sa tren paingon sa bilanggoan sa Atlanta, Georgia, T.B.A.

5. Sa unsang paagi nakita nga dihay panginahanglan sa pag-ayag taliwala niadtong nag-alagad sa Diyos, ug unsay nagpakita nga nahitabo kini?

⁵ Sa ting-init sa 1918, ang niadto malig-on, organisadong tingog sa pagsangsaw sa katilingban alang sa Gingharian ni Jehova pinaagi sa dinihogan mikunhod ug dako. Ingon nga daw sila ‘gipatay’ maylabot sa ilang kalihokan sa katilingban. (Pinadayag 11:3, 7) Sa panahon sa mga kombensiyon sa Sosyedad niadtong ting-init, ang ubang mga apostata mibulag ug miporma ug ilang kaugalingon kaatbang nga relihiyosong mga grupo. Nagpakita sa batasan sa “daotang ulipon,” sila ‘gipalid’ sama sa “uhot” nga gilain gikan sa matinumanong nanghibilin ni Jehova. (Mateo 3:12; 24:48-51) Ang Memoryal sa kamatayon ni Kristo gisaulog sa Dominggo, Abril 13, 1919, nga may 17,961 nga mitambong sa daghang kayutaan. Kon itandi sa dili kompletong report sa 1917, ang tumatambong sa Memoryal mius-os ug kapin sa 3,000, nga nagpakita sa mga epekto sa pag-ayag.

6. Sa unsang paagi ang pagtugot ni Jehova niining mga pagsulaya sa ulahi nakahatag panalangin sa iyang katawhan?

⁶ Apan, ang pagtugot ni Jehova sa kalayanhong mga pagsulay nga nahitabo sa iyang katawhan adunay panalangin sa ulahi. Wala gayod niya sila talikdi sa bug-os. Sa Martes, Marso 25, 1919, si J. F. Rutherford ug ang iyang pito ka kauban gipagawas sa prisohan nga gipiyansahan ug sa ulahi bug-os nga gipakawalay sala. Sa kalit, alang sa napaputling mga nangaluwas niining yugto sa pagsulay, dihay miabot nga kagawasan gikan sa pagkaulipon! Oo, “ang espiritu sa kinabuhi sa Diyos misulod kanila, ug sila nanagpanindog,” andam sa paglihok.​—Pinadayag 11:11.

7. (a) Unsay himoon karon niining napasig-uling mga saksi? (b) Unsay miresulta niining paglunsay ug pagputli?

⁷ Unsay ilang buhaton karon? Ingong napasig-uling Kristohanong komunidad, gisusi sa nanghibilin ang ilang kaugalingon. Nangayo silag pasaylo kang Jehova sa tanang mga sala sa pagkompromiso. (Itandi sa Salmo 106:6; Isaias 42:24.) Sila miggula ingong napaputling katawhan. Ingong resulta sa pagpaputli kanila, ang maunongon ug kasingkasing nga nanghibilin ‘nahimo alang kang Jehova nga katawhang nanagtanyag ug mga halad diha sa pagkamatarong.’ (Malaquias 3:3) Ang espirituwal nga mga halad sa pagdayeg nga ilang gitanyag nakahatag kahimuot kang Jehova. (Hebreohanon 13:15) Sila nalipay nga ang mubong yugto sa pagkawala sa kahimuot ni Jehova natapos. Sila masaligon nga ang ilang umaabot nga pag-alagad makahatag ug kahimuot kaniya. (Isaias 12:1) Gikan sa Septiyembre 1 ngadto sa 8, 1919, gihimo ang usa ka malipayong kombensiyon sa Cedar Point, Ohio, nga may 7,000 ka tumatambong ug 200 ang gibawtismohan. Kining tanan nagpakitag kapasig-ulian ug pagkamainandamon sa pagtuman sa buluhaton ni Jehova sa pagsangyaw.

8. (a) Sa unsang paagi ang paglunsay ug pagputli nakaapekto kanato karon? (b) Dugang pa sa modernong-adlawng “mga anak ni Levi,” kinsa pa ang kinahanglang moagi sa pagsulay ug pag-ayag?

⁸ Sa unsang paagi nakaapekto kini sa katawhan ni Jehova nga buhi karon? Sumala sa tagna, si Jehova, uban sa iyang sinugo, moabot ug “molingkod ingong tiglunsay ug tigputli.” (Malaquias 3:3) Oo, ang paagi sa paglunsay ug pagputli nagapadayon, ug siya “molingkod” ug magbantay pag-ayo. Ang kamatuoran nga miagi ang maunongong nanghibilin ug panahon sa mga kalayonhong mga pagsulay sayo niining sigloha wala magkahulogan nga ang Dakong Tiglunsay natapos na sa iyang pagputli kanila. Ang pagsulay ug pag-ayag nagpadayon hangtod sa atong adlaw. Si Jehova anaa gihapon sa iyang templo, naglinghod diha sa paghukom. Gilunsay niya dili lamang ang “mga anak ni Levi,” ang dinihogang nanghibilin. Ang tagna ni Malaquias nagpakita sa Iyang pagtagad alang sa “dumuloong,” nga mao ang “dakong panon,” kansang palaabuton mao ang yutan-ong kinabuhi. (Malaquias 3:5; Pinadayag 7:9, 10) Oo, sulod sa 69 ka tuig, padayong ginaputli ang katawhan ni Jehova sa upat ka kasagarang mga paagi.

Mga Paglunsay sa Organisasyon

9. Unsa ang pipila ka kauswagan sa gambalay sa organisasyon sukad sa 1919?

⁹ Una, nahitabo ang pagputli pinaagi sa progresibong pagpasibo sa tibuok-yuta nga kongregasyon uban sa bag-ong nasabtan Kasulatanhong mga prinsipyo. Kinahanglang adunay anam-anam nga pagwala sa demokratikong mga paagi sa pagdumala sa mga kalihokan sa kongregasyon. Tagda ang pipila ka progresibong mga kauswagan bahin niini.

1919: Ang mga pagtudlo sa Nagamandong Lawas nagsugod pinaagi sa pag-asayn gikan sa mga hedkuwarter sa Watch Tower Society ug permanenteng direktor sa pag-alagad alang sa matag kongregasyon aron sa pagdumala sa mga kalihokan sa pag-alagad sa kanataran.

1932: Ang eleksiyon sa mga ansiano ug mga deakono kada tuig giwala; ang pagpili sa kongregasyon ug mga lalaki alang niining mga katungdanana gipulihan sa komite sa pag-alagad nagabulig (ug nagalakip) sa tinudlo sa Sosyedad nga direktor sa pag-alagad.

1937: Nasabtan nga ang “mga Jonadab” [kadtong may yutan-ong paglaom] mahimong makabaton ug katungdanan sa kongregasyon.

1938: Ang tanang mga magtatan-aw ug ang ilang mga katabang itudlo sa Sosyedad sa teokratikong paagi.

1972: Gipatin-aw nga ang Kasulatanhong paagi sa pagdumala sa matag kongregasyon dili dumalahon sa usa lamang ka hamtong nga Kristohanon kondili sa lawas sa mga ansiano, nga itudlo sa Sosyedad.

1975: Gitukod ang mga komite sa Nagamandong Lawas sa pag-atiman sa nagkalainlaing mga katungdanan; walay usa ka tawo ang makadumala sa mga butang, apan ang tanan sulod sa komite adunay samang tingog ug hiusang nagalantaw sa pagkaulo ni Kristo Jesus.

10. (a) Unsay miresulta niining mga pagpalunsay? (b) Unsay imong pagbati niining tanang mga kausaban?

¹⁰ Unsay miresulta niining mga kausaban? Sa walay duhaduha tugob ang panalangin ni Jehova, sumala sa makita sa pagtubo sa espirituwal ug sa gidaghanon sa iyang mga magsisimba. (Itandi sa Buhat 6:7; 16:5.) Tinuod, ang pipila ka mga magtatan-aw ug ang uban giayag o gipagawas tungod kay wala sila magpasakop nga maunongon sa gitultolan sa Diyos nga paagi. Apan, ang kadaghanan sa katawhan ni Jehova, nakitang masinundanon ug mapasakopon sa mga kausaban sa organisasyon. (Hebreohanon 13:17) Ilang nasabtan nga pinaagi sa maong mga pagpasibo ang Dakong Maglulunsay nakaagak kanila nga labi pa nga kaharmoniya sa mga paagi sa Kasulatan alang sa mga kongregasyon.

Ang Pag-alagad sa Kanataran

11. Unsang mga paagi sa pag-uswag ang nabatonan sa buluhaton pagsangyaw sa dili pa dugayng mga katuigan?

¹¹ Ikaduha, nahitabo ang pagputli pinaagi sa mga pagsulay may kalabotan sa pakigbahin sa pag-alagad sa kanataran.

1922: Ang tanang sakop sa kongregasyon giawhag sa pakigbahin sa balay-ug-balay nga pag-alagad sa kanataran. Migula ang binulang Bulletin (karon Atong Ministeryo sa Gingharian) nga nasudlan sa mga direktiba sa pag-alagad.

1927: Gisugdan ang regular nga balay-ug-balay nga pag-alagad sa Dominggo; giapod-apod ang mga libro ug mga pulyeto nga may kontribusyon.

1937: Unang Model Study nga pulyeto alang sa mga pagtuon sa Bibliya sa balay nadawat.

1939: Gisugdan ang unang tinuig nga kampaniya alang sa suskrisyon sa Watchtower; kapin sa 93,000 ka bag-ong suskrisyon ang napahimutang.

1940: Gisugdan ang buluhaton sa magasin sa kadalanan.

Kining pagsangyaw sa katilingban nakabaton ug dugang nga mga paagi sa pag-uswag, lakip sa paghimog mga pagbalik duaw ug sa pagdumalag mga pagtuon sa Bibliya sa balay.

12. (a) Unsay mga resulta sa mga paglunsay may kalabotan sa pag-alagad sa kanataran? (b) Sa unsang paagi atong ikapasundayag ang atong pagkamaunongon sa paagi sa paglunsay ni Jehova sa iyang katawhan?

¹² Unsa ang mga resulta? Sa milabay ang mga tuig naayag o gipagawas ang uban tungod kay dili sila buot mahimong mga Kristohanon nga nagapamunga. (Juan 15:5) Apan daghan sa katawhan ni Jehova misanong sa panawag alang sa mga magwawali sa Gingharian. Gani, kanang gamayng grupo nga ubos sa 8,000 balik sa 1919 mitubo sa labing taas nga gidaghanong 3,229,022 ka magmamantala sa Gingharian sa 1986! Komusta ang bug-os panahong ministeryo? Kon itandi sa 150 ka aktibong colporteurs (mga payunir) sa tingpamulak sa 1919, dihay kapin sa 391,000 ka payunir nga mga magmamantala sa miaging tuig nga aktibo matag bulan​—ang labing taas nga numero sa kasaysayan sa modernong mga Saksi! Pinaagi sa paghimog aktibong pakigbahin sa pagsangyaw sa maayong balita, atong ginapakita ang atong maunongong gugma sa pagpaluyo sa paagi sa pagpadayon ni Jehova sa pagputli sa iyang katawhan.​—1 Corinto 9:16.

Nagakauswag nga Kahayag

13. Unsa ang pipila ka panig-ingnan nga gidan-agan ni Jehova ang iyang katawhan?

¹³ Ikatulo, nahitabo ang pagputli samtang ginasulayan ang katawhan sa Diyos bahin sa pagdawat sa progresibong espirituwal nga kahayag gikan sa Bibliya. (Proverbio 4:18) Gikan sa 1919 hangtod karon nagaagos ang tinuod bag-ong nasabtang mga kamatuoran.

1925: Dayag nga nasabtan nga adunay duha ka lahi ug magkaatbang nga mga organisasyon​—ang kang Jehova ug kang Satanas.

1931: Gisagop ang bag-ong ngalang mga Saksi ni Jehova.

1935: Ang “dakong panon” sa Pinadayag 7:9-15 nailhan ingong usa ka matang nga adunay yutan-ong palaabuton.

1941: Ang pagkamatarong sa pagkasoberano ni Jehova sa uniberso nakitang mao ang pangunang isyu nga gibangon sa hagit ni Satanas.

1962: Ang “labawng kagamhanan” sa Roma 13:1 tukmang nailhan nga mao ang sekular nga mga awtoridad sa kagamhanan, nga kanila relatibong magpasakop ang mga Kristohanon.

1986: Nasabtan nga ang nanghibilin ug ang “dakong panon” sa mahulagwayong paagi kinahanglang makig-ambit sa unod ug dugo ni Kristo pinaagi sa pagdawat sa iyang halad aron magkaharmoniya uban kaniya.​—Juan 6:53-56.

Sa milabay ang daghang mga tuig, samtang gidan-agan ni Jehova ang iyang katawhan, matin-aw nga adunay panginahanglan sa pagtagad sa kongregasyon aron mahuptan ang maputli, neyutral nga organisasyon nga nagatahod sa pagkabalaan sa dugo.​—1 Corinto 5:11-13; Juan 17:14, 16; Buhat 15:28, 29.

14. (a) Sa unsang paagi misanong ang katawhan ni Jehova niining pag-uswag sa kahayag? (b) Unsay imong determinasyon may kalabotan sa alagianan sa komunikasyon ni Jehova?

¹⁴ Unsay reaksiyon sa katawhan sa Diyos niining pag-uswag sa kahayag? Sa gihapon, dihay uban nga dili makadawat sa pipila ka mga kausaban. Kini sila ‘gipapalid.’ (Mateo 3:12) Sa laing bahin, pagkamalipayon sa maunongong mga katawhan ni Jehova niining espirituwal nga kadan-agan! Sa panahon nga nagpangapkap ang Kakristiyanohan diha sa espirituwal nga kangitngit, ang dalan sa mga katawhan ni Jehova dugang pang nagakasanag ug nagakasanag. Dili ba angay magpabilin kitang suod sa alagianan sa komunikasyon nga gigamit ni Jehova, dawaton ang tanang pag-uswag sa kahayag ingong “kalan-on sa tukmang panahon”?​—Mateo 24:45.

Paghukas sa Mahugawng mga Kustombre

15. Sa unsang paagi anam-anam nga gilunsay ni Jehova ang iyang katawhan bahin sa mahugaw o Babilonyanhong mga kustombre?

¹⁵ Ikaupat, nahitabo ang paghinlo sa dihang gikinahanglang walaon ang mahugaw o Babilonyanhong mga kustombre. Sa katuigan sa 1920 mihunong ang katawhan sa Diyos sa pagsaulog sa Pasko ug sa ubang mga piyesta nga napamatud-ang pagano ug sinugdanan. Sa 1945 ang baroganan sa Kristohanon bahin sa mga pagdugang ug dugo gipatin-aw. Sa katuigang 1960 ug sa 1970, sa dihang ang moral nga klima sa kalibotan nagkaut-ot, nagapadayon Ang Bantayanang Torre sa paghatag ug prangkang tambag alang sa katawhan sa Diyos bahin sa mga ulohan sama sa tukmang batasan tali sa mga sekso ug sa panginahanglan sa pagbulag gikan sa batasan sa tabako ug ubang mga droga.

16. Sa unsang paagi lantawon kining mga kausaban bahin sa mahugawng mga kustombre?

¹⁶ Siyempre, kining maong mga kausaban may kalabotan sa mahugawng mga kustombre sa kasagaran nahimong pagsulay sa pagkamaunongon sa katawhan sa Diyos. Apan, kadtong kinahanglang maghimog mga kausaban naglantaw niining maong mga kausaban ingong tabang sa paghukas sa mahugawng sapot. (Colosas 3:9, 10) Sila nakaamgo nga bisag ang mga kustombre nga nalangkit sa pipila ka mga piyesta daw dili daotan, ang paglantaw ni Jehova ang importante kanato; siya mismo nakakita sa pagano relihiyosong mga kustombre nga gigikanan niini. Mahitungod sa moral nga mga kinahanglanon sa Diyos, ilang gilantaw kini nga panalipod imbes usa ka restriksiyon, busa sila gipanalanginan ni Jehova sa pagkahimong putli. Kon daw malisod masabtan ang kausaban, sila masaligon nga si Jehova ‘nagatudlo kanato aron makapahimulos sa ilang kaugalingon.’​—Isaias 48:17.

17, 18. (a) Sa unsang paagi kita sa tagsatagsa sulayan sa Dakong Maglulunsay? (b) Unsay atong determinasyon samtang nagahulat kita sa adlaw ni Jehova?

¹⁷ Matag tuig nagapadayon si Jehova sa paglunsay ug sa pagputli sa iyang katawhan. Sa kinatibuk-an, sila misugot nga mapalunsay may kalabotan sa ilang organisasyon, kalihokan, doktrina, ug moral nga kahinlo. Apan komusta kita sa tinagsatagsa? Pinaagi sa iyang organisasyon si Jehova nagpadayon sa pagtaganag “magahi nga kalan-on” alang sa pagtultol nga makapalunsay sa kasingkasing. Ang atong mga motibo gisusi ug gisulayan. (Hebreohanon 4:12; 5:14) Pinaagi sa pagsanong sa paagi sa paglunsay, sa pagputli sa Dakong Maglulunsay, kita makapabiling mahinlo samtang ginahulat nato ang “pag-abot sa dako ug makalilisang nga adlaw ni Jehova.”​—Malaquias 4:5.

¹⁸ Salamat kang Jehova, “ang tinuod nga Ginoo,” ug sa iyang “sinugo sa pakigtugon,” si Jesu-Kristo, kinsa nagalunsay ug nagaluwas kanato gikan sa kahugawan niining panahona sa pagsulay ug pag-ayag. Hinaot determinado kitang tanan sa paglakaw diha sa mahinlong mga dalan sa kalinaw ni Jehova ilalom sa “Prinsipe sa Pakigdait,” si Jesu-Kristo, ug busa makatipig sa atong malipayong relasyon kang Jehova.​—Isaias 9:6; Salmo 72:7.

Sa Unsang Paagi Gilunsay ni Jehova ang Iyang Katawhan May Kalabotan sa—

◻ Mga kausaban sa organisasyon?

◻ Pakigbahin sa pag-alagad sa kanataran?

◻ Pagdawat sa progresibong kahayag?

◻ Paghukas sa mahugawng mga kustombre?

1. Sa dihang miabot si Jehova sa espirituwal nga templo sa modernong panahon, unsay iyang nakita, ug unsang pangutana ang mibangon dinhi?

3. Sa ting-init sa 1918, unsay kahimtang sa mga saksi sa Diyos?

[Blurb sa panid 16]

Ingong resulta sa pagputli ug paglunsay, ang maunongon ug kasingkasing nga mga nanghibilin ‘nahimo kang Jehova nga usa ka katawhan nga nagatanyag ug halad sa pagkamatarong’

[Blurb sa panid 19]

Matag tuig nagpadayon si Jehova sa paglunsay ug sa pagputli sa iyang katawhan

[Hulagway sa panid 17]

Hapawon sa karaang maglulunsay ang mga hugaw, kun yamokyamok. Sa ingon, tugotan ni Jehova ang pagsulay ug pag-ayag aron mahimong lunsay ang iyang katawhan

[Hulagway sa panid 18]

Ang pipila ‘gipapalid’ samag “uhot,” apan ang maunongong alagad ni Jehova malipayong midawat sa progresibong espirituwal nga kahayag

[Tinubdan]

Pictorial Archive (Near Eastern History) Est.