Usa ka Lamparahan Aron Magtultol Kanimo sa Dalan sa Kinabuhi
“OH JEHOVA, ako nasayod nga ang dalan sa tawo wala diha sa iyang kaugalingon. Kini wala sa tawo nga molakaw aron sa pagtultol sa iyang mga lakang.” (Jeremias 10:23) Uban niining mga pulonga ang manalagnang Jeremias nagpakita nga ang mga tawo dili malamposong makasubay sa dalan sa kinabuhi nga walay tabang. Asa man makaplagan ang maong tabang? Ang salmista nagtubag dinha sa iyang pag-ampo kang Jehova nga Diyos: “Ang imong pulong maoy lamparahan sa akong mga tiil, ug kahayag sa akong alagianan.”—Salmo 119:105.
Kadtong magtuon sa Pulong sa Diyos, ang Balaang Bibliya, ug magpadapat sa giingon niini mahisama sa usa nga mosugod sa pagpanaw sayo sa kabuntagon. Sa sinugdanan, dili pa kaayo daghan ang iyang makita tungod kay ngitngit. Apan sa dihang mosugod na pagsidlak ang adlaw, ubay-ubay na ang iyang makita. Sa kataposan, bug-os nga magsidlak ang adlaw sa itaas. Makita niya ang tanan sa klarong detalye. Ang maong ilustrasyon makapahinumdom kanato sa usa ka panultihon sa Bibliya: “Ang alagianan sa matarong ingon sa banagbanag sa kahayag nga nagakasanag sa kahayag hangtod sa pagkahingpit sa adlaw.”—Proverbio 4:18.
Komosta man kadtong nagsalikway sa pagtultol sa Diyos? Ang Bibliya nag-ingon: “Ang dalan sa tawong daotan ingon sa kangitngit; sila dili mahibalo kon unsa ang ilang napangdolan.” (Proverbio 4:19) Oo, ang mga daotan maoy sama sa tawo nga napangdol sa ngitngit. Bisan ang ilang morag mga kalamposan sa ilalom sa kinamaayohang mga kahimtang maoy temporaryo, tungod kay “walay kaalam ni pagsabot ni tambag batok kang Jehova.”—Proverbio 21:30.
Busa, sunda ang pagtultol sa Pulong sa Diyos, ang Bibliya. Kon kini imong himoon, makaplagan nimo nga matuod ang mga pulong sa Proverbio 3:5, 6: “Sumalig ka kang Jehova sa bug-os mong kasingkasing ug ayaw pagsalig sa imong kaugalingong salabotan. Sa tanan nimong mga dalan ilha siya, ug siya magamando sa imong mga alagianan.”