Nganong ‘Moadto sa Hulmigas’?

ANG maalamong Haring Solomon sa karaang Israel mihatag niining tambaga: “Umadto ka sa hulmigas.” Nganong miingon man siya niini? Unsay atong makat-onan gikan sa mga hulmigas?

Si Solomon midugang: “Palandonga ang dalan sa [hulmigas] ug magmaalamon. Bisan siya walay pangulo, punoan o magmamando, siya nagaandam ug iyang kalan-on bisan sa ting-init; siya nagahakot sa iyang pagkaon bisan sa ting-ani.” (Proverbio 6:6-8) Gipadayag niining mga pulonga sa dugay na kaayong panahong miagi ang mga kamatuoran nga nadiskobrehan sa modernong-adlawng mga tigtuon sa tanom ug ubang buhing mga butang.

Ang magsusumbingay nga si Agur nagpakita nga ang mga hulmigas “kinaiyanhong maalamon.” (Proverbio 30:24, 25) Sa pagkatinuod, ang ilang kaalam dili maoy bunga sa intelihenting pangatarongan kondili maoy bunga gikan sa mga kinaiyahan nga gihatag kanila sa Maglalalang. Tungod sa kinaiyahan, pananglitan, ang mga hulmigas nagatigom sa ilang pagkaon sa hustong panahon.

Ang mga hulmigas organisado kaayo. Hilabihan ka matinabangon ug matinagdanon sa kaubang mga mamumuo, tabangan nila ang mga hulmigas nga nasamdan ug gikapoy balik sa salag. Sila kinaiyanhong nagaandam alang sa umaabot ug nagabuhat sa tanang butang nga mahimo aron matapos ang ilang mga trabaho.

Ang kinaiyanhong lihok sa hulmigas nagpasabot nga ang mga tawo kinahanglang magplanong daan ug magmakugihong mga trabahante. Kini aplikado diha sa eskuylahan, sa trabaho, ug sa espirituwal nga kalihokan. Sama nga ang mga hulmigas nakabenepisyo sa iyang pagkakugihan, sa ingon ang Diyos nagatinguha nga ang mga tawo ‘makakita sa tanan nilang paghago.’ (Ecclesiastes 3:13, 22; 5:18) Sama sa puliking mga hulmigas, ang matuod nga mga Kristohanon magabuhat ug kuging trabaho sa adlaw. Sila ‘nagatrabaho kutob sa ilang mahimo nga mabuhat sa ilang mga kamot,’ dili tungod kay nagtan-aw ang amo, kondili tungod sa pagkamaminatud-on ug sa tinguha nga magmakugihon, mapuslanong mga mamumuo.​—Ecclesiastes 9:10; itandi ang Proverbio 6:9-11; tan-awa usab ang Tito 2:9, 10.

Nan, kita magmalipayon, kon kita ‘moadto sa hulmigas’ ug ipadapat ang atong makat-onan gikan niana. Ug ang labing dakong kalipay atong maangkon kon kita magkugi sa pagtuman sa kabubut-on ni Jehova nga Diyos, sumala sa gipadayag diha sa Bibliya.