IGSOONG BABAYE

Diha sa Kasulatan kini nga termino gipadapat ngadto sa pursosong mga igsoong babaye ug ngadto sa mga igsoong babaye nga pareho ug amahan apan lahi ug mga inahan (Gen 34:​1, 27; 1Cr 3:1-9), o pareho ug inahan apan lahi ug mga amahan, sama sa mga igsoong babaye ni Jesus.​—Mat 13:​55, 56; Mar 6:3.

Ang pipila sa mga anak nga lalaki ni Adan dayag nga naminyo sa ilang mga igsoong babaye, sanglit ang tanang katawhan naggikan man kang Adan ug Eva. (Gen 3:20; 5:4) Ang asawa ni Adan nga si Eva, ingong ‘bukog sa iyang mga bukog ug unod sa iyang unod,’ mas suod pa ug relasyon kaniya kay sa usa ka igsoong babaye. (Gen 2:22-24) Kaniadto, dili kaulawan kon ang usa makigminyo sa iyang igsoong babaye, kini siya iya mang igsoon-sa-amahan o igsoon-sa-inahan. Ang asoy nag-ingon nga kapin sa 2,000 ka tuig sa ulahi, si Abraham nakigminyo kang Sara nga iyang igsoon-sa-amahan. (Gen 20:​2, 12) Apan, ang Moisesnong Balaod, mga 430 ka tuig sa ulahi nagdili sa maong mga panaghiusa ingong insesto. (Lev 18:​9, 11; 20:17) Sa walay duhaduha, samtang nagkalayo ang tawhanong rasa gikan sa orihinal nga kahingpitan ni Adan, ang pagminyo ug suod nga paryente makadaot na.

Ang “igsoong babaye” sa mas lapad nga diwa niini naglakip sa katagilungsod nga mga babaye sa usa ka nasod. (Num 25:​17, 18) Ang mga nasod o mga siyudad nga may suod nga relasyon o nagtuman sa samang moral nga mga panggawi gipakasama sa magsoong mga babaye.​—Jer 3:7-10; Eze 16:​46, 48, 49, 55; 23:​32, 33.

Ang Hebreohanong pulong alang sa igsoong babaye (ʼa·chohthʹ) gihubad nga “lain,” “pikas,” o “usa” sa dihang naghubit sa nahimutangan sa usa ka butang kon itandi sa kauban niini nga butang diha sa tabernakulo ug diha sa mga panan-awon ni Ezequiel.​—Ex 26:​3, 5, 6, 17; Eze 1:​9, 23; 3:13.

Sa Kristohanong Kongregasyon. Si Jesus nagtudlo nga ang espirituwal nga mga relasyon angayng molabaw sa unodnong mga relasyon. Kadtong mga babaye nga nagabuhat sa kabubut-on sa Amahan maoy ‘mga igsoong babaye’ nga mas gitamod kay sa unodnon lamang nga mga relasyon. (Mat 12:50; Mar 3:​34, 35) Ang usa nga andam magputol sa unodnong mga relasyon, kon gikinahanglan, tungod sa Gingharian, makabaton ug “usa ka gatos ka pilo” nga “mga igsoong babaye” ug uban pang relasyon sa ‘pamilya’ karon, ug dugang pa, “kinabuhing walay kataposan” sa umalabot. (Mat 19:29; Mar 10:​29, 30; Luc 14:26) Ang mga babaye diha sa Kristohanong kongregasyon gitawag nga mga igsoon, sa espirituwal nga diwa.​—Rom 16:1; 1Co 7:15; 9:5; San 2:15.

Mahulagwayong Paggamit. Ang pagpakigsuod sa kaalam gidasig sa maalamong magsusulat nga si Solomon sa dihang iyang gipasiugda ang kahinungdanon sa mga sugo ni Jehova. “Ingna ang kaalam: ‘Ikaw mao ang akong igsoon nga babaye’; ug tawgon mo ang pagsabot nga ‘Paryente nga Babaye.’”​—Pr 7:4.