Kahadloki si Jehova ug Himayaa ang Iyang Balaang Ngalan

“Kinsa bay dili mahadlok kanimo, Jehova, ug magahimaya sa imong ngalan, tungod kay ikaw mao lamang ang maunongon?”​—PINADAYAG 15:4.

1, 2. (a) Giunsa pag-abli ni Jehova ang langitnong mga tamboanan sulod sa 1991? (b) Unsang kasinatian sa kinabuhi ang nagdasig sa usa ka matinumanong misyonaryo sa paghatag sa tambag: “Kahadloki si Jehova”? (Tan-awa usab ang 1991 Yearbook, mga panid 187-9.)

SI Jehova ‘nagbukas sa mga tamboanan sa mga langit ug nagbubo sa panalangin hangtod nga wala nay panginahanglan.’ Kanang mga pulonga ikapadapat nga balikbalik sa mga Saksi ni Jehova sa panahong bag-o pa. (Malakias 3:10) Pananglitan, sa 1991 tuig sa pag-alagad, ang kadasig sa miduaw nga mga Saksi ug lokal nga mga kombensiyonista nadayag diha sa Kristohanong panag-uban panahon sa espesyal nga mga kombensiyon nga gihimo sa tibuok yuta​—gikan sa “Putling Pinulongan” nga mga Kombensiyon sa Buenos Aires sa Amerika del Sur; ug Manila, Taipei, ug Bangkok sa Oriente; ngadto sa “Mga Mahigugmaon sa Kagawasan” nga mga Kombensiyon sa Budapest, Prague, ug Zagreb (Agosto 16-18, 1991) sa Silangang Uropa.

² Pagkadako sa kalipay sa mga delegado gikan sa ubang mga nasod nga makahibalag sa karaan matinumanong mga Saksi nianang mga dapita! Pananglitan, sa Bangkok, si Frank Dewar​—nga sa usa ka panahon maoy bugtong magmamantala sa Gingharian sa Thailand​—miasoy bahin sa iyang 58 ka tuig nga misyonaryong pag-alagad. Ang iyang pagsangyaw maoy gikan sa kaislahan sa Pasipiko abot sa Habagatan-silangang Asia, ug abot gayod sa Tsina. Miatubang siya sa mga katalagman gumikan sa pagkalunod, sa mabangis nga mga mananap sa lasang, sa mga sakit sa tropiko, ug sa mapintas nga pagmando sa Hapones nga mga pangulong militar. Sa gisukna kon unsang tambag ang ihatag niya ngadto sa mga kombensiyonista, ang iyang tubag yano: “Kahadloki si Jehova!”

3. Nganong angay nga atong ipasundayag ang diyosnong kahadlok?

³ “Kahadloki si Jehova!” Hinungdanon gayod nga ugmaron natong tanan kanang maayo nga kahadlok! “Ang pagkahadlok kang Jehova mao ang sinugdanan sa kaalam.” (Salmo 111:10) Kining maong pagkahadlok dili kay mangil-ad nga pagkalisang kang Jehova. Hinunoa, kini usa ka dakong pagtahod sa iyang makapahinganghang kahalangdon ug diyosnong mga hiyas, nga gipasukad sa salabotan nga atong madawat pinaagi sa pagtuon sa Pulong sa Diyos. Sa Pinadayag 15:3, 4, ang awit ni Moises ug sa Kordero nagpahayag: “Dako ug kahibulongan ang imong mga buhat, Jehova nga Diyos, ang Makagagahom sa Tanan. Matarong ug matuod ang imong mga dalan, Hari sa walay kataposan. Kinsa bay dili mahadlok kanimo, Jehova, ug magahimaya sa imong ngalan, tungod kay ikaw mao lamang ang maunongon?” Sa pagkamaunongon ngadto sa iyang mga magsisimba, si Jehova adunay “usa ka basahon nga handumanan . . . nga gisulat sa iyang atubangan alang niadtong nahadlok kang Jehova ug niadtong nagapalandong sa iyang ngalan.” Sila gantihan ug kinabuhing walay kataposan.​—Malakias 3:16; Pinadayag 20:12, 15.

Diyosnong Kahadlok Magmadaogon

4. Unsang pagluwas sa kakaraanan angay magdasig nato sa pagkahadlok kang Jehova?

⁴ Sa dihang ang Israel migawas sa Ehipto ni Paraon, gipakita sa tin-aw ni Moises nga siya nahadlok lamang kang Jehova. Sa wala madugay, ang mga Israelinhon nasikop sa tunga tali sa Pulang Dagat ug sa gamhanang kasundalohan sa Ehipto. Unsay ilang mahimo? “Si Moises miingon ngadto sa katawhan: ‘Ayaw kamo kahadlok. Barog kamo nga malig-on ug tan-awa ang kaluwasan ni Jehova, nga iyang pagabuhaton alang kaninyo karong adlawa. Kay ang mga Ehiptohanon nga inyong makita karong adlawa dili na ninyo makita pag-usab, dili, dili na gayod. Makig-away si Jehova mismo alang kaninyo, ug kamo mismo magmahilomon.’” Sa milagrosong paagi, gibulag ni Jehova ang katubigan. Ang mga Israelinhon milatas sa namad-ang dagat. Dayon ang katubigan mibuhagay pag-usab. Ang kasundalohan ni Paraon napuo. Giluwas ni Jehova kadtong mahadlokon-sa-Diyos nga nasod, samtang sa samang panahon gipahamtangan ug paghukom ang nagpasipala-sa-Diyos nga Ehipto. Maingon usab karong adlawa, ipasundayag niya ang iyang pagkamaunongon sa pagluwas sa iyang mahadlokon-sa-Diyos nga mga Saksi gikan sa kalibotan ni Satanas.​—Exodo 14:13, 14; Roma 15:4.

5, 6. Unsang mga hitabo sa panahon ni Josue nagpakita nga angay mahadlok kita kang Jehova inay sa tawo?

⁵ Tapos sa Exodo gikan sa Ehipto, gipadala ni Moises ang 12 ka espiya ngadto sa Yutang Saad. Napulo ang nalisang sa pagkakita sa samag-higante nga mga lumolupyo ug naninguha sa pagdani sa Israel nga dili mosulod sa yuta. Apan ang duha pa, si Josue ug Caleb, mitaho: “[Kini] usa gayod ka maayo nga yuta. Kon si Jehova nahamuot kanato, nan siya magpasulod kanato niining yutaa ug kini iyang igahatag kanato, usa ka yuta nga nagaagay sa gatas ug dugos. Dili lamang kamo magmasuklanon batok kang Jehova; ug kamo, dili kamo mahadlok sa katawhan sa yuta, kay sila ang tinapay alang kanato. Ang ilang salipdanan nagpahilayo gikan sa ibabaw nila, ug si Jehova nagauban kanato. Ayaw ninyo silag kahadloki.”​—Numeros 14:7-9.

⁶ Bisan pa niana, kadtong mga Israelinhon gidaog sa kahadlok sa tawo. Ingong sangpotanan, sila wala gayod makaabot sa yutang saad. Apan si Josue ug Caleb, uban sa usa ka bag-ong kaliwatan sa mga Israelinhon, nabulahan sa pagsulod niadtong piniling yuta ug nagtikad sa iyang kaparrasan ug kaolibohan. Sa iyang panamilit nga pakigpulong ngadto sa natigom nga katawhan sa Israel, gihatag ni Josue kining tambaga: “Kahadloki ninyo si Jehova ug alagara ninyo diha sa kawalay-ikasaway ug sa kamatuoran.” Ug midugang si Josue: “Alang kanako ug sa akong panimalay, kami magaalagad kang Jehova.” (Josue 24:14, 15) Makapadasig gayod nga mga pulong alang sa mga ulo sa pamilya ug sa tanan nga uban sa pagkahadlok kang Jehova samtang kita nangandam sa pagtabok ngadto sa matarong bag-ong kalibotan sa Diyos!

7. Giunsa pagpasiugda ni David ang kahinungdanon sa pagkahadlok sa Diyos?

⁷ Ang magbalantayg karnero nga bata nga si David nagpadayag usab ug talagsaong kahadlok kang Jehova sa gihagit niya si Goliat diha sa ngalan sa Diyos. (1 Samuel 17:45, 47) Sa higdaanan sa hapit na siyang mamatay, si David nakapahayag: “Ang espiritu ni Jehova mao ang namulong pinaagi kanako, ug ang iyang pulong diha sa akong dila. Ang Diyos sa Israel miingon, ngari kanako ang Bato sa Israel namulong, ‘Sa dihang ang nagamando sa katawhan matarong, nga nagamando nga may kahadlok sa Diyos, nan kini sama sa kahayag sa kabuntagon, sa dihang mosilang ang adlaw, usa ka buntag nga walay mga panganod.’” (2 Samuel 23:2-4) Kining pagkahadlok sa Diyos wala maglungtad taliwala sa mga magmamando niining kalibotana, ug pagkamakapasubo ang sangpotanan! Pagkalahi unya sa dihang si Jesus, “ang Anak ni David,” magamando sa yuta nga may kahadlok kang Jehova!​—Mateo 21:9.

Paglihok nga May Kahadlok Kang Jehova

8. Nganong ang Juda miuswag ilalom kang Josapat, nga nagpaila sa unsa alang kanato karong adlawa?

⁸ Mga usa ka gatos ka tuig tapos sa pagkamatay ni David, si Josapat nahimong hari sa Juda. Diha na usab ang usa ka hari nga nag-alagad nga may kahadlok kang Jehova. Gipasig-uli niya ang teokratikanhong kahikayan sa Juda, gipahamutang ang mga maghuhukom sa tibuok yuta, ug gihatagan sila niining mga instruksiyona: “Dili alang sa tawo nga kamo magahukom kondili maoy alang kang Jehova; ug siya magauban kaninyo sa paghukom. Ug karon himoa nga modangat kaninyo ang pagkahadlok kang Jehova. Pagbantay ug buhata kana, kay kang Jehova nga atong Diyos walay pagkadili-matarong o pagpalabi o pagdawat ug hiphip. . . . Kini ang inyong pagabuhaton nga may kahadlok kang Jehova uban sa pagkamatinumanon ug sa hingpit nga kasingkasing.” (2 Cronicas 19:6-9) Busa, ang Juda miuswag tungod kay may kahadlok kang Jehova, maingon nga ang katawhan sa Diyos makabatog kaayohan tungod sa pag-alagad sa maluluy-ong mga magtatan-aw karong adlawa.

9, 10. Sa unsang paagi si Josapat nagmadaogon tungod sa pagkahadlok kang Jehova?

⁹ Bisan pa niana, ang Juda may mga kaaway. Mihukom sila nga panason ang nasod sa Diyos. Ang nagkausang kasundalohan sa Amon, Moab, ug Bukid Seir mihugpa sa Judeanong teritoryo ug mihulga sa Jerusalem. Kadto usa ka gamhanang kasundalohan. Si Josapat midangop kang Jehova diha sa pag-ampo “samtang ang tanan sa Juda nanagbarog atubangan ni Jehova, bisan ang ilang mga bata, ilang mga asawa ug ilang mga anak lalaki.” Dayon, ingong tubag sa maong pag-ampo, ang espiritu ni Jehova miabot sa Levihanon nga si Jahaziel, kinsa miingon: “Kini mao ang giingon ni Jehova kaninyo, ‘Ayaw kamo kahadlok o kalisang tungod niining dako nga panon; kay ang gubat dili inyo, kondili iya sa Diyos. Ugma dulhog kamo batok kanila. . . . Dili kamo kinahanglang makig-away niining higayona. Magpahamutang kamo, tindog nga walay lihok ug tan-awa ang kaluwasan ni Jehova alang kaninyo. Oh Juda ug Jerusalem, ayaw kamo kahadlok o kalisang. Ugma panggula kamo batok kanila, ug si Jehova magauban kaninyo.’”​—2 Cronicas 20:5-17.

¹⁰ Sa sunod buntag, ang mga lalaki sa Juda sayo nga mibangon. Samtang sila masinugtanong nanggula aron sa pagsugat sa kaaway, si Josapat mitindog ug miingon: “Pamatia ako, Oh Juda ug kamong mga lumolupyo sa Jerusalem! Magbaton ug pagtuo kang Jehova nga inyong Diyos aron kamo molungtad ug dugay. Magbaton ug pagtuo diha sa iyang mga manalagna ug sa ingon magmalamposon.” Nga nag-una sa armadong kalalakin-an, ang mga mag-aawit kang Jehova miawit nga dungan: “Dayega si Jehova, kay sa panahong walay katinoan mao ang iyang mahigugmaong-kalulot.” Gipahayag ni Jehova ang maong mahigugmaong-kalulot pinaagi sa paglibog sa mga kaaway nga sila nagpinatyanay sa usag usa. Sa pag-abot sa mga lalaki sa Juda ngadto sa bantayanang torre sa kamingawan, ang mga patay nga lawas na lamang sa mga kaaway ang nahibilin.​—2 Cronicas 20:20-24.

11. Mahitungod sa kahadlok, sa unsang paagi ang mga nasod lahi sa katawhan sa Diyos?

¹¹ Sa dihang nadunggan sa sikbit nga kanasoran ang maong milagrosong pagluwas, “ang pagkahadlok sa Diyos” midangat kanila. Sa laing bahin, ang nasod nga nagmasinugtanon nga may kahadlok kang Jehova karon nagbaton “ug pahulay sa dapit sa palibot.” (2 Cronicas 20:29, 30) Sa susama, sa dihang ipahamtang ni Jehova ang paghukom sa Armageddon, sila unya mahadlok sa Diyos ug sa iyang Tiglaglag nga Anak, si Jesu-Kristo, ug sila dili arang makabarog sa dakong adlaw sa diyosnong kasuko.​—Pinadayag 6:15-17.

12. Sa unsang paagi ang kahadlok kang Jehova nagantihan niadtong unang mga panahon?

¹² Ang maayo nga kahadlok kang Jehova mopatungha ug tugob nga mga panalangin. Si Noe nagpakita ug diyosnong kahadlok ug mitukod sa arka alang sa pagluwas sa iyang panimalay. (Hebreohanon 11:7) Ug kon bahin sa unang-siglo nga mga Kristohanon, kini natala nga, sunod sa yugto sa paglutos, ang kongregasyon mingsulod ngadto sa yugto sa kalinaw, nga napalig-on; ug samtang kini nagalakaw diha sa kahadlok ni Jehova ug sa paghupay sa balaang espiritu kini padayong nagatubo sa gidaghanon​—maingon sa nagakahitabo diha sa Sidlakang Uropa karong adlawa.​—Buhat 9:31.

Higugmaa ang Maayo, Dumti ang Daotan

13. Sa unsang paagi lamang masinati nato ang panalangin ni Jehova?

¹³ Si Jehova sa kabug-osan maayo. Busa, “ang pagkahadlok kang Jehova nagkahulogan sa pagdumot sa daotan.” (Proverbio 8:13) Kini nahisulat mahitungod kang Jesus: “Imong gihigugma ang pagkamatarong, ug imong gidumtan ang pagkamalapason. Kana ang hinungdan ang Diyos, ang imong Diyos, nagdihog kanimo sa lana sa kalipay.” (Hebreohanon 1:9) Kon kita, sama kang Jesus, nagtinguha sa panalangin ni Jehova, kinahanglang atong ayran ang pagkadaotan, ang imoralidad, ang kapintasan, ug ang kadalo sa magarbohong kalibotan ni Satanas. (Itandi ang Proverbio 6:16-19.) Kinahanglang higugmaon nato ang gihigugma ni Jehova ug dumtan ang iyang gidumtan. Kinahanglang kita mahadlok sa bisan unsa nga dili makapahimuot kang Jehova. “Tungod sa pagkahadlok kang Jehova ang usa mopahilayo sa daotan.”​—Proverbio 16:6.

14. Sa unsang paagi gitagana ni Jesus ang usa ka sumbanan?

¹⁴ Si Jesus nagbilin kanatog usa ka sulundan nga angay natong sundon pag-ayo ang iyang mga lakang. “Sa dihang siya gipasipalahan, siya wala mobalos sa pagpasipala. Sa dihang siya nag-antos, siya wala manghulga, kondili nagpadayon sa pagtugyan sa iyang kaugalingon ngadto sa usa nga nagahukom sa pagkamatarong.” (1 Pedro 2:21-23) Tungod kay may kahadlok kang Jehova, kita usab makaantos sa mga pakaulaw, mga pagtamay, mga paglutos, nga ipahamtang kanato sa kalibotan ni Satanas.

15. Nganong angay nga kita mahadlok kang Jehova inay niadtong makapatay sa lawas?

¹⁵ Sa Mateo 10:28, si Jesus nagatambag kanato: “Ayaw kahadlok niadtong nagapatay sa lawas apan dili makapatay sa kalag; hinunoa kahadloki ang makalaglag sa kalag ug lawas sa Gehenna.” Bisag ang usa nga nahadlok kang Jehova pagapatyon sa kaaway, ang mga kasakit sa kamatayon umalagi lamang. (Oseas 13:14) Sa dihang pagabanhawon, kana siya makaingon: “Kamatayon, hain ang imong kadaogan? Kamatayon, hain ang imong ikot?”​—1 Corinto 15:55.

16. Giunsa pagpakita ni Jesus ang pagkahadlok kang Jehova ug paghimaya kaniya?

¹⁶ Si Jesus mismo mihatag ug labing maayong sulundan alang sa tanan nga nahigugma sa pagkamatarong ni Jehova ug nagadumot sa daotan. Ang iyang pagkahadlok kang Jehova gipadayag sa kataposan niyang mga pulong ngadto sa iyang mga tinun-an, sumala sa makita sa Juan 16:33: “Gisulti ko kaninyo kining mga butanga aron nga pinaagi kanako makabaton kamog kalinaw. Sa kalibotan aduna kamoy kagul-anan, apan magmaisogon! Gidaog ko ang kalibotan.” Ang asoy ni Juan nagpadayon: “Gipamulong ni Jesus kining mga butanga, ug, sa pagyahat sa iyang mga mata ngadto sa langit, siya miingon: ‘Amahan, ang takna nahiabot na; himayaa ang imong anak, aron ang imong anak makahimaya kanimo . . . Gipadayag ko ang imong ngalan ngadto sa mga tawo nga imong gihatag kanako gikan sa kalibotan.’”​—Juan 17:1-6.

Kahadloki si Jehova ug Dayega Siya

17. Sa unsang mga paagi kita makasundog sa panig-ingnan ni Jesus?

¹⁷ Kita ba karong adlawa makasundog sa maisogong panig-ingnan ni Jesus? Segurado nga kita makasundog tungod sa pagkahadlok kang Jehova! Gipahibalo ni Jesus kanato ang bantogang ngalan ug mga hiyas ni Jehova. Kay nahadlok kang Jehova ingong atong Soberanong Ginoo, ato siyang ginabayaw labaw pa kay sa tanang ubang diyos, apil ang walay-ngalan, misteryosong Trinidad sa Kakristiyanohan. Si Jesus nag-alagad kang Jehova nga may maayo nga kahadlok, nga wala magpalit-ag sa kahadlok sa himalatyong tawo. “Sa mga adlaw sa iyang unod si Kristo mitanyag ug mga pangaliyupo ug usab mga hangyo ngadto sa Usa nga makaarang sa pagluwas kaniya gikan sa kamatayon, pinaagi sa kusog nga mga singgit ug mga luha, ug siya gidungog tungod sa iyang diyosnong kahadlok.” Sama kang Jesus, hinaot kita mahadlok usab kang Jehova samtang mopadayon kita sa pagkakat-on ug pagkamasinugtanon gikan sa mga butang atong ginaantos​—sa kanunay uban ang walay-kataposang kaluwasan ingon nga atong tumong.​—Hebreohanon 5:7-9.

18. Sa unsang paagi kita makahatag ug balaang pag-alagad sa Diyos uban sa diyosnong kahadlok?

¹⁸ Sa ulahi sa maong sulat ngadto sa Hebreohanong mga Kristohanon, gitambagan ni Pablo ang dinihogang mga Kristohanon: “Sa pagkasabot nga atong pagadawaton ang usa ka gingharian nga dili matarog, magpadayon kita sa pagbaton ug dili-takos nga kalulot, nga pinaagi niana kita sa dalawaton makahatag sa Diyos ug balaang pag-alagad uban ang diyosnong kahadlok ug kalisang.” Karong adlawa, ang “dakong panon” makaambit nianang balaang pag-alagad. Ug unsay naglangkob niini? Tapos sa paghisgot sa dili-takos nga kalulot ni Jehova sa pagtagana sa halad sa Iyang Anak, si Jesu-Kristo, si Pablo miingon: “Pinaagi kaniya itanyag ta sa kanunay ngadto sa Diyos ang usa ka halad sa pagdayeg, nga mao, ang bunga sa mga ngabil nga nagahimog katilingbanong pagpahayag ngadto sa iyang ngalan.” (Hebreohanon 12:28; 13:12, 15) Sa pagpabili sa dili-takos nga kalulot ni Jehova, buot natong igahin ang matag oras nga posible alang sa iyang sagradong pag-alagad. Ingong maunongong mga kauban sa nahibiling dinihogang mga Kristohanon, ang dakong panon karong adlawa sa pagkakaron nagahimo sa kinadak-ang bahin sa maong pag-alagad. Kini sila nagpasidungog sa kaluwasan ngadto sa Diyos ug kang Kristo, samtang sila nagatindog nga masambingayon atubangan sa trono sa Diyos, “nga nagahatag kaniyag balaang pag-alagad sa adlaw ug sa gabii.”​—Pinadayag 7:9, 10, 15.

Himayaa si Jehova Hangtod sa Kahangtoran

19, 20. Unsang duha ka matang sa kahadlok ang madayag sa “adlaw ni Jehova”?

¹⁹ Ang mahimayaong adlaw sa pagbayaw kang Jehova tuling nagsingabot! “‘Tan-awa! ang adlaw nagsingabot nga nagdilaab sama sa hurno, ug ang tanan nga mapangahason ug tanan nga nagabuhat sa pagkadaotan mahisama sa tuod. Ug ang adlaw nga nagsingabot magalamoy gayod kanila,’ nagaingon si Jehova sa mga panon.” Kanang panahon sa kalaglagan mao “ang dako ug makalilisang nga adlaw ni Jehova.” (Malakias 4:1, 5) Kini makapabatig “kalisang” sa mga kasingkasing sa mga daotan, ug kini sila “dili gayod makaikyas.”​—Jeremias 8:15; 1 Tesalonica 5:3.

²⁰ Bisan pa niana, ang katawhan ni Jehova nadasig sa usa ka laing matang sa kahadlok. Ang manulonda nga gisaligan sa “walay-kataposang maayong balita” nagtawag kanila pinaagi sa makusog nga tingog, nga nag-ingon: “Kahadloki ninyo ang Diyos ug himayaa siya, tungod kay nahiabot na ang iyang takna sa paghukom.” (Pinadayag 14:6, 7) Kita mobarog nga mahingangha sa maong paghukom samtang sunogon ang kalibotan ni Satanas sa makapagba nga kainit sa Har–​Magedon. Ang maayo nga kahadlok kang Jehova mahasulat nga dili mapala ibabaw sa atong mga kasingkasing. Nan hinaot nga kita mauyonan aron kita mismo mahiapil sa ‘mga giluwas nga nanagsangpit sa ngalan ni Jehova’!​—Joel 2:31, 32; Roma 10:13.

21. Sa unsang mga panalangin mosangpot ang pagkahadlok kang Jehova?

²¹ Ang kahibulongang mga panalangin mosunod, apil “ang mga katuigan sa kinabuhi” nga moabot hangtod sa kahangtoran! (Proverbio 9:11; Salmo 37:9-11, 29) Busa, kon kaha ang atong paglaom mao ang pagpanunod sa Gingharian o pag-alagad diha sa dominyo niini ibabaw sa yuta, magpadayon kita karon sa paghatag ug balaang pag-alagad sa Diyos uban ang diyosnong kahadlok ug kahingangha. Magpadayon kita sa paghimaya sa iyang balaang ngalan. Ug uban sa unsang bulahang sangpotanan? Pagkamapasalamaton sa walay kataposan nga atong gibutang sa kasingkasing ang maalamong tambag nga sa tanang panahon kahadloki si Jehova!

Unsay Imong Tubag?

◻ Unsay kahulogan sa “pagkahadlok kang Jehova”?

◻ Sa unsang paagi ang pagkahadlok sa Diyos nakahatag kaayohan sa iyang karaan nga katawhan?

◻ Unsang sulundan sa diyosnong kahadlok ang gibilin ni Jesus kanato?

◻ Sa unsang paagi kita makahupot sa integridad tungod sa pagkahadlok kang Jehova?

[Hulagway sa panid 18]

Diha sa basahon sa Pinadayag, ang mga igsoon ni Jesus makitang nagaawit sa “awit ni Moises,” usa ka awit nga nagadayeg kang Jehova

[Hulagway sa panid 20]

Ang kasundalohan ni Josapat nagmadaogon tungod sa pagkahadlok kang Jehova

[Hulagway sa panid 23]

Mga katuigan sa kinabuhi nga moabot hangtod sa kahangtoran mao unya ang ganti niadtong nahadlok kang Jehova