Angay Ka Bang Mahimong Dili-Mabalak-on?

ADAGHANAN sa mga tawo mobati tingali nga usa ka pagdayeg kon isipon sila ingong dili-mabalak-on, usa nga may kalmado, malinawon, ug matugoton nga kinaiya. Apan, adunay laing bahin sa pagkadili-mabalak-on. Ang Bibliya nag-ingon: “Ang walay pagpakabana sa mga hungog mao ang molaglag kanila.” (Proverbio 1:32) Unsay buot ipasabot niana?

Ang ubang mga bersiyon sa Bibliya naghubad sa orihinal nga Hebreohanong pulong ginamit ang mga ekspresyong sama sa “dili-mabinantayong pagparelaks-relaks” (American Standard Version), “pagkamatagbawon-sa-kaugalingon” (The New American Bible), ug “pagkawalay-pagtagad.” (The New English Bible) Niini nga diwa, ang pagkadili-mabalak-on gilangkit sa pagkatapolan ug pagkadili-mabinantayon ug busa sa kahungog o kabuangan.

Sa unang siglo, ang mga Kristohanon sa kongregasyon sa Laodicea wala gayod magpakabana sa ilang espirituwal nga mga kakulangan. Sila nangandak nga sila “wala na manginahanglan ug bisan unsa pa.” Gibadlong sila ni Jesu-Kristo, nga nag-awhag kanila nga ipasig-uli ang ilang Kristohanong kasibot.—Pinadayag 3:14-19.

Ang kawalay-pagtagad mao usab ang kinaiya sa mga tawo sa adlaw ni Noe. Nalinga sila sa kalibotanong mga butang sa kinabuhi, “ang mga lalaki nangaon ug nanginom, nagminyo ug ang mga babaye gihatag sa kaminyoon . . . , ug wala sila magtagad hangtod nga miabot ang baha ug gibanlas silang tanan.” Dayon midugang si Jesus: “Mao man usab unya ang presensiya sa Anak sa tawo.”—Mateo 24:37-39.

Ang natuman nga mga tagna sa Bibliya nagpaila nga kita nagkinabuhi sa panahon sa “presensiya sa Anak sa tawo,” si Jesu-Kristo. Hinaot nga dili gayod kita mahimong dili-magtagad, dili-mabinantayon, andakan—dili-mabalak-on diha sa sayop nga diwa.—Lucas 21:29-36.