Mga Pamilya, Dayega ang Diyos Ingong Bahin sa Iyang Kongregasyon
“Taliwala sa natigom nga mga panon magadayeg ako kang Jehova.”—SALMO 26:12.
1. Unsa ang usa ka hinungdanong bahin sa matuod nga pagsimba dugang pa sa pagtuon ug pag-ampo sa balay?
ANG pagsimba kang Jehova wala lamang maglakip sa pag-ampo ug pagtuon sa Bibliya sa balay kondili usab sa kalihokan ingong bahin sa kongregasyon sa Diyos. Gimandoan ang karaang Israel sa “pagtigom sa katawhan, ang mga lalaki ug ang mga babaye ug ang mga bata,” sa pagtuon sa kasugoan sa Diyos aron sa paglakaw diha sa iyang dalan. (Deuteronomio 31:12; Josue 8:35) Ang mga edaran ug ‘batan-ong mga lalaki ug mga ulay’ gidasig sa pagpakig-ambit sa pagdayeg sa ngalan ni Jehova. (Salmo 148:12, 13) Ang susamang mga kahikayan mapadapat sa sulod sa Kristohanong kongregasyon. Diha sa mga Kingdom Hall sa tibuok kalibotan, ang mga lalaki, babaye, ug kabataan libreng nakigbahin sa mga sesyon nga naglangkit sa mamiminaw, ug daghan ang nakakaplag ug dakong kalipay tungod sa pagpakigbahin.—Hebreohanon 10:23-25.
2. (a) Nganong ang pagpangandam usa ka yawing bahin sa pagtabang sa mga batan-on aron malipay sa mga tigom? (b) Kang kinsang panig-ingnan ang hinungdanon?
2 Tinuod, ang pagtabang sa mga batan-on sa pagsunod sa usa ka maayong rutina sa kalihokan sa kongregasyon mahimong usa ka hagit. Kon ang pipila ka bata nga motambong uban sa ilang mga ginikanan dayag nga wala malipay sa mga tigom, unsa kaha ang problema? Siyempre, kadaghanang bata dunay mubong lugway sa pagtagad ug daling laayan. Ang pagpangandam makatabang sa pagdumala niining maong problema. Kon walay pagpangandam, ang mga bata dili makapakigbahin sa mga tigom sa makahuloganong paagi. (Proverbio 15:23) Kon walay pagpangandam, malisod alang kanila ang paghimog espirituwal nga pag-uswag nga modalag katagbawan. (1 Timoteo 4:12, 15) Unsay arang mahimo? Una, ang mga ginikanan kinahanglang mangutana kon sila ba mismo nangandam alang sa mga tigom. Ang ilang panig-ingnan maoy usa ka kusganong impluwensiya. (Lucas 6:40) Ang maayong pagplano sa pagtuon sa pamilya mahimong usa usab ka importanteng bahin.
Pagpalig-on sa Kasingkasing
3. Panahon sa pagtuon sa pamilya, nganong kinahanglan nga mohimog linaing paningkamot sa pagpalig-on sa kasingkasing, ug nagkinahanglan kinig unsa?
3 Ang pagtuon sa pamilya kinahanglang dili lamang usa ka panahon sa pagpuno sa ulo ug kahibalo kondili sa pagpalig-on usab sa kasingkasing. Kini nagkinahanglan ug kaamgohan sa mga problema nga giatubang sa mga membro sa pamilya ug mahigugmaong pagtagad alang sa matag usa. Si Jehova maoy “nagasusi sa kasingkasing.”—1 Cronicas 29:17.
4. (a) Unsay ipasabot sa ‘pagkawalay-kasingkasing’? (b) Unsay nalangkit sa ‘pagbaton ug kasingkasing’?
4 Unsa ang makaplagan ni Jehova sa dihang iyang susihon ang kasingkasing sa atong mga anak? Kadaghanan kanila ang moingon nga sila nahigugma sa Diyos, ug dalayegon kana. Bisan pa niana, ang usa nga bata pa o bag-o pang nagtuon bahin kang Jehova adunay limitadong kasinatian sa mga dalan ni Jehova. Tungod kay siya walay-kasinatian, siya mahimong “walay kasingkasing,” sumala sa pagpahayag niini sa Bibliya. Malagmit dili daotan ang tanan niyang motibo, apan nagkinahanglan ug panahon sa pag-umol sa kasingkasing sa tawo ngadto sa usa ka kahimtang nga magpahimuot gayod sa Diyos. Kini naglangkit sa paghimo sa mga hunahuna, tinguha, pagbati, emosyon, ug mga tumong sa kinabuhi sa usa ka tawo nga kaharmonya sa kon unsay giuyonan sa Diyos, ngadto sa sukod nga kini posible alang sa dili-hingpit nga mga tawo. Kon ang usa ka tawo maghimo sa maong pag-umol sa sulod nga pagkatawo diha sa diyosnong paagi, siya “nagbaton ug kasingkasing.”—Proverbio 9:4; 19:8.
5, 6. Sa unsang paagi ang mga ginikanan makatabang sa ilang mga anak sa ‘pagbaton ug kasingkasing’?
5 Makatabang kaha ang mga ginikanan sa ilang mga anak sa ‘pagbaton ug kasingkasing’? Tinuod, walay tawong makabutang ug maayong kahimtang sa kasingkasing ngadto sa laing tawo. Ang matag usa kanato gihatagan ug kagawasan sa pagpili, ug dako ang nag-agad sa kon unsay atong itugot sa atong kaugalingon nga hunahunaon. Apan, uban ang pagsabot ang mga ginikanan sagad nga makatukmod sa ilang anak sa pagsulti, nga mahibalo kon unsay anaa sa kasingkasing ug kon asang dapita ang nagkinahanglan ug tabang. Gamita ang mga pangutana sama sa ‘Unsa man ang imong pagbati bahin niini?’ ug ‘Unsa ba gayod ang gusto nimong himoon?’ Dayon, mapailobong maminaw. Ayaw pasobrahi ang reaksiyon. (Proverbio 20:5) Ang usa ka atmospera nga may kalulot, pagsabot, ug gugma hinungdanon kon buot mong maabot ang kasingkasing.
6 Aron mapalig-on ang maayong mga kiling, hisgoti kanunay ang mga bunga sa espiritu—ang matag bahin niini—ug magtinabangay ingong pamilya sa pag-ugmad niini. (Galacia 5:22, 23) Palig-ona ang gugma alang kang Jehova ug alang kang Jesu-Kristo, dili lamang pinaagi sa pag-ingon nga kinahanglan natong higugmaon sila kondili pinaagi sa paghisgot sa mga katarongan kon ngano nga nahigugma kita kanila ug kon sa unsang paagi kita makapahayag sa maong gugma. (2 Corinto 5:14, 15) Palig-ona ang tinguha sa paghimo kon unsay matarong pinaagi sa pagpangatarongan bahin sa mga kaayohan nga mosangpot. Palig-ona ang tinguha sa paglikay sa sayop nga mga hunahuna, sinultihan, ug panggawi pinaagi sa paghisgot sa daotang mga epekto sa maong mga butang. (Amos 5:15; 3 Juan 11) Ipakita kon sa unsang paagi ang mga hunahuna, sinultihan, ug panggawi—maayo man o daotan—makaapektar sa relasyon sa usa ka tawo kang Jehova.
7. Unsay arang mahimo sa pagtabang sa mga anak sa pag-atubang sa mga problema ug sa paghimog mga desisyon diha sa paagi nga maghupot kanila nga suod kang Jehova?
7 Sa dihang ang bata adunay problema o kinahanglang mohimog importanteng desisyon, kita makapangutana kaniya: ‘Sa imong hunahuna unsa kaha ang panglantaw ni Jehova niini? Unsay imong nahibaloan bahin kang Jehova nga nakasulti ka niana? Nakaampo ka na ba kaniya maylabot niini?’ Nga magsugod ug sayo kutob sa mahimo, tabangi ang imong mga anak sa pagtukod ug sumbanan sa kinabuhi nga niana ang tim-os nga paningkamot kanunayng ginahimo sa pagtino sa kabubut-on sa Diyos ug dayon sa paghimo niini. Sa dihang sila makabaton ug suod, personal nga relasyon uban kang Jehova, sila makakaplag ug kalipay sa paglakaw diha sa iyang mga dalan. (Salmo 119:34, 35) Kini magtukod diha kanila ug pagpabili sa pribilehiyo nga makapakig-uban sa kongregasyon sa matuod nga Diyos.
Pagpangandam Alang sa mga Tigom sa Kongregasyon
8. (a) Unsa ang mahimong makatabang kanato aron malakip diha sa atong pagtuon sa pamilya ang tanang butang nga nanginahanglan ug pagtagad? (b) Unsa ka hinungdanon kining maong pagtuon?
8 Adunay daghang butang nga nagkinahanglan ug pagtagad panahon sa pagtuon sa pamilya. Sa unsang paagi nimo mapasibo kining tanan? Imposible nga himoon ang tanan sa samang higayon. Apan imo tingaling makaplagan nga makatabang ang paghimog usa ka listahan. (Proverbio 21:5) Sa matag karon ug unya, repasoha kini ug hunahunaa kon unsay nagkinahanglan ug linaing pagtagad. Pagbaton ug dulot nga interes sa pag-uswag sa matag membro sa pamilya. Kining maong kahikayan alang sa pagtuon sa pamilya maoy usa ka hinungdanong bahin sa Kristohanong edukasyon, nga magsangkap kanato alang sa kinabuhi karon ug mag-andam kanato alang sa kinabuhing dayon sa umaabot.—1 Timoteo 4:8.
9. Unsang mga tumong maylabot sa pagpangandam sa tigom ang anam-anam tingali natong mapauswag panahon sa atong mga pagtuon sa pamilya?
9 Ang inyo bang pagtuon sa pamilya naglakip sa pagpangandam alang sa mga tigom sa kongregasyon? Adunay ubay-ubayng proyekto nga tingali anam-anam ninyong mapauswag samtang kamo nagtuon sa tingob. Ang pipila niini nanginahanglan tingali ug mga semana, mga bulan, o bisan mga tuig aron mahimo. Tagda kini nga mga tumong: (1) matag usa diha sa pamilya andam sa pagkomento sa mga tigom sa kongregasyon; (2) matag usa maningkamot sa pagkomento diha sa iyang kaugalingong mga pulong; (3) maglakip ug mga kasulatan diha sa mga komento; ug (4) mag-analisar sa materyal uban sa tuyo nga ipadapat sa personal. Kining tanan makatabang sa usa ka indibiduwal sa paghimo sa kamatuoran nga iya na.—Salmo 25:4, 5.
10. (a) Sa unsang paagi kaha nato mahatagan ug pagtagad ang matag usa sa atong mga tigom sa kongregasyon? (b) Nganong mapuslanon kini?
10 Bisan pag ang inyong pagtuon sa pamilya kasagarang gipasukad sa tun-anan sa Bantayanang Torre alang sa maong semana, ayaw kalimti ang kahinungdanon sa pagpangandam sa indibiduwal o sa pamilya alang sa Pagtuon sa Kongregasyon sa Libro, sa Tunghaan sa Teokratikanhong Ministeryo, ug sa Tigom sa Pag-alagad. Kini usab maoy importanteng mga bahin sa programa alang sa pagtudlo kanato sa paglakaw diha sa dalan ni Jehova. Tingali matag karon ug unya makahimo kamo sa pagpangandam alang sa mga tigom isip usa ka grupo sa pamilya. Pinaagi sa inyong pagtambayayongay, ang mga katakos sa pagtuon mapauswag. Ingong resulta, mas daghang kaayohan ang makuha gikan sa mga tigom mismo. Lakip sa uban pang mga butang, hisgoti ang mga benepisyo sa regular nga pagpangandam alang niining maong mga tigom ug ang kahinungdanon sa pagbaton ug tinong panahon nga igahin alang niini.—Efeso 5:15-17.
11, 12. Sa unsang paagi ang pagpangandam alang sa pag-awit sa kongregasyon makabenepisyo kanato, ug sa unsang paagi kini puwedeng mahimo?
11 Sa “Iya sa Diyos nga Dalan sa Kinabuhi” nga mga Kombensiyon, gidasig kita sa pagpangandam alang sa laing bahin sa atong mga tigom—ang pag-awit. Ikaw ba nagsunod niana? Ang paghimo sa ingon makatabang sa pagsilsil sa mga kamatuoran sa Bibliya diha sa atong hunahuna ug kasingkasing ug sa samang higayon magpadako sa atong kalipay sa mga tigom sa kongregasyon.
12 Ang pagpangandam nga naglakip sa pagbasa ug paghisgot sa kahulogan sa mga pulong sa pipila sa gieskedyul nga mga awitonon makatabang kanato sa pag-awit gikan sa kasingkasing. Sa karaang Israel, ang mga instrumento sa musika kanunayng gigamit sa pagsimba. (1 Cronicas 25:1; Salmo 28:7) Aduna bay usa sa inyong pamilya nga mahibalong motugtog ug instrumento sa musika? Nganong dili gamiton ang maong instrumento sa pagbansay sa usa sa mga awitonon sa Gingharian alang sa maong semana, ug dayon moawit sa awitonon isip usa ka pamilya. Ang laing posibilidad mao ang paggamit ug rekording sa mga awitonon. Sa pipila ka kayutaan ang atong mga igsoon nindot moawit bisag walay pagduyog sa musika. Samtang naglakaw sila sa kadalanan o naghimo sa ilang buluhaton sa uma, sila sagad nga malingaw sa pag-awit sa mga awitonon nga gieskedyul alang sa mga tigom sa kongregasyon nianang semanaha.—Efeso 5:19.
Pagpangandam sa Pamilya Alang sa Pag-alagad sa Kanataran
13, 14. Nganong bililhon ang mga panaghisgot sa pamilya nga nag-andam sa atong kasingkasing alang sa pag-alagad sa kanataran?
13 Ang pagpanaksi ngadto sa uban bahin kang Jehova ug sa iyang katuyoan maoy usa ka importanteng bahin sa atong kinabuhi. (Isaias 43:10-12; Mateo 24:14) Batan-on man o tigulang, mas dako ang atong kalipay niining buluhatona ug mas dakong kaayohan ang atong makab-ot kon kita nakapangandam. Sa unsang paagi kita makahimo niini sulod sa pamilya?
14 Sama sa tanang butang nga nalangkit sa atong pagsimba, importante nga andamon ang atong kasingkasing. Kinahanglang atong hisgotan dili lamang kon unsay atong himoon kondili usab kon nganong himoon nato kini. Sa mga adlaw ni Haring Jehosafat, ang katawhan gihatagan ug instruksiyon sa kasugoan sa Diyos, apan ang Bibliya nagsulti kanato nga sila “wala mag-andam sa ilang kasingkasing.” Naghimo kini kanila nga daling madala sa mga pangdani nga makapahilayo kanila sa matuod nga pagsimba. (2 Cronicas 20:33; 21:11) Dili nato tumong nga makataho lamang ug mga oras nga gigugol diha sa pag-alagad sa kanataran, ni makapahimutang lamang ug literatura. Ang atong ministeryo angay nga usa ka pagpahayag sa atong gugma alang kang Jehova ug sa atong gugma alang sa mga tawo kinsa nanginahanglan sa higayon sa pagpili sa kinabuhi. (Hebreohanon 13:15) Kini maoy buluhaton diin kita “mga isigkamagbubuhat sa Diyos.” (1 Corinto 3:9) Pagkadakong pribilehiyo! Samtang kita nakigbahin diha sa ministeryo, kita nagabuhat sa ingon sa pagtabang sa balaang mga manulonda. (Pinadayag 14:6, 7) Wala nay mas maayo pang higayon sa pagpalig-on sa apresasyon alang niini kay sa mga panaghisgot diha sa pamilya, sa ato ba kahang senemanang pagtuon o sa dihang naghisgot ug nahiangayng teksto gikan sa Pagsusi sa Kasulatan sa Adlaw-Adlaw!
15. Kanus-a kita mahimong mangandam alang sa pag-alagad sa kanataran isip usa ka pamilya?
15 Kamo ba sa matag karon ug unya naggamit ug panahon sa inyong pagtuon sa pamilya aron sa pag-abag sa mga membro sa inyong panimalay sa pagpangandam alang sa pag-alagad sa kanataran sa maong semana? Ang paghimo sa ingon mahimong mapuslanon kaayo. (2 Timoteo 2:15) Kini makatabang sa paghimo sa ilang pag-alagad nga makahuloganon ug mabungahon. Usahay, igahin tingali ninyo ang bug-os nga sesyon sa pagtuon alang sa maong pagpangandam. Mahimong inyong hisgotan ang mga bahin sa pag-alagad sa ministeryo nga mas subsob diha sa mas mugbong mga panaghisgot sa kataposan sa pagtuon sa pamilya o sa uban pang panahon sa sulod sa maong semana.
16. Hisgoti ang bili sa matag usa sa mga lakang nga gilista diha sa parapo.
16 Ang mga sesyon sa pamilya mahimong magpunting sa pagtagad sa sunodsunod nga mga lakang, sama sa mosunod: (1) Pangandam ug nabansay-pag-ayong presentasyon nga maglakip ug usa ka teksto nga basahon gikan sa Bibliya kon itugot sa higayon. (2) Paneguroa nga ang kada usa, kon posible, adunay iyang kaugalingong bag alang sa pag-alagad sa kanataran, Bibliya, notbok, pluma o lapis, mga tract, ug ubang literatura nga hapsay ug hitsura. Ang bag alang sa pagsangyaw dili kinahanglang mahal, apan kini kinahanglang hinlo. (3) Hisgoti kon diin ug sa unsang paagi himoon ang dili-pormal nga pagsangyaw. Sunda ang matag hugna niini nga instruksiyon pinaagi sa mga yugto nga niana kamo magkauban sa pag-alagad sa kanataran. Pagtanyag ug makatabang nga mga sugyot, apan ayaw paghatag ug tambag bahin sa daghan kaayong punto.
17, 18. (a) Unsang matanga sa pagpangandam isip usa ka pamilya ang makatabang sa paghimo sa atong ministeryo sa kanataran nga mas mabungahon? (b) Unsang bahina niini nga pagpangandam ang puwedeng mahimo kada semana?
17 Ang dakong bahin sa buluhaton nga gipabuhat ni Jesu-Kristo sa iyang mga sumusunod mao ang paghimog tinun-an. (Mateo 28:19, 20) Ang paghimog mga tinun-an naglangkit ug labaw pa kay sa pagsangyaw. Kini nagkinahanglan ug pagtudlo. Sa unsang paagi ang inyong pagtuon sa pamilya motabang kaninyo nga mahimong epektibo sa paghimo niini?
18 Isip usa ka pamilya, hisgoti kon kinsay maayong duawon pag-usab. Pipila kanila tingali midawat ug literatura; ang pipila tingali naminaw lang. Sila mahimong nahibalag diha sa balay-balay nga buluhaton o diha sa dili-pormal nga pagsangyaw sa tiyanggihan o sa eskuylahan. Tugoti ang Pulong sa Diyos nga mogiya kaninyo. (Salmo 25:9; Ezequiel 9:4) Pagdesidir kon kinsay gustong duawon sa matag usa kaninyo nianang semanaha. Unsay pagahisgotan? Ang panaghisgot sa pamilya makatabang sa matag membro sa pagpangandam. Timan-i ang espesipikong mga teksto nga ipaambit sa mga interesado maingon man ang nahiangay nga mga punto gikan sa brosyur nga Unsay Gikinahanglan sa Diyos Kanato? o sa librong Kahibalo nga Motultol sa Kinabuhing Walay Kataposan. Ayaw tinguhaa ang pagkobre ug daghan kaayong impormasyon sa usa ka pagduaw. Binlig pangutana ang tagbalay nga pagatubagon sa sunod nga pagduaw. Nganong dili himoong bahin sa senemanang rutina sa pamilya ang pagplano kon kinsang mga balikduaw ang duawon sa matag usa, kon kanus-a kini niya himoon, ug kon unsay iyang gilaomang mahimo. Ang paghimo niini makatabang sa paghimo sa ministeryo sa kanataran sa tibuok pamilya nga mas mabungahon.
Padayon sa Pagtudlo Kanila sa Dalan ni Jehova
19. Aron ang mga membro sa pamilya makapadayon sa paglakaw sa dalan ni Jehova, unsay angay nilang masinati, ug unsay makatabang aron matinuod kana?
19 Ang pagkaulo sa pamilya niining daotang kalibotan maoy usa ka hagit. Si Satanas ug ang iyang mga demonyo nanglimbasog sa pagdaot sa espirituwalidad sa mga alagad ni Jehova. (1 Pedro 5:8) Dugang pa, adunay dakong pagpit-os karon kaninyo nga mga ginikanan, ilabina kaninyo nga nag-inusarang mga ginikanan. Lisod ang pagkaplag ug panahon aron mahimo ang tanang butang nga buot ninyong himoon. Apan kini takos sa paningkamot, bisan kon kamo makapadapat lamang ug usa ka sugyot sa usa ka panahon, ug anam-anam nga magpauswag sa inyong programa sa pagtuon sa pamilya. Ang pagkakita niadtong suod kaayo kanimo nga maunongong maglakaw diha sa dalan ni Jehova maoy usa ka ganti nga makalipay sa kasingkasing. Aron makalakaw nga malamposon diha sa dalan ni Jehova, ang mga membro sa pamilya kinahanglang makakaplag ug kalipay sa pagtambong sa mga tigom sa kongregasyon ug sa pagpakigbahin diha sa ministeryo sa kanataran. Aron matinuod kana, ang pagpangandam gikinahanglan—pagpangandam nga magpalig-on sa kasingkasing ug magsangkap sa matag usa aron adunay makahuloganong pagpakigbahin.
20. Unsay makatabang sa mas daghang ginikanan aron masinati ang matang sa kalipay nga gipahayag sa 3 Juan 4?
20 Mahitungod niadtong iyang natabangan sa espirituwal nga paagi, si apostol Juan misulat: “Wala akoy labaw nga hinungdan sa pagkamapasalamaton kay sa niining mga butanga, nga madungog ko nga ang akong mga anak nagapadayon sa paglakaw diha sa kamatuoran.” (3 Juan 4) Ang mga pagtuon sa pamilya nga ginahimo samtang naghunahuna sa tin-awng mga tumong ug ang mga ulo sa pamilya kinsa nagdumala sa maluloton, matinabangong paagi sa indibiduwal nga mga panginahanglan sa mga membro sa pamilya dakog mahimo aron ang pamilya makaambit sa maong kalipay. Pinaagi sa pag-ugmad sa apresasyon alang sa iya sa Diyos nga dalan sa kinabuhi, ang mga ginikanan nagatabang sa ilang pamilya sa pagtagamtam sa labing maayo gayod nga dalan sa kinabuhi.—Salmo 19:7-11.
Makasaysay Ka Ba?
◻ Nganong ang pagpangandam sa tigom hinungdanon kaayo alang sa atong mga anak?
◻ Sa unsang paagi ang mga ginikanan makatabang sa ilang mga anak sa ‘pagbaton ug kasingkasing’?
◻ Sa unsang paagi ang atong pagtuon sa pamilya makatabang sa pagpangandam alang sa tanang tigom?
◻ Sa unsang paagi ang pagpangandam alang sa pag-alagad sa kanataran isip usa ka pamilya motabang kanato nga mahimo pang mas epektibo?
[Hulagway sa panid 20]
Ang inyong pagtuon sa pamilya mahimong maglakip sa pagpangandam alang sa mga tigom sa kongregasyon
[Hulagway sa panid 21]
Ang pagbansay alang sa pag-awit sa mga tigom maoy mapuslanon