-
Unsay Makatabang Aron Makapadayon Ka sa Pagtuon sa Bibliya?Mabuhi Ka Hangtod sa Hangtod!—Interactive nga Pagtuon sa Bibliya
-
-
LEKSIYON 12
Unsay Makatabang Aron Makapadayon Ka sa Pagtuon sa Bibliya?
Ang pagtuon sa Bibliya makaayo, pero dili ni kanunayng sayon. Usahay maghunahuna tingali ka kon makapadayon ba ka sa pagtuon sa Bibliya. Nganong maayo nga magpadayon sa pagtuon? Unsay makatabang nga makapadayon ka bisan pa sa kalisdanan?
1. Nganong importante ang pagtuon sa Bibliya?
“Ang pulong sa Diyos buhi ug gamhanan.” (Hebreohanon 4:12) Ang Bibliya importante kay mahibaloan nimo dinhi ang hunahuna sa Diyos ug ang iyang pagbati kanimo. Motabang ni nimo nga makabaton ug kahibalo, tinuod nga kaalam, ug paglaom. Labaw sa tanan, ang Bibliya motabang nimo nga masuod kang Jehova. Dihang tun-an nimo ang Bibliya, imong gitugotan nga makahatag nig maayong epekto sa imong kinabuhi.
2. Unsay kaayohan kon maghunahuna ta nga importante ang kamatuoran sa Bibliya?
Ang mga kamatuoran sa Bibliya sama ug bililhong bahandi. Kanay hinungdan nga gidasig ta sa Bibliya nga ‘paliton ang kamatuoran ug dili kini ibaligya.’ (Proverbio 23:23) Kon atong hinumdoman nga importante ang kamatuoran sa Bibliya, maningkamot ta nga magpadayon sa pagtuon—bisan pag makaatubang tag kababagan.—Basaha ang Proverbio 2:4, 5.
3. Sa unsang paagi makatabang si Jehova nga makapadayon ka sa pagtuon?
Si Jehova, ang imong labing gamhanang Maglalalang ug Higala, gustong motabang nimo sa pagkat-on bahin kaniya. Iyang ‘palig-onon ang imong tinguha sa pagbuhat sa mga butang nga gusto niya.’ (Basaha ang Filipos 2:13.) Busa kon usahay mobati ka nga wala kay ganang magtuon o naglisod ka sa pagpadapat sa imong nakat-onan, makatabang siya. Kon nagkinahanglan kag dugang kusog sa pag-atubang sa kababagan o pagsupak, iya ning mahatag nimo. Iampo kanunay kang Jehova nga tabangan kang makapadayon sa pagtuon sa Bibliya.—1 Tesalonica 5:17.
TUN-IG DUGANG
Sayra kon sa unsang paagi makapadayon ka sa pagtuon sa Bibliya bisag busy ka o supakon ka sa uban. Dayon tan-awa kon sa unsang paagi ka tabangan ni Jehova nga makapadayon sa pagtuon.
4. Himoang prayoridad ang imong pagtuon sa Bibliya
Usahay mobati ta nga busy kaayo ta ug wa nay panahon sa pagtuon sa Bibliya. Unsay makatabang nimo? Basaha ang Filipos 1:10, ug dayon hisgoti kini nga mga pangutana:
Para nimo, unsay apil sa “mas importanteng mga butang” sa kinabuhi?
Sa unsang paagi mahimo nimong prayoridad ang pagtuon sa Bibliya?
Kon ang sudlanan pun-on nimog balas ug butangan nig mga bato, ang mga bato dili maensakto
Kon unahon nimog butang ang mga bato, naa pa kay kabutangan sa balas. Sa susama, kon unahon nimo sa imong kinabuhi ang “mas importanteng mga butang,” mahimo nimo ni ug naa pa kay panahon para sa ubang butang
Ang pagtuon sa Bibliya magtagbaw sa atong espirituwal nga panginahanglan—ang atong panginahanglan nga makaila sa Diyos ug simbahon siya. Basaha ang Mateo 5:3, ug dayon hisgoti kini nga pangutana:
Unsay kaayohan kon himoon natong prayoridad ang pagtuon sa Bibliya?
5. Lahutay bisan pag supakon
Usahay naay mga tawo nga mopugong nimo sa pagtuon sa Bibliya. Tan-awa ang eksperyensiya ni Francesco. I-play ang VIDEO, ug dayon hisgoti ang mosunod nga mga pangutana:
Sa video, unsay reaksiyon sa mga amigo ug pamilya ni Francesco dihang iya silang giingnan bahin sa iyang nakat-onan?
Unsay maayong resulta sa iyang paglahutay?
Basaha ang 2 Timoteo 2:24, 25, ug dayon hisgoti kini nga mga pangutana:
Unsay reaksiyon sa imong pamilya ug mga higala bahin sa imong nakat-onan?
Base ani nga teksto, unsay angay nimong reaksiyon dihang naay dili malipay sa imong pagtuon sa Bibliya? Ngano?
6. Salig nga tabangan ka ni Jehova
Samtang magkasuod ta kang Jehova, magkadako ang atong tinguha nga mapalipay siya. Bisan pa niana, malisdan tingali ta sa paghimog mga kausaban sa atong kinabuhi sa pagsunod sa iyang mga sukdanan. Kon mibati ka ana, ayawg surender. Tabangan ka ni Jehova. I-play ang VIDEO, ug dayon hisgoti ang mosunod nga mga pangutana:
Sa video, unsang mga kausaban ang gihimo ni Jim aron mapalipay si Jehova?
Unsay ganahan nimo sa iyang eksperyensiya?
Basaha ang Hebreohanon 11:6, ug dayon hisgoti kini nga mga pangutana:
Unsay himoon ni Jehova para niadtong “sinserong nangita kaniya”—kadtong naningkamot nga mailhan siya ug mapalipay siya?
Base ani, unsa kahay bation ni Jehova dihang iyang makita ang imong paningkamot sa pagtuon sa Bibliya?
KON NAAY MANGUTANA: “Nganong nagtuon kag Bibliya?”
Unsay imong itubag?
SUMARYO
Bisag dili kanunayng sayon ang pagtuon sa Bibliya, kini makatabang nimo nga mabuhi hangtod sa hangtod. Padayon sa pagsalig kang Jehova, ug iya kang panalanginan.
Review
Para nimo, nganong importante ang mga kamatuoran sa Bibliya?
Unsaon nimo ‘pagseguro ang mas importanteng mga butang’?
Nganong angay kang mangayog tabang kang Jehova nga makapadayon sa pagtuon sa Bibliya?
SUSIHA
Matikdi ang upat ka paagi nga nakatabang sa daghang tawo nga magamit ug maayo ang ilang panahon.
“Kon Unsaon sa Pagpahimulos ug Maayo sa Imong Panahon” (Pagmata!, Pebrero 2014)
Matikdi kon giunsa pagtabang ni Jehova ang usa ka babaye kansang bana wala makasabot sa iyang paningkamot nga mapalipay ang Diyos.
Gilig-on Mi ni Jehova Aron Madaog Namo ang Among Palas-anon (5:05)
Tan-awa kon sa unsang paagi nakabenepisyo ang usa ka lalaki sa paglahutay sa iyang asawa.
Usahay ang mga Saksi ni Jehova akusahan nga namungkag ug pamilya. Pero tinuod ba na?
“Ang mga Saksi ni Jehova ba Namungkag ug mga Pamilya o Nagpalig-on Niini?” (Web article)
-
-
Kon Unsaon Paghimog Maayong mga DesisyonMabuhi Ka Hangtod sa Hangtod!—Interactive nga Pagtuon sa Bibliya
-
-
LEKSIYON 35
Kon Unsaon Paghimog Maayong mga Desisyon
Kitang tanan kinahanglang mohimog mga desisyon. Daghan niana naay dakong epekto nato ug sa atong relasyon kang Jehova. Pananglitan, modesisyon ta kon asa ta magpuyo, kon unsaon nato pagpanginabuhi, o kon magminyo ba ta o dili. Dihang mohimo tag maayong mga desisyon, magmalipayon ta ug mapalipay nato si Jehova.
1. Unsay imong himoon aron matabangan ka sa Bibliya sa paghimog maayong mga desisyon?
Sa dili pa ka mohimog desisyon, pag-ampo para sa tabang ni Jehova ug susiha ang Bibliya kon unsay iyang panghunahuna bahin sa maong butang. (Basaha ang Proverbio 2:3-6.) Sa ubang kahimtang, naay klarong sugo si Jehova. Kon mao, ang pinakamaayong desisyon nga imong mahimo mao ang pagsunod niana.
Pero komosta kon walay klarong giingon ang Bibliya kon unsay imong himoon? Giyahan gihapon ka ni Jehova “sa dalan nga angay nimong laktan.” (Isaias 48:17) Sa unsang paagi? Tingali naay mga prinsipyo nga makagiya nimo. Ang mga prinsipyo sa Bibliya maoy mga kamatuoran nga nagpakita sa panghunahuna ug pagbati sa Diyos. Sagad mahibaloan nato ang pagbati sa Diyos bahin sa usa ka butang dihang mobasa ta ug estorya sa Bibliya. Dihang makita nato kon unsay pagbati ni Jehova, makahimo tag mga desisyon nga makapalipay niya.
2. Unsay angay nimong konsiderahon sa dili pa mohimog desisyon?
Ang Bibliya nag-ingon: “Ang maalamon mamalandong sa matag lakang.” (Proverbio 14:15) Nagpasabot ni nga sa dili pa ta mohimog desisyon, angay tang mogahin ug panahon nga hunahunaon ang atong mga kapilian. Samtang timbangtimbangon nimo ang matag kapilian, pangutan-a ang imong kaugalingon: ‘Unsang mga prinsipyo sa Bibliya ang mapadapat ani? Asa sa mga kapilian ang makahatag nakog kalinaw sa hunahuna? Unsay epekto sa uban sa akong desisyon? Labaw sa tanan, makapalipay ba ni kang Jehova?’—Deuteronomio 32:29.
Si Jehova naay katungod sa pagsulti nato kon unsay maayo ug kon unsay daotan. Kon mahibalo ta pag-ayo sa iyang mga balaod ug prinsipyo ug determinado nga sundon kana, mabansay nato ang atong konsensiya. Sultihan ta sa atong konsensiya kon ang usa ka butang husto o sayop. (Roma 2:14, 15) Ang nabansay nga konsensiya motabang nato sa paghimog maayong mga desisyon.
TUN-IG DUGANG
Sayra kon sa unsang paagi ang mga prinsipyo sa Bibliya ug ang atong konsensiya makatabang nato sa paghimog mga desisyon.
3. Pagiya sa Bibliya
Sa unsang paagi ang mga prinsipyo sa Bibliya makagiya nato sa paghimog mga desisyon? I-play ang VIDEO, ug dayon hisgoti ang mosunod nga mga pangutana:
Unsa ang kagawasan sa pagpili?
Nganong gihatagan ta ni Jehova ug kagawasan sa pagpili?
Unsay iyang gitagana aron matabangan ta nga gamiton sa pinakamaayong paagi ang atong kagawasan sa pagpili?
Ingong pananglitan sa usa ka prinsipyo sa Bibliya, basaha ang Efeso 5:15, 16. Dayon hisgoti kon unsaon nimo ‘paggamit ang imong panahon sa kinamaayohang paagi’ aron . . .
regular nga makabasa sa Bibliya.
mahimong mas maayong kapikas, ginikanan, o anak.
makatambong sa mga tigom sa kongregasyon.
4. Bansaya ang imong konsensiya sa paghimog maayong mga desisyon
Sayon ra mohimog hustong desisyon kon naay klarong giingon ang Bibliya bahin sa usa ka butang. Pero komosta kon walay klarong sugo? I-play ang VIDEO, ug dayon hisgoti ang mosunod nga pangutana:
Sa video, unsay gihimo sa sister aron mabansay niya ang iyang konsensiya ug makahimog desisyon nga makapalipay kang Jehova?
Nganong dili nato angayng padesisyonon ang uban para nato? Basaha ang Hebreohanon 5:14, ug dayon hisgoti kini nga mga pangutana:
Tingali mas sayon nga ang uban maoy atong padesisyonon para nato. Pero angay natong mahibaloan kon unsaon pag-ila ang unsa?
Unsang mga tagana ang makatabang nimo nga mabansay ang imong konsensiya ug makahimog maayong mga desisyon?
Samag mapa, ang atong konsensiya makagiya nato sa paghimog desisyon
5. Tahora ang konsensiya sa uban
Kada tawo lainlain ug desisyon. Unsaon nato pagpakita nga gitahod nato ang konsensiya sa uban? Matikdi ang duha ka situwasyon:
Situwasyon 1: Ang sister nga ganahang mag-makeup mibalhin ug kongregasyon. Dili madawat sa konsensiya sa daghang sister sa maong kongregasyon kon makakita silag nag-makeup.
Basaha ang Roma 15:1 ug 1 Corinto 10:23, 24, ug dayon hisgoti kini nga mga pangutana:
Base niini nga mga teksto, unsa kahay desisyon sa maong sister? Unsay imong himoon kon ang konsensiya sa imong kauban dili makadawat sa butang nga madawat ra sa imong konsensiya?
Situwasyon 2: Ang usa ka brader nahibalo nga wala idili sa Bibliya ang pag-inom ug alkoholikong ilimnon, pero midesisyon siya nga dili moinom. Giimbitar siya sa usa ka tapoktapok diin ang mga brader miinom ug alkoholikong ilimnon.
Basaha ang Ecclesiastes 7:16 ug Roma 14:1, 10, ug dayon hisgoti kini nga mga pangutana:
Base niini nga mga teksto, unsa kahay desisyon sa maong brader? Unsay imong himoon kon buhaton sa usa ka tawo ang butang nga dili madawat sa imong konsensiya?
Unsay angayng himoon aron makahimog maayong mga desisyon?
1. Hangyoa si Jehova nga tabangan ka sa pagdesisyon kon unsay himoon.—Santiago 1:5.
2. Pag-research sa Bibliya ug sa mga publikasyon nga binase sa Bibliya aron makakita kag mga prinsipyo nga makatabang. Puwede pod kang mangayog tambag sa eksperyensiyadong mga Kristohanon.
3. Konsideraha ang epekto sa desisyon diha sa imong konsensiya ug sa konsensiya sa uban.
ANG UBAN MOINGON: “Naa koy katungod sa pagbuhat bisan unsay akong gusto. Wala koy labot sa hunahunaon sa uban.”
Nganong angay natong konsiderahon ang bation sa Diyos ug sa uban?
SUMARYO
Makahimo tag maayong mga desisyon kon atong sayron ang pagbati ni Jehova bahin sa usa ka butang ug dayon konsiderahon kon ang atong himoon makatabang ba sa uban o makadaot nila.
Review
Unsaon nimo paghimog mga desisyon nga makapalipay kang Jehova?
Unsaon nimo pagbansay ang imong konsensiya?
Unsaon nimo pagpakita nga gitahod nimo ang konsensiya sa uban?
SUSIHA
Unsaon nimo paghimog mga desisyon nga makapalig-on sa imong relasyon sa Diyos?
“Paghimog mga Desisyon nga Magpasidungog sa Diyos” (Ang Bantayanang Torre, Abril 15, 2011)
Sayrag dugang kon sa unsang paagi si Jehova mohatag natog tambag.
Tan-awa kon unsay nakatabang sa usa ka tawo sa paghimog lisod nga desisyon.
Si Jehova Naggarantiya nga Iyang Ihatag Kanato ang Tanang Maayo (5:46)
Sayrag dugang kon sa unsang paagi nato mapalipay si Jehova dihang wala siyay klarong sugo bahin sa usa ka butang.
-