Pagpangitag Nalubong nga Bahandi

NIADTONG 1848 ang bulawan nakaplagan sa Sutter’s Mill sa California, T.B.A. Pagka 1849 linibo ang midugok sa maong dapit sa paglaom nga madato dayon, ug ang kinadak-ang pagpangagpas sa dakong bahandi nagsugod sa kasaysayan sa Tinipong Bansa. Sa usa ka tuig, ang kinaduolang dunggoanan, ang San Francisco, midako gikan sa usa ka gamayng lungsod ngadto sa usa ka siyudad nga may 25,000 ka molupyo. Ang kalaoman sa kalit nga bahandi namatud-ang usa ka kusog nga pangdani.

Si Haring Solomon sa karaang Israel nasayod kon unsa ka abtik mangubkob ang mga tawo ug nalubong nga bahandi, ug kini iyang gihisgotan sa misulat siya: “Kon, dugang pa, ikaw magasangpit sa salabotan mismo ug ikaw magapatugbaw sa imong tingog alang sa panabot mismo, kon ikaw magapangita niini ingon sa salapi, ug ingon sa nalubong nga mga bahandi ikaw magapangita niini, niana ikaw makasabot sa pagkahadlok kang Jehova, ug hikaplagan mo ang kahibalo mismo sa Diyos.”​—Proverbio 2:3-5.

Ikaw daghag mahimo sa bulawan ug salapi, apan labaw pa ang imong mahimo sa salabotan ug panabot. Kini sila motabang kanimo sa paghimog hustong mga desisyon, pagsulbad sa mga suliran, pagpalampos sa kaminyoon, ug pagkaplag sa kalipay. (Proverbio 2:11, 12) Sa susama, ang tinuod nga kahibalo ug kaalam motabang kanimo sa pagkaila sa imong Maglalalang, pagsabot sa iyang mga katuyoan, ug pagsugot ug pagpahimuot kaniya. Ang bulawan dili makahatag kanimo niining mga butanga.

Ang mga pulong sa Bibliya tinuod: “Ang kaalam maoy usa ka silonganan sama sa salapi, apan ang pagkalabaw sa kahibalo mao kini: ang kaalam magaluwas sa kinabuhi sa nanag-iya niini.” (Ecclesiastes 7:12, New International Version) Samtang daghan ang mangandoy ug kalit nga bahandi, pagkalabi pang maalamon ang pag-abli sa Bibliya ug pagpangita sa panabot, salabotan, kahibalo, ug kaalam nga maoy tinuod nga bahandi.