Pagtuon sa Pagkalipay sa Pagkahadlok Kang Jehova
“Umari, kamong mga anak, patalinghog kanako; ang pagkahadlok kang Jehova mao ang itudlo ko kaninyo.”—SALMO 34:11.
1. Sa unsang paagi ang kahadlok wagtangon sa Gingharian sa Diyos, apan nagpasabot ba kana sa tanang matang sa kahadlok?
ANG mga tawo bisan diin nangandoy ug kagawasan sa kahadlok—kahadlok sa krimen ug kapintasan, kahadlok sa kawalay-trabaho, kahadlok sa grabe nga balatian. Pagkaanindot unya nianang adlawa sa dihang mahimong tinuod kanang maong kagawasan ilalom sa Gingharian sa Diyos! (Isaias 33:24; 65:21-23; Miqueas 4:4) Bisan pa, dili mawagtang ang tanang kahadlok niana unyang panahona, ni maningkamot kita sa pagwakli sa tanang kahadlok gikan sa atong mga kinabuhi karon. Adunay kahadlok nga maayo ug kahadlok nga daotan.
2. (a) Unsang matanga sa kahadlok ang daotan, ug unsang matanga ang maayo? (b) Unsa ang diyosnong kahadlok, ug sa unsang paagi gipakita sa gikutlong mga kasulatan kana?
2 Ang kahadlok mahimong usa ka hilo sa hunahuna, nga makadaot sa katakos sa usa ka tawo sa pagpangatarongan. Kini makawala sa kaisog ug makagun-ob sa paglaom. Kini nga kahadlok ang mahimong maagoman sa usa ka tawo nga gihulga sa pisikal sa usa ka kaaway. (Jeremias 51:30) Mahimong maagoman kini sa usa ka tawo nga naghatag ug sobrang pagtagad sa pagpahimuot sa pila ka impluwensiyal nga mga tawo. (Proverbio 29:25) Apan adunay kahadlok usab nga maayo, ang matang sa kahadlok nga magpugong kanato gikan sa pagdinanghag, gikan sa pagdaot sa atong kaugalingon. Ang diyosnong kahadlok naglakip ug labaw pa kay niana. Kini maoy pagkataha kang Jehova, halalom nga pagtahod kaniya, nga inubanan sa maayong pagkahadlok nga makapasuko kaniya. (Salmo 89:7) Kini nga kahadlok nga mahiagom sa kasuko sa Diyos nagagikan sa pagpabili sa iyang mahigugmaong-kalulot ug kaayo. (Salmo 5:7; Oseas 3:5) Kini naglakip usab sa pagkahibalo nga si Jehova mao ang Labaw nga Maghuhukom ug ang Labing Makagagahom, kinsa adunay gahom sa pagpahamtang ug silot, kamatayon pa gani, ngadto sa mga tawo nga dili mosugot kaniya.—Roma 14:10-12.
3. Sa unsang paagi ang pagkahadlok kang Jehova lahi nianang nalangkit sa pipila ka paganong mga diyosdiyos?
3 Ang diyosnong kahadlok maayo, dili mangil-ad. Kini mopalihok sa usa nga magmalig-on alang sa matarong, dili mokompromiso pinaagi sa pagbuhat ug daotan. Kini dili sama sa kahadlok nga nalangkit sa karaang diyosdiyos sa Grego nga si Phobos, nga gihubit ingong tuman ka daotang diyos nga makapalisang. Ug dili kini sama sa kahadlok nga nalangkit sa diyosa sa Hindu nga si Kali, nga usahay gilarawan ingong uhaw sa dugo, nga nagagamit ug mga patayng lawas, mga bitin, ug mga kalabera ingong mga adorno. Ang diyosnong kahadlok makabihag; kini dili makapasibog. Kini nalambigit sa gugma ug apresasyon. Busa, ang diyosnong kahadlok makadani kanato ngadto kang Jehova.—Deuteronomio 10:12, 13; Salmo 2:11.
Kon Nganong ang Pipila Adunay Kahadlok ug ang Uban Wala
4. Sumala sa gibatbat ni apostol Pablo, sa unsang kahimtang midangat ang katawhan, ug unsay hinungdan niini?
4 Ang katawhan sa katibuk-an wala mapalihok sa hiyas nga diyosnong kahadlok. Sa Roma 3:9-18, gibatbat ni apostol Pablo ang sukod sa pagkahulog sa katawhan gikan sa orihinal nga kahingpitan. Human sa pag-ingon nga ang tanan nailalom sa sala, si Pablo mikutlo sa mga Salmo, nga nag-ingon: “Wala gayoy tawo nga matarong, bisan usa.” (Tan-awa ang Salmo 14:1.) Unya mihatag siya ug mga detalye pinaagi sa pagkutlo sa mga butang sama sa kawalay pagtagad sa katawhan sa pagpangita sa Diyos, sa ilang kakulang ug kalulot, sa ilang malimbongong pakigpulong, sa pagpanghimaraot, ug pag-ulag-dugo. Pagkatukma sa pagkabatbat niana sa kalibotan karong adlawa! Ang kadaghanan sa katawhan walay interes sa Diyos ug sa iyang mga katuyoan. Ang bisan unsang dagway sa kalulot kasagarang itagana alang sa mga okasyon sa dihang adunay makuha gikan niana. Ang pagpamakak ug malaw-ayng sinultihan komon. Ang pag-ulag-dugo ginapasundayag dili lamang diha sa mga balita kondili usab diha sa kalingawan. Unsay hinungdan sa ingon niining kahimtanga? Tinuod nga kitang tanan maoy mga kaliwat sa makasasala nga Adan, apan kon buhaton sa mga tawo ingong paagi sa ilang kinabuhi ang mga butang nga gibatbat ni apostol Pablo, usa ka butang nga labaw pa niana ang nalangkit. Ang bersikulo 18 nagbatbat kon unsa kana, nga nag-ingon: “Walay kahadlok sa Diyos sa atubangan sa ilang mga mata.”—Tan-awa ang Salmo 36:1.
5. Nganong ang pipila ka mga tawo adunay diyosnong kahadlok, samtang ang uban wala?
5 Apan, nganong ang pipila ka mga tawo adunay diyosnong kahadlok, samtang ang uban wala? Sa yanong pagkasulti, tungod kay ang pipila ka mga tawo nagaugmad niini, samtang ang uban wala. Walay bisan usa kanato ang natawo nga aduna niini, apan kitang tanan adunay katakos alang niini. Angay natong tun-an ang diyosnong kahadlok. Unya, aron kini mahimong gamhanan nagapalihok nga puwersa sa atong mga kinabuhi, angay nato kining ugmaron.
Usa ka Madanihong Imbitasyon
6. Kinsay nagpaabot kanato sa imbitasyon nga narekord sa Salmo 34:11, ug sa unsang paagi gipakita niining tekstoha nga ang diyosnong kahadlok kinahanglang pagatun-an?
6 Usa ka madanihong imbitasyon sa pagtuon sa pagkahadlok kang Jehova gipaabot kanato diha sa Salmo 34. Salmo kini ni David. Ug kinsa ang gilandongan ni David? Walay lain kondili ang Ginoong Jesu-Kristo. Ang usa ka tagna nga espisipikong giaplikar ni apostol Juan kang Jesus natala sa bersikulo 20 niini nga salmo. (Juan 19:36) Sa atong adlaw, si Jesus mao ang usa nga nagapaabot nianang imbitasyona diha sa bersikulo 11: “Umari, kamong mga anak, patalinghog kanako; ang pagkahadlok kang Jehova mao ang itudlo ko kaninyo.” Kini dayag nga nagpakita nga ang diyosnong kahadlok maoy usa ka butang nga mahimong makat-onan, ug si Jesu-Kristo labaw kaayong kuwalipikado sa pagtudlo kanato. Ngano?
7. Nganong si Jesus ilabina mao ang usa nga kaniya kita makakat-on ug diyosnong kahadlok?
7 Si Jesu-Kristo nahibalo sa pagkahinungdanon sa diyosnong kahadlok. Ang Hebreohanon 5:7 nag-ingon mahitungod kaniya: “Sa mga adlaw sa iyang pagkaunodnon si Kristo mitanyag ug mga pangamuyo ug usab mga pangaliya ngadto sa Usa kinsa arang makaluwas kaniya gikan sa kamatayon, uban ang makusog nga mga pagtuaw ug mga luha, ug gidungog siya nga may pabor tungod sa iyang diyosnong kahadlok.” Ang maong diyosnong kahadlok maoy usa ka hiyas nga gipakita ni Jesu-Kristo bisan sa wala pa siya mag-atubang sa kamatayon diha sa sakitanang estaka. Hinumdomi, sa Proverbio kapitulo 8, ang Anak sa Diyos gibatbat ingong ang personipikasyon sa kaalam. Ug sa Proverbio 9:10, kita gisultihan: “Ang pagkahadlok kang Jehova maoy sinugdan sa kaalam.” Busa kining diyosnong kahadlok maoy pangunang bahin sa kinaiya sa Anak sa Diyos nga dugay na kaayo una pa siya mianhi sa yuta.
8. Sa Isaias 11:2, 3, unsay atong makat-onan bahin sa pagkahadlok kang Jehova?
8 Dugang pa, bahin kang Jesus ingong Mesiyanikong Hari, ang Isaias 11:2, 3 nag-ingon: “Ang espiritu ni Jehova mopuyo sa ibabaw kaniya, ang espiritu sa kaalam ug pagsabot, ang espiritu sa pagtambag ug kagahom, ang espiritu sa kahibalo ug sa kahadlok kang Jehova; ug ang iyang kalipay anaa sa kahadlok kang Jehova.” Pagkatahom nga pagkapahayag kana! Ang pagkahadlok kang Jehova maayo. Kini mapuslanon ug makatabang. Kini maoy usa ka hiyas nga mokaylap sa tibuok dominyo nga ibabaw niini si Kristo magmando ingong Hari. Siya nagamando na karon, ug ngadto sa tanan nga ginatigom ingong iyang mga ginsakpan, siya nagsugo sa pagkahadlok kang Jehova. Sa unsang paagi?
9. Sa unsang paagi gitudloan kita ni Jesu-Kristo sa pagkahadlok kang Jehova, ug unsay buot niya nga atong makat-onan bahin niana?
9 Pinaagi sa atong mga tigom sa kongregasyon, sa mga asembliya, ug sa mga kombensiyon, si Jesus, ingong tinudlong Ulo sa kongregasyon ug ingong ang Mesiyanikong Hari, nagatabang kanato sa matin-awng pagsabot kon unsa ang diyosnong kahadlok ug kon nganong kini mapuslanon kaayo. Sa ingon siya naningkamot sa pagpalalom sa atong apresasyon niana aron kita mahibalo sa pagkalipay sa pagkahadlok kang Jehova sama kaniya.
Maningkamot Ka Ba?
10. Sa dihang motambong sa Kristohanong mga tigom, unsay atong kinahanglang buhaton aron makasabot kita sa pagkahadlok kang Jehova?
10 Siyempre, ang atong pagbasa lamang sa Bibliya o pagtambong sa mga tigom sa Kingdom Hall dili makagarantiya nga kita makabaton ug diyosnong kahadlok. Matikdi kon unsay atong kinahanglang buhaton kon buot gayod natong masabtan ang pagkahadlok kang Jehova. Ang Proverbio 2:1-5 nag-ingon: “Anak ko, kon dawaton mo ang akong mga pulong ug ampingan mo ang akong mga sugo diha kanimo, aron magapamati ka sa imong igdulungog sa kaalam, aron ikiling mo ang imong kasingkasing sa pagsabot; kon, dugang pa, ikaw magasangpit sa salabotan ug magapatugbaw sa imong tingog alang sa pagsabot mismo, kon magapangita ka niini sama sa salapi, ug magausisa niini sama sa tinago nga bahandi, niana masabtan mo ang pagkahadlok kang Jehova, ug makaplagan mo ang kahibalo mismo sa Diyos.” Busa sa dihang motambong sa mga tigom, kita kinahanglang mamati gayod sa ginapanulti, maningkamot gayod sa pagsentro sa atong pagtagad ug sa paghinumdom sa yawi nga mga hunahuna, mamalandong ug maayo kon sa unsang paagi ang atong pagbati kang Jehova angay mag-impluwensiya sa atong tinamdan bahin sa tambag nga gihatag—oo, buksan nato ang atong mga kasingkasing. Niana atong masabtan ang pagkahadlok kang Jehova.
11. Aron maugmad ang diyosnong kahadlok, unsay angay natong buhaton sa kinasingkasing ug sa kanunay?
11 Gipasiugda sa Salmo 86:11 ang laing hinungdanong butang, kanang bahin sa pag-ampo. “Tudloi ako, Oh Jehova, sa imong dalan. Ako magalakaw sa imong kamatuoran,” miampo ang salmista. “Bug-osa ang akong kasingkasing sa pagkahadlok sa imong ngalan.” Si Jehova nahimuot sa maong pag-ampo, kay iyang giparekord kana diha sa Bibliya. Aron maugmad ang diyosnong kahadlok, kita usab kinahanglang mag-ampo kang Jehova alang sa iyang tabang, ug kita makabaton ug kaayohan pinaagi sa kinasingkasing nga pag-ampo ug sa kanunay.—Lucas 18:1-8.
Ang Imong Kasingkasing Nalangkit
12. Nganong kinahanglang hatagan ug linain nga pagtagad ang kasingkasing, ug unsay nalakip niana?
12 Adunay laing butang nga angay natong matikdan sa Salmo 86:11. Ang salmista wala maghangyo lamang alang sa mental nga pagsabot sa pagkahadlok sa Diyos. Iyang gihisgotan ang iyang kasingkasing. Ang pag-ugmad sa diyosnong kahadlok naglangkit sa mahulagwayong kasingkasing, nga nagkinahanglag linain nga pagtagad tungod kay kini mao ang sulod nga pagkatawo sumala sa makita diha sa tanan natong mga kalihokan sa kinabuhi ug naglakip sa atong mga hunahuna, sa atong mga tinamdan, sa atong mga tinguha, sa atong mga panukmod, sa atong mga tumong.
13. (a) Unsay magpaila nga nabahin ang kasingkasing sa usa ka tawo? (b) Samtang ugmaron nato ang diyosnong kahadlok, unsang tumong ang atong paningkamotang makab-ot?
13 Ang Bibliya nagpasidaan kanato nga ang kasingkasing sa usa ka tawo mahimong mabahin. Kini mahimong malimbongon. (Salmo 12:2; Jeremias 17:9) Mahimong moaghat kini kanato sa pagpakigbahin sa maayong mga kalihokan—pagtambong sa mga tigom sa kongregasyon ug sa paggawas sa pag-alagad sa kanataran—apan mahimong mahigugma usab kini sa pila ka bahin sa kalibotanong paagi sa kinabuhi. Kini mahimong magpugong kanato sa pagkahimong tinuod nga bug-os-kalag sa pagpauswag sa intereses sa Gingharian. Unya ang malimbongong kasingkasing mahimong mosulay sa pagdani kanato nga, total, nagahimo man kita sa atong maarangan sama sa uban. O tingali diha sa eskuylahan o sa atong sekular nga trabaho, ang kasingkasing mahimong maimpluwensiyahan sa kahadlok sa tawo. Tungod niini, sa maong mga palibot basig magpanuko kita sa pagpaila sa atong kaugalingon ingong mga Saksi ni Jehova ug basig mohimog mga butang nga dili-angay sa mga Kristohanon. Apan, human niana tulisokon kita sa atong konsensiya. Dili kining matanga sa pagkatawo ang atong gitinguha. Busa, duyog sa salmista kita moampo kang Jehova: “Bug-osa ang akong kasingkasing sa pagkahadlok sa imong ngalan.” Buot nato ang bug-os nga pagkatawo sa sulod, ingon sa makita diha sa tanan natong mga kalihokan sa kinabuhi, aron mohatag pamatuod nga kita “may kahadlok sa matuod nga Diyos ug nagabantay sa iyang mga sugo.”—Ecclesiastes 12:13.
14, 15. (a) Sa dihang nanagna sa pagpasig-uli sa Israel gikan sa pagkabihag sa Babilonya, unsay gisaad ni Jehova nga ihatag ngadto sa iyang katawhan? (b) Unsay gihimo ni Jehova bahin sa pagpatisok sa kahadlok sa Diyos diha sa mga kasingkasing sa iyang katawhan? (c) Nganong mibiya ang Israel sa mga dalan ni Jehova?
14 Si Jehova nagsaad nga mohatag siya ug ingon niana nga kasingkasing nga mahinadlokon sa Diyos ngadto sa iyang katawhan. Iyang gitagna ang pagkapasig-uli sa Israel ug miingon, sumala sa atong mabasa diha sa Jeremias 32:37-39: “Dad-on ko sila pag-usab nganhi niining dapita ug papuy-on ko sila sa kasegurohan. Ug sila mahimong akong katawhan, ug ako mahimong ilang Diyos. Ug hatagan ko sila ug usa ka kasingkasing ug usa ka dalan aron sila mangahadlok kanako kanunay, alang sa ilang kaayohan ug sa ilang mga anak nga mosunod kanila.” Sa bersikulo 40, ang saad sa Diyos dugang napalig-on: “Ang pagkahadlok kanako akong ibutang diha sa ilang mga kasingkasing aron dili sila mobiya kanako.” Sa 537 W.K.P., tinuod nga gidala silag balik ni Jehova sa Jerusalem sumala sa iyang gisaad. Apan unsay ikasulti bahin sa nahibilin sa maong saad—nga hatagan niya sila ug ‘usa ka kasingkasing aron sila mangahadlok kaniya kanunay’? Nganong ang karaang nasod sa Israel mibiya kang Jehova human nga iyang gidala silag balik gikan sa Babilonya, mao nga ang ilang templo nalumpag sa 70 K.P., nga dili na gayod tukoron pag-usab?
15 Dili kini tungod sa kapakyasan sa bahin ni Jehova. Si Jehova, sa pagkatinuod, mihimog mga lakang sa pagbutang sa kahadlok sa Diyos diha sa mga kasingkasing sa iyang katawhan. Tungod sa kaluoy nga iyang gipakita sa pagluwas kanila gikan sa Babilonya ug sa pagpabalik kanila ngadto sa ilang yutang-natawhan, iyang gihatagan sila ug igong pamatuod sa pagtamod kaniya nga may dulot nga kataha. Dugang gipalig-on sa Diyos kanang tanan pinaagi sa mga pahinumdom, tambag, ug pagbadlong pinaagi sa iyang mga manalagnang si Haggeo, Zacarias, ug Malakias; pinaagi kang Esdras, kinsa gipadala ngadto kanila ingong magtutudlo; pinaagi kang Gobernador Nehemias; ug pinaagi sa Anak sa Diyos mismo. May mga panahong namati ang katawhan. Namati sila sa dihang ilang gitukod pag-usab ang templo ni Jehova sa pag-agda ni Haggeo ug Zacarias ug sa dihang ilang gipalayas ang dumuloong nga mga asawa sa mga adlaw ni Esdras. (Esdras 5:1, 2; 10:1-4) Apan kanunay nga sila dili mosunod. Sila dili kanunay mamati; sila mihunong sa pagsanong sa tambag; wala nila hupting bukas ang ilang mga kasingkasing. Ang mga Israelinhon wala mag-ugmad sa diyosnong kahadlok, ug tungod niana, kadto dili usa ka gamhanan nagapalihok nga puwersa sa ilang mga kinabuhi.—Malakias 1:6; Mateo 15:7, 8.
16. Diha sa kang kinsang mga kasingkasing gipatisok ni Jehova ang diyosnong kahadlok?
16 Bisan pa, ang saad ni Jehova sa pagbutang ug diyosnong kahadlok diha sa mga kasingkasing sa iyang katawhan wala mapakyas. Naghimo siya ug bag-ong pakigsaad sa espirituwal nga Israel, ngadto sa mga Kristohanon kinsa iyang gitanyagan ug langitnong paglaom. (Jeremias 31:33; Galacia 6:16) Pagka 1919, gipasig-uli sila sa Diyos gikan sa pagkabihag sa Babilonyang Bantogan, ang empiryo sa bakak nga relihiyon sa kalibotan. Diha sa ilang mga kasingkasing lig-on niyang gipatisok ang pagkahadlok kaniya. Kini misangpot ug dagayang mga kaayohan kanila ug sa “dakong panon,” kinsa nakabaton sa paglaom sa kinabuhi ingong yutan-ong mga ginsakpan sa Gingharian. (Jeremias 32:39; Pinadayag 7:9) Ang pagkahadlok kang Jehova napasilsil usab diha sa ilang mga kasingkasing.
Kon sa Unsang Paagi ang Diyosnong Kahadlok Natisok Diha sa Atong mga Kasingkasing
17. Sa unsang paagi gipasilsil ni Jehova ang diyosnong kahadlok diha sa atong mga kasingkasing?
17 Giunsa pagtisok ni Jehova kining diyosnong kahadlok diha sa atong mga kasingkasing? Pinaagi sa paglihok sa iyang espiritu. Ug unsay atong nabatonan nga produkto sa balaang espiritu? Ang Bibliya, ang dinasig nga Pulong sa Diyos. (2 Timoteo 3:16, 17) Pinaagi sa iyang nahimo sa nangagi, pinaagi sa iyang mga pakiglabot sa iyang mga alagad karon sa katumanan sa iyang matagnaong Pulong, ug pinaagi sa mga tagna sa mga butang nga umaabot, si Jehova nagataganag maayong basehanan aron maugmad natong tanan ang diyosnong kahadlok.—Josue 24:2-15; Hebreohanon 10:30, 31.
18, 19. Sa unsang paagi ang mga kombensiyon, mga asembliya, ug mga tigom sa kongregasyon makatabang kanato sa pagbaton ug diyosnong kahadlok?
18 Angay hinumdoman nga, sumala sa gireport diha sa Deuteronomio 4:10, si Jehova miingon kang Moises: “Tigomon mo kanako ang katawhan aron makapatalinghog sila sa akong mga pulong, aron makakat-on sila sa pagkahadlok kanako sa tanang mga adlaw nga sila magakinabuhi sa yuta ug aron pagatudloan nila ang ilang mga anak.” Sa susama karong adlawa, si Jehova naghimo ug dagayang mga tagana sa pagtabang sa iyang katawhan sa pagtuon sa pagkahadlok kaniya. Diha sa mga kombensiyon, sa mga asembliya, ug sa mga tigom sa kongregasyon, atong ipadayag ang ebidensiya sa mahigugmaong-kalulot ni Jehova ug ang iyang kaayo. Mao kanay atong ginahimo sa dihang magtuon kita sa librong Ang Labing Bantogang Tawo nga Nabuhi Sukad. Sa unsang paagi kana nga pagtuon nakaapektar kanimo ug sa imong tinamdan kang Jehova? Samtang nakita nimo ang nagkalainlaing bahin sa dakong personalidad sa atong langitnong Amahan nga napabanaag diha sa iyang Anak, dili ba nagpalig-on kini sa imong tinguhang dili gayod pasuk-on ang Diyos?—Colosas 1:15.
19 Diha sa atong mga tigom, tun-an usab nato ang mga asoy sa pagluwas ni Jehova sa iyang katawhan sa nangaging panahon. (2 Samuel 7:23) Samtang magtuon kita sa libro sa Bibliya nga Pinadayag uban sa tabang nga librong Pinadayag—Ang Dakong Sangkoanan Niini Haduol Na!, atong makat-onan ang matagnaong mga panan-awon nga natuman na niining ika-20ng siglo ug bahin sa makapukawg-kahadlok nga mga hitabo nga umaabot pa. Mahitungod sa tanang mga buhat sa Diyos, ang Salmo 66:5 nag-ingon: “Umari, kamo nga katawhan, ug tan-awa ang mga buhat sa Diyos. Ang iyang pakiglabot sa mga anak tawo makapukawg-kahadlok.” Oo, kon hustong pagkalantaw, kining mga buhat sa Diyos magpatisok diha sa atong mga kasingkasing ug pagkahadlok kang Jehova, usa ka lalom nga kataha. Busa atong masabtan ang paagi sa pagtuman ni Jehova nga Diyos sa iyang saad: “Ibutang ko ang pagkahadlok kanako diha sa ilang mga kasingkasing aron sila dili mobiya kanako.”—Jeremias 32:40.
20. Aron molalom ang pagkatisok sa diyosnong kahadlok diha sa atong mga kasingkasing, unsay gikinahanglan kanato?
20 Hinunoa, matin-aw nga ang diyosnong kahadlok dili mapatisok sa atong mga kasingkasing kon walay paningkamot sa atong bahin. Ang mga resulta dili awtomatikong motungha. Gihimo ni Jehova ang iyang bahin. Kinahanglang himoon usab nato ang atong bahin pinaagi sa pag-ugmad sa diyosnong kahadlok. (Deuteronomio 5:29) Ang kinaiyanhong Israel napakyas sa pagbuhat niana. Apan pinaagi sa pagsalig kang Jehova, ginatagamtam na sa espirituwal nga mga Israelinhon ug sa ilang mga kauban ang daghang kaayohan nga modangat sa mga tawong mahinadlokon sa Diyos. Atong hisgotan ang pipila niining mga kaayohan sa mosunod nga artikulo.
Unsaon Nimo Pagtubag?
◻ Unsa ang diyosnong kahadlok?
◻ Sa unsang paagi gitudloan kita aron makakaplag ug kalipay sa pagkahadlok kang Jehova?
◻ Aron makabaton ug diyosnong kahadlok, unsay atong kinahanglang paningkamotan?
◻ Nganong ang pagbaton ug diyosnong kahadlok nalangkit sa tanang bahin sa atong mahulagwayong kasingkasing?
[Hulagway sa panid 12, 13]
Gikinahanglan ang kuging pagtuon aron masabtan ang pagkahadlok kang Jehova