“Sa Dili pa ang Himaya Anaa ang Pagkamapainubsanon”

USA ka batan-ong lalaki didto sa Ehiptohanong bilanggoan tungod sa usa ka tinumotumong sumbong. Nag-antos siya sa hilabihang kaulawan, ug daw walay paglaom nga makagawas gikan sa bilanggoan. Unya gimandoan siya nga paatubangon kang Paraon. Gipagawas dayon siya sa mga guwardiya sa bilanggoan. Siya namalbas, nag-ilis sa iyang sapot, ug unya miatubang sa hari.

Usa ka sorprisa ang naghulat kang Jose. Pinaagi sa tabang ni Jehova tukmang nahubad ni Jose ang duha ka damgo ni Paraon. Si Paraon miingon: “Tan-awa, ibutang ko ikaw ibabaw sa tibuok yuta sa Ehipto.” (Genesis 41:41) Pagkadili-katuohang eksperyensiya—gikan sa bilanggoan ngadto sa palasyo sa hari sa usa lang ka adlaw! Ang eksperyensiya ni Jose mahimong ikailustrar nianang sa ulahi gidasig si Solomon sa pagsulat: “Kay gikan sa bilanggoan siya migula aron mahimong hari.” Sa tukma, makaduha nga misulat si Solomon: “Sa dili pa ang himaya anaa ang pagkamapainubsanon.”​—Ecclesiastes 4:14; Proverbio 15:33; 18:12.

Aron makapahimulos gikan nianang balaang kamatuoran, pangutan-a ang imong kaugalingon: Unsay nagpalig-on kang Jose sa panahon sa iyang makauulawng eksperyensiya? Sa unsang paagi giatubang niining matinumanong alagad ni Jehova ang bakak nga sumbong nga nakapabilanggo kaniya? Unsang himaya ang anaa sa hunahuna ni Jehova alang kang Jose? Unsang matang sa himaya ang naghulat niadtong kinsa latas sa mga siglo matinumanon ug maisogong nag-antos sa paglutos ug kaulawan? Labaw sa tanan, unsay makatabang kanato sa pagbaton ug timbang nga tinamdan kon kita mag-antos sa kaulawan?

Tingali namalandong kanunay si Jose sa iyang unang duha ka matagnaong mga damgo nga nagpaila nga ang iyang mga igsoon ug bisan ang iyang mga ginikanan “moluhod” sa iyang atubangan. Sa pagkamatuod, ang iyang mga igsoon, sa pagkadungog sa unang damgo, miingon: “Ikaw ba mahimong hari sa ibabaw kanamo?”​—Genesis 37:8-10.

Patyon unta si Jose sa iyang nasinang mga igsoon! Apan ilalom sa pagtultol ni Jehova, ang 17-anyos nga batang lalaki gibaligya sa nagpanawng mga negosyante, kinsa, sa baylo, nagbaligya kaniya kang Potipar, ang hepe sa mga guwardiya ni Paraon.

Sa ulahi, si Jose nahimong piniyalan sa panimalay ni Potipar, kang kansang asawa misulay sa pagdani sa ambongang batan-on. Apan maunongon si Jose kang Jehova ug nakaikyas. Bakak nga gisumbong sa malimbongong asawa si Jose nga misulay sa paglugos kaniya, ug mituo si Potipar kaniya, busa ang pobreng Jose gibanlod sa bilanggoan.

Apan, siya nagpabiling maunongon kang Jehova, kinsa, sumala sa nahisgotan na, mihikay nga siya ipadala kang Paraon aron sa paghubad sa mga damgo. Human niadto gitudlo ni Paraon si Jose sa mahimayaong pribilehiyo sa pag-organisar sa abiyo sa pagkaon sa Ehipto. Sa dihang mikaylap ang gutom sa Canaan, ang mga igsoon ni Jose sa pagkamatuod miluhod kaniya aron sa pagkuhag pagkaon alang sa pamilya.

Ang Uban Kinsa Midangat sa ‘Kaulawan Ngadto sa Himaya’

Ang laing matinumanong alagad ni Jehova kansang sumbanan sa kinabuhi nagpamatuod sa balaang kamatuoran nga “sa dili pa ang himaya anaa ang pagkamapainubsanon” mao si Moises. Gipadako sa maluhong palasyo ni Paraon, si Moises dunay maayong umaabot sa atubangan kaniya. Dayon ang mga hitabo daw miliso sa kadaotan. Si Moises milihok tungod sa pagtuo kang Jehova ug sa mahigugmaong pagtagad sa iyang katawhan, busa siya mikalagiw alang sa iyang kinabuhi gikan sa nasukong Paraon. Nag-inusara siyang mipanaw ngadto sa Midian. Sulod sa 40 ka tuig siya nagpakita sa iyang pagkamapainubsanon pinaagi pagpuyo sa yanong kinabuhing magbalantay sa mga hayop, nag-alagad sa iyang ugangang si Jethro. Pagkamakapadasig tingali kadto alang kang Moises sa panahon sa iyang 40 ka tuig nga pag-ugmad sa personalidad aron sa pagpalandong bahin sa paagi sa paghimo ni Jehova kaniyang mapainubsanon ug sa pagpalandong sa butang nga gitagana alang kaniya sa umaabot!

Dayon miabot ang himaya. Gitudlo ni Jehova si Moises ingong Iyang mensahero ngadto kang Paraon ug sa pagpagawas sa Iyang katawhan sa Ehipto. Pagkamahimayaong pribilehiyo ang nabatonan ni Moises sa dihang direkta siyang nalangkit sa napulo ka hampak ug nanguna sa Israel sa Pulang Dagat! Sa ulahi, nadawat ni Moises ang Kasugoan gikan kang Jehova sa Bukid sa Sinai. Sa iyang paglugsong, ang mga tawo “dili makatutok sa nawong ni Moises tungod sa himaya sa iyang dagway.”​—2 Corinto 3:7.

Palandonga usab si Job, ang labing bantogan sa tanang mga taga Silangan. Siya maoy “usa ka tawong matarong ug matul-id, mahadlokon sa Diyos ug nagapahilayo sa daotan.” (Job 1:2, 3, 8) Unya, sa kalit, nawala kaniya ang iyang napulo ka anak ug tanan sa iyang libolibong mga karnero, kamelyo, baka, ug baye nga asno.

Dili lang kana. Si Job naputos sa makamatayng mga hubag, nga naghimo kaniya nga makaluod. Gibiaybiay siya sa iyang kaugalingong asawa: “Magpabilin ka pa ba gihapon sa imong pagkamaunongon? Tungloha ang Diyos ug magpakamatay ka!” (Job 2:9) Grabeng nasulayan si Job ug napakaulawan, apan siya wala gayod masayod sa langitnong komprontasyon tali kang Jehova ug sa pangunang-kaaway, si Satanas. Ang kahimtang wala mouswag pinaagi sa taas nga diskusyon uban sa tulo ka “higala” ni Job. Apan, nagpabilin si Job sa iyang pagkamaunongon. Maunongon gani niyang gidawat ang maalamong tambag gikan kang Elihu​—nga manghod niya.​—Job 32:4.

Nagantihan ba si Job? Oo. Gipasig-uli ni Jehova si Job, gidoble ang gidak-on sa iyang panon, ug gihatagan siyag pito ka anak nga lalaki ug tulo ka anak nga babaye​—ang labing matahom sa tibuok yuta! Pagkamahimayaong sangpotanan sa pagkamapainubsanon ni Job! Pagkamatuod gayod niini​—“sa dili pa ang himaya anaa ang pagkamapainubsanon.”​—Job 42:12-15.

Nagkalainlaing mga Matang sa Himaya

Sa dayag dunay nagkalainlaing matang sa himaya​—gikan sa himaya sa buhok sa usa ka babaye ngadto sa nawong ni Moises sa dihang milugsong siya sa Bukid sa Sinai. (1 Corinto 11:15; 2 Corinto 3:7) Ang talagsaong mga pagsalop sa adlaw dunay matahom nga himaya, ug ang mga bitoon dunay laing himaya.​—1 Corinto 15:41.

Nagkalainlaing porma sa pulong “himaya” ang gigamit sa gatos-gatos ka besis diha sa Bibliya. Kon susihon kining mga reperensiya ug ang ilang konteksto, matin-aw nga si Jehova mao ang tuboran sa tanang himaya. Ang iyang matinumanong mga alagad ug ang iyang mga obra-maestra sa kalalangan nagpabanaag niining himayaa sa nagkalainlaing mga paagi ug sa nagkalainlaing mga sukod.

Sa atong ika-20ng siglo, kita dunay daghang ebidensiya sa mga kaulawan nga giantos niadtong dunay mahimayaong paglaom sa langitnong kinabuhi. Sa panahon sa Gubat sa Kalibotan I, ang pangunang mga membro sa Watch Tower Society sa Brooklyn, New York, gisentensiyahan sa 20 ka tuig sa pagkabilanggo sa bakak nga mga sumbong. Niining higayona, mibuto ang paglutos diha sa daghang dapit. Pananglitan, si J. B. Siebenlist gibilanggo sa tulo ka adlaw nga walay sugo sa pagdakop ug wala hatagig pagkaon, gawas sa tulo ka pirasong pan-os nga tinapay gikan sa mais. Siya gidala sa bilanggoan sa mga tawong nangasuko, gihukasan, gibulitag mainit nga alkitran, ug gilatigo sa latigo sa kabayo nga dunay alambre ang tumoy. Diha sa usa ka husay ang abogado sa tagsumbong miingon: “Wa koy labot sa imong Bibliya; angay kang maimpiyerno uban sa imong bukobuko nga bali; angay kang bitayon.”

Sa panahon sa Gubat sa Kalibotan II, ang ubang matinumanong mga alagad ni Jehova nag-antos sa makalilisang nga mga konsentrasyong kampo sa Nazi. Ang usa mao si Martin Poetzinger, usa ka dinihogang Saksi kinsa naluwas aron sa pagkahimong membro sa Nagamandong Lawas sa mga Saksi ni Jehova. Iyang gibatbat ang Dachau ingong “gubot-nga-balay sa mga demonyo.” Diha sa kampo sa Mauthausen, “gisulayan sa Gestapo ang tanang paagi sa paghaylo kanamo sa pagbungkag sa among pagtuo kang Jehova. Ang kagutom, malimbongong mga paghigalaay, kapintasan, patindogon diha sa kuwadrado, gairon diha sa diyes-piye nga poste, mga pagbunal​—kining tanan ug uban pa . . . gisulayan.”

Unsay Nakapalig-on Niining Matinumanong mga Kristohanon?

Ilalom nianang alaot ug makauulawng mga kahimtang, sila natabangan sa ilang pagtuo sa kataposang sangpotan, apil ang paglaom sa mahimayaong umaabot alang niadtong nagapabilin sa ilang integridad. Alang sa “gamayng panon” sa dinihogang mga Saksi, kini maoy langitnong panulondon. (Lucas 12:32) Ang linain nga matang sa himaya dinhi sa yuta gitagana alang sa ubang mga tawong matinumanon. Ang uban kanila, sama kang Jose ug Moises, gihisgotan diha sa Hebreohanon kapitulo 11. Palihog basaha ang mga bersikulo 32-40 ug palandonga ang mga kaulawan nga giantos sa uban niining mga matinumanon. Dugang pa, “ang dakong panon” nagaalagad kang Jehova sa yuta karong adlawa. (Pinadayag 7:9, 15) Unsa ang ilang palaabuton?

Usa ka tugob nga palaabuton ang naghulat kanila. Ang langitnong gingharian ilalom ni Jesu-Kristo dunay yutan-ong mga hawas nga magadapat sa instruksiyon nga nasulat diha sa mga linukot nga basahon nga gihisgotan diha sa Pinadayag 20:12. Kini sila dunay mahimayaong mga pribilehiyo, dili ingong mga hari, kondili “ingong mga prinsipe sa tibuok yuta,” ug uban kanila, ang dili-maisip nga mapainubsanon, matinumanong katawhan, apil ang mga binanhaw, nga makabaton ug kinabuhing dayon diha sa usa ka mahimayaong paraiso sa yuta.​—Salmo 45:16.

Karong adlawa dunay milyonmilyon nga nagpasundayag sa ilang pagkamapainubsanon pinaagi sa pagbulag sa bakak nga relihiyon ug pinaagi sa malipayong pakigbahin sa balay-ug-balay nga buluhatong pagsangyaw sa mga Saksi ni Jehova. Daghan kanila gibiaybiay sa mga sakop sa pamilya ug mga higala, apan sila nagpabilin sa matuod nga pagsimba. Sila mapainubsanong midawat sa pagbadlong ug disiplina aron makaalagad sa matuod nga Diyos, si Jehova. Ang ilang paglaom mao ang pagpuyo diha sa napasig-uling Paraiso, sa dinha “ang yuta mapuno sa kahibalo sa himaya ni Jehova sama sa mga tubig nga nagatabon sa dagat.”​—Habaccuc 2:14.

Kini maoy mga adlaw sa pagsulay alang sa katawhan ni Jehova. Daw sama kita sa mga dumuloong diha sa usa ka langyawng yuta. Ang kal-ang tali sa matuod nga pagsimba ug sa bakak nagkalalom ug nagkadako. Kitang tanan nag-antos sa kaulawan sa usa ka sukod. Apan sama nga napahalipayan ug napalig-ong si Jesus pinaagi sa kalipay nga anaa sa iyang atubangan, kita usab makabuntog sa mga pagsulay pinaagi sa paghinumdom sa kataposang sangpotanan.

Ang Bibliya nagtambag kanato: “Ipaubos ninyo ang inyong kaugalingon sa atubangan ni Jehova, ug siya magatuboy kaninyo.” (Santiago 4:10) Kon mabutang ka sa grabe nga pagsulay, palandonga kining mga pulonga: “Sa dili pa ang himaya anaa ang pagkamapainubsanon.” Hinumdomi, usab, nga si Jehova dili gayod mapakyas!