Importante ang Tubag

Importante bang mahibalo nga naay Maglalalang? Kon nakombinsir ka nga naay labing gamhanang Diyos tungod sa mga ebidensiya, tingali gusto nimong susihon ang ebidensiya nga ang Bibliya gikan sa Diyos. Ug kon mosalig ka sa giingon sa Bibliya, makabenepisyo gyod ka.

Mas magmalipayon ka

ANG BIBLIYA NAG-INGON: ‘[Ang Diyos] naghimog maayo, nga naghatag kaninyog ulan gikan sa langit ug mabungahong mga panahon, nga nagbuhong kaninyog pagkaon ug nagpuno sa inyong mga kasingkasing ug kalipay.’—Buhat 14:17.

KAHULOGAN: Ang tanan nga imong na-enjoy sa kalalangan maoy regalo sa Diyos kanimo. Mas maapresyar nimo ang maong mga regalo dihang imong makita kon unsa ka dako ang iyang gugma kanimo.

Makita nimo ang kasaligang giya sa adlaw-adlawng pagkinabuhi

ANG BIBLIYA NAG-INGON: “Imong masabtan kon unsay matarong ug hustisya ug matul-id, ang katibuk-ang dalan sa kon unsay maayo.”—Proverbio 2:9.

KAHULOGAN: Ingong imong Maglalalang, nahibalo ang Diyos kon unsay imong gikinahanglan aron malipay ka. Kon imong tun-an ang Bibliya, makakat-on kag mga leksiyon nga makatabang nimo karon.

Matubag ang imong mga pangutana

ANG BIBLIYA NAG-INGON: “Imong makaplagan ang kahibalo sa Diyos.”—Proverbio 2:5.

KAHULOGAN: Ang pagkahibalo nga naay Maglalalang makatabang nimo nga makita ang tubag sa importanteng mga pangutana, sama sa: Unsay katuyoan sa kinabuhi? Nganong daghan ang nag-antos? Unsay mahitabo dihang mamatay ta? Ang tubag naa sa Bibliya.

Makabaton ug paglaom

ANG BIBLIYA NAG-INGON: “‘Nahibalo ko pag-ayo kon unsay akong buhaton kaninyo,’ miingon si Jehova, ‘hatagan mo nakog kalinaw, ug dili katalagman, aron makabaton mog maayong kaugmaon ug paglaom.’”—Jeremias 29:11.

KAHULOGAN: Nagsaad ang Diyos nga iyang wad-on ang pagkadaotan, pag-antos, ug kamatayon. Kon mosalig ka sa mga saad sa Diyos, ang imong paglaom makahatag nimog kaisog sa pag-atubang sa mga problema kada adlaw.

Nakabenepisyo ang uban sa ilang pagtuo sa Maglalalang

“Mahingangha ko pirme dihang makita nako kon giunsa ta pagtabang sa Diyos sa daghang paagi. Pananglitan, gitabangan ta sa pag-una sa importanteng mga butang, kon unsaon pagsulbad ang mga dili pagsinabtanay, ug kon unsaon nga mahimong higala sa Diyos.”—Cyndi, U.S.A.

“Kay nagtuo ko sa Maglalalang, malipayon kaayo ko ug dili laay ang akong kinabuhi. Daghan kaayo kog madiskobrehan bahin sa Diyos, sa iyang kalalangan, ug sa iyang Pulong.”—Elise, France.

“Mas nagmalipayon ko dihang akong gisunod ang gitudlo sa Maglalalang diha sa Bibliya. Dili na ko sobra ka estrikto, mas buotan ug matinabangon na ko, ug mas kontento. Nakatabang pod ni nako nga mahimong mas maayong amahan.”—Peter, Netherlands.

“Kaniadto, wa na koy laing gihimo kondili mokaon, matulog, ug magdalidalig sulod ug sayo sa trabaho. Stressed kaayo ko ug way kalipay! Pero nakita nako karon nga nindot kaayo nga regalo ang kinabuhi, ug angay ning i-enjoy ug pabilhan.”—Liz, Estonia.

“Mabalak-on ko nga tawo. Pero ang pagkahibalo nga matapos ra ang pagkadaotan, inhustisya, ug pag-antos nakatabang nako nga dili madaog sa sobrang kabalaka.”—Adrien, France.