Tinuod nga Katahom Makaugmad Ka Niini
ANG Bibliya may tambag alang sa mga lalaki ug mga babaye kon bahin sa maayong hitsura. Alang sa mga lalaki, kini nagaingon: “Ang katahom sa mga batan-ong lalaki mao ang ilang gahom.” (Proverbio 20:29) Oo, ang kusog ug kaabtik sa mga batan-ong lalaki makadani kaayo. Apan unsay mahitabo kon mahanaw ang batan-ong kusog? Ang sanglitanan sa Bibliya nagaingon: “Ang pagkaubanon maoy purongpurong sa katahom kon kini hikaplagan sa dalan sa pagkamatarong.” (Proverbio 16:31) Ang pagkamatarong maoy usa ka bahin sa sulodnong katahom. Kon ugmaron kini sa usa ka batan-ong lalaki, kini anaa gihapon bisan pag mawad-an siya nianang madanihong kusog sa pagkabatan-on.
Mahitungod sa mga babaye ang Bibliya nagaingon: “Ang katahom mahimong malimbongon, ug ang kaanyag mahimong kakawangan; apan ang babaye nga nahadlok kang Jehova mao ang usang nakabaton ug pagdayeg sa iyang kaugalingon.” (Proverbio 31:30) Ang maanyag, matahom nga batan-ong babaye kahimut-anan nga kauban. Apan unsa man kon may kasalingkapaw ug mahakogong kagarbosa nga nagapahipi luyo sa lawasnong katahom? Nan ang katahom maoy kutob ra sa panit, ug kini nagatago sa sulodnong kangil-aran. Kon mahanaw ang kaanyag, unsay mahibilin? Pagkalabi pang maayo kon ang maayong hitsura tugbangan sa dili-molubad sulod nga katahom, nga gipasukad sa ‘pagkahadlok kang Jehova’!
Kausaban sa Pagkatawo
Posible ba ang pag-ugmad niining sulod nga katahom? Oo. Sa pagkatinuod, alang sa mga Kristohanon, kini usa ka kinahanglanon. Ang Diyos nagapabili sa matuod nga katahom. “Iyang gihimo ang tanan nga matahom sa iyang panahon.” (Ecclesiastes 3:11, Revised Standard Version) Dili niya dawaton ang pagsimba niadtong kansang kagawian nagapadayag ug dili-nindot sulod nga mga hiyas.
Ang mga pulong ni apostol Pablo ngadto sa mga taga-Colosas nagapasabot sa panginahanglan nga ugmaron ang sulod nga katahom. Nahauna, siya nagatambag: “Ipahilayo kanang tanan gikan kaninyo, ang kapungot, kasuko, pagkadaotan, mapasipalahong sinultihan, ug mahilas nga sinultihan gikan sa inyong baba. Ayaw kamo pagbakak sa usag usa. Hukasa ninyo ang daang pagkatawo uban ang mga batasan niini.” Oo, si bisan kinsa nga nagabatasan nianang mangil-ad nga mga butang dulumtanan sa Diyos—ug sa mga tawong matarong ug hunahuna. Unya, si Pablo nagpadayon: “Sul-obi ninyo ang inyong kaugalingon sa bag-ong pagkatawo, nga pinaagi sa tukmang kahibalo ginabag-o sumala sa dagway sa Usa nga naglalang niini.” (Colosas 3:8-10) Kinahanglang atong ‘isul-ob’ ang paagi sa panghunahuna ug pagbati nga nahiuyon sa kabubut-on sa Diyos. Unsay nagatimaan niining “bag-ong pagkatawo”?
Kristohanong mga Hiyas
Ang Bibliya nagatalag daghang nindot nga mga hiyas nga molangkob niana. Apan ang pasikaranan niining sulod nga katahom gibatbat sa mga pulong ni Jesus: “‘Higugmaa si Jehova nga imong Diyos uban sa bug-os mong kasingkasing ug sa bug-os mong kalag ug sa bug-os mong hunahuna.’ Kini ang kinadak-an ug ang unang sugo. Ang ikaduha, sama niini, mao kini, ‘Higugmaa ang imong silingan sama sa imong kaugalingon.’” (Mateo 22:37-39) Ang paghigugma sa Diyos motultol sa atong pagtinguha nga mahimong ang matang sa tawo nga makapahimuot kaniya. Ang maong gugma magtukmod kanato sa pagsulti mahitungod kaniya ngadto sa uban, nga tabangan sila, sa baylo, nga makaila sa ilang Maglalalang.—Isaias 52:7.
Ang pila ka ubang hiyas nga kinahanglanon aron molangkob sa bag-ong pagkatawo mao ang gibatbat ni apostol Pablo: “Gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon. Batok nianang mga butanga walay kasugoan.”—Galacia 5:22, 23.
Dugang pa, ang Bibliya nagaingong tino ngadto sa mga bana: “Ang usa ka bana mao ang ulo sa iyang asawa maingon nga si Kristo mao usab ang ulo sa kongregasyon . . . Mga bana, magpadayon kamo sa paghigugma sa inyong mga asawa, maingon nga si Kristo nahigugma usab sa kongregasyon ug nagtugyan sa iyang kaugalingon alang niana.” (Efeso 5:23, 25) Ug sa mga asawa, ang Bibliya nagaingon: “Ang mga asawa magpasakop sa ilang mga bana ingon nga ngadto sa Ginoo . . . Ang asawa magbaton ug halalom nga pagtahod sa iyang bana.” (Efeso 5:22, 33) Pagkamadanihon ang pamilyahanong kinabuhi kon tumanon sa bana ang iyang mga responsabilidad sa mahigugmaon, dili-hakog, ug mapailobong paagi! Ug pagkalabi pang sayon nga tumanon sa lalaki ang iyang tukmang papel kon ang asawa magpadayag sa iyang sulod nga katahom pinaagi sa mahigugmaong pagpaluyo kaniya ug dili magmaindigon o sobra ka hinawayon. Ang pamilyahanong kinabuhi ubos sa maong mga kahimtang tinuod nga makapahimuot.
Ang mga panig-ingnan nga gisitar sa nag-unang artikulo nagpakita sa pipila sa maong mga hiyas nga naglihok. Ang Sulamitang dalaga nagpasundayag sa pagkadili-mabalhinon ug halalom nga gugma alang sa iyang magbalantay nga hinigugma sa midumili siya sa pagbiya kaniya ilis sa kasilaw sa korte ni Solomon. Gipakita ni Jose ang kinaiyanhong pagkamaayo sa dihang midumili siya sa pagpakasala batok sa iyang agalon, si Potipar. Gipasundayag usab niya ang pagpugong-sa-kaugalingon sa dihang siya mikalagiw inay nga magpatental sa asawa ni Potipar. Ug siya nagpakitag maayong panig-ingnan sa kalumo, pakigdait, ug hataas-nga-pailob sa dihang wala siya mayugot tungod sa daghang lisod nga mga hitabo sa iyang kinabuhi.
Katahom sa Mangil-ad nga Kalibotan
Ang maong maanindot nga mga hiyas praktikal ba karong adlawa? Daghan ang nagahunahuna nga dili. Hinunoa, mosanong sila sa magpauswag-sa-kaugalingon, mapahimuslon nga kalibotan nga ilang ginapuy-an pinaagi sa pag-ugmad sa kabangis. Gibati nilang aron mabuhi kinahanglang sila magmapintason, ambisyoso, nga kanunay mahimong numero uno ug magpahimulos sa tanang ilang makuha.
Sa kasukwahi, ang Bibliya nagadasig: ‘Ayaw pagbuhat sa bisan unsa tungod sa pagkamabingkilon o pagkagarboso sa kaugalingon, kondili uban sa pagpaubos sa hunahuna isipa ang uban nga labaw kaninyo, nga magabantay, dili sa kaugalingon lamang nga kaayohan, kondili sa kaayohan usab sa uban.’ (Filipos 2:3, 4) Maoy tungod kay ang katawhan sa katibuk-an wala magsunod niining maayong tambag nga ang tawhanong katilingban nagakadaotan kaayo.
Dugang pa, sa kalibotan karon, ang kalamposan sa tawo sukdon pinaagi sa kuwarta o katungdanan. Ang usa ka datong tawo isipong malamposong tawo. Bisan pa niana, kon bahin sa matuod nga mga butang bililhon, bug-os dili hinungdanon kon kaha ang usa dato o kabos. Sa pagkatinuod, ang bahandi may mga kapeligrohan. Ang Bibliya nagapasidaan: “Kadtong matinguhaon nga madato mahulog sa pagpanulay ug sa lit-ag ug sa daghang binuang ug makadaot nga mga pangibog.” Kini nagadugang: “Ang gugma sa salapi mao ang gamot sa tanang matang sa makadaot nga mga butang.”—1 Timoteo 6:9, 10.
Hinuon, ang mga tawo nga hakog, mapahimuslon, materyalistiko, ug mapintason kadaghanan nagatagamtam ug temporaryong “kalamposan” karong adlawa. Apan kana dili matuod nga kalamposan, sanglit ang bili sa maong mangil-ad nga paagi sa kinabuhi—personal nga pagkadili popular, bungkag nga mga kaminyoon, dili-maayong panglawas, ug malangkobong pagbati sa kapakyasan—mahal kaayo. Ang tawo gibuhat sa dagway sa Diyos, apan kon morebelde siyang mabangison kaayo batok sa mga hiyas nga sa sinugdan gibutang sa Diyos diha kaniya, dili gayod niya makab-ot ang personal nga kalipay.—Genesis 1:27.
Pag-ugmad ug Sulod nga Katahom
Nan, sa unsang paagi masuklan nato ang daotang impluwensiya niining kalibotana ug maugmad ang hamili, diyosnong mga hiyas? Sa gilista ni Pablo ang mga hiyas nga ‘gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, ug pagpugong-sa-kaugalingon,’ gitawag niya silang “ang mga bunga sa espiritu.” (Galacia 5:22, 23) Busa ang espiritu sa Diyos kinahanglanon aron atong maugmad kining matahom sulod nga mga hiyas.
Sa unsang paagi? Aw, ang pagtuon sa Bibliya, nga gidasig pinaagi sa espiritu sa Diyos, motabang nato sa pag-ila niining mga hiyasa ug maglig-on sa atong tinguha sa pag-ugmad kanila. (2 Timoteo 3:16) Ang mga Saksi ni Jehova kanunay malipay sa pagtabang sa maong proyekto, sanglit giisip nilang bahin sa ilang ministeryo ang pagtabang sa mga tawo sa pagtuon sa Bibliya. Ang matinud-anong pagsusi sa kaugalingon makapaarang nato sa pagtan-aw kon diin kita kulangan, ug kita makaampo alang sa tabang sa espiritu sa Diyos niining mga bahina. Ang pagpakig-uban sa isigkamagsisimba sa Diyos mohatag sa pagpaluyo sa atong mga isigkaingon nga atong gikinahanglan, ug dinhi, usab, ang espiritu sa Diyos motabang tungod kay, sumala sa giingon ni Jesus, “diin adunay duha o tulo nga nagkatigom sa akong ngalan, ako anaa sa ilang taliwala.”—Mateo 18:20.
Usa ka Matahom nga Kalibotan sa Unahan
Kinaiyanhon, walay mausa kanato ang bug-os makabuntog sa atong mga pagkadili-hingpit, apan kon kita maningkamot sa pag-ugmad niining sulod nga katahom, panalanginan sa Diyos ang atong paningkamot. Ug kita iyang gantihan sa kahibulongang paagi. Ang Bibliya nagatala alang kanato sa katuyoan sa Diyos nga ipasulod sa dili na madugay ang usa ka bag-ong sistema sa mga butang nga bug-os lahi sa karon. Niana, “ang mga matarong magapanunod sa yuta, ug sila magapuyo niana sa walay kataposan.” (Salmo 37:29) Si Jesus mismo miingon: “Malipayon ang mga malumo, sanglit sila magapanunod sa yuta.”—Mateo 5:5.
Sa maong panahon, ang mangil-ad nga pagkamaindigon ug kahakog niining sistema sa mga butang pagapulihan sa nindot nga kalinong ug kamalinawon. “Sila dili magabuhat sa bisan unsang kadaot o magahimog pagpanglaglag sa tibuok kong bukid nga balaan; tungod kay ang yuta mapuno sa kahibalo ni Jehova sama sa mga tubig nga nagatabon sa dagat mismo.” (Isaias 11:9) Sa pagkatinuod, ang Diyos “magapahid sa tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa. Ang unang mga butang miagi na.”—Pinadayag 21:4.
Ang mao bang mga kahimtang makadaning pamation? Kana posible lamang kay ang mga molupyo unya sa yuta makabatog sulod nga katahom nga ipasukad sa gugma sa Diyos ug sa silingan. Ug ang Diyos nagsaad nga kadtong nagaalagad kaniya karon, nga nagaugmad sa “bag-ong pagkatawo” ug nagapaningkamot kaayo sa pagsunod sa iyang mga sukdanan, makakita sa pagkatuman sa maong saad. Ang maayong hitsura, lawasnong katahom, dili gayod makapatungha nianang mga panalangina. Nan, pagkamaayong katarongan nga ugmaron ang maong mas tugob, mas malungtarong sulod nga katahom nga makapahimuot kaayo sa mga tawong matarong ug hunahuna ug sa Diyos mismo!
[Hulagway sa panid 6]
Ang mga tawong matahom sa lawasnon angay molikay nga magmahakogon ug mamaneobrahon. Hinunoa, angay nilang ugmaron ang sulod nga katahom nga makapahimuot sa Diyos