Pagpamati Kang Jehova Samtang Nagakaduol na ang Kataposan
“Malipayon ang tawo nga mamati kanako . . . Kay ang makakaplag kanako makakaplag gayod ug kinabuhi.”—PROVERBIO 8:34, 35.
BISAN pa sa pagkawalay kalinaw sa tibuok kasaysayan, ilabina niining ika-20ng siglo, ang uban moingon nga ang mga nasod nagahimog mga tikang sa pagsulbad sa ilang mga suliran. Ilang ipunting ang mga lider sa kalibotan nga naghimog dagkong mga tigom aron sa paghisgot mahitungod sa kalinaw ug magpirmahayg nagkalainlaing mga kasabotan. Gani, ang Hiniusang Kanasoran mideklarar sa miaging tuig nga mao ang “Internasyonal nga Tuig sa Kalinaw”! Gilaoman nga kini makakita sa sinugdanan sa dugang panlimbasog sa mga nasod sa pagpalambo sa kalinaw, nga posibleng molampos sa umaabot nga katuigan.
1, 2. (a) Bisan pa sa pagkawalay kalinaw sa bug-os nga kasaysayan sa tawo, unsay giingon karon sa uban? (b) Nganong imposibleng makab-ot ang tinuod nga kalinaw pinaagi sa tawhanong panlimbasog?
2 Apan, sa tibuok tawhanong kasaysayan, ang sama bang mga paningkamot nakapatunghag dumalayong kalinaw? Kon posible kana pinaagig tawhanong panlimbasog, dugay na unta nga may kalinaw—dugay na unta sa wala pa makabaton ang yuta ug hapit lima ka bilyong katawhan nga nabahin ngadto sa kapin sa 160 ka kanasoran, uban sa dili-maisip nagkalainlaing politikanhon, ekonomikanhon, ug relihiyosong mga pilosopiya. Apan wala gayoy kalinaw, ni may motunghang kalinaw gikan sa mga panlimbasog sa mga lider sa kalibotan. Ngano? Sa usa ka katarongan, tungod kay ang suliran sa katawhan karon seryoso na kaayo nga kini dili na masulbad sa tawhanong paagi lamang. Husto ang giingon sa Jeremias 10:23: “Dili iya sa tawo nga nagalakaw ang pagtultol sa iyang lakang.”
Kon Nganong Dili Molampos ang Panlimbasog sa mga Tawo
3 Adunay laing katarongan ngano nga ang mga panlimbasog sa mga tawo ug mga nasod dili gayod makapatunghag tinuod nga kalinaw. Gipunting kini sa Bibliya diha sa 1 Juan 5:19, nga nagaingon: “Ang tibuok kalibotan anaa sa gahom sa usa nga daotan.” Gipakita sa Pinadayag 12:9 nga kanang “usa nga daotan” mao “ang usa nga gitawag nga Yawa ug Satanas, nga nagpasalaag sa tibuok pinuy-anang yuta.” Ang Ikaduhang Corinto 4:4 nagtawag kaniyang “ang diyos niining sistema sa mga butang.” Busa, ang bug-os presenteng sistema sa mga butang sa politikanhon, ekonomikanhon, ug relihiyosong pagmando nga nakapatunghag daghan kaayong kabangisan maoy bunga sa pagmando ni Satanas, dili pagmando sa Diyos. Maoy hinungdan, sa naghisgot sa kaalam nga gikan sa Diyos, ang 1 Corinto 2:8 nag-ingon: “Walay bisan usa sa mga punoan niining sistemaha sa mga butang nga nakahibalo sa maong kaalam.”—Lucas 4:5, 6.
4. Unsay miresulta dihang mihunong ang atong unang ginikanan sa pagpamati kang Jehova?
4 Dihang mialsa si Satanas batok sa Diyos, iyang gitintal ang atong unang mga ginikanan sa pagpamati kaniya inay sa pagpamati sa Diyos. Ingong resulta, sila mitipas gikan sa pagkamasugtanon ngadto sa Diyos ug nakahatag sa tawhanong panimalay ug 6,000 ka tuig sa kasakit, sama sa tin-awng gipadayag kanato sa Bibliya nga gitintal ni Satanas ang mga tawo sa pagtuo nga makahimo silag labing maayo kon dili sila mamati sa ilang Maglalalang. (Genesis 3:1-5) Tungod sa iyang kaalam, gitugotan ni Jehova ang kalibotan sa katawhan sa pagbuot sa kaugalingon, nga walay iyang pagtultol, hangtod niining mga panahona. Ug tinuod man, sa tibuok nga kasiglohan, igo nang napamatud-an nga ang tawhanong pagmando usa gayod ka kapakyasan.—Deuteronomio 32:5; Ecclesiastes 8:9.
5. Bisag makab-ot pa ang kalinaw pinaagi sa mga panlimbasog sa tawo, unsay magpabilin gihapon kanato?
5 Gawas pa niana, dihang mihunong sa pagpamati si Adan ug Eva kang Jehova, ang Tuboran sa hingpit nga kinabuhi, sila nahimong dili-hingpit ug sa ulahi namatay. Busa, ang tanan nilang kaliwatan, natawong dili-hingpit. Ang sakit, pagkatigulang, ug kamatayon nahimong dulnganan sa katawhan. (Roma 5:12) Busa, bisan pa kon ang mga tawo molampos sa pagpatunghag kalinaw, dili gihapon nila masulbad ang napanunod nga pagkadili-hingpit. Magkasakit gihapon kita, matigulang, ug mamatay. Ug kay si Satanas man ang nakaingon niini, si Jesus miingon bahin kaniya: “Siya mamumuno sukad pa sa sinugdan, ug siya wala magpabilin diha sa kamatuoran.” (Juan 8:44) Sa pagkamatuod, kon palandongon mo ang binilyon nga natawo ug nangamatay sa nangagi, daw si Satanas ang nagpatay kanilang tanan.
6. Kinsa ang magbubungkag sa kalinaw, ug unsay mahitabo kanila?
6 Gitintal usab ni Satanas ang ubang espiritu nga mga linalang sa pagduyog sa iyang pag-alsa, ug kining tanang mga daotan midumili sa pagpamati dihang misulti si Jehova. Busa si Satanas, ug ang iyang mga demonyo, ug ang rebelyosong mga tawo ang nakaagak niining kalibotana sa iyang presenteng kahimtang. Kinahanglang wagtangon gayod sila, nga motapos niining malaglagong 6,000 ka tuig nga eksperimento sa pagkinaugalingon nga bulag sa Diyos. “Ang Diyos nga nagahatag ug kalinaw,” nagpasalig ang Roma 16:20, “magadugmok kang Satanas . . . sa dili madugay,” lakip sa iyang mga demonyo ug sa tanang mga tawo nga dili mamati sa dihang misulti ang Diyos.—Mateo 25:41.
Dakong Panginahanglan sa Pagpamati Karon
7. Nganong pakusgan pa nato ang atong mga panlimbasog sa pag-alagad kang Jehova karon?
7 Kita ania na sa kinatumyang bahin niining “kataposang mga adlaw.” (2 Timoteo 3:1-5) Ingong resulta, adunay labi pa ka dakong panginahanglan sa pagpamati sa gisulti ni Jehova kanato. Adunay samang panginahanglan sa pagpakusog sa atong pagkamainandamon sa pagsakripisyo sa pag-alagad kaniya. Nganong pakusgan man ang atong panlimbasog? Tungod kay nahibalo si Satanas nga “hamubong panahon” na lamang ang nahibilin kaniya. (Pinadayag 12:12) Busa pakusgan ba gayod niya ang iyang paningkamot sa pagdaot ug sa paglaglag.
8. (a) Nganong dili mapahunong ang buluhatong pagsangsaw sa iyang mga kaaway? (b) Unsay atong buhaton aron padayon kitang tabangan sa Diyos?
8 Dako gayod ang tinguha ni Satanas nga pahunongon ang mga Saksi ni Jehova sa pagsangyaw sa maayong balita sa Gingharian. Apan siya dili makapahunong, kay si Jehova nagsaad kanila: “Walay hinagiban nga gibuhat batok kanimo nga magmalamposon.” (Isaias 54:17) Kadtong mosupak sa iyang mga alagad “makaplagan nga nakig-away batok sa Diyos.” (Buhat 5:38, 39) Busa, pinaagi sa gamhanang tabang sa espiritu ni Jehova, ni Jesu-Kristo, ug sa panon sa mga manulonda, ang buluhaton sa pagmantala sa Gingharian nagakakusog tuig-tuig. Aron padayon kitang tabangan sa Diyos, ang mga alagad ni Jehova mainampingon sa pagsunod sa tambag diha sa Santiago 4:7, 8: “Busa, magpasakop kamo sa Diyos; apan sukli ang Yawa, ug siya mokalagiw gikan kaninyo. Paduol sa Diyos, ug siya magapaduol kaninyo.”
9. Nganong dili nato pakamenoson si Satanas?
9 Ayaw pakamenosa ang katakos ni Satanas sa paglimbong ug pagdaot. Ang Pulong sa Diyos nagapasidaan: “Magmalinawon sa hunahuna, magtukaw kamo. Ang inyong kaaway, ang Yawa, nagalibotlibot samag nagangulob nga leon, nga nangitag iyang matukob. Apan bumarog nga malig-on batok kaniya, malig-on sa pagtuo.” (1 Pedro 5:8, 9) Kon nasayod ka nga nakabuhi ang mabangis nga leon sa inyong kasilinganan, mangandam ka gayod sa pagpanalipod sa kaugalingon ug sa imong pamilya. Apan bahin kang Satanas, labi pa gayod kitang magbantay, kay siya makahimo man ug kadaot nga dayon kanato. Makapasubo, ang kadaghanan sa mga tawo walay panagang tungod kay wala man sila mahibalo nga naglungtad si Satanas. Ngano? Tungod kay mipili sila sa dili pagpamati sa Pulong ni Jehova. Ug unsay moresulta nianang dili maayong pagpili? “Bisan unsay igapugas sa tawo, mao usab kana ang iyang pagaanihon.”—Galacia 6:7.
Dihang Mosinggit Silag “Kalinaw ug Kasegurohan!”
10, 11. (a) Unsay atong ibutang sa hunahuna mahitungod sa bisan unsang kalamposan nga makab-ot sa mga nasod sa pagpatunghag kalinaw? (b) Unsang tagna sa Bibliya ang nalangkit bahin sa pagpangitag kalinaw sa mga nasod sa atong panahon? (c) Unsa ka malungtaron kining kalinawa?
10 Ayaw tugoting maabtan kamo nga dili makabantay sa bisan unsang kalamposan nga makab-ot sa kanasoran sa pagpatunghag kalinaw. Ibutang kanunay sa hunahuna nga si Jehova dili mogamit ug bisan unsang mga ahensiya niining kalibotana alang nianang tumonga. Si Jehova adunay kaugalingong paagi sa pagpatunghag matuod nga kalinaw, ug kana pinaagi lamang sa iyang Gingharian ilalom ni Kristo. Busa bisan unsa pay kalamposan nga makab-ot sa kanasoran sa pagtukod ug kalinaw, makadiyut lamang kini ug sa atubangan lamang. Sa tinuod wala gayoy kausabang nahimo. Ang krimen, kabangisan, gubat, gutom, kakabus, pagkabungkag sa pamilya, imoralidad, sakit, kamatayon, ug si Satanas ug ang iyang mga demonyo ania gihapon sa atong taliwala hangtod nga paphaon silang tanan ni Jehova. “Gawas nga si Jehova mismo ang magatukod sa balay, walay kapuslanan ang paghago sa mga magtutukod niana.”—Salmo 127:1.
11 Hinunoa gipakita sa tagna sa Bibliya nga ang mga nasod magtinabangay sa pagptunghag kalinaw sa atong panahon. Kini nag-ingon: “Kamo nahibalo gayod nga ang adlaw ni Jehova moabot sama sa kawatan sa kagabhion. Sa dihang sila moingon: ‘Kalinaw ug kasegurohan!’ dayon ang kalit nga kalaglagan modangat kanila sama gayod sa kasakit sa babayeng manganak; ug sila dili makaikyas.” (1 Tesalonica 5:2, 3) Kanang pagsinggit ug “Kalinaw ug kasegurohan!” dili magkahulogan nga ang kadunot niining kalibotana nabali. Ang 2 Timoteo 3:13 nag-ingon nga ang “mga daotan ug mga tigpahisalaag mosamot sa pagkadaotan.” Ang kamatuoran mao ang giingon sa presidente sa usa ka organisasyon nga nagatuon sa palibot: “Ang kinadak-ang problema nga giatubang sa katilingban mao ang pagkadili na mamandoan niini.”
12. Unsay nahibaloan sa mga alagad ni Jehova mahitungod sa tinuod nga kahulogan sa umaabot nga pagsinggit ug ‘kalinaw ug kasegurohan’?
12 Daghan sa kalibotan malimbongan sa walay kapuslanang mga paglaom sa umaabot nga pagsinggit sa “Kalinaw ug kasegurohan!” Apan dili ang mga alagad ni Jehova, tungod kay sila nagapamati sa dihang mosulti ang Diyos. Busa sila nahibalo gikan sa iyang Pulong nga ang maong deklarasyon dili mohatag ug tinuod nga kalinaw ug kasegurohan. Hinunoa, ang kamatuoran mao nga kini maoy kataposang ilhanan nga ang “kalit nga kalaglagan moabot diha kanila.” Kini maoy ilhanan nga hapit nang magsugod ang “dakong kasakitan” nga gitagna ni Jesus sa atong panahon. Siya midugang: “Kay unya moabot ang dakong kasakitan nga ang ingon wala pa mahitabo sukad sa sinugdanan sa kalibotan hangtod karon, ug dili, dili na gayod kini mahitabo pa.”—Mateo 24:21.
13. Sa unsang paagi gibatbat sa Bibliya ang kataposan sa tawhanong mga pagmando?
13 Sa panahon sa “dakong kasakitan,” ang tanang tawhanong pagmando matapos na. Ang Salmo 2:2-6 nagaingon: “Ang mga hari sa yuta nanagpahimutang sa ilang kaugalingon ug ang mga punoan nanagsabotsabot sa tingob batok kang Jehova ug batok sa iyang dinihogan, nga nagaingon: ‘Bugtoon ta ang ilang mga talika ug isalibay nato ang ilang mga igtatakos!’ Ang Usa nga nagalingkod sa kalangitan magakatawa; si Jehova magahimo kanila nga yubitonon. Ug sa maong panahon mosulti kanila diha sa iyang kasuko ug sa iyang kaligotgot siya magagubot kanila, nga nagaingon: ‘Ako, bisan ako, nagbutang sa akong hari ibabaw sa [langitnong] Sion, ang akong bukid nga balaan.’” Ang Salmo 110:5, 6 midugang: “Si Jehova mismo . . . magadugmok gayod sa mga hari sa adlaw sa iyang kasuko. Siya magahukom taliwala sa mga nasod.” Ang tanang politikanhong mga plano matapos, kay ang Isaias 8:9, 10 mipahayag: “Pangandam kamo, ug magkatibulaag! Pangandam kamo, ug magkatibulaag! Pagsabotsabot kamo, ug kini mahimong walay kapuslanan! Sulti bisag unsa, apan kini dili magpulos, kay ania ang Diyos nagauban kanato!”
Masaligon sa Kaluwasan
14. Nganong masaligon kita nga adunay maluwas sa kataposan niining kalibotana?
14 Kita masaligon nga si Jehova padayong magapahibalo sa iyang katawhan aron sila makahimog hustong mga tikang aron maluwas sa umaabot nga “dakong kasakitan.” Sa unsang paagi atong matino kini? Tungod kay ang tagna diha sa Pinadayag 7:9, 14 nagpakita nga usa ka “dakong panon” gayod ang maluwas. Ngano? Tungod sa pagpamati dihang misulti si Jehova ug hustong pagkatudlo. Niining paagiha ang “dakong panon” nakahimo sa pagbuhat sa gipamulong sa Pinadayag 7:15: “Sila naghatag kaniya ug balaang pag-alagad sa adlaw ug sa gabii.” Busa ilang gibuhat ang kabubut-on sa Diyos, nakadawat sa iyang pag-uyon, ug may panalipod aron maluwas sa kataposan niining kalibotana.—1 Juan 2:15-17.
15. Sa unsang paagi gibatbat sa Joel ang pagdugmok niining sistemaha ug unsay dangatan sa mga alagad sa Diyos?
15 Ang Joel 3:13-16 nagpunting usab sa kaluwasan sa mga alagad sa Diyos sa dihang dugmokon kining sistemaha samag paras sa pug-anan sa bino. Kini nagaingon: “Isakob ninyo ang galab, kay ang alanihon hinog na. . . . Nagaawas na ang mga kawa; kay dako kaayo ang ilang pagkadaotan. Mga panon sa katawhan, mga panon sa katawhan atua sa walog sa pagpakanaog sa paghukom. Mingitngit ang adlaw ug ang bulan, ug ang mga bitoon napadngan sa ilang kahayag. Ug gikan sa [langitnong] Sion si Jehova modahunog sa iyang tingog . . . Ang langit ug ang yuta mauyog; apan si Jehova mahimong dalangpanan sa iyang katawhan.”
16. Unsa pang mga tagnaa ang nagpakita nga luwason ni Jehova ang iyang katawhan latas sa kalaglagan sa kalibotan?
16 Sa susama, diha sa Isaias 26:20, 21 si Jehova nag-ingon bahin nianang umaabot nga panahon: “Lakaw, akong katawhan, sumulod ka sa imong mga lawak, ug siradohi ang imong mga pultahan. Tagoi ang imong kaugalingon sa diyutayng panahon hangtod nga ang kasuko moagi. Kay, tan-awa! si Jehova moanhi gikan sa iyang dapit aron sa pagsilot sa molupyo sa yuta tungod sa ilang kasal-anan kaniya.” Busa, ang Sofonias 2:2, 3 nag-awhag: “Sa dili pa moabot diha kaninyo ang adlaw sa kasuko ni Jehova, pangitaa si Jehova, kamong tanang maaghop sa yuta, nga nanagtuman sa Iyang tulomanon. Pangitaa ang pagkamatarong, pangitaa ang pagkamaaghop. Kay tingali pagatagoan kamo sa adlaw sa kasuko ni Jehova.”
‘Pagdalagan’ Ngadto Kang Jehova
17. (a) Unsay kinahanglang buhaton aron makabaton sa panalipod ni Jehova? (b) Unsa ang sayop nga nahimo sa mga tawo sa wala pa ang Lunop?
17 Ang Proverbio 18:10 nagaingon: “Ang ngalan ni Jehova maoy usa ka malig-ong torre. Ang matarong modalagan nganha niana ug may kaluwasan.” Ikaw ba ‘nagadalagan’ kang Jehova? Hinumdomi ang gisulti ni Jehova bahin sa mga tawo sa mga adlaw ni Noe. Sila “nanagpangaon ug nanag-inom, ang mga lalaki nangasawa ug ang mga babaye nanagpamana, hangtod sa adlaw nga si Noe misulod sa arka; ug sila wala manumbaling hangtod miabot ang baha ug gibanlas silang tanan.” (Mateo 24:38, 39) Ang sayop mao nga sila okupado kaayo sa ubang butang gawas sa pagpamati sa Diyos dihang namulong siya pinaagi sa iyang alagad nga si Noe, nga “usa ka magwawali sa pagkamatarong.” (2 Pedro 2:5) Tungod kay wala man sila namati, sa dihang miabot ang Baha “gibanlas silang tanan” ngadto sa kalaglagan.
18. Nganong ang ilang pagkahimong “maayong” tawo wala makaluwas niadtong nalaglag sa Lunop?
18 Daghan niadtong nalaglag sa Baha sa walay duhaduha naglantaw sa ilang kaugalingon nga “maayong” mga tawo, nga wala malangkit sa kabangis sa katilingban niadtong mga adlawa. Apan ang ilang pagkahimong “maayo” wala makaluwas kanila. Pinaagi sa ilang pagkawalay-pagtagad ilang giuyonan ang pagkadaotan sa ilang adlaw. Ang dakong sayop mao nga sila wala ‘midalagan’ ngadto kang Jehova; sila wala namati dihang misulti ang alagad sa Diyos. Busa sila wala makahimog hustong mga tikang alang sa kaluwasan. Sa laing bahin, kadtong namati naluwas.
19. Unsang katingalahang mga kaayohan ang ginaani sa mga alagad ni Jehova karon, ug ngano?
19 Karon ang Diyos nagasultig kalinaw niadtong nagapamati kaniya. Ug unsay resulta niini alang kanila? Ang Isaias 54:13 nagaingon: “Ang tanan nimong mga anak pagatudloan ni Jehova, ug dako ang pakigdait sa imong mga anak.” (Salmo 29:11) Busa, sa tunga niining mabangis nga kalibotan, ang mga Saksi ni Jehova adunay matuod, dili-mabungkag nga kalinaw sa ilang taliwala. Sila adunay mahigugmaon internasyonal nga panag-igsoonay nga dili masuhid sa mga lider sa kalibotan, sa ilang mga nasod, ug sa ilang relihiyon. Ngano? Tungod kay sila dili gayod mamati sa dihang mosulti ang Diyos. Busa sila dili molihok sumala sa iyang isulti. Apan namati ang mga Saksi ni Jehova. Seryoso nilang gisunod ang mga pulong sa Ecclesiastes 12:13: “Kahadloki ang matuod nga Diyos ug bantayi ang iyang mga sugo. Kay kini mao ang tibuok nga katungdanan sa tawo.”
20. Unsa ang kinahanglang buhaton sa tanang tawo aron maluwas ngadto sa bag-ong kalibotan sa Diyos?
20 Kinahanglang mao kanay himoon sa tanang tawo—oo, sa tanang nagatinguhang mabuhi sa bag-ong kalibotan sa Diyos. Sila kinahanglang ‘modalagan’ ngadto kang Jehova sa walay langan. Sa pagkamatuod, sila kinahanglang maagak sa hinatag sa Diyos nga kaalam nga gihawasan nga nagaingon: “Pamati kanako; oo, malipayon silang nagabantay sa akong mga dalan. Pamatia ang pahamatngon ug magmaalamon, ug ayaw kini pag-isalikway. Malipayon ang tawo nga mamati kanako . . . Kay ang makakaplag kanako makakaplag gayod ug kinabuhi.”—Proverbio 8:32-35.
Unsaon Nimo sa Pagtubag?
◻ Nganong dili gayod molampos ang tawhanong mga panlimbasog sa pagpatunghag kalinaw?
◻ Nganong may dakong panginahanglan karon sa pagpamati kang Jehova?
◻ Unsa gayoy kahulogan sa umaabot nga pagsinggit ug “Kalinaw ug kasegurohan!”?
◻ Unsay atong buhaton kon kita gustong maluwas ngadto sa bag-ong sistema sa Diyos?
3. Unsa ang ubang katarongan nganong ang mga tawo ug mga nasod dili gayod makapatunghag tinuod nga kalinaw?
[Hulagway sa panid 17]
Sama sa leon nga nagangulob, gipakusgan ni Satanas ang iyang mga panlimbasog sa pagdaot ug sa paglaglag
[Hulagway sa panid 18]
Dihang dugmokon kining sistemaha samag mga paras diha sa pug-anan, “si Jehova mahimong dalangpanan sa iyang katawhan”