Imong Paglaom—Diyos o Bahandi?
“Sa daghang katuigan nagkinabuhi siya sa kahadlok diha sa iyang matahom nga balay nga kinuralan ug gisirhan sa duha ka puthawng mga ganghaan.”
MAO kana ang paghulagway sa taho sa balita sa usa ka datong biyuda nga namatay sa kamot sa mga kawatan nga nangawat sa iyang mga alahas ug $1 ka milyon sa iyang balay. Sa nakit-an ang iyang patayng lawas, gigamit sa kapolisan ang kariton sa groseriya aron sa paghakot sa laing $5 ka milyong kuwarta gikan sa iyang balay. Nakita usab sa kapolisan ang libolibong “mga gasa sa komplianyo” nga may mga kard nga may sulat “Alang Kang Jesu-Kristo” ug “Alang sa Diyos.”
Daw walay higala kining eredera, ug nagkinabuhi siya sa kahadlok. Pangutan-a ang imong kaugalingon, Unsa gayod ka bililhon ang iyang milyonmilyon nga iyang gipabilhan ug dako? Dugang pa, Unsa siya ka adunahan sa atubangan sa Diyos? Hayan nahibalo ka nga dili madani ang Diyos sa “mga gasa sa komplianyo,” ni ang pakigdait uban sa Diyos moresulta tungod sa pagbaton ug mga bahandi. Kana makita sa tambag sa Bibliya sa ‘pagbutang sa atong paglaom, dili sa walay kasegurohang mga bahandi, kondili sa Diyos, nga nagahatag kanato sa tanang mga butang sa madagayaon gayod aron atong pagakalipayan.”—1 Timoteo 6:17.
Nganong walay kasegurohan ang bahandi? Buweno, tingali nasayod ka kon unsa ka tinuod ang mga pulong ni Jesus: “Hunong na sa pagtigom ug mga bahandi alang kaninyo dinhi sa yuta, diin ang tangkob ug ang mga taya nagakutkot, ug diin ang mga kawatan nagapanakasaka ug nagapangawat.” (Mateo 6:19) Sumala sa imong nahibaloan, may kapeligrohan kanunay nga maugdaw sa kalayo ang balay. Gipatago sa uban ang ilang mga bililhong butang diha sa mga bangko, apan dili ba nakapangawat na usab dinhi ang mga kawatan? Bisan ang bag-ong awto tay-on usab.
Komusta ang ekonomiya sa nasod? Diha sa kadaghanang kayutaan ang implasyon kaamgid sa kawatan; kini makakubos sa katigayonan sa usa ka tawo. “Tapos sa grabeng implasyon nga mihampak sa Alemanya sa sayong katuigan sa 1920, ang mga pumapalit nagkinahanglag mga basket sa kuwarta . . . sa pagpamalit ug mga groseriya . . . Misaka ang mga prisyo sa Alemanya ug kapin sa 1 ka trilyon ka por siento gikan sa Agosto 1922 ngadto sa Nobyembre 1923.” (The World Book Encyclopedia) Pagkamakapaguol ang pagsalig sa salapi!
Si Jesus maalamong nagtambag: “Pagtigom kamo ug bahandi alang kaninyo didto sa langit, diin walay tangkob ni taya ang magakutkot, ug diin walay mga kawatan ang magapanakasaka ug magapangawat.” (Mateo 6:20) Unsa kining “mga bahandia”? Sila maoy atong tagsatagsa ka rekord sa maayong mga binuhatan, ang atong pagkahimong dato diha sa Diyos. ‘Unsa,’ tingali mangutana ka, ‘ang gikinahanglan niini kanako?’ Sa lakbit, ang Bibliya nagtubag nga nagkahulogan kini “sa pagbuhat sa maayo, sa pagkadato sa maayong binuhatan, sa pagkamahinatagon, ug sa pagkamapaambiton.”—1 Timoteo 6:18.
Sa tibuok yuta karon, adunay minilyong mga Saksi ni Jehova nga matinuorong makapamatuod nga ang pagpaambit sa espirituwal ug sa materyal nga mga butang sa uban—ilabina sa pagtabang sa mga tawo sa pagkakat-on bahin sa paglaom sa Gingharian pinaagi sa mga kalihokan sa pagsangyaw, sa pagpanudlo, ug sa paghimog mga tinun-an—maoy maayong mga buhat nga may pag-uyon ni Jehova ug kana mohatag ug tinuod nga katagbawan. Ang kamatayon dili gani makakuha gikan sa tawo sa mga ganti nga ikahatag sa ingon nga pagtumpig mga bahandi sa langit. Ngano man? Si Jesus misaad: “Ako mao ang pagkabanhaw ug ang kinabuhi. Siya nga motuo kanako, bisan siya mamatay, siya mabuhi.”—Juan 11:25.
Bililhong Bahandi nga Atong Matagamtam Karon
Tapos sa pagpahayag nga kinahanglang mosalig kita “sa Diyos,” si Pablo mipadayon nga ang ‘Diyos mao ang mohatag kanato sa tanang butang sa madagayaon aron atong pagakalipayan.’ (1 Timoteo 6:17) Gawas pa sa adlaw-adlawng mga kinahanglanon sa kinabuhi, ang Labing Hataas sa mahigugmaon nagataganag bililhong mga bahandi sa mga tawo nga iyang giuyonan. Unsa kining mga bahandia?
Matikdi kon unsay gipamulong sa Proverbio 3:13-18: “Malipayon ang tawo nga makakaplag sa kaalam, ug ang tawo nga makakab-ot sa pagsabot, kay ang pagpakabaton niini labi pang maayo kay sa pagmanggad sa salapi ug ang kaayohan niini labaw pa kay sa pino nga bulawan. Mas bililhon pa kini kay sa korales, ug walay mausa sa mga butang nga imong ginatinguha nga ikatanding niana. Ang hataas nga mga adlaw anaa sa iyang kamot nga tuo; diha sa iyang kamot nga wala anaa ang bahandi ug kadungganan. . . . Kini maoy kahoy sa kinabuhi kanila nga mokupot niini, ug malipayon ang tagsatagsa nga magahawid niini.” Busa ang “kaalam” maoy bahandi nga molabaw sa bili sa tanang bahandi sa kalibotan.
Ang kaalam mao ang pagpadapat sa kahibalo sa hustong paagi. Kini mao ang katakos sa paggamit sa kahibalo ug pagsabot sa malamposong pagsulbad sa mga problema, sa paglikay o sa pagsanta sa mga kapeligrohan, sa pagkab-ot ug pila ka tumong o sa pagtabang sa uban sa pagbuhat sa ingon. Dili ka ba mouyon nga gikinahanglan nato kining kaalama aron makaatubang nga malamposon sa mga pagsulay sa kinabuhi ug sa paghupot ug maayong baroganan sa Diyos?
Sa pagbatbat sa kaalam, ang Proverbio 3:13-18 nagpasiugda sa kalipay. Dili ba ang kalipay mao ang bahandi nga ginatinguha natong tanan? Ang diyosnong kaalam mohatag kanato niini nga kalipay tungod kay ang tinuod nga kalipay modangat lamang gikan sa Tuboran niini, si Jehova nga Diyos. Napamatud-an sa eksperyensiya nga dili makab-ot ang kalipay nga bulag gikan sa pagsunod sa Labing Hataas ug sa pagsunod sa paglihok sa iyang espiritu. Ang mga kalipay nga gisaad sa Bibliya nagadepende sa atong tukmang relasyon, o inuyonang baroganan, uban sa atong langitnong Amahan. (Mateo 5:3-10) Busa, pinaagi sa pagpadapat sa atong nakat-onan gikan sa pagtuon sa Bibliya, kita makapakita sa “kaalam nga gikan sa kahitas-an” nga mohatag kanato sa kalipay nga dili ikahatag sa tanang bahandi sa kalibotan.
Hinumdomi usab, nga nag-ingon ang Proverbio 3:16: “Ang hataas nga mga adlaw anaa sa iyang kamot nga tuo.” Kini nagpasabot sa tuong kamot sa panalipod, ang kamot nga andam sa pagtabang ug sa pagpanalipod sa tawo diha sa malisod nga mga panahon. Daghan ang nagkinabuhi karon sa haluag nga paagi sa kinabuhi, sa seksuwal nga imoralidad, pag-abuso sa droga, ug uban pa. Tingali nakabasa ka na nga ang AIDS (Acquired Immune Deficiency Syndrome) nalangkit niining mga buhata. Sumala sa imong nakita, ang mga tawo ba nga nagabuhat niadtong mga butanga tinuod nga malipayon? O nakahatag ba kini sila sa ilang kaugalingon ug sa uban ug daghang kaguol ug kasakit, ug kamatayon pa gani?
Sa kasukwahi, ang pagpadapat sa maalamong tambag sa Pulong sa Diyos kanunayng anaa sa atong “kamot nga tuo” sa pagpanalipod kanato gikan niining mga kapeligrohana. Busa, ang kaalam makapataas sa atong kinabuhi, makapanalipod kanato gikan sa usa ka dalan nga motultol ug wala sa panahong kamatayon. Busa, ang diyosnong kaalam piho nga makahimo sa atong presenteng kinabuhi nga mas malipayon.
Lakaw nga Maalamon Karon
Ang pamatuod sa atong palibot nagpakita nga kita nagkinabuhi na sa “kataposang mga adlaw” niining sistema sa mga butang. (2 Timoteo 3:1-5) Busa, hinungdanon nga magbantay kita batok sa pagpadaog sa espiritu sa kalibotan. Kining espirituha nagapasiugda sa materyal nga mga butang pinaagi sa pagdani sa mahakugong mga pangibog. Ang usa ka sumbong nga gipasaka bahin kang Job, usa ka matinumanong tawo sa talaan sa Bibliya, mao nga nag-alagad lang kining tawhana sa Diyos tungod sa hakog nga mga bentaha, alang sa materyal nga ganansiya. (Job 1:9-11) Ang mao bang sumbong mapasaka batok kanato?
Kon motubag kitag dili, tingali malamposong nakasukol kita sa materyalismo karon. Apan kining kapeligrohana, sa materyalismo, mao ang usa sa labing malalangon nga atong maatubang. Si Jesu-Kristo miingon nga “ang kabalaka niining sistema sa mga butang ug ang malimbongong gahom sa bahandi makatuok sa pulong.” (Mateo 13:22) Sa matin-aw, magbantay gayod kita kanunay batok sa “malimbongong gahom sa bahandi,” kay dili kini sila tinuod bililhon.
Kinahanglang atong pahinumdoman ang atong kaugalingon sa relatibong bili sa materyal nga mga butang. Ang Pulong sa Diyos nag-ingon: “Ang bahandi sa adunahan mao ang iyang malig-on nga lungsod, ug kini ingon sa hataas nga kuta sa iyang kaugalingong handurawan.” (Proverbio 18:11) Oo, ang kasegurohan nga ikahatag sa bahandi bug-os nga handurawan lamang, usa ka paglimbong. Dili usab buot ingnon nga daotan ang materyal nga butang. Ang daotan mao ang pagsentro sa atong mga kinabuhi diha kanila imbes sa pagbaton sa pag-uyon sa Diyos. Si Jesus, nga nailhan ingong usa sa labing maalamong magtutudlo sa kasaysayan, prangkang miingon: “Ang kinabuhi sa tawo wala diha sa kadagaya sa mga butang nga iyang nabatonan.”—Lucas 12:15.
Busa atong subayon ang dalan sa kinabuhi nga makahimo kanatong “adunahan atubangan sa Diyos.” (Lucas 12:21) Wala nay laing butang nga bililhon kay sa inuyonang baroganan uban sa Maglalalang. Ang tanang mga paningkamot sa paghupot niana makaamot sa atong ‘pagtigom alang sa atong kaugalingon ug maayong patukoranan alang sa umaabot, aron atong lig-ong mahuptan ang tinuod nga kinabuhi.’—1 Timoteo 6:19.