Nahinumdom Ka Ba?

Gipalandong ba nimog maayo ang dili pa dugayng mga isyu sa Ang Bantayanang Torre? Kon mao, makaplagan nimong makaiikag ang paghinumdom sa mosunod:

◻ Sa unsang paagi ang daghang magtiayon karong adlawa nagsunod sa ekselenteng panig-ingnan nga gipakita ni Aquila ug Priscila?

Si Aquila ug Priscila nakaalagad sa daghang nagkalainlaing kongregasyon. Sama kanila, daghang modernong-adlawng mga Kristohanon nakahimo sa ilang kaugalingon sa pagbalhin diin mas dako ang panginahanglan. Nakasinati usab sila sa kalipay ug katagbawan gumikan sa pagkakita sa pagtubo sa intereses sa Gingharian ug sa pag-ugmad sa bililhong Kristohanong panaghigalaay.​—12/15, panid 24.

◻ Unsay panglantaw sa Bibliya bahin sa alkoholikong mga ilimnon?

Timbang ang panglantaw sa Bibliya sa alkoholikong mga ilimnon. Sa usa ka bahin, ang Bibliya nag-ingon nga ang bino maoy gasa gikan sa Diyos. (Salmo 104:​1, 15) Sa laing bahin, kini nagsaway sa pagkamapatuyangon. (Lucas 21:​34; 1 Timoteo 3:​8; Tito 2:3; 1 Pedro 4:​3)​—12/15, panid 26, 27.

◻ Unsa ang talagsaong bahin sa basahon sa Bibliya nga Haggeo?

Bisag ang basahong Haggeo gilangkoban lamang sa 38 ka bersikulo, ang ngalan sa Diyos gigamit sa 35 ka beses. Ang maong tagna walay lami nga pamation kon ilisan ang ngalang Jehova sa titulong “Ginoo.”​—1/1, panid 6.

◻ Unsang leksiyon ang makat-onan gikan sa kasal-anan ni David ug Manases?

Bisan sa pagpasaylo ni Jehova kang David ug Manases, kining duha ka tawo​—ug ang Israel uban nila​—kinahanglang mag-antos sa mga sangpotanan sa ilang makasasalang mga buhat. (2 Samuel 12:​11, 12; Jeremias 15:​3-5) Sa susamang paagi, bisan pag si Jehova karong adlawa magpasaylo sa mahinulsolong mga makasasala, mahimong adunay mga sangpotanan sa ilang mga buhat nga dili malikayan.​—1/1, panid 27.

◻ Sa unsang paagi ‘ang mga tiil niadtong nagapahayag sa maayong balita’ sa Gingharian sa Diyos “matahom”? (Isaias 52:7)

Ang mga tiil sa naandan maoy magpalakaw sa usa ka tawo sa dihang siya mogawas sa pagsangyaw sa uban. Ang maong mga tiil sa pagkatinuod naghawas sa tawo. Busa alang sa daghan nga nakadungog ug mosanong nga may pag-uyon sa maayong balita sa Gingharian, ang mga tiil sa maong mga mensahero sa pagkatinuod matahom nga talan-awon.​—1/15, panid 13.

◻ Unsang duha ka bahing buluhaton ang nalangkit sa “pagmantala sa maayong balita”? (1 Corinto 9:16)

Una, kinahanglang imantala nato ang maayong balita sa Gingharian. Ang ikaduhang bahin niining buluhatona naglangkit sa pagtudlo niadtong mosanong nga may pag-uyon sa pagmantala sa Gingharian.​—1/15, panid 23.

◻ Unsang personal nga mga kaayohan ang moresulta sa pag-awit sa mga awit sa Gingharian diha sa mga tigom sa kongregasyon?

Ang pag-awit mohatag kanatog higayon nga ipahayag ang atong mga pagbati alang sa atong Maglalalang. (Salmo 149:​1, 3) Sa dihang kita magaawit nga kinasingkasing diha sa kongregasyon, kini magbutang kanato sa hustong kahimtang sa hunahuna ug kasingkasing sa programa nga mosunod. Kini magdasig kanato sa mas dakong pagpakig-ambit sa pagsimba kang Jehova.​—2/1, panid 28.

◻ Kanus-a nga ang adlaw sa kamatayon mas maayo kay sa adlaw sa pagkatawo? (Ecclesiastes 7:1)

Ang adlaw sa kamatayon mas maayo kay sa adlaw sa pagkatawo sa usa kon ang usa sa maong panahon nakahimog maayong ngalan kang Jehova, kinsa makabanhaw sa mga matinumanon nga nangamatay. (Juan 11:25)​—2/15, panid 12.

◻ Nganong ang basahon sa Ecclesiastes makatabang kanato sa personal?

Kini makatabang sa matag usa kanato nga tul-iron ang atong panglantaw sa kinabuhi ug kon unsay hinungdanon kanato. (Ecclesiastes 7:​2; 2 Timoteo 3:​16, 17)​—2/15, panid 16.

◻ Ang mga Saksi ni Jehova ba mga pundamentalista?

Dili. Bisag sila adunay malig-ong relihiyosong mga pagtuo, sila dili mga pundamentalista sa diwa nga gigamit ang termino. Sila dili mogamit sa mga demonstrasyon ug kapintasan batok niadtong dili nila uyonan. Ginasundog nila ang ilang Pangulo, si Jesu-Kristo.​—3/1, panid 6.

◻ Ang pagkawalay-kahibalo sa eksaktong panahon sa pag-abot ni Jesus aron sa pagpahamtang sa panimalos sa Diyos adunay unsang epekto diha sa mga Kristohanon?

Kini magpakiling sa mga Kristohanon nga magmabinantayon ug maghatag kanila ug adlaw-adlawng kahigayonan sa pagpamatuod nga sila nag-alagad kang Jehova nga walay mahakogong mga motibo.​—3/1, panid 13.

◻ Unsay angay natong palandongon sa dili pa mohimog legal nga aksiyon batok sa usa ka igsoon nga lagmit nagtikas kanato?

Angay natong palandongon ang posibleng mga epekto kanato, sa ubang nalangkit, sa kongregasyon, ug sa mga tagagawas. (1 Corinto 6:7)​—3/15, panid 20.

◻ Sa unsang paagi mabatonan ang tinuod nga kalipay?

Ang tinuod nga kalipay maoy usa ka kahimtang sa kasingkasing, pinasukad sa lunsay nga pagtuo ug sa usa ka maayong relasyon uban kang Jehova. (Mateo 5:3)​—3/15, panid 23.

◻ Unsay buhaton sa usa ka Kristohanon kon tawgon alang sa buluhaton sa pagkahurado?

Ang matag Kristohanon nga nag-atubang sa buluhaton sa pagkahurado kinahanglang magtino kon unsang dalana ang sundon, pinasikad sa iyang pagsabot sa Bibliya ug sa iyang kaugalingong tanlag. (Galacia 6:5)​—4/1, panid 29.