Kapitulo Desiotso

Si Jehova Nagsaad Kang Daniel ug Usa ka Talagsaong Ganti

1, 2. (a) Unsang hinungdanong hiyas ang gikinahanglan sa usa ka maglulumba aron molampos? (b) Giunsa pagtandi ni apostol Pablo ang kinabuhing may pagkamatinumanon diha sa pag-alagad ni Jehova ngadto sa usa ka lumba?

USA ka maglulumba nanlimbasog paingon sa dag-anang linya. Halos gikapoy na siya, apan kay napanan-aw ang iyang tumong, gihurot niya ang tibuok niyang kusog nganha nianang kataposang pipila ka lakang. Sa paghago sa tanang kaunoran, siya sa kataposan milabang sa dag-anan! Ang kahupayan ug kadaogan milakra sa iyang nawong. Gibaslan ang paglahutay hangtod sa kataposan.

² Sa kataposan sa Daniel kapitulo 12, makaplagan nato ang minahal nga propeta nga duol na sa dag-anan sa iyang “lumba”​—iyang kinabuhi nga nag-alagad kang Jehova. Human hisgoti ang nagkalainlaing mga panig-ingnan sa pagtuo taliwala sa una-Kristohanong mga alagad ni Jehova, si apostol Pablo misulat: “Busa, tungod kay kita aduna may ingon gayod kadakong panganod sa mga saksi nga nagalibot kanato, tangtangon usab nato ang tanang kabug-at ug ang sala nga daling makalambod kanato, ug atong daganon nga may pag-agwanta ang lumba nga gibutang atubangan kanato, samtang kita nagatutok sa Pangulong Ahente ug Maghihingpit sa atong pagtuo, si Jesus. Tungod sa kangaya nga gibutang atubangan kaniya siya miagwanta ug sakitanang estaka, nagpakawalay-bili sa kaulaw, ug milingkod na sa tuong kamot sa trono sa Diyos.”​—Hebreohanon 12:​1, 2.

3. (a) Unsay midasig kang Daniel sa ‘pagdagan nga may pag-agwanta’? (b) Unsang tulo ka dayag nga mga butang ang gisulti sa manulonda ni Jehova kang Daniel?

³ Lakip nianang ‘dakong panganod sa mga saksi’ mao si Daniel. Seguradong usa siya nga kinahanglang ‘modagan nga may pag-agwanta,’ ug siya napalihok sa pagbuhat niana tungod sa halalom nga gugma alang sa Diyos. Daghan ang gibutyag ni Jehova kang Daniel mahitungod sa umaabot sa mga kagamhanan sa kalibotan, apan nianang higayona Iyang gipadalhan siya niining personal nga pagdasig: “Kon bahin kanimo, magpadayon ka hangtod sa kataposan; ug ikaw mopahulay, apan ikaw mobarog alang sa imong bahin sa kataposan sa mga adlaw.” (Daniel 12:13) Ang manulonda ni Jehova nagsulti kang Daniel sa tulo ka dayag nga mga butang: (1) nga si Daniel kinahanglang ‘magpadayon hangtod sa kataposan,’ (2) nga siya “mopahulay,” ug (3) nga siya “mobarog” pag-usab sa umaabot nga panahon. Sa unsang paagi kining mga pulonga makadasig sa mga Kristohanon karong adlawa sa pag-agwanta hangtod sa dag-anan sa lumba alang sa kinabuhi?

“MAGPADAYON KA HANGTOD SA KATAPOSAN”

4. Unsay gipasabot sa manulonda ni Jehova sa pag-ingon nga “magpadayon ka hangtod sa kataposan,” ug nganong kana nahimong lisod nga tahas alang kang Daniel?

⁴ Unsay gipasabot sa manulonda sa giingnan niya si Daniel: “Kon bahin kanimo, magpadayon ka hangtod sa kataposan”? Ang kataposan sa unsa? Aw, sanglit si Daniel hapit na 100 ka tuig sa pangedaron, lagmit nagtumong kadto sa kataposan sa iyang kinabuhi mismo, nga lagmit duol na kaayo.a Ang manulonda nag-awhag kang Daniel sa paglahutay nga matinumanon hangtod sa kamatayon. Apan ang pagbuhat niana dili gayod sayon. Si Daniel nabuhi nga nakakita nga napukan ang Babilonya ug ang nahibilin sa Hudiyong mga destiyero namalik ngadto sa Juda ug Jerusalem. Seguradong nakahatag kadtog dakong kalipay sa tigulang nga propeta. Hinuon, walay talaan nga siya mikuyog sa maong panaw. Mahimong tigulang na kaayo ug maluya na siya niadtong panahona. O tingali kabubut-on ni Jehova nga magpabilin siya sa Babilonya. Sa bisan unsang kahimtang, ang usa mahibulong gayod kon si Daniel mibati bag kamingaw samtang nanglakaw ang iyang mga paisano paingon sa Juda.

5. Unsay nagpaila nga si Daniel milahutay hangtod sa kataposan?

⁵ Pihong nakabatog dakong kusog si Daniel gumikan sa malumong mga pulong sa manulonda: “Magpadayon ka hangtod sa kataposan.” Kita mapahinumdoman sa mga pulong nga gilitok ni Jesu-Kristo mga unom ka siglo sa ulahi: “Siya nga nakalahutay hangtod sa kataposan mao ang maluwas.” (Mateo 24:13) Sa walay duhaduha kanay gibuhat ni Daniel. Milahutay siya hangtod sa kataposan, nga matinumanong gidagan ang lumba alang sa kinabuhi hangtod sa dag-anan niini mismo. Mahimong mao kanay usa ka hinungdan nga gihisgotan siyang may pag-uyon sa ulahi diha sa Pulong sa Diyos. (Hebreohanon 11:​32, 33) Unsay nakapaarang kang Daniel sa paglahutay hangtod sa kataposan? Ang talaan sa iyang kinabuhi motabang nato kon bahin sa tubag.

PAGLAHUTAY INGONG ESTUDYANTE SA PULONG SA DIYOS

6. Giunsa nato pagkahibalo nga si Daniel maoy makugihong estudyante sa Pulong sa Diyos?

⁶ Alang kang Daniel, ang paglahutay hangtod sa kataposan naglangkit sa pagpadayon sa pagtuon ug pagpamalandong sa makapalipayng mga saad sa Diyos. Nahibalo kitang si Daniel usa ka masibotong estudyante sa Pulong sa Diyos. Kon dili pa, unsaon niya pagkasayod bahin sa saad ni Jehova kang Jeremias nga ang pagkadestiyero maoy 70 ka tuig sa gidugayon? Si Daniel mismo misulat: “Ako . . . nakasabot pinaagi sa mga basahon sa gidaghanon sa mga tuig.” (Daniel 9:​2; Jeremias 25:​11, 12) Sa walay duhaduha, gipangita ni Daniel ang mga basahon sa Pulong sa Diyos nga niadto naglungtad. Ang mga sinulat ni Moises, David, Solomon, Isaias, Jeremias, Ezequiel​—bisan unsang iyang makuptan​—tinong nagtagana kang Daniel ug daghang takna sa makapahimuot nga pagbasa ug pagpamalandong.

7. Kon atong itandi ang atong panahon sa adlaw ni Daniel, unsang mga bentaha ang atong nabatonan sa pagtuon sa Pulong sa Diyos?

⁷ Ang pagtuon sa Pulong sa Diyos, nga mapuliki niana, hinungdanon aron makaugmad kita sa paglahutay karong adlawa. (Roma 15:​4-6; 1 Timoteo 4:15) Ug nakabaton kita sa kompletong Bibliya, nga naglakip sa sinulat nga talaan kon giunsa pagkatuman sa pipila sa mga tagna ni Daniel kasiglohan sa ulahi. Dugang pa, bulahan kita nga nagkinabuhi sulod sa “panahon sa kataposan,” nga gitagna sa Daniel 12:4. Sa atong adlaw mismo, ang mga dinihogan gipanalanginan sa hait nga panabot sa espirituwal, nga nagsidlak ingon sa mga iwag sa kamatuoran niining mangitngit nga kalibotan. Ingong resulta, daghan sa laglom nga mga tagna diha sa basahon ni Daniel, nga ang pipila nakapalibog kaniya, tugob sa kahulogan alang kanato karong adlawa. Busa, magpadayon kita sa pagtuon sa Pulong sa Diyos sa adlaw-adlaw, nga dili gayod ibalewala kining mga butanga. Ang pagbuhat niana motabang nato sa paglahutay.

SI DANIEL MILAHUTAY SA PAG-AMPO

8. Unsang panig-ingnan ang gihatag ni Daniel kon bahin sa pag-ampo?

⁸ Ang pag-ampo nakatabang usab kang Daniel sa paglahutay hangtod sa kataposan. Sa matag adlaw siya midangop kang Jehova nga Diyos ug nakigsulti kaniyang walay pagpanuko uban ang kasingkasing nga nahupngan sa pagtuo ug pagsalig. Nahibalo siya nga si Jehova mao ang “Tigpatalinghog sa pag-ampo.” (Salmo 65:​2; itandi ang Hebreohanon 11:6.) Sa dihang ang kasingkasing ni Daniel nabug-atan sa kaguol tungod sa masuklanong dalan sa Israel, gipahayag niya ang iyang mga pagbati kang Jehova. (Daniel 9:​4-19) Bisan pag si Dario nagbaod nga siya lang ang pangaliyupoan sulod ug 30 ka adlaw, wala kana makapahunong kang Daniel sa pag-ampo ngadto kang Jehova nga Diyos. (Daniel 6:10) Dili ba matandog ang atong mga kasingkasing sa paghanduraw nianang matinumanong tigulang nga tawo nga maisogong miatubang sa usa ka gahong nga punog mga leyon inay luwatan ang bililhong pribilehiyo sa pag-ampo? Walay duhaduhang si Daniel matinumanong nagpadayon hangtod sa iyang kataposan, nga mainitong nag-ampo kang Jehova kada adlaw.

9. Nganong dili nato angayng sayonsayonon ang pribilehiyo sa pag-ampo?

⁹ Ang pag-ampo maoy yanong buhat. Makaampo kita sa bisan unsang panahon, sa bisan diin, sa kusog o sa hilom. Dili gayod, hinuon, nato pakasayonon lamang ang maong bililhong pribilehiyo. Gilangkit sa Bibliya ang pag-ampo uban sa pag-agwanta, paglahutay, ug pagpabiling nagmata sa espirituwal. (Lucas 18:​1; Roma 12:​12; Efeso 6:​18; Colosas 4:2) Dili ba talagsaon nga kita adunay walay-kinutbanan ug andam-kanunay nga kanal sa komunikasyon uban sa kinatas-ang persona sa uniberso? Ug siya magpatalinghog! Hinumdomi ang okasyon sa dihang si Daniel miampo, ug si Jehova nagpadalag usa ka manulonda ingon nga tubag. Ang manulonda miabot samtang si Daniel nag-ampo pa! (Daniel 9:​20, 21) Ang atong panahon tingali dili panahon alang sa ingon nga mga pagduaw sa manulonda, apan si Jehova wala mausob. (Malaquias 3:6) Ingon nga siya nagpatalinghog sa pag-ampo ni Daniel, siya magpatalinghog sa atoa. Ug samtang kita mag-ampo, kita mas masuod kang Jehova, nga maporma ang bugkos nga motabang nato sa paglahutay hangtod sa kataposan, sama kang Daniel.

PAGLAHUTAY INGONG MAGTUTUDLO SA PULONG SA DIYOS

10. Nganong ang pagtudlo sa kamatuoran sa Pulong sa Diyos hinungdanon alang kang Daniel?

¹⁰ Si Daniel kinahanglang ‘magpadayon hangtod sa kataposan’ sa laing diwa. Kinahanglang siya molahutay ingong magtutudlo sa kamatuoran. Wala gayod siya malimot nga siya usa sa mga tawong pinili nga mahitungod kanila nag-ingon ang Kasulatan: “‘Kamo ang akong mga saksi,’ nagaingon si Jehova, ‘ang akong alagad nga akong napili.’” (Isaias 43:10) Gibuhat ni Daniel ang tanan niyang mahimo aron tumanon kanang tinudlong buluhaton. Lagmit ang iyang buluhaton naglakip sa pagtudlo sa iyang kaugalingong katawhan nga nadestiyero sa Babilonya. Gamay ra ang atong nasayran mahitungod sa iyang mga pakiglabot sa iyang isigka-Hudiyo gawas sa iyang pakiglabot sa tulo nga gitumong ingong “iyang mga kauban”​—si Ananias, Misael, ug Asarias. (Daniel 1:​7; 2:​13, 17, 18) Ang ilang suod nga panaghigala tinong nakatabang ug dako aron ang matag usa kanila molahutay. (Proverbio 17:17) Si Daniel, nga gipanalanginan ni Jehova ug espesyal nga hait nga panabot, daghag ikatudlo sa iyang mga higala. (Daniel 1:17) Apan siya may laing pagpanudlo nga pagabuhaton usab.

11. (a) Unsa ang talagsaon bahin sa buluhaton ni Daniel? (b) Unsa ka malamposon si Daniel sa pagtuman sa iyang talagsaong tinudlong-buluhaton?

¹¹ Labaw pa kay sa ubang propeta, nabatonan ni Daniel ang buluhaton sa pagsaksi ngadto sa Hentil nga kadagkoan. Bisan pag sagad dili-popular ang mga mensahe nga kinahanglang iyang ipahayag, wala siya mag-isip sa maong mga magmamando nga samag sila mangil-ad o sa usa ka paagi ubos kaniya. Nakigsulti siya kanila sa matinahuron ug mahanasong paagi. Dihay pipila​—sama niadtong masinahon, daotag-laraw nga mga satrapa​—nga buot mopatay kang Daniel. Bisan pa niana, ang ubang kadagkoan nagtahod kaniya. Tungod kay si Jehova nakapaarang kang Daniel sa pagsaysay sa mga tinago nga nakapalibog sa mga hari ug mga tawong maalamon, ang propeta nahimong ilado kaayo. (Daniel 2:​47, 48; 5:29) Tinuod, samtang nagkagulang siya, dili na siya aktibo nga sama sa batan-on pa siya. Apan tinong nagpadayon siya hangtod sa iyang kataposan nga sa gihapon matinumanong nagtinguha sa bisan unsang paagi nga siya makaalagad nga usa ka saksi sa iyang minahal nga Diyos.

12. (a) Unsang mga kalihokan sa pagpanudlo ang atong ginabuhat ingong mga Kristohanon karong adlawa? (b) Sa unsang paagi makasunod kita sa tambag ni Pablo nga “padayon sa paglakaw diha sa kaalam ngadto kanilang anaa sa gawas”?

¹² Sa Kristohanong kongregasyon karong adlawa, mahimong makakaplag kitag matinumanong mga kauban nga motabang nato sa paglahutay, sama nga si Daniel ug tulo niya ka kauban nagtinabangay sa usag usa. Kita usab magtudloay sa usag usa, nga magtaganag “pagdinasigay.” (Roma 1:​11, 12) Sama kang Daniel, kita adunay tinudlong-buluhaton sa pagsaksi ngadto sa mga dili-magtutuo. (Mateo 24:​14; 28:​19, 20) Busa kinahanglang atong bairon ang atong mga kahanas aron kita ‘sa husto magagamit sa pulong sa kamatuoran’ sa pagpakigsulti sa mga tawo mahitungod kang Jehova. (2 Timoteo 2:15) Ug makatabang kon atong sundon ang tambag ni apostol Pablo: “Padayon sa paglakaw diha sa kaalam ngadto kanilang anaa sa gawas.” (Colosas 4:​5) Ang maong kaalam naglakip sa balanseng panghunahuna niadtong dili sama kanatog pagtuo. Dili nato pagatamayon kanang mga tawhana, nga mag-isip sa atong kaugalingon nga labaw. (1 Pedro 3:15) Hinunoa, tinguhaon nato ang pagdani kanila sa kamatuoran, nga magagamit sa Pulong sa Diyos sa mataktikanhon ug mahanasong paagi aron maabot ang ilang mga kasingkasing. Sa dihang molampos kita sa pag-abot sa usa ka tawo, dako kaayong kangaya ang ihatag niini kanato! Ang maong kangaya tinong motabang nato sa paglahutay hangtod sa kataposan, sama kang Daniel.

“IKAW MOPAHULAY”

13, 14. Nganong ang kalaoman nga mamatay nakapahadlok sa daghang Babilonyanhon, ug sa unsang paagi ang panglantaw ni Daniel lahi?

¹³ Ang manulonda dayon nagpasalig kang Daniel: “Ikaw mopahulay.” (Daniel 12:13) Unsay kahulogan nianang mga pulonga? Aw, si Daniel nahibalo nga ang kamatayon diha sa iyang unahan. Ang kamatayon mao ang dili-maikyasang kataposan sa tanang tawo, sukad sa adlaw ni Adan hangtod sa atong adlaw. Ang Bibliya haom nga nagtawag sa kamatayon nga “kaaway.” (1 Corinto 15:26) Alang kang Daniel, hinuon, ang kalaomang mamatay nagpasabot sa butang nga lahi kaayo kay sa ipasabot niadto alang sa mga Babilonyanhong nag-alirong kaniya. Alang kanila, kay naimpluwensiyahan sa makutihong pagsimba sa mga 4,000 ka bakak nga diyos, ang kamatayon nakabaton sa tanang matang sa mga butang nga makalilisang. Nagtuo sila nga sa pagkamatay, kadtong nagkinabuhing masulub-on o namatay sa mapintasong paagi nahimong mga espiritung mapanimaslon nga nagduaw sa mga buhi. Ang mga Babilonyanhon nagtuo usab sa makahahadlok nga laing kalibotan, nga gipuy-an sa mangil-ad nga mga mangtas diha sa mga dagway sa tawo ug sa hayop.

¹⁴ Alang kang Daniel, ang kamatayon wala magpasabot nianang mga butanga. Ginatos ka tuig una pa sa adlaw ni Daniel, si Haring Solomon gidasig sa Diyos sa pag-ingon: “Bahin sa mga patay, sila walay nahibaloan nga bisan unsa.” (Ecclesiastes 9:5) Ug mahitungod sa usa nga mamatay, ang salmista miawit: “Ang iyang espiritu mogula, siya mobalik ngadto sa iyang yuta; nianang adlawa ang iyang mga hunahuna mahanaw.” (Salmo 146:4) Busa si Daniel nahibalo nga ang mga pulong sa manulonda ngadto kaniya matuman. Ang kamatayon nagpasabot sa pahulay. Walay mga hunahuna, walay mapait nga mga pagbasol, walay pagsakit​—ug tinong walay mga mangtas. Si Jesu-Kristo nagpahayag sa mga butang sa susamang paagi sa dihang namatay si Lazaro. Siya miingon: “Si Lazaro nga atong higala mipahulay.”​—Juan 11:11.

15. Sa unsang paagi ang adlaw sa pagkamatay mas maayo kay sa adlaw sa pagkatawo?

¹⁵ Tagda ang laing hinungdan nga ang kalaoman sa pagkamatay wala makapalisang kang Daniel. Ang Pulong sa Diyos nag-ingon: “Ang usa ka ngalan mas maayo kay sa maayong lana, ug ang adlaw sa pagkamatay kay sa adlaw sa pagkatawo sa usa.” (Ecclesiastes 7:1) Sa unsang paagi ang adlaw sa pagkamatay, nga masulub-on gayong panahon, mahimong mas maayo kay sa mangayaong adlaw sa pagkatawo? Ang yawi anaa sa “ngalan.” Ang “maayong lana” mahimong mahal kaayo. Ang igsoong babaye ni Lazaro nga si Maria kas-a nagpahid sa mga tiil ni Jesus sa pinahumotang lana nga mikostar ug halos usa ka tuig nga suhol! (Juan 12:​1-7) Sa unsang paagi ang yanong ngalan mahimong bililhon kaayo? Sa Ecclesiastes 7:​1, ang Gregong Septuagint nag-ingon, “usa ka maayong ngalan.” Dili lamang ang ngalan kondili ang gibarogan niana mao ang bililhon kaayo. Sa pagkatawo niya, walay dungog, walay rekord sa maayong mga buhat, walay gimahal nga handomanan sa personalidad ug mga hiyas sa nagdala sa ngalan. Apan sa kataposan sa kinabuhi, ang ngalan nagpasabot nianang tanang butang. Ug kon kini usa ka maayong ngalan gikan sa punto de bista sa Diyos, labi pa kining bililhon kay sa bisan unsang materyal nga mga butang.

16. (a) Sa unsang paagi gipaningkamotan ni Daniel ang paghimog maayong ngalan uban sa Diyos? (b) Nganong si Daniel makapahulay nga may bug-os nga pagsalig nga milampos siya sa paghimog usa ka maayong ngalan uban kang Jehova?

¹⁶ Sa tibuok niyang kinabuhi, gibuhat ni Daniel ang tanan niyang maarangan sa paghimog usa ka maayong ngalan uban sa Diyos, ug si Jehova wala gayod malimot niini. Siya nagbantay kang Daniel ug nagsusi sa iyang kasingkasing. Ang ingon gibuhat usab sa Diyos alang kang Haring David, kinsa miawit: “Oh Jehova, ikaw nagsusi kanako, ug ikaw nakaila kanako. Ikaw mismo nahibalo sa akong paglingkod ug sa akong pagbakod. Ikaw nagtagad sa akong hunahuna gikan sa halayo.” (Salmo 139:​1, 2) Itugot nato, si Daniel dili hingpit. Siya usa ka kaliwat sa makasasalang si Adan ug usa ka membro sa makasasalang nasod. (Roma 3:23) Apan si Daniel naghinulsol sa iyang pagkamakasasala ug nagpadayon sa pagtinguha sa paglakaw uban sa iyang Diyos sa matul-id nga paagi. Busa ang matinumanong propeta nakasalig nga si Jehova magpasaylo sa iyang mga sala ug dili gayod magmayugtanon kaniya. (Salmo 103:​10-14; Isaias 1:18) Si Jehova mopalabi sa paghinumdom sa maayong mga buhat sa iyang matinumanong mga alagad. (Hebreohanon 6:10) Busa, ang manulonda ni Jehova kaduha nagtawag kang Daniel nga “tawong tilinguhaon kaayo.” (Daniel 10:​11, 19) Kadto nagpasabot nga si Daniel gihigugma sa Diyos. Si Daniel makapahulay nga matagbawon, kay nahibalo nga siya nakahimog usa ka maayong ngalan uban kang Jehova.

17. Nganong dinalian nga kita mohimog maayong ngalan uban kang Jehova karong adlawa?

¹⁷ Ang matag usa kanato maayong mangutana, ‘Nakahimo ba akog maayong ngalan uban kang Jehova?’ Nagkinabuhi kita sa gubot nga mga panahon. Dili mangil-ad apan matinud-anon lamang ang pag-ila nga ang kamatayon mahimong makaapas kang bisan kinsa kanato sa bisan unsang panahon. (Ecclesiastes 9:11) Nan, pagkahinungdanong ang matag usa kanato mohukom sa paghimog usa ka maayong ngalan uban sa Diyos karon mismo, nga walay langan. Kon buhaton nato kana, dili kinahanglang kita mahadlok sa kamatayon. Kini maoy pahulay lamang​—sama sa katulog. Ug sama sa katulog, kini sundan sa pagmata!

“IKAW MOBAROG”

18, 19. (a) Unsay gipasabot sa manulonda sa dihang iyang gitagna nga si Daniel “mobarog” sa umaabot? (b) Nganong si Daniel nasayod sa paglaom sa pagkabanhaw?

¹⁸ Ang basahon ni Daniel gitapos uban sa usa sa labing nindot nga mga saad nga sukad gipahayag sa Diyos ngadto sa usa ka tawo. Ang manulonda ni Jehova miingon kang Daniel: “Ikaw mobarog alang sa imong bahin sa kataposan sa mga adlaw.” Unsay gipasabot sa manulonda? Aw, sanglit ang ‘pahulay’ nga bag-o pa niyang gihisgotan maoy kamatayon, ang saad nga si Daniel “mobarog” sa ulahing panahon mahimong magpasabot sa usa lamang ka butang​—ang pagkabanhaw!b Sa pagkamatuod, ang pipila ka eskolar nagpatuo nga ang Daniel kapitulo 12 naundan sa unang dayag nga paghisgot sa pagkabanhaw nga hikaplagan diha sa Hebreohanong Kasulatan. (Daniel 12:2) Hinunoa, sayop sila bahin niini. Si Daniel nasayod pag-ayo sa paglaom sa pagkabanhaw.

¹⁹ Pananglitan, si Daniel sa walay duhaduha nahibalo niining mga pulonga nga gisulat ni Isaias duha ka siglo nga sayosayo: “Ang imong mga patay mabuhi. Ang usa nako ka minatay​—sila mobangon. Pagmata ug singgit nga mangayaon, kamong mga lumolupyo sa abog! Kay . . . ang yuta mismo magpahinabo nga kadtong walay lihok diha sa kamatayon mangatawo.” (Isaias 26:19) Dugay na una pa niana, si Elias ug Eliseo gihatagan ni Jehova ug gahom sa paghimog aktuwal nga mga pagbanhaw. (1 Hari 17:​17-24; 2 Hari 4:​32-37) Sayosayo pa gani, si Ana, ang inahan sa propetang si Samuel, miila nga si Jehova makabanhaw sa mga tawo gikan sa Sheol, ang lubnganan. (1 Samuel 2:6) Mas sayo pa gayod, ang matinumanong si Job nagpahayag sa iyang paglaom pinaagi niining mga pulonga: “Kon ang usa ka lig-on-ug-lawas nga tawo mamatay mabuhi ba siya pag-usab? Ang tanang adlaw sa akong pinugos nga pag-alagad ako magpaabot, hangtod nga moabot ang akong kahupayan. Ikaw motawag, ug ako mismo motubag kanimo. Kay ang buhat sa imong mga kamot ikaw mangandoy.”​—Job 14:​14, 15.

20, 21. (a) Sa unsang pagkabanhaw si Daniel seguradong mahimong bahin? (b) Sa unsang paagi lagmit mahitabo ang pagkabanhaw diha sa Paraiso?

²⁰ Sama kang Job, si Daniel may hinungdan nga magmasaligon nga si Jehova aktuwal nga mangandoy nga siya buhion pag-usab sa usa ka adlaw sa umaabot. Sa gihapon, dulot nga makapahupay ang pagkadungog sa usa ka gamhanang espiritung linalang nga naglig-on sa maong paglaom. Oo, si Daniel mobarog diha sa “pagpamanhaw sa mga matarong,” nga mahitabo sulod sa Milenyong Paghari ni Kristo. (Lucas 14:14) Sama unya kana sa unsa alang kang Daniel? Ang Pulong sa Diyos daghag ikasulti bahin niana.

²¹ Si Jehova maoy “Diyos, dili sa kasamok, kundili sa kalinaw.” (1 Corinto 14:33) Nan, dayag nga ang pagkabanhaw diha sa Paraiso mahitabo sa mahusay nga paagi. Tingali molabay ang diyutayng panahon sukad sa Armagedon. (Pinadayag 16:​14, 16) Ang tanang ilhanan sa daang sistema sa mga butang nahiklin na, ug ang mga pagpangandam sa walay duhaduha nahimo na aron sa pag-abiabi sa mga patay. Kon bahin sa pagkasunodsunod sa pagbalik sa mga patay, ang Bibliya naghatag niining panig-ingnan: “Matag usa sa iyang kaugalingong han-ay.” (1 Corinto 15:23) Morag lagmit nga kon bahin sa “pagkabanhaw sa mga matarong ug sa mga dili-matarong,” ang mga matarong maoy unahon sa pagbanhaw. (Buhat 24:15) Nianang paagiha, ang matinumanong mga tawo sa kakaraanan, sama kang Daniel, makatabang sa pagdumala sa yutan-ong mga kahikayan, lakip ang pagtudlo sa binilyong “dili-matarong” nga binanhaw.​—Salmo 45:16.

22. Unsa ang pipila ka pangutana nga sa walay duhaduha maikagong tubagon ni Daniel?

²² Sa dili pa maandam si Daniel sa pag-abaga nianang mga responsabilidara, seguradong siya adunay pipila ka pangutana. Kon buot sabton, mahitungod sa pipila sa laglom nga mga tagnang gisalig kaniya, siya miingon: “Ako nakadungog, apan ako wala makasabot.” (Daniel 12:8) Pagkadako unya sa iyang kalipay nga makasabot sa kataposan niining balaang mga misteryo! Walay duhaduhang buot niyang makadungog sa tanan bahin sa Mesiyas. Si Daniel malingaw nga mahibalo bahin sa pagtungha sa mga gahom sa kalibotan sukad sa iyang adlaw hangtod sa atoa, bahin sa ilhanan sa matinumanong “mga balaan sa Supremong Usa”​—kinsa milahutay bisan pa sa paglutos sulod sa “panahon sa kataposan”—ug bahin sa kataposang kalaglagan sa tanang tawhanong mga gingharian pinaagi sa Mesiyanikong Gingharian sa Diyos.—Daniel 2:44; 7:22; 12:4.

ANG BAHIN NI DANIEL DIHA SA PARAISO—UG ANG IMOHA!

23, 24. (a) Sa unsang paagi ang kalibotan diin si Daniel pagabanhawon lahi kay sa usang iyang nailhan? (b) Makabaton ba si Daniel ug usa ka dapit diha sa Paraiso, ug giunsa nato pagkahibalo?

²³ Buot gayong mahibaloan ni Daniel ang bahin sa kalibotan nga iya unyang hiabotan nianang panahona—usa ka kalibotang lahi kaayo niadtong sa iyang adlaw. Wala na unya ang tanang timaan sa mga gubat ug pagpanglupig nga nagdaot sa kalibotan nga iyang nailhan. Wala na unyay kasubo, walay sakit, walay kamatayon. (Isaias 25:​8; 33:24) Apan aduna unyay dagayang pagkaon, daghang pamalay, ug makapatagbawng buluhaton alang sa tanan. (Salmo 72:​16; Isaias 65:​21, 22) Ang katawhan mahimong usa ka nahiusa, malipayong pamilya.

²⁴ Si Daniel tinong adunay dapit nianang kalibotana. “Ikaw mobarog alang sa imong bahin,” giingnan siya sa manulonda. Ang Hebreohanong pulong nga gihubad dinhing “bahin” maoy sama nianang gigamit alang sa literal nga mga luna sa yuta.c Si Daniel mahimong sinati sa tagna ni Ezequiel bahin sa pagbahinbahin sa napasig-uling yuta sa Israel. (Ezequiel 47:​13–​48:35) Diha sa katumanan niini sa Paraiso, unsay gipaila sa tagna ni Ezequiel? Nga ang tanang katawhan sa Diyos may dapit unya sa Paraiso, nga ang yuta mismo bahinbahinon sa mahusay ug makiangayong paagi. Siyempre, ang bahin ni Daniel diha sa Paraiso maglangkit ug labaw pa kay sa yuta lamang. Kana maglakip sa iyang dapit diha sa katuyoan sa Diyos didto. Garantisado ang gisaad nga ganti kang Daniel.

25. (a) Unsa ang pipila ka kalaoman sa kinabuhi sa Paraiso nga madanihon alang kanimo? (b) Nganong ikaingon nga ang mga tawo angayng anaa sa Paraiso?

²⁵ Apan, komosta man sa imong bahin? Ang samang mga saad mapadapat kanimo. Gusto ni Jehova nga ang masinugtanong mga tawo “mobarog” alang sa ilang bahin, aron makabaton ug usa ka dapit sa Paraiso. Hunahunaa ra god! Segurado, makalilipay ang paghimamat kang Daniel sa personal, kauban sa ubang matinumanong mga lalaki ug mga babaye sa kapanahonan sa Bibliya. Dayon aduna unyay di-maihap nga uban pa nga mahibalik gikan sa mga patay, nga kinahanglang tudloan aron makaila ug mahigugma kang Jehova nga Diyos. Handurawa ang imong kaugalingon nga nagaatiman sa atong yutang pinuy-anan ug nagatabang sa paghimo niini nga paraiso nga adunay way-kinutobang kadaiyahan ug dili-malawos nga katahom. Hunahunaa nga mahimong tinudloan ni Jehova, nga makakat-on kon unsaon pagkinabuhi sa paagi nga maoy iyang tuyo nga ang mga tawo magkinabuhi. (Isaias 11:​9; Juan 6:45) Oo, adunay usa ka dapit alang kanimo sa Paraiso. Bisan pag ang Paraiso morag dili sinati sa pipila karong adlawa, hinumdomi nga si Jehova sa sinugdan naglaraw nga ang mga tawo magpuyo sa ingon nga dapit. (Genesis 2:​7-9) Nianang diwaa, ang Paraiso maoy kinaiyanhong pinuy-anan sa bilyonbilyon sa yuta. Angay nga sila anaa niana. Ang paghiabot niana maoy sama sa pagkanakapauli sa balay.

26. Giunsa pag-ila ni Jehova nga ang pagpaabot alang sa kataposan niining sistema dili masayon alang kanato?

²⁶ Ang atong mga kasingkasing natandog uban ang pagpabili sa dihang atong hunahunaon kining tanan, dili ba? Dili ba ikaw mismo mangandoy nga maatua didto? Nan, dili katingad-ang ang mga Saksi ni Jehova maikag nga mahibalo kon kanus-a moabot ang kataposan niining sistema sa mga butang! Ang pagpaabot dili sayon. Kana giila ni Jehova, kay siya nag-awhag kanato nga “magpadayon sa pagpaabot” sa kataposan “bisan pag kini malangan.” Iyang gipasabot nga kini morag nalangan gikan sa atong punto de bista, kay sa samang kasulatan, kita gipasaligan: “Kini dili malangan.” (Habacuc 2:​3; itandi ang Proverbio 13:12.) Oo, ang kalaglagan moabot nga eksakto sa panahon.

27. Unsay kinahanglan nimong buhaton aron mobarog sa atubangan sa Diyos hangtod sa kahangtoran?

²⁷ Unsay imong buhaton samtang nagkaduol ang kataposan? Sama sa minahal nga propeta ni Jehova nga si Daniel, lahutay nga matinumanon. Sa makugihon tun-i ang Pulong sa Diyos. Pag-ampo sa tim-os. Mahigugmaong makig-uban sa mga isigkamagtutuo. Madasigong itudlo ang kamatuoran ngadto sa uban. Tungod kay ang kataposan niining daotang sistema sa mga butang nagkahiduol na sa kada adlaw, magpabiling determinado nga mahimong maunongong alagad sa Labing Hataas ug lig-ong tigpaluyo sa iyang Pulong. Sa tanang paagi, patalinghogi ang tagna ni Daniel! Ug hinaot ang Soberanong Ginoong Jehova maghatag kanimo sa pribilehiyo sa pagbarog nga mangayaon sa iyang atubangan hangtod sa kahangtoran!

[Mga footnote]

UNSAY IMONG NASABTAN?

• Unsay nakatabang kang Daniel sa paglahutay hangtod sa kataposan?

• Nganong ang kalaoman nga mamatay wala makapalisang kang Daniel?

• Sa unsang paagi matuman ang saad sa manulonda nga si Daniel ‘mobarog alang sa iyang bahin’?

• Sa unsang paagi ikaw sa personal nakabatog kaayohan pinaagi sa pagpatalinghog sa tagna ni Daniel?

[Tibuok-panid nga hulagway panid 307]

[Hulagway sa panid 318]

Sama kang Daniel, nagpatalinghog ka ba sa matagnaong pulong sa Diyos?