Nganong ang Maayong mga Tawo Nagaantos?

TUIG kadto sa 1914, ug ang kalibotan okupado sa gubat. Sa kalit, mibutho ang tipos diha sa kampo sa mga binilanggo sa gubat sa Serbia. Apan sinugdanan lamang kadto. Ang gikahadlokang sakit mikaylap ngadto sa mga sibilyan ug 150,000 ang nangamatay sa unom ka bulan lamang. Tali sa mga kahimtang sa gubat ug sa rebolusyon nga misunod sa Russia, tulo ka milyon ang namatay sa tipos. Hustong makaingon ka nga daghang maayong mga tawo ug ang ilang gibiyaan nga mga membro sa pamilya nahimong mga biktima.

Kini maoy usa lamang ka pananglitan sa trahedya sa tawo. Ikaw tingali nakaagig pag-antos nga misangpot sa dihang ang mga minahal nabiktima sa mga sakit, aksidente, ug nagkalainlaing mga kalamidad. Malagmit, naguol ka sa dihang antoson sa usa ka matarong nga indibiduwal ang kasakit sa usa ka dili-maayong balatian. Ikaw tingali maguol kaayo kon ang usa ka maayong tawo​—tingali usa ka kugihang padre de-pamilya​—mamatay sa aksidente. Ang kasubo sa gibiyaan nga pamilya tingali mohilap sa imong kasingkasing.

Daghan ang nagtuo nga ang usa ka tawo nga nagahimog maayo kinahanglang gantihan ug kagawasan gikan sa pag-antos. Giisip sa uban ang pag-antos nga maoy pamatuod nga mamumuhat ug daotan ang biktima. Mao kadto ang pangatarongan sa tulo ka tawo nga nabuhi duolan sa 3,600 ka tuig kanhi. Sila maoy mga katalirongan sa usa ka maayong tawo nga ginganlag Job. Mobalik kita sa ilang adlaw samtang sugdan nato ang atong pagpangitag tubag sa pangutana, Nganong ang maayong mga tawo nagaantos?

Ang mga Pag-antos ni Job

Sa dihang giduaw si Job sa iyang tulo kuno ka higala, siya nag-antos sa grabeng kasakit ug sa balatian. Siya namatyan ug napulo ka anak ug napildi ang tanan niyang materyal nga mga kabtangan. Ang mga tawo nga taas kaayog pagtamod kang Job nasilag kaniya. Bisan ang iyang asawa mitalikod kaniya ug miawhag nga iyang tunglohon ang Diyos ug magpakamatay.​—Job 1:1–​2:13; 19:13-19.

Sulod sa pito ka adlaw ug gabii, ang mga bisita ni Job hilom nga nagtan-aw sa iyang pag-antos. Unya giakusar siya sa usa kanila nga nakahimog daotan nga tungod niana siya gisilotan. “Hinumdomi, palihog,” miingon ang tawong si Eliphaz: “Kinsa ba ang nawagtang nga walay sala? Ug may matarong ba nga gilaglag? Sumala sa akong nakita, kadtong maglaraw ug kadaotan ug magpugas ug kasamok magaani usab niini. Pinaagi sa gininhawa sa Diyos sila nalaglag, ug pinaagi sa iyang nagdilaab nga kasuko sila nangaut-ot.”​—Job 4:7-9.

Busa, si Eliphaz nagpatuo nga gisilotan sa Diyos si Job tungod sa iyang mga sala. Karon, usab, ang uban nangatarongan nga ang mga kalamidad maoy mga buhat sa Diyos nga gilaraw sa pagsilot sa mga tawo kay nagbuhat ug daotan. Apan wala siloti ni Jehova si Job tungod kay nakahimog daotan. Kita nahibalo niini tungod kay gisultihan sa Diyos sa ulahi si Eliphaz: “Ang akong kasuko misilaob batok kanimo ug sa duha mo ka higala, kay kamo wala magsulti sa matarong bahin kanako sama sa akong alagad nga si Job.”​—Job 42:7.

Dili Sad-an ang Diyos

Karong adlawa, milyon-milyon​—tino apil ang daghang maayong mga tawo—​ang nag-antos sa kakabos ug naghigos sa kakuraw. Ang uban nasuko ug gipasanginlan ang Diyos sa ilang pag-antos. Apan dili siya ang mapasanginlan sa kagutom. Gani, siya ang Usa nga nagataganag pagkaon sa katawhan.​—Salmo 65:9.

Ang kahakog, ug kadalo ug ubang tawhanong mga hinungdan hayan maoy nakapugong nga mahatod ang pagkaon ngadto sa gigutom. Ang gubat maoy usa sa mga hinungdan sa kagutom. Pananglitan, ang The World Book Encyclopedia nag-ingon: “Ang gubat moresultag kagutom kon biyaan sa daghang mag-uuma ang ilang kaumahan ug mosulod sa pagkasundalo. Sa ubang mga kaso, tuyoon sa kasundalohan ang pagmugnag kagutom aron mosurender ang kaaway tungod sa kagutom. Daoton sa kasundalohan ang napundong pagkaon ug nagatubong mga pananom ug nagapatindog ug babag sa dalan aron dili makaagi ang suplay sa pagkaon ngadto sa mga kaaway. Ang mga babag sa dalan nakasanta sa pagpadala sa pagkaon ngadto sa rehiyon sa Biafra sa panahon sa Sibil nga Gubat sa Nigeria (1967-70). Misangpot ang kagutom, ug tingali kapin sa usa ka milyong mga taga Biafra ang gikuraw.”

Ilabinang sayop nga gipasanginlan sa uban ang Diyos sa panahon sa Gubat sa Kalibotan II, diin daghang maayong mga tawo ang nag-antos ug nangamatay. Bisan pa, gilapas sa mga tawo ang kasugoan sa Diyos pinaagi sa pagdumot ug sa pagpakiggubat batok sa usag usa. Sa dihang gipangutana si Jesu-Kristo kon unsa nga sugo ang “una sa tanan,” siya mitubag: “Ang una mao, ‘Patalinghogi, Oh Israel, si Jehova ang atong Diyos maoy usa ra nga Jehova, ug kinahanglang higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong hunahuna ug sa tibuok mong kusog.’ Ang ikaduha mao kini, ‘Higugmaa ang imong silingan sama sa imong kaugalingon.’ Wala nay laing sugo nga labi pang dako kay niini.”​—Marcos 12:28-31.

Kon lapason sa mga tawo ang kasugoan sa Diyos pinaagi sa pagpakigbahin sa pinakyaw nga pagpatay, may bisan kinsa ba nga hustong makapasangil kaniya kon mosangpot ang pag-antos? Kon sultihan sa ginikanan ang iyang mga anak nga dili sila mag-away ug dili mamati sa iyang maayong tambag, siya ba ang responsabli kon mag-antos sila sa mga samad? Ang ginikanan sama sa Diyos dili mao ang responsabli sa tawhanong pag-antos sa dihang dili-mosunod ang mga tawo sa balaang kasugoan.

Bisag ang pag-antos maoy mosangpot tingali sa dihang dili-sundon ang mga kasugoan ni Jehova, ang Bibliya wala magpakita nga ang mga katalagman sa katibuk-an maoy mga buhat sa Diyos nga gilaraw sa pagsilot sa daotan. Sa dihang nakasala ang unang tawhanong paris, nawala nila ang iyang espesyal nga panalangin ug panalipod. Gawas sa mga kaso nga may balaang pagpangilabot aron matuman ang mga katuyoan ni Jehova, ang nagakahitabo sa katawhan sa adlaw-adlaw gimandoan niining prinsipyoha sa Kasulatan: “Ang lumba dili alang sa matulin, ni ang gubat alang sa kusgan, ni ang tinapay alang sa maalam, ni ang bahandi alang sa mga tawong may salabotan, ni ang pagkapinalabi alang sa mga tawo sa kahibalo; tungod kay ang panahon ug dili-madahom nga mga panghitabo mahinabo kanilang tanan.”​—Ecclesiastes 9:11.

Ang Maayo ug Daotan Nagaantos

Sa pagkatinuod, ang mga tawong maayo ug daotan nagaantos tungod sa napanunod nga sala ug pagkadili-hingpit. (Roma 5:12) Pananglitan, ang mga tawong matarong ug daotan makaagom ug masakit nga mga balatian. Ang matinumanong Kristohanong Timoteo nag-antos gikan sa “balikbalik nga pagkasakit.” (1 Timoteo 5:23) Sa dihang gihisgotan ni apostol Pablo ang iyang kaugalingong “tunok sa unod,” tingali ang iyang gitumong mao ang usa ka pisikal nga balatian. (2 Corinto 12:7-9) Bisan alang sa iyang maunongong mga alagad, wala pa kuhaa karon sa Diyos ang napanunod nga kahuyangon o mga pagkadaling matakdan ug sakit.

Ang mga tawong diyosnon mahimong mag-antos usab tungod sa dili maayong paghukom o sa kapakyasan sa pagpadapat sa tambag sa Kasulatan usahay. Sa pag-ilustrar: Ang usa nga mosupak sa Diyos ug magminyo ug dili-magtutuo tingali mag-antos ug mga suliran sa kaminyoon nga iya untang malikayan. (Deuteronomio 7:3, 4; 1 Corinto 7:39) Kon ang usa ka Kristohanon dili mokaon ug husto ug kulang sa igong pahulay, tingali siya mag-antos tungod sa pagdaot niya sa iyang panglawas.

Ang pag-antos sa emosyon tingalig maoy mosangpot kon magpadaog kita sa kahuyangan ug mohimog daotan. Ang pagpanapaw ni Haring David kang Batseba mihatag kaniyag dakong pag-antos. (Salmo 51) Samtang naningkamot sa pagtago sa iyang daotang buhat, giantos niya ang grabeng kaguol. “Sa dihang nagpakahilom ako,” matud pa niya, “ang akong mga bukog nagkaut-ot tungod sa akong pag-agulo sa tibuok adlaw. . . . Kay adlaw ug gabii ang akong yamog sa kinabuhi nauga sama sa kainit sa ting-init.” (Salmo 32:3, 4) Ang kabalaka sa iyang sala nagkuha sa kalagsik ni David sama sa usa ka kahoy nga mawad-an sa iyang nagahatag-kinabuhi nga yamog sa panahon sa hulaw o sa kainit sa adlaw sa ting-init. Dayag nga siya nag-antos sa mental ug sa pisikal. Apan ang Salmo 32 nagpakita nga mahupayan ang maong pag-antos pinaagi sa mahinulsolong pagsugid sa tawo sa sala ug sa pagkadawat sa pasaylo sa Diyos.​—Proverbio 28:13.

Ang mga tawong daotan kanunayng mag-antos tungod sa pagtinguha sa usa ka mahilayong dalan, dili ingon nga silot sa Diyos. Si Herodes nga Bantogan daghag-sakit tungod sa daotang mga batasan. Sa kataposan niyang mga adlaw, si Herodes “nag-antos ug grabe nga mga pagsakit,” miingon ang Hudiyohanong manalaysay nga si Josephus. “Grabe kaayo ang pangatol sa iyang kalawasan, daghag samad ang iyang tinai, ug ang iyang kinatawo gikangrena ug giulod. Siya misulay sa walay kapuslanan sa pagpahupay sa iyang paghingutas ug mga kombulsiyon pinaagi sa pagkaligo sa mainit nga mga tubig sa Callirrhoe. . . . Si Herodes karon nag-antos sa hilabihang kasakit nga siya misulay sa pagdunggab sa iyang kaugalingon, apan napugngan sa iyang ig-agaw.”​—Josephus: The Essential Writings, gihubad ug giedit ni Paul L. Maier.

Ang pagsunod sa kasugoan sa Diyos mohatag ug panalipod batok sa mga sakit sama sa sakit nga mapasa sa sekso. Bisan pa, nganong daghang maayong mga tawong nangita sa iyang pag-uyon daw daghan mang pag-antos?

Kon Nganong Nag-antos ang mga Tawong Diyosnon

Ang pangunang katarongan kon nganong ang mga tawong diyosnon nagaantos tungod kay sila matarong. Giilustrar kini diha sa kaso ni Jose nga anak sa patriarkang si Jacob. Bisag nagpunay ug agda ang asawa ni Potipar kang Jose sa pagpakigsekso kaniya, siya nangutana: “Unsaon ko paghimo kining dakong pagkadaotan ug makasala batok sa Diyos?” (Genesis 39:9) Kini misangpot sa dili-makataronganong pagkabilanggo, ug si Jose nag-antos tungod kay siya matarong.

Apan nganong gitugotan sa Diyos ang iyang matinumanong mga alagad nga mag-antos? Ang tubag nahisandig sa usa ka isyu nga gibangon sa rebelyosong manulonda nga si Satanas nga Yawa. Ang isyu nalangkit sa pagkamaunongon ngadto sa Diyos. Sa unsang paagi kita nahibalo? Tungod kay gipakita kini sa kaso sa tawong matarong nga si Job, nga gihisgotan sa sinugdan.

Diha sa usa ka tigom sa mga anak sa Diyos nga mao ang mga manulonda sa langit, si Jehova nangutana kang Satanas: “Gipalandong mo ba si Job nga akong alagad, walay sama kaniya diha sa yuta, usa ka tawo nga walay ikasaway ug matarong, mahinadlokon sa Diyos ug nagpahilayo sa daotan?” Ang tubag sa Yawa nagpamatuod nga dihay panaglalis kon kaha ang mga tawo magpabiling maunongon kang Jehova ilalom sa pagsulay. Si Satanas nagpatuo nga si Job nag-alagad sa Diyos tungod sa materyal nga mga panalangin nga gitagamtam ug dili tungod sa gugma. Unya si Satanas miingon: “Agig kausaban, bakyawa ang imong kamot, palihog, ug tandoga ang tanan nga nabatonan [ni Job] ug tan-awa kon dili ka ba niya tunglohon bisan sa atubangan sa imong nawong.” Si Jehova mitubag: “Tan-awa! Ang tanan nga anaa kaniya anaa sa imong kamot. Ayaw lamang siya pagtandoga!”​—Job 1:6-12.

Bisan sa tanan nga gihimo ni Satanas, si Job nagpabilin sa matarong nga dalan ug nagpamatuod nga siya nag-alagad kang Jehova tungod sa gugma. Gani, gisultihan ni Job ang iyang mga tigsumbong: “Imposible gayod nga ipahayag ko kamo nga mga matarong! Hangtod ako mamatay dili ko gayod isalikway ang akong pagkamaunongon!” (Job 27:5) Oo, ang maong mga maghuhupot sa integridad andam kanunay nga moantos alang sa pagkamatarong. (1 Pedro 4:14-16) Ang Bibliya nag-asoy bahin sa daghan nga adunay gugma nga walay-pagkapakyas alang sa Diyos ug nagkinabuhi sa matarong nga mga kinabuhi aron pasidunggan siya ug pamatud-ang bakak ang pangangkon ni Satanas nga iyang mapatalikod ang tanang tawo gikan kang Jehova. Ang tanang indibiduwal nga nag-antos tungod kay nagpabiling maunongon sa Diyos malipay nga iyang gipamatud-an nga bakakon ang Yawa ug naglipay sa kasingkasing ni Jehova.​—Proverbio 27:11.

Ang Diyos nabalaka sa pag-antos sa iyang matinumanong mga alagad. Ang salmistang si David miingon: “Si Jehova magasapnay niadtong nangapukan, ug magabangon niadtong tanang nanghiumod.” (Salmo 145:14) Kadtong nagpahinungod kang Jehova tingali kulang ug igong kusog sa pagpas-an sa mga alantoson sa kinabuhi ug sa paglutos nga ilang ginaagoman ingong iyang katawhan. Apan ang Diyos molig-on ug mopaluyo kanila ug mohatag kanila sa kaalam nga gikinahanglan aron maantos ang ilang tanang mga pagsulay. (Salmo 121:1-3; Santiago 1:5, 6) Kon patyon man ugaling sa mga maglulutos ang pipila ka maunongong mga alagad ni Jehova, sila adunay hinatag-sa-Diyos nga paglaom sa pagkabanhaw. (Juan 5:28, 29; Buhat 24:15) Bisan hangtod sa maong sukod, mabali sa Diyos ang mga epekto sa bisan unsang pag-antos nga ginaagoman niadtong nahigugma kaniya. Iyang gitapos ang pag-antos ni Job ug dagayang gipanalanginan ang maong matarong nga tawo. Ug kita masaligon nga dili biyaan ni Jehova ang iyang katawhan sa atong adlaw.​—Job 42:12-16; Salmo 94:14.

Sa Dili Madugay​—Wala nay Pag-antos!

Busa, ang tanan makaagom ug pag-antos tungod sa napanunod nga pagkadili-hingpit ug kinabuhi niining daotang sistema sa mga butang. Ang diyosnong mga indibiduwal makadahom usab nga mag-antos tungod sa pagpabiling maunongon kang Jehova. (2 Timoteo 3:12) Apan sila mahimong magkalipay, kay ang Diyos sa dili madugay magawala sa mga luha, kamatayon, pagminatay, paghilak, ug kasakit. Niining bahina, si apostol Juan misulat:

“Ug unya nakita ko ang usa ka bag-ong langit ug usa ka bag-ong yuta; kay ang unang langit ug ang unang yuta nahanaw na, ug ang dagat wala na. Ug nakita ko usab ang balaang siyudad, ang Bag-ong Jerusalem, nga nanaog gikan sa langit sa Diyos nga giandam ingong pangasaw-onon nga gidayandayanan alang sa iyang pamanhonon. Ug nadungog ko gikan sa trono ang usa ka dakong tingog nga nag-ingon: ‘Tan-awa! Ang puloy-anan sa Diyos anaa uban sa mga tawo, ug siya magapuyo ipon kanila, ug sila mahimong iyang katawhan. Ug ang Diyos mismo magauban kanila. Ug iyang pagapahiran ang tanang luha gikan sa ilang mga mata, ug ang kamatayon wala na, wala na usab unyay pagminatay ni paghilak ni kasakit. Kay ang unang mga butang nangagi na.’ Ug ang Usa nga naglingkod sa trono miingon: ‘Tan-awa! Ginabag-o ko ang tanang mga butang.’ Usab, siya miingon: ‘Isulat mo kini, kay kining mga pulonga kasaligan ug matuod.’”​—Pinadayag 21:1-5.

Sa susama, si apostol Pedro mipahayag: “Adunay bag-ong mga langit ug usa ka bag-ong yuta nga atong gihulat sumala sa iyang [Jehova nga Diyos] saad, ug niini magapuyo ang pagkamatarong.” (2 Pedro 3:13) Pagkadakong mga palaaboton ang anaa lamang sa unahan! Ang kinabuhi diha sa usa ka paraiso sa yuta mahimong imong malipayong pribilehiyo. (Lucas 23:43) Busa, ayaw tugoting mawad-an ka ug paglaom tungod sa presenteng adlaw nga pag-antos. Hinunoa, tan-awa ang umaabot nga masanagon. Ibutang ang imong paglaom ug pagsalig diha sa bag-ong kalibotan sa Diyos nga haduol na kaayo. Tinguhaa ang usa ka dalan nga dalawaton kang Jehova nga Diyos, ug ikaw mahimong mabuhi nga walay kataposan diha sa usa ka kalibotan nga libre gikan sa tanang pag-antos.

[Hulagway sa panid 4]

Bisag si Job nag-antos, iyang gitinguha ang usa ka dalan nga dalawaton sa Diyos

[Hulagway sa panid 7]

Ikaw mahimong mabuhi diha sa usa ka kalibotan nga libre gikan sa tanang pag-antos

[Picture Credit Line sa panid 3]

Collier’s Photographic History of the European War