Hupting Lig-on ang Imong Pagsalig Hangtod sa Kataposan
HANDURAWA ang usa ka gamay nga ayroplano nga naglupad latas sa daotang panahon. Ang piloto dili na makaila sa mga timaan sa yuta. Ang baga nga mga dag-om naglimin kaniya. Dili siya makakita saylo sa iyang salipod sa hangin, apan nakaseguro siya nga matapos niya ang iyang panaw nga luwas. Unsay katarongan sa iyang pagsalig?
Siya may tukmang mga instrumento nga makapaarang kaniya sa paglupad latas sa mga panganod ug motugpa diha sa kangitngit. Ubay sa iyang ruta, ilabina duol sa erport, ang mga suga maggiya kaniya sa elektronikanhong paagi, ug siya may kontak sa radyo sa mga nagkontrolar sa trapiko sa kahanginan dinhi sa yuta.
Sa samang paagi, makaatubang kita sa umaabot uban ang pagsalig, bisan tuod nga ang mga kahimtang sa kalibotan nagakangiob adlaw-adlaw. Ang atong panaw latas niining daotang sistema mahimong magdugay kay sa gihunahuna sa pipila, apan kita makasalig nga kita anaa sa hustong dalan ug anaa sa tukmang panahon. Nganong makaseguro kita pag-ayo? Tungod kay kita adunay giya nga makapaarang kanato sa pagmatikod kon unsay dili mamatikdan sa tawo.
Ang Pulong sa Diyos maoy usa ka ‘kahayag sa atong alagianan,’ ug kini “kasaligan, nga naghimo sa walay-kasinatian nga maalamon.” (Salmo 19:7; 119:105) Sama sa mga suga nga nagpakita sa agianan sa pagpalupad sa piloto, ang Bibliya tukmang naglaraw sa umaabot nga mga hitabo ug naghatag kanato ug tin-awng mga instruksiyon aron sa pagseguro nga kita makaabot nga luwas sa atong destinasyon. Hinunoa, aron makabenepisyo gikan sa diyosnong giya kinahanglan kitang mosalig niana.
Sa iyang sulat sa mga Hebreohanon, si Pablo nag-awhag sa Hudiyong mga Kristohanon sa ‘pagpangupot pag-ayo sa pagsalig nga ilang nabatonan sa sinugdan nga lig-on hangtod sa kataposan.’ (Hebreohanon 3:14) Ang pagsalig mahimong matarog kon wala kini ‘kupti pag-ayo.’ Busa ang pangutana motungha, Sa unsang paagi mahuptan natong lig-on ang atong pagsalig kang Jehova hangtod sa kataposan?
Ipasundayag ang Imong Pagtuo
Una makapalupad ang piloto nga dili pinaagi sa panan-aw, nga nagdepende sa bug-os sa iyang mga instrumento ug kontrol sa yuta, nagkinahanglan siya ug igong pagbansay ug daghang oras sa paglupad. Sa susama, ang usa ka Kristohanon kinahanglang magpasundayag sa iyang pagtuo aron mahuptan ang iyang pagsalig sa giya ni Jehova, ilabina sa dihang motungha ang malisod nga mga sirkumstansiya. Si apostol Pablo misulat: “Tungod kay kami aduna may espiritu sa pagtuo sama nianang mahitungod niana kini nahisulat: ‘Ako nagpasundayag ug pagtuo, busa ako namulong,’ kami usab nagapasundayag ug pagtuo ug busa kami nagapamulong.” (2 Corinto 4:13) Busa, sa diha nga kita mamulong bahin sa maayong balita sa Diyos, kita nagpasundayag ug nagpalig-on sa atong pagtuo.
Si Magdalena, kinsa migugol ug upat ka tuig sa kampong konsentrasyon panahon sa ikaduhang gubat sa kalibotan, misaysay sa bili sa kalihokang pagsangyaw: “Ang akong inahan nagtudlo kanako nga aron mahuptang lig-on ang pagtuo, kinahanglang magmahunahunaon sa espirituwal nga kaayohan sa uban. Akong nahinumdoman ang usa ka hitabo nga nag-ilustrar kon unsay among gibati. Human sa pagpagula kanamo gikan sa kampong konsentrasyon sa Ravensbrück, ang akong inahan ug ako miabot sa among balay ug Biyernes. Duha ka adlaw sa ulahi, sa Dominggo, miduyog kami sa mga igsoon sa pagsangyaw gikan sa balay ngadto sa balay. Ako hugot nga nagtuo nga kon kita motunong sa atong pagtagad sa pagtabang sa uban nga mosalig sa mga saad sa Diyos, kanang samang mga saad mahimong tinuod kanato.”—Itandi ang Buhat 5:42.
Ang paghupot nga lig-on sa atong pagsalig hangtod sa kataposan nagkinahanglan ug espirituwal nga kalihokan sa ubang natad. Ang personal nga pagtuon maoy laing ekselenteng makapalig-on-sa-pagtuo nga buluhaton. Kon atong sundogon ang mga taga-Berea ug makugihong susihon ang Kasulatan sa adlaw-adlaw, makatabang kini kanato nga “mabatonan ang bug-os nga kasegurohan sa paglaom hangtod sa kataposan.” (Hebreohanon 6:11; Buhat 17:11) Tinuod, ang personal nga pagtuon nagkinahanglan ug panahon ug determinasyon. Posible, mao kanay hinungdan kon nganong si Pablo nagpasidaan sa mga Hebreohanon mahitungod sa kapeligrohan sa pagkahimong “tapolan,” o taspokan, sa maong mga buluhaton.—Hebreohanon 6:12.
Ang usa ka taspokang tinamdan lagmit adunay dili-maayong mga sangpotanan sa daghang bahin sa kinabuhi. Si Solomon nag-ingon nga “tungod sa pagkatapolan sa mga kamot ang balay magatulo.” (Ecclesiastes 10:18) Sa madugay o sa madali ang ulan magsugod sa pagtulo sa atop nga wala atimana. Kon kita magtinapolan sa espirituwal nga paagi ug mapakyas sa paghupot sa atong pagtuo, ang mga pagduhaduha mahimong moyuhot. Sa laing bahin, ang regular nga pagpalandong ug pagtuon sa Pulong sa Diyos magpalig-on ug manalipod sa atong pagtuo.—Salmo 1:2, 3.
Pag-ugmad ug Pagsalig Pinaagi sa Kasinatian
Siyempre, ang usa ka piloto makakat-on pinaagi sa kasinatian maingon man pinaagi sa pagtuon nga ang iyang mga instrumento maoy kasaligan. Sa susama, ang atong pagsalig kang Jehova motubo sa dihang diha sa atong kaugalingong mga kinabuhi kita makakita sa pamatuod sa iyang mahigugmaong pag-atiman. Si Josue nakasinati niana, ug iyang gipahinumdoman ang iyang kaubang mga Israelinhon: “Nahibalo kamo pag-ayo sa bug-os ninyong kasingkasing ug sa bug-os ninyong mga kalag nga walay usa ka pulong nga napakyas gikan sa tanang maayong mga pulong nga gipamulong ni Jehova nga inyong Diyos kaninyo. Silang tanan nahitabo kaninyo.”—Josue 23:14.
Si Josefina, usa ka minyong igsoong babaye nga taga-Pilipinas, nakakat-on sa samang leksiyon. Siya misaysay kon unsa ang kinabuhi kaniadto sa wala pa niya mahibaloi ang kamatuoran: “Ang akong bana kaniadto maoy palainom, ug sa dihang siya mahubog, masuko siya ug suntokon ako. Ang among masulob-ong kaminyoon nag-apektar usab sa among anak lalaki. Ang akong bana ug ako parehong nagtrabaho, nga mokita ug daghang salapi, apan gisugal namo ang dakong bahin sa among suweldo. Ang akong bana daghag higala, apan kadaghanan kanila nakighigala lamang kaniya aron mobayad siya sa mga ilimnon, ug ang uban mosulay gani sa paghubog kaniya aron lamang kataw-an siya.
“Nausab ang mga hitabo sa dihang nailhan namo si Jehova ug gibutang sa kasingkasing ang iyang tambag. Ang akong bana dili na moinom, mihunong na kami sa pagpanugal, ug kami nakabaton ug matuod nga mga higala nga nahigugma ug motabang kanamo. Ang among kaminyoon maoy malipayon, ug ang among anak lalaki nagdako nga usa ka buotang bayongbayong. Mas menos na ang oras sa among pagtrabaho, apan mas daghan kami ug kuwarta. Ang kasinatian nagtudlo kanamo nga si Jehova maoy sama sa usa ka mahigugmaong Amahan, kinsa kanunayng nagtultol kanamo sa hustong direksiyon.”
Ingong resulta sa giradyo nga mga instruksiyon o sa pagsusi sa instrumento, ang mga piloto usahay makaamgo nga kinahanglan nilang tul-iron ang ilang direksiyon. Kita sa susama kinahanglang mag-usab sa direksiyon sumala sa instruksiyon ni Jehova. “Ang imong kaugalingong mga igdulongog makadungog ug usa ka pulong sa imong likod nga magaingon: ‘Kini mao ang dalan. Lumakaw kamo diha niana,’ sa inyong pagliko sa tuo o sa inyong pagliko sa wala.” (Isaias 30:21) Pinaagi sa iyang Pulong ug pinaagi sa iyang organisasyon, makadawat kita ug tambag nga magpaalinggat kanato sa espirituwal nga mga kapeligrohan. Ang usa niini adunay kalabotan sa mga kaubanan.
Ang Kaubanan Makapahisalaag Kanato
Ang usa ka gamay nga ayroplano dali rang ipadpad kon dili himoon ang gikinahanglang pagtul-id. Sa susama, ang mga impluwensiya gikan sa gawas kanunayng mohapak sa mga Kristohanon karong adlawa. Nagkinabuhi kita sa usa ka unodnon-ug-hunahunang kalibotan diin daghan ang motamay sa espirituwal nga mga sukdanan, nga nagbutang ug labawng importansiya sa salapi ug kalingawan. Gipasidan-an ni Pablo si Timoteo nga ang kataposang mga adlaw maoy “malisod sagubangon.” (2 Timoteo 3:1-5) Ang mga tin-edyer, nga nangandoyng dawaton ug mahimong popular, maoy ilabinang daling maapektahan sa daotang kaubanan.—2 Timoteo 2:22.
Si Amanda, kinsa 17 anyos ang edad, misaysay: “Sa makadiyot ang akong pagtuo naluya sa usa ka sukod gumikan sa akong mga klasmet. Kanunay silang moingon nga ang akong relihiyon mapig-oton ug dili-makataronganon, ug nagsugod kini sa pagpaluya kanako. Hinunoa, ang akong mga ginikanan nakatabang kanako sa pagsabot nga ang Kristohanong mga giya nagsilbing proteksiyon inay nga restriksiyon. Karon akong naamgohan nga kining mga prinsipyoha nakatabang kanako sa pagbaton ug mas makapatagbawng kinabuhi kay nianang sa kanhi nakong mga kauban sa tunghaan. Nakakat-on ako sa pagsalig kanilang tinuod nga nag-atiman kanako—akong mga ginikanan ug si Jehova—ug ako nagakalipay sa payunir nga pag-alagad.”
Bisan unsay atong pangedaron, makahibalag kita ug mga tawo nga mohimog mabiaybiayong mga komento mahitungod sa atong mga gituohan. Daw makinaadmanon silang tan-awon, apan sa Diyos sila maoy pisikal, dili espirituhanon. (1 Corinto 2:14) Ang usa ka impluwensiyal nga pundok sa Corinto sa adlaw ni Pablo mao ang makinaadmanon-sa-kalibotan nga mga Maduhaduhaon. Ang mga pagtulon-an niining maong mga pilosopo lagmit mitultol sa pipila ka Kristohanon sa Corinto nga mawad-an sa ilang pagtuo sa pagkabanhaw. (1 Corinto 15:12) “Ayaw pagpahisalaag,” mipasidaan si apostol Pablo. “Ang daotang pakig-uban nagadaot sa mapuslanong mga batasan.”—1 Corinto 15:33.
Sa laing bahin, ang maayong mga kauban makapalig-on kanato sa espirituwal. Sulod sa Kristohanong kongregasyon, aduna kitay kahigayonan sa pagpakighugoyhugoy sa katawhan nga nagkinabuhing matinuohon. Si Norman, usa ka igsoon nga nakakat-on sa kamatuoran niadtong 1939, maoy tinubdan gihapon sa dakong pagdasig sa tanan. Unsay nagpalantip sa iyang espirituwal nga panglantaw? “Ang mga tigom ug suod nga mga pakighigala sa matinumanong mga igsoon mahinungdanon,” siya mitubag. “Kining matanga sa pakig-uban nakatabang kanako nga tin-awng makakita sa kalainan tali sa organisasyon sa Diyos ug ni Satanas.”
Ang Malimbongong Gahom sa Bahandi
Si Brian, usa ka eksperyensiyadong piloto, misaysay nga ang “usa ka piloto usahay malisdan sa pagtuo sa iyang mga instrumento—tungod lamang kay ang iyang mga kinaiyahan dili mouyon. Ang eksperyensiyadong militaryong mga piloto nasayran nga mopalupad sa ayroplano nga balit-ad tungod kay ang mga suga sa yuta sama gayong bituon tan-awon—bisan tuod nga lahi ang gipakita sa ilang mga instrumento.”
Sa susama, ang atong hakog nga mga kinaiyahan makalimbong kanato sa espirituwal nga diwa. Si Jesus nag-ingon nga ang mga bahandi adunay “malimbongong gahom,” ug si Pablo nagpasidaan nga ‘ang gugma sa salapi nagpahisalaag sa daghan gikan sa pagtuo.’—Marcos 4:19; 1 Timoteo 6:10.
Sama sa malimbongong nagkidlapkidlap nga mga suga, ang magilakong materyalistikanhong mga tumong makapunting kanato sa sayop nga direksiyon. Inay magmaya sa “pagdahom sa mga butang nga gilaoman,” kita mahisalaag pinaagi sa mapagawalong pagpasundayag sa kalibotan nga lumalabay lamang. (Hebreohanon 11:1; 1 Juan 2:16, 17) Kon kita “determinado” nga makabaton ug adunahang estilo sa kinabuhi, lagmit diyutay na lang ang atong panahon nga nahibilin alang sa espirituwal nga pag-uswag.—1 Timoteo 6:9; Mateo 6:24; Hebreohanon 13:5.
Usa ka batan-ong minyong lalaki nga ginganlag Patrick miangkon nga siya ug ang iyang asawa misakripisyo sa espirituwal nga mga tumong aron makapahimulos ug mas maayong sukdanan sa pagkinabuhi. Siya misaysay: “Kami naimpluwensiyahan nianang anaa sa kongregasyon nga adunay mahalong mga kotse ug maluhong mga balay. Bisan tuod wala mahanaw kanamo ang paglaom sa Gingharian, among gibati nga maayong magkinabuhi kami nga haruhay. Hinunoa, ngadtongadto among naamgohan nga ang tinuod nga kalipay modangat pinaagi sa pag-alagad kang Jehova ug gumikan sa pag-uswag sa espirituwal. Karon ang among mga kinabuhi sa makausa pa maoy yano. Among gimenosan ang among oras sa pagtrabaho, ug kami nahimong mga regular payunir.”
Ang Pagtuo Nagdepende sa Madinawatong Kasingkasing
Ang usa ka madinawatong kasingkasing aduna usab ing hinungdanong bahin sa pag-ugmad ug pagsalig kang Jehova. Tinuod, “ang pagtuo mao ang may katinoan nga pagdahom sa mga butang nga gilaoman, ang tataw nga pagpanghimatuod [o, “makapadaning ebidensiya,” potnot] sa mga katinuoran bisan tuod wala makita.” (Hebreohanon 11:1) Apan gawas kon aduna kitay madinawaton nga kasingkasing, kuli kitang madani. (Proverbio 18:15; Mateo 5:6) Tungod niining katarongana si apostol Pablo nag-ingon nga “ang pagtuo dili man panag-iya sa tanang katawhan.”—2 Tesalonica 3:2.
Nan, sa unsang paagi mahuptan nato ang atong kasingkasing nga madinawaton nianang tanang makapadaning mga ebidensiya? Pinaagi sa pag-ugmad sa diyosnong mga hiyas, mga hiyas nga magpalambo ug magpalihok sa atong pagtuo. Si Pedro nagdasig kanato nga ‘ipuno sa atong pagtuo ang pagkahamili, kahibalo, pagpugong-sa-kaugalingon, pag-agwanta, diyosnong pagkamahinalaron, inigsoong pagbati, ug gugma.’ (2 Pedro 1:5-7; Galacia 5:22, 23) Sa laing bahin, kon kita magkinabuhi nga mahunahunaon sa kaugalingon o ihatag kang Jehova ang diyutay lamang nga pag-alagad, dili kita makataronganong makadahom nga motubo ang atong pagtuo.
Si Esdras “nag-andam sa iyang kasingkasing” sa pagbasa sa Pulong ni Jehova ug sa pagpadapat niana. (Esdras 7:10) Si Miqueas sa susama may madinawatong kasingkasing. “Mahitungod kanako, ako magalantaw kang Jehova. Ako magahulat sa Diyos sa akong kaluwasan. Ang akong Diyos magapamati kanako.”—Miqueas 7:7.
Si Magdalena, nga unang gikutlo, naghulat usab nga mapailobon kang Jehova. (Habacuc 2:3) Siya miingon: “Aduna na kitay espirituwal nga paraiso. Ang ikaduhang ang-ang, ang pisikal nga Paraiso, moabot sa dili madugay. Sa kasamtangan gatosan ka libo ang miduyog sa dakong panon. Nakapalipay kanako ang pagkakita nga daghan kaayo ang nagpanon sa organisasyon sa Diyos.”
Pagsalig sa Diyos sa Atong Kaluwasan
Ang paghupot nga lig-on sa atong pagsalig hangtod sa kataposan nagkinahanglan ug pagpasundayag sa atong pagtuo ug pagpamati pag-ayo sa giya nga atong madawat gikan kang Jehova ug sa iyang organisasyon. Takos gayod kini sa paningkamot. Ang usa ka piloto mobati ug halalom nga katagbawan sa dihang human sa usa ka dugay, malisod nga panaw, siya mopaubos ug sa kataposan mogawas sa mabaga nga dag-om. Gibuklad sa iyang atubangan ang yuta—berde ug maabiabihon. Ang runway sa erport anaa sa ubos, nga nagpaabot sa pagdawat kaniya.
Usa ka kulbahinam nga kasinatian ang naghulat usab kanato. Kining mangiob, daotang kalibotan moiway alang sa usa ka bag-ong yuta sa pagkamatarong. Usa ka balaang pag-abiabi ang nagpaabot kanato. Makaabot kita didto kon atong sundon ang mga pulong sa salmista: “Ikaw mao ang akong paglaom, Oh Soberanong Ginoong Jehova, ang akong pagsalig sukad sa akong pagkabatan-on. . . . Kanimo kanunay akong magadayeg.”—Salmo 71:5, 6.