SAKAYANG GINAORAN

Usa ka taas, dili habog, hiktin nga sakayan nga gipadagan pinaagi sa usa o kapin pang mga bugsay nga naglumbay ug pangunang gigamit alang sa pagpakiggubat diha sa dagat.

Si Isaias naghulagway sa mga molupyo sa Jerusalem nga nag-ingon: “Didto, ang Halangdong Usa, si Jehova, alang kanato maoy usa ka dapit sa mga suba, sa halapad nga mga kanal. Ibabaw niini walay panon sa mga sakayang ginaoran [sa literal, panon sa mga barko nga ginaoran] nga motadlas, ug walay halangdong barko nga moagi diha niana. Kay si Jehova mao ang atong Maghuhukom, si Jehova mao ang atong Maghahatag-lagda, si Jehova mao ang atong Hari; siya mismo magluwas kanato.” (Isa 33:​21, 22) Ang Jerusalem walay dagkong mga suba o mga kanal ingong depensa batok sa pag-atake. Bisan pa niana, maingon nga gipanalipdan sa mga suba ug mga kanal ang mga siyudad sama sa Babilonya ug No-amon (Nah 3:8), panalipdan usab ni Jehova ang Jerusalem. Hilabihan ka gamhanan kini nga “mga suba” sa Diyos nga naghatag ug kaluwasan, nga tungod niana ang lig-ong kasundalohan sa kaaway, nga gisimbolohan sa usa ka panon sa mga sakayang ginaoran o sa usa ka halangdong barko, maguba diha sa gamhanang “katubigan” kon sila mosulong batok sa Jerusalem. Busa, sa mahulagwayong paagi, si Jehova nga nagmando ingong Hari sa Jerusalem nagpasalig sa seguridad niini ubos sa depensa nga iya mismong itagana alang sa kaluwasan niini.