Samag mga Dulon Lamang

NAKASULAY ka ba sa paglakaw diha sa kasagbotan sa panahon sa ting-init ug nakakitag daghan kaayong dulon nga nagluksolukso palayo sa imong dalan? Maorag anaa sila bisan asa, bisag wala kaayo nimo kini tagda. Gawas pa, daw dili sila makadaot ug walay-bili.

Bisan pa, ang kawalay-bili sa mga dulon naghimo kanilang haom nga simbolo sa katawhan. Bisag isipon sa pipila ka prominenteng tawo ang ilang kaugalingon nga importante kaayo, ang atong Maglalalang lahi ug hunahuna. Ang iyang propeta nga si Isaias miingon: “Adunay Usa nga nagapuyo ibabaw sa sirkulo sa kalibotan, ang mga pumoluyo niini sama sa mga dulon.”​—Isaias 40:22.

Ang kahalangdon, gahom, ug kaalam ni Jehova nga Diyos nagpataas kaniya ibabaw sa gingharian sa yanong katawhan, sama nga ang tawo mas labaw sa dulon sa kinaadman ug gahom. Apan, ang kinalabwang hiyas sa Diyos mao ang gugma. Ug ang iyang dili-matumbasan nga gugma nagapalihok kaniya sa pagmatikod kanato, sa pagtabang kanato, ug sa pagluwas kanato​—kon ato siyang higugmaon ug sundon. Si Jehova nakiglabot kanato nga mahigugmaon, bisag sama kita sa walay-bili nga mga dulon. Ang salmista miingon: “Kinsa ba ang sama kang Jehova nga atong Diyos, siya nga nagapuyo sa kahitas-an? Iyang gipaubos ang iyang kaugalingon aron sa pagtan-aw sa mga butang nga atua sa langit ug sa yuta, nga nagabangon sa kabos gikan sa abog.”​—Salmo 113:5-7.

Ingon sa gibatbat niining salmoha, si Jehova mahigugmaong nagatabang sa mga kabos. Oo, Iyang tabangan kadtong mapainubsanon nga ‘mangita sa Diyos aron sila makakaplag gayod kaniya.’ (Buhat 17:27) Kadtong nakakaplag sa Diyos​—ug nagaalagad kaniya​—mahimo ganing bililhon sa iyang mga mata. (Itandi ang Isaias 43:4, 10.) Sa ingon ang ubos nga dulon nagsilbing pahinumdom kanato sa atong pagkawalay-bili ug sa gugma sa atong labing gamhanang Maglalalang, nga nagahatag sa masinugtanong katawhan sa iyang pagkahigala ug sa dili-takos nga kalulot. Ikaw ba nagapakitag apresasyon sa gugma sa Diyos?